樂齡見習生, Hong Kong (2026)

13/09/2026

今日出街見到「友智識」長者數碼共融宣傳，有自學平台、有課程、有流動服務站，表面睇資源都幾齊。

但小編企喺度望住張單張，第一個反應係：真正唔識用手機嗰班老友記，佢哋自己點樣搵到？點樣報名？又點樣學？
派宣傳單位哥仔同姨姨得過「派」字，又唔教人點登入。。。。

上個 post 講完中大免費 AI 班，已經收到唔少哥哥姐姐誤會咗，可以message 我哋報名。😓😓😓

如果連報名都要搵人幫，咁你叫佢自己掃 QR code、撳 link、填 form、收 email、再確認上堂，真係非常咁離地。

長者學科技，最難唔係 AI，而係第一步有冇人肯陪佢哋行。

你屋企長者最想學咩？手機安全？智方便？醫健通？防騙？AI？

留言話小編知，我哋真係會睇。

#樂齡見習生 #友智識 #數碼共融 #長者學手機 #智方便 #醫健通 #防騙意識 #銀髮生活

11/09/2026

🌕 **今年中秋，不如親手編一份好意頭。**
《樂齡見習生》今次又搞啲新嘢 😆
9月19日，我哋會第一次舉辦
**「中秋幸運五行手機繩工作坊」** 🧵✨
唔識五行？唔識手作？
**完全唔緊要。**
今次唔係算命，亦唔使睇八字。
我哋只係借用中國傳統「木、火、土、金、水」五種元素，幫大家諗一諗：
最近嘅自己，最想多一點甚麼？
🌳 **木｜活力、成長、順暢**
🔥 **火｜快樂、熱情、好人緣**
🪨 **土｜安心、穩定、踏實**
✨ **金｜清晰、順利、果斷**
💧 **水｜智慧、從容、順遂**
揀好自己嘅「心願」，再親自揀顏色、配珠仔、學編繩，最後完成一條屬於自己嘅 **幸運五行手機繩**。
可以整俾自己，亦可以趁中秋親手整俾老伴、仔女或者孫仔孫女。
有時一份禮物最珍貴嘅地方，真係唔係價錢，而係：
**「呢條係我親手整俾你㗎。」❤️**
當日每位參加者仲會有一張
🎁 **「五行心願幸運卡」**
記低自己今個中秋最想實現嘅一個小心願。
📅 **日期｜2026年9月19日（星期六）**
⏰ **時間｜下午2:00–5:00**
📍 **地點｜伊利沙伯體育館**
💰 **費用｜$50／位**
👥 **名額｜只限40位**
✅ 零手作經驗都可以
✅ 現場有導師及義工逐步教
✅ 材料全部提供
✅ 完成後作品可以帶走
名額只有40個，額滿就真係要等下次啦。
有興趣嘅哥哥姐姐、朋友仔，歡迎 Inbox 我哋報名留位 🙌🏼
#樂齡見習生 #中秋活動 #五行手機繩 #手作工作坊 #樂齡活動 #中秋節 #香港長者活動 #手機繩 #退休生活 #老友記活動

09/09/2026

尋晚睇到《日落下的彩虹》原本以為只係講下彩虹邨就嚟拆、賣下懷舊嗰啲。

點知睇落先發現，根本唔係搬邨咁簡單。
呢一集係講，阿媽一手湊大幾個仔女，去到要分戶安排嗰陣，每個人都有自己理由。有人覺得自己一直照顧屋企，想俾屋企人知道自己有好大付出，有人有自己家庭壓力；有人出錢，有人出力；有人覺得公平，有人覺得偏心。最慘係阿媽，其實佢想要嘅未必係點樣分得最公平，而係一家人唔好為咗呢啲事反面，要齊齊整整。

