29/05/2026
ທະນາຄານ ມາຣູຮານ ເຈແປນ ລາວ ຈຳກັດ ເຂົ້າຮ່ວມພິທີປິດໂຄງການເຂົ້າເຖິງແຫຼ່ງທຶນຂອງຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ເພື່ອຮັບມືກັບຜົນກະທົບ ແລະ ຟື້ນຟູຈາກໂຄວິດ-19 (MSME A2F-ESR)
ໃນຕອນບ່າຍຂອງວັນທີ 28 ພຶດສະພາ 2026 ທີ່ຜ່ານມາ, ທະນາຄານ ມາຣູຮານ ເຈແປນ ລາວ ຈຳກັດ ຕາງໜ້າໂດຍຫົວໜ້າພະແນກບໍລິການສິນເຊື່ອລາຍຍ່ອຍ (Retail) ໄດ້ເຂົ້າຮ່ວມພິທີປິດໂຄງການເຂົ້າເຖິງແຫຼ່ງທຶນຂອງຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ເພື່ອຮັບມືກັບຜົນກະທົບ ແລະ ຟື້ນຟູຈາກໂຄວິດ-19 (MSME A2F-ESR) ພາຍໃຕ້ການເປັນປະທານຂອງທ່ານ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ.
ໃນໂອກາດດັ່ງກ່າວ, ທ່ານ ນາງ ມະນີວອນ ວົງໄຊ, ຫົວໜ້າກົມສົ່ງເສີມຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ໄດ້ກ່າວສະເໜີສະຫຼຸບວ່າ: ໂຄງການ MSME A2F-ESR ເປັນໂຄງການເງິນກູ້ຢືມດອກເບ້ຍຜ່ອນຜັນທີ່ໄດ້ຮັບການສະໜັບສະໜູນຈາກທະນາຄານໂລກ ມູນຄ່າ 40 ລ້ານໂດລາສະຫະລັດ ໂດຍມີໄລຍະການຈັດຕັ້ງປະຕິບັດ 5 ປີ (ປີ 2021–2025) ເຖິງຢ່າງໃດກໍ່ຕາມ, ເນື່ອງຈາກປັດໄຈຫຼາຍດ້ານທີ່ສົ່ງຜົນໃຫ້ກິດຈະກຳຕ່າງໆຂອງໂຄງການເກີດຄວາມລ່າຊ້າ, ລັດຖະບານແຫ່ງ ສປປ ລາວ ແລະ ທະນາຄານໂລກ ຈຶ່ງໄດ້ຕົກລົງຮ່ວມກັນຂະຫຍາຍໄລຍະເວລາການຈັດຕັ້ງປະຕິບັດໂຄງການອອກໄປອີກ 6 ເດືອນ ຈາກວັນທີ 28 ພະຈິກ 2025 ເປັນວັນທີ 28 ພຶດສະພາ 2026. ມາຮອດປັດຈຸບັນ, ໂຄງການດັ່ງກ່າວໄດ້ສຳເລັດການຈັດຕັ້ງປະຕິບັດ ແລະ ບັນລຸຕາມເປົ້າໝາຍທີ່ວາງໄວ້ຢ່າງຄົບຖ້ວນ.
