29/10/2026
人愈長壽，最驚嘅可能唔係無錢，而係有事嗰陣，究竟邊個幫你？
事緣最近小編真係好苦惱，因為屋企有位69歲長輩，早前因為糖尿腳入院，治療期間又出現急性腎衰竭。家人都擔心係咪同用藥有關，仲需要進一步了解。
但最令小編頭痛嘅，其實係佢之後點生活。
無兒無女，積蓄唔多，唯一比較值錢嘅就係一層舊唐樓。偏偏行動開始不便，住唐樓日日上落樓梯，對佢嚟講真係好地獄。
一直照顧佢嘅，係一位只比佢細三歲、今年66歲嘅家人。兩個人相依為命，一個病咗，另一個就要頂住所有嘢。
但如果有一日，照顧人嗰個都病埋呢？
小編近年接觸唔少樂齡朋友，發現大家好關心長生津、退休金、醫療保險，但有樣嘢真係好容易忽略：我哋可能長命到90歲，但未必可以自己照顧自己到90歲。
尤其係單身、無仔女，又或者兩老相依為命嘅哥哥姐姐，有幾樣嘢真係要趁自己仲健康，早啲安排。
🏠 有樓，唔代表適合住到老。 唐樓無升降機，後生行幾層樓梯無問題，但當你要用拐杖、輪椅，甚至每星期要返醫院覆診，層樓隨時由資產變成負擔。
💰 有資產，唔代表有錢照顧自己。 層樓可能值幾百萬，但戶口得幾萬蚊，請人照顧、買輔助用品、搬屋，樣樣都要現金。
👥 有人照顧，唔代表永遠有人照顧。 特別係兩個長者互相照顧，如果其中一個先倒下，另一個未必頂得住。
仲有一樣，小編覺得更加重要：如果突然入院，邊個知道你食緊咩藥？邊個有你嘅重要文件？如果有日自己無能力處理財務同醫療決定，又有無預先安排？
其實香港有醫務社工、家居照顧服務、長者社區照顧服務券等支援，可以按個別情況評估同轉介，未必所有嘢都要自己處理。
講真，寫呢篇唔係想嚇大家，而係小編自己屋企真係遇到，先發現原來以前覺得好遙遠嘅問題，可以突然間殺到埋身。
長壽當然係福氣，但點樣有尊嚴咁老去，真係要趁早諗。
特別係無兒無女、單身、獨居嘅哥哥姐姐，小編好想問你一句：
如果聽日突然入院，你第一個會打電話俾邊個？
#樂齡見習生 #獨居長者 #單身退休 #長者照顧 #雙老家庭 #退休規劃 #居家安老 #長者社區照顧 #香港退休 #銀髮生活