現實就係，一講到樓、一講到錢、一講到邊個照顧邊個，幾親嘅人都會開始計數。

小編睇到呢度，其實好有Feel。
近年做樂齡市場，真係見過太多類似情況。
層樓邊個名？
爸爸走咗之後啲文件有冇搞清楚？
邊個同阿媽住？
邊個有公屋，邊個驚影響資格？
邊個出錢，邊個出力？
第時真係要分，係咪個個心服口服？

呢啲嘢平時無人想講，因為一講就尷尬，一講就好似自己好計較。但唔講，又唔代表問題唔存在。好多香港家庭，就係拖到真係有事、真係要搬、真係要用錢嗰陣，先發現原來成家人對件事嘅理解完全唔一樣。
所以小編成日覺得，樂齡市場唔係齋講產品咁簡單。

講真，處理呢啲個案好花時間，亦唔係每次都有即時答案。有啲位要問政府部門，有啲位要問律師，有啲位要家人自己傾清楚。小編可以做嘅，未必係即刻幫你解決所有問題，但至少可以先幫你將件事睇清楚。

《日落下的彩虹》都幾好睇，唔係因為佢好戲劇化，而係因為佢太似香港好多家庭。平時無事大家食飯飲茶，一到講樓、講錢、講照顧，就失感情。

小編唔敢評論，一家人邊個啱邊個錯。仔女有仔女壓力，老人家有老人家擔心，照顧嗰個未必想邀功，無照顧嗰個又未必完全無苦衷。但最怕係，大家都覺得自己有道理，最後無人願意坐低講清楚。

如果屋企有長者，牽涉錢、物業、
趁大家仲傾到，早少少拎出嚟講，可能尷尬只係一時。但拖到最後先爆，可能傷嘅就係一家人。
講錢傷感情。

有需要可以留言或 inbox 小編。
有時只係坐低傾一次，先會知道屋企原來有幾多嘢一直無整理。

涉及法律、遺產、物業業權、公屋資格或者政府津貼申請，當然要再向相關專業人士或官方機構查清楚。但第一步，真係要先知道自己屋企盤數亂喺邊。

#樂齡見習生 #日落下的彩虹 #彩虹邨 #香港家庭 #退休生活 #長生津 #物業安排 #遺產承辦 #家庭溝通 #照顧者 #香港退休 #銀髮生活

08/09/2026

60歲以上免費 AI 課程？聽落就好正，但真正需要嗰班老友記，究竟入唔入到場先？🤔

最近見到中文大學賽馬會老年學研究所，9月有三個免費長者數碼科技課程，內容包括 AI 健康管理、智慧移動與機器人、多媒體創作。

免費、大學機構、又有賽馬會老年學研究所名銜加持，第一眼連小編都想報。

但老老實實，小編睇完個名額同內容，即刻反白眼。。。🙄

三個課程，每個課程得20個位，加埋都只係60人。香港咁多60歲以上長者，成日講數碼共融、長者學AI，最後一班得20個位，真係幫到幾多人？

更加現實係，報名要網上先到先得。真正識㩒 link、掃 QR Code、填網上表格、收 email、再回覆確認嘅長者，其實好多都已經唔算最需要幫嗰批。最唔識嗰班，可能連點樣報名都未搞得掂。

小編唔係話呢啲課程唔好，免費課程，同內容都相當唔錯，但如果以長者數碼教育為入口，本身就要你有一定數碼能力先入到，咁件事就真係堅離地。😅

講返資料，今次9月有三個課程可以報：

📌 第一個係「數碼健康管理實務：AI與自助工具」，9月21日上午10時開始網上報名，內容包括醫健通、AI健康自助工具、健康自查、記錄症狀同搜尋社區醫療資源。

📌 第二個係「智慧移動與機器人：未來生活新體驗」，9月23日上午10時開始網上報名，內容包括自動駕駛、家居機器人，亦會有戶外參觀。

📌 第三個係「創意數位故事：多媒體編輯與分享」，9月28日上午10時開始網上報名，內容包括 Canva、CapCut、相片影片編輯，同埋點樣安全分享到雲端同社交平台。

