07/09/2026
LaoVietBank ສາຂາອຸດົມໄຊ ລົງພື້ນທີ່ມອບເຄື່ອງອຸປະໂພກ-ບໍລິໂພກ ຊ່ວຍເຫຼືອປະຊາຊົນຜູ້ປະສົບກັບໄພພິບັດທຳມະຊາດ ນ້ຳຖ້ວມ, ນໍ້າປ່າໄຫຼຊຸ
ໃນວັນທີ 5 ກັນຍາ 2026, ທະນາຄານ ຮ່ວມທຸລະກິດ ລາວ-ຫວຽດ ຈຳກັດ (LaoVietBank) ສາຂາອຸດົມໄຊ ໄດ້ລົງພື້ນທີ່ຢ່າງທັນສະພາບການ ເພື່ອຊ່ວຍເຫຼືອ ແລະ ບັນເທົາທຸກໃນເບື້ອງຕົ້ນ ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດທຳມະຊາດ ນ້ຳຖ້ວມ, ນໍ້າປ່າໄຫຼຊຸ ໃນຄັ້ງວັນທີ 30 ສິງຫາ ທີ່ຜ່ານມາ.
ໃນໂອກາດນີ້, ນຳໂດຍ ທ່ານ ຫງວຽນ ແທັງ ເຟືອງ ຫົວໜ້າທະນາຄານຮ່ວມທຸລະກິດ ລາວ-ຫວຽດ ຈຳກັດ ສາຂາອຸດົມໄຊ ພ້ອມດ້ວຍທີມງານ ແລະ ຕາງໜ້າການນຳເມືອງ ນຳໂດຍ ທ່ານ ສົມຈັນ ເທບພາລີ ຮອງເລຂາພັກເມືອງ, ປະທານ ຄະນະກຳມະການປົກຄອງເມືອງໄຊ ພ້ອມດ້ວຍທີມງານໄພພິບັດຂັ້ນເມືອງ, ໄດ້ນຳເອົາເຄື່ອງອຸປະໂພກ-ບໍລິໂພກ ທີ່ຈຳເປັນລົງມອບ-ຮັບ ໃຫ້ແກ່ປະຊາຊົນ ເຊິ່ງປະກອບມີ: ເຂົ້າສານ, ໝີ່, ປາກະປ໋ອງ, ໄຂ່, ເກືອ, ແປ້ງນົວ, ໝາກເຜັດແຫ້ງ, ຫົວຜັກບົວ, ຫົວຜັກທຽມ ພ້ອມດ້ວຍນໍ້າດື່ມຂະໜາດ 20 ລິດ ແລະ 1.5 ລິດ ລວມມູນຄ່າທັງໝົດ 22,000,000 ກີບ. ໂດຍໄດ້ມາມອບໃຫ້ ປະຊາຊົນ ໃນ 3 ບ້ານຄື: ບ້ານບໍ່ 3 ຄອບຄົວ, ບ້ານຫົວນ້ຳບາກ 27 ຄອບຄົວ (ຄອບຄົວປະເພດ 2) ແລະ ບ້ານນາງິ້ວ 4 ຄອບຄົວ ທີ່ປະສົບໄພພິບັດທຳມະຊາດໃນຄັ້ງນີ້. ການຊ່ວຍເຫຼືອໃນຄັ້ງນີ້ ແມ່ນເພື່ອເປັນການແກ້ໄຂສະຖານະການສຸກເສີນ ແລະ ບັນເທົາຄວາມຫຍຸ້ງຍາກໃຫ້ແກ່ປະຊາຊົນໃນພື້ນທີ່.
ຕໍ່ກັບສະພາບການດັ່ງກ່າວ, ພາກສ່ວນທີ່ກ່ຽວຂ້ອງຈະສືບຕໍ່ຕິດຕາມສະຖານະການຢ່າງໃກ້ຊິດ, ປະເມີນຄວາມເສຍຫາຍ ແລະ ປະສານງານເພື່ອໃຫ້ການຊ່ວຍເຫຼືອແກ່ປະຊາຊົນໃນບັນດາບ້ານທີ່ໄດ້ຮັບຜົນກະທົບໃນຂັ້ນຕໍ່ໄປ. LaoVietBank ຂໍສົ່ງກຳລັງໃຈ ພ້ອມທັງຄຽງຂ້າງປະຊາຊົນໃນທຸກສະຖານະການ ເພື່ອຮ່ວມກັນຜ່ານຜ່າອຸປະສັກ ແລະ ຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ.
____________
ທະນາຄານ ຮ່ວມທຸລະກິດ ລາວ - ຫວຽດ ຈໍາກັດ
｟ຂົວຕໍ່ແຫ່ງຜົນສໍາເລັດ｠
☎️ Hotline: 1440
ⓕ Lao Viet Bank
🌐 laovietbank. com. la
