22/05/2026
ကိုယ်ပိုင်အရေးပေါ်ရန်ပုံငွေကို ဘာကြောင့် လိုအပ်တာလဲ ?
ကျွန်တော်တို့ရဲ့နေ့စဉ်ဘဝမှာ မမျှော်လင့်ထားတဲ့ကိစ္စတွေက ဘယ်အချိန်မဆို ဖြစ်လာနိုင်ပါတယ်။ ကျန်းမာရေးမကောင်းတာ၊ အလုပ်အကိုင်အပြောင်းအလဲဖြစ်တာ၊ ရုတ်တရက် ငွေကြေးလိုအပ်လာတာမျိုးတွေ ကြုံရတဲ့အခါ ကျွန်တော်တို့ကို ငွေကြေးအရ အကာအကွယ်ပေးနိုင်မယ့်အရာကတော့ “အရေးပေါ်ရန်ပုံငွေ(𝐄𝐦𝐞𝐫𝐠𝐞𝐧𝐜𝐲 𝐅𝐮𝐧𝐝)”ပဲ ဖြစ်ပါတယ်။
အရေးပေါ်ရန်ပုံငွေအကြောင်းကို နားလည်လွယ်အောင် အောက်ပါအချက် (၃) ချက်နဲ့ လေ့လာကြည့်ရအောင်…
၁။ အရေးပေါ်ရန်ပုံငွေဆိုတာ ဘာလဲ?
အရေးပေါ်ရန်ပုံငွေဆိုတာ နေ့စဉ်သုံးစွဲငွေ(သို့မဟုတ်)စုဆောင်းငွေတွေနဲ့ သီးသန့်ခွဲထုတ်ထားပြီး တကယ့်အရေးပေါ်အခြေအနေ (မဖြစ်မနေငွေကြေးလိုအပ်တဲ့အချိန်)မှသာ ထုတ်သုံးဖို့ စုဆောင်းထားတဲ့ ငွေကြေးဖြစ်ပါတယ်။ သတိထားဖို့က ဖုန်းအသစ်လဲချင်လို့၊ ခရီးသွားချင်လို့ သို့မဟုတ် လျှော့ဈေးပစ္စည်းတွေ ဝယ်ချင်လို့ သုံးစွဲရမယ့်ငွေကြေးမျိုး မဟုတ်ပါဘူး။
၂။ ငွေကြေးကို ဘယ်လောက်အထိစုဆောင်းထားသင့်သလဲ?
ငွေကြေးပညာရှင်တွေရဲ့ အကြံပြုချက်အရ အနည်းဆုံး မိမိရဲ့ (၃)လစာကနေ (၆)လစာအထိ ရှိတဲ့ လစဉ်ကုန်ကျစရိတ်အတိုင်း စုဆောင်းထားသင့်ပါတယ်။ ဥပမာအားဖြင့် သင့်ရဲ့ တစ်လတာ မဖြစ်မနေ ကုန်ကျစရိတ် (စားစရိတ်၊ အိမ်လခ၊ အသုံးစရိတ်) က (၅)သိန်းကျပ်ဆိုရင် သင့်မှာ အနည်းဆုံး(၁၅)သိန်းမှ သိန်း(၃၀)အထိ အရေးပေါ်ရန်ပုံငွေအဖြစ် သီးသန့်ရှိနေရမှာ ဖြစ်ပါတယ်။
၃။ အရေးပေါ်ရန်ပုံငွေရှိခြင်းရဲ့ ကောင်းကျိုးများ
• စိတ်အေးချမ်းမှုရခြင်း- မမျှော်လင့်ဘဲ ငွေကြေးအခက်အခဲကြုံလာရင်တောင် မိမိမှာ စုဆောင်းငွေအကာအကွယ်ရှိနေတဲ့အတွက် စိုးရိမ်သောကကင်းဝေးစေပါတယ်။
• အတိုးများများနဲ့ ချေးငွေရယူဖို့ မလိုအပ်ခြင်း: ငွေကြေးလိုအပ်တဲ့အချိန်မှာ တခြားသူဆီက အတိုးနှုန်းကြီးကြီးနဲ့ ချေးငှားရတာမျိုးကို မရွေးချယ်မိအောင် တားဆီးပေးပါတယ်။
• အနာဂတ်ပန်းတိုင်များကို မထိခိုက်ခြင်း: သားသမီးပညာရေး(သို့မဟုတ်)စီးပွားရေးလုပ်ဖို့ စုထားတဲ့ ရေရှည်စုဆောင်းငွေတွေကို ကြားထဲက ထုတ်ယူသုံးစွဲစရာမလိုတော့ပါဘူး။
အကြံပြုချက်
• လစဉ်ကုန်ကျစရိတ်ကို တွက်ချက်ပါ။ မိမိတစ်လကို တကယ့်မရှိမဖြစ်လိုအပ်တဲ့အခြေခံကုန်ကျစရိတ်ဘယ်လောက်ရှိလဲဆိုတာ အရင်ဆုံး စာရင်းပြုလုပ်ပါ။
• ပန်းတိုင်သတ်မှတ်ပါ။ (၃)လစာစာရင်းကို ပထမဆုံးအဖြစ် သတ်မှတ်ပြီး စုဆောင်းပါ။
• သီးသန့်ခွဲထားပါ။ အရေးပေါ်ရန်ပုံငွေကို သာမန်အသုံးပြုနေကျဘဏ်အကောင့်ထဲမှာ မထားဘဲ ထုတ်ရလွယ်ကူပြီး သီးသန့်အကောင့်တစ်ခုခုမှာ စုဆောင်းထားပါ။
ငွေကြေးစီမံခန့်ခွဲမှုဆိုင်ရာ သိကောင်းစရာအကြောင်းအရာများကို အသင်းဝင်များအားလုံး အကျိူးရှိစေရန်အတွက် အလိုင်းရင့်စ်ကုမ္ပဏီ၏ 𝐅𝐚𝐜𝐞𝐛𝐨𝐨𝐤 𝐏𝐚𝐠𝐞, 𝐓𝐞𝐥𝐞𝐠𝐫𝐚𝐦နှင့် 𝐕𝐢𝐛𝐞𝐫 𝐂𝐡𝐚𝐧𝐧𝐞𝐥များကို 𝐅𝐨𝐥𝐥𝐨𝐰 & 𝐒𝐮𝐛𝐬𝐜𝐫𝐢𝐛𝐞လုပ်ထားပြီး ဝင်ရောက်ကြည့်ရှုလေ့လာနိုင်ရန် ဖိတ်ခေါ်အပ်ပါသည်။