三個課程都係免費，每班20位，對象係60歲或以上、具備基本資訊科技知識嘅長者，亦要自備智能手機。報名只接受網上報名，先到先得。成功入選後，開課前約一星期會收到電郵通知，仲要記得回覆確認，否則有機會當你放棄。

所以有興趣嘅老友記，真係要搵屋企人幫手準備定。唔好等到報名當日先慢慢搵條 link、慢慢研究點填表，因為20個位真係好快滿。⏰

但講到尾，小編最想講嘅唔係「大家快啲去搶位」。

而係想問一句：長者學科技，點解成日要由最識科技嗰批人先成功報到名？？？

超級反智‼️‼️

真正零基礎嗰班，可能連手機字太細都睇唔清，驗證碼收唔到已經唔知點算，見到 email 確認更加頭痛。

你叫佢學 AI、Canva、CapCut，壯年人都未必識，但佢第一步可能只係想有人慢慢教：部手機到底點樣先用得安全。

如果今次有 follower 成功報到名，麻煩留言同小編講聲。小編真係想知，20個位先到先得，到底有幾多真正老友記報得到。🙋🏻‍♂️

如果你之後完成課程，又可以證明真係有上堂同完成，小編私人送出小禮物一份，當係支持你繼續學新嘢。唔係抽獎，唔係官方活動，純粹小編想鼓勵願意踏出第一步嘅老友記。🎁

樂齡見習生之後都會繼續搞更貼地嘅 AI 基礎班。唔講好高深，但最少做到幾樣嘢：

✅ 字一定夠大
✅ 步驟一定簡單
✅ 問題可以問到明

唔需要大家變成科技達人，而係希望老友記用手機、用AI、用政府服務時，唔使下下驚自己撳錯。

最後最後，有興趣報中大課程嘅朋友，都可以留意中大賽馬會老年學研究所官方網頁及 Facebook 最新公布。

亦歡迎留言話俾小編知，你最想學嘅到底係 AI 畫圖、剪片，定係其實只想有人教你：手機點樣用先安全？

資料參考：中大賽馬會老年學研究所、數字政策辦公室及公開新聞資料

#樂齡見習生 #長者數碼生活 #數碼共融 #智方便 #醫健通 #防騙意識 #退休生活 #長者學手機 #銀髮生活 #香港長者 #中大 #賽馬會老年學研究所

07/09/2026

近年好多人都講樂齡市場。

睇返市面好多有關樂齡人士嘅social media fan page，一㩒入去，內容好多都係推長者去講座、聽資訊、再了解服務。小編無話唔啱，做生意當然要有生意模式。

但如果以為樂齡市場就係咁簡單，就真係睇少咗。

有啲人以為，做長者市場，無非都係講長生津、醫療券、年金、保險、退休金。資料熟啲，流程清楚啲，就可以幫到人。

小編近年接觸多咗樂齡朋友，愈做愈覺得，長者好多問題，表面睇好似係錢，其實背後係一個家庭幾十年無整理過嘅結。

有時婆婆伯伯坐低，只係問一句：「我可唔可以申請長生津？」

聽落好似好簡單，計下入息資產，睇下文件，問下有冇物業就得。但傾落去先發現，問題根本唔止長生津。

例如有個婆婆，原本只係想了解自己有冇機會申請長者生活津貼。傾傾下先發現，層樓已經供斷，但業權唔係得佢一個名。屋企有人已經離世，但當年遺產承辦又無完全處理好。身邊幾個仔女各有各住屋情況，有人有公屋，有人同長者住，有人擔心日後安排，有人覺得應該留俾照顧嗰個，有人又覺得咁樣未必公平。

你話，呢件事係咪只係一條長生津問題？

根本唔係。

佢係物業問題、遺產問題、住屋問題、照顧問題，再加上一家人各自講唔出口嘅擔心。

呢啲先係樂齡市場最真實嘅地方。

年輕人市場好多時問嘅係：「我應該點儲錢？」「買咩保障？」「點投資？」當然都有難度，但條線好多時比較直接。

長者市場唔同。一坐低，可能係樓契、遺產、仔女、公屋、醫療、津貼、保單、照顧責任全部撈埋一齊。你以為今日傾一個資產審查，最後可能要先拆清楚一家人到底邊個想點、邊個驚咩、邊件事拖咗幾多年。

所以小編成日覺得，做樂齡市場，唔可以只係識產品，亦唔可以只係識技巧。

你要聽得出老人家真正擔心咩；要明白仔女未必係唔理，只係每個人都有自己現實壓力；要知道邊啲可以幫佢哋整理，邊啲要轉介律師、社工、政府部門或者其他專業人士。更加要有耐性，陪一家人慢慢將問題攤開。

講真，呢類個案好花時間，亦唔係每次都有即時結果。

但每次真係幫到一個長者，或者幫一家人終於願意坐低講清楚，個滿足感真係好大。

因為你唔係淨係幫人處理一份表格，或者講一個產品。好多時你係幫佢哋面對一件拖咗好耐、大家都唔敢郁嘅事。

小編唔會講到自己好偉大，亦唔想將樂齡市場包裝到好浪漫。現實係，佢真係複雜，真係麻煩，仲好多時牽涉人情、面子同家庭關係。

但正正因為咁，先值得做。

如果你屋企都有長者，或者你自己都開始進入退休階段，真係唔好等到出事先攞文件出嚟睇。長生津、醫療、物業、保單、遺產、照顧安排，樣樣都唔係單獨存在。

表面係錢，背後好多時係一家人。

有需要可以留言或 inbox 小編，唔一定係即刻要買嘢。有時只係坐低傾一次，先知道屋企原來有幾多嘢一直未整理。

涉及法律、遺產承辦、物業業權、公屋資格或者政府津貼申請，當然要按實際情況向相關專業人士或官方機構查詢。但第一步，永遠係先將問題睇清楚。

#樂齡見習生 #退休生活 #長者生活津貼 #長生津 #樂齡市場 #物業安排 #遺產承辦 #家庭溝通 #香港退休 #長者理財 #退休規劃 #照顧者 #屋企人

04/09/2026

話咁快又三年，又係銀債。

今次銀債又創新高，差唔多47.8萬人申請，總認購金額接近1,200億。好多老友記一見到政府發行、最低息率4.25厘，第一反應就係：「穩陣喎，抽啦。」

結果都出咗爐，宜家先叫大家「買之前要諗清楚」，直頭係馬後炮啦。

所以今次小編唔講買唔買。
反而想講：抽完銀債之後，先係真正考你退休錢有冇安排。

如果你抽到，恭喜你。
但都要記住，銀債係三年期，每半年派息一次，唔係每月出糧，亦唔係自動複息滾存。派咗息出嚟，如果你無再安排，可能又係擺喺戶口，或者不知不覺用咗。

如果你抽唔足，退款返嚟，下一步更加要小心。好多銀行即刻推退款優惠、短期定存，息口望落都幾吸引。
你要問自己：
呢筆錢本來係咪三年內唔等使？
定其實係醫療備用錢、生活錢、應急錢？
如果未分清楚就追下一個優惠，好容易又變成錢跟產品走，而唔係產品跟你需要走。

如果你無抽到，亦唔使覺得自己輸咗。銀債係工具，唔係唯一退休答案。
無銀債，唔代表無得規劃；有銀債，亦唔代表退休已經安排好。

小編唔係話銀債唔好。
如果呢筆錢三年內完全唔等使，生活費夠用、醫療儲備夠、應急錢又充足，銀債絕對係一個穩陣收息選擇。

但如果你每月生活費都未計清楚，只係見到4.25厘、見朋友抽、見新聞話反應熱烈就跟住抽，咁就要趁今次結果出爐，認真執一執自己盤數。

退休錢最怕唔係收少少息。
最怕係啲錢鎖住，到真係要用嗰陣先發現拎出嚟都唔係咁易。
而且銀債最容易令人忽略一件事：佢唔係幫你建立一份「退休薪金」。佢係半年派一次息，三年後本金返嚟，到時又要重新諗擺邊。三年話長唔長，話短唔短，眨下眼又到。

所以今次結果出咗之後，無論你抽到、抽唔足，定無抽，都可以問自己三句：
呢筆錢係咪三年內真係唔用？
半年派一次息，夠唔夠我每月生活費？
三年後到期，我有冇下一步安排？

答得實在，銀債就係你其中一個工具。

如果睇完都有懷疑，就唔好抽完銀債又追定存，追完定存又等下一隻產品。退休錢唔係跟住新聞走，係要跟住自己生活走。

如果你今次有抽銀債，或者退款返嚟唔知擺邊，歡迎留言或 inbox 小編。帶埋銀債、定存、強積金、保單同每月開支資料，我哋可以同你一齊整理清楚，睇下你啲退休錢係咪真係用得順。

以上只係一般退休理財教育分享，不構成個別投資建議，實際安排要按自己情況評估。

資料參考：香港政府債券計劃、金管局及公開新聞資料

#樂齡見習生 #銀債 #銀色債券 #退休生活 #退休規劃 #長者理財 #退休薪金 #現金流 #定存 #年金 #強積金 #香港退休

01/09/2026

🌕 **今年中秋，不如親手編一份好意頭。**

《樂齡見習生》今次又搞啲新嘢 😆
9月19日，我哋會第一次舉辦
**「中秋幸運五行手機繩工作坊」** 🧵✨

唔識五行？唔識手作？
**完全唔緊要。**

今次唔係算命，亦唔使睇八字。
我哋只係借用中國傳統「木、火、土、金、水」五種元素，幫大家諗一諗：

最近嘅自己，最想多一點甚麼？
🌳 **木｜活力、成長、順暢**
🔥 **火｜快樂、熱情、好人緣**
🪨 **土｜安心、穩定、踏實**
✨ **金｜清晰、順利、果斷**
💧 **水｜智慧、從容、順遂**

揀好自己嘅「心願」，再親自揀顏色、配珠仔、學編繩，最後完成一條屬於自己嘅 **幸運五行手機繩**。

可以整俾自己，亦可以趁中秋親手整俾老伴、仔女或者孫仔孫女。
有時一份禮物最珍貴嘅地方，真係唔係價錢，而係：
**「呢條係我親手整俾你㗎。」❤️**

當日每位參加者仲會有一張
🎁 **「五行心願幸運卡」**
記低自己今個中秋最想實現嘅一個小心願。

📅 **日期｜2026年9月19日（星期六）**
⏰ **時間｜下午2:00–5:00**
📍 **地點｜伊利沙伯體育館**
💰 **費用｜$50／位**
👥 **名額｜只限40位**

✅ 零手作經驗都可以
✅ 現場有導師及義工逐步教
✅ 材料全部提供
✅ 完成後作品可以帶走

名額只有40個，額滿就真係要等下次啦。
有興趣嘅哥哥姐姐、朋友仔，歡迎 Inbox 我哋報名留位 🙌🏼

#樂齡見習生 #中秋活動 #五行手機繩 #手作工作坊 #樂齡活動 #中秋節 #香港長者活動 #手機繩 #退休生活 #老友記活動

01/09/2026

香港退休每月開支 15,090 元？

最近見到一個退休開支調查，話香港退休人士平均每月開支已經去到 HK$15,090，而且升幅仲快過一般通脹。

小編第一眼睇到，唔係覺得「嘩，好驚」，而係覺得：呢個數字其實幾值得大家參考兼計數。

因為 15,090 元唔係一個好誇張嘅退休生活。好多時只係日常食飯、交通、屋企雜費、覆診買藥、同朋友飲茶、間中北上消費或者去個短旅行，加加埋埋就已經差唔多。

更加要留意係，今次調查入面好多受訪退休人士本身都有自住物業，甚至已經完成按揭。即係話，呢個 15,090 元好多時未必包括大額供樓或者租金壓力。

所以如果你而家 50+，準備退休，但仲有樓按、租金、保險、醫療、仔女支援，甚至兩邊走去大灣區生活，千祈唔好只係問：「我仲有幾多積蓄？」

你要問得再實際啲：
退休後每個月，有幾多錢一定要使？

邊啲係食飯交通水電煤？
邊啲係醫療同藥費？
邊啲係屋企人支援？
邊啲係想維持生活質素，例如飲茶、旅行、北上玩？
仲有仲有，講明係完成按揭自置物業，即係十年一次大廈維修，大家都要準備！（小編係業主立案法團主席，睇住大廈盤數，真係嚇死人。。。）

好多人退休前最大誤區，就係覺得：「到時唔返工，應該使少好多，同埋一定要慳。」

但現實係，唔返工之後，午餐未必平咗好多。朝早去街市買餸，下午覆診，隔幾日同朋友飲茶；屋企管理費、電話費、醫保一樣要交，仲要隔幾年就加保費。以前返工嗰陣，時間表塞滿晒，唔少消費反而被迫延後；退休後時間多咗，出街食飯、北上、旅行同興趣開支，未必會自然減少。
宜家連公立醫院都加價。。。仲只加不減

小編覺得，今次調查最值得大家記住嘅，唔係 $15,090 呢個數字，而係「退休開支會自己慢慢升」。

你今日覺得一萬五夠用，幾年後可能未必一樣。通脹只會會慢慢陰窮購買力。尤其退休人士嘅開支，未必同一般打工仔一樣，因為醫療、餐飲、旅遊、跨境交通，全部都可能升得快過你想像。

所以退休規劃唔可以只係擺低一大舊錢，然後慢慢拎。

最穩陣係幫自己建立一份「退休薪金」。

簡單講，就係退休後每個月都有一筆穩定現金流，好似出糧咁，幫你應付日常生活。至於大額醫療、突發開支、旅行玩樂、留俾家人嗰啲，就要分開另一盤數計，唔好全部撈埋一齊。

如果想簡單啲，可以分四格：

第一格，日常生活錢：食飯、交通、水電煤、管理費。

第二格，醫療備用錢：覆診、藥費、檢查、突發入院。

第三格，生活質素錢：飲茶、旅行、北上消費、興趣班。

第四格，長線保命錢：唔好亂郁，用嚟對抗長壽同通脹。

好多退休問題唔係無錢，而係無分清楚啲錢應該點用。一開始覺得戶口有幾百萬好安心，但每個月無紀律咁拎，幾年後先發現用得比想像中快，嗰下先真係麻煩。

如果你屋企有 50+、60+ 準備退休，或者你自己已經開始諗退休，呢篇建議收藏低，今晚可以試下做一件事：

攞張紙，寫低你退休後每月基本開支，再乘以 12 個月。

然後問自己：呢筆錢，係靠積蓄慢慢燒，定係已經有穩定收入來源去支持？

呢個問題，越拆越好，小編4字頭都要即刻同太太一齊計計。。。。

退休唔係鬥邊個戶口數字最大，而係到時每個月生活費出唔出得隱定，而且無痛苦。

資料參考：香港財務策劃師學會、萬通信託及公開新聞資料

#樂齡見習生 #退休生活 #退休開支 #退休規劃 #長者理財 #現金流 #退休薪金 #強積金 #香港退休 #銀髮生活 #通脹 #醫療開支

27/08/2026

【😳 一年$200左右，屋企人已經可以多一個睇醫生嘅選擇？】

如果屋企有小朋友或者長者，呢個新安排真係值得大家留意❗️

小朋友夜晚突然發燒、咳到瞓唔到；老人家有少少唔舒服，但又未至於要去急症室……

最頭痛往往唔係「睇唔睇醫生」，而係要換衫、落街、搭車、排隊、睇完再去攞藥。病嗰個固之言辛苦，但陪嗰個其實仲攰。😮‍💨

最近《樂齡見習生》了解到一個新嘅健康服務安排，當中有樣嘢好值得分享俾大家：

🏥 港怡醫院視像診症
合適情況下，可以安坐屋企透過視像方式接受醫生診症，並可按相關服務安排提供藥物送遞。

對有小朋友嘅家庭幾方便；對一啲唔想周圍走、行動未必咁方便嘅老友記，亦多一個求診選擇。

而且一年二百蚊左右，除咗基本保障之外，仲可以使用一系列指定醫療及健康服務優惠，包括：
✅ 普通科及專科門診
✅ 中醫、針灸、跌打、推拿
✅ 物理治療
✅ 牙科檢查及洗牙
✅ 心理輔導及營養治療
✅ 指定身體檢查及健康服務
✅ 部分指定服務優惠可低至半價

其實去到我哋呢個年紀，慢慢會發現一樣嘢：

醫療保障固然重要，但一啲平時真正用得到、令睇醫生方便啲嘅健康服務，一樣實際。
尤其一個家庭上有父母、下有小朋友，照顧健康從來都唔係一個人嘅事。

所以我哋今次唔係想叫大家「見平就買」。
而係一年二百蚊左右，買一個醫療會籍，有折扣，有優惠，有服務，如果當中有一兩項服務屋企人真係會用到，已經好值得大家了解。

想知道自己或者屋企人符唔符合資格、港怡視像診症點用、藥物送遞點安排、仲有咩健康服務可以用，歡迎：

📩 直接 DM《樂齡見習生》問我哋

或者唔鍾意網上問，想搵真人慢慢講：

🏠 可以直接嚟我哋淘大商場實體店查詢
我哋幫你逐樣睇清楚，有用先考慮，唔啱就唔使勉強。🙂

📌以上為一般健康服務及保障資訊分享，並不構成個人化保險建議。相關計劃設有申請資格、投保年齡及條款；視像診症、藥物送遞、醫療健康服務、收費及優惠均受相關服務條款、供應情況及安排約束，並可能不時更改。實際保障內容、保費及續保安排請參閱正式產品文件及條款。

#樂齡見習生 #樂齡生活 #退休生活 #健康管理 #家庭健康 #港怡醫院 #視像診症 #長者健康 #小朋友健康 #淘大商場

25/08/2026

香港年金公司推出跨境支付，今次真係值得大家留意。

特別係係我哋樂齡見習生，我哋都有幾多老友記嘅客友，有買香港年金。

新鮮滾熱辣，剛剛新聞講，香港年金公司推出「跨境年金支付服務」，客戶可以選擇將每月年金，直接收落自己喺中國內地開立嘅合資格人民幣戶口，而且香港年金公司本身不收手續費。

表面睇就好似只係多咗一個收錢方法，但如果你退休後本身已經成日返深圳、中山、珠海、廣州生活，或者正考慮將來有部分時間喺內地養老，呢個安排就絕對關你事。

以前好多香港退休人士嘅情況係：收入喺香港，生活開支慢慢搬咗上內地。香港戶口有錢，但內地食飯、交通、買餸、睇普通門診、請人照顧，全部都用人民幣。每次都要自己諗點樣轉錢、點樣兌換、手續費點計，對年輕人當然唔難，但對好多長者嚟講，其實真係好鬼麻煩。

今次安排最實際嘅地方，就係每月年金可以直接入到內地合資格人民幣戶口。對長住內地、或者一星期幾日喺大灣區生活嘅長者嚟講，日常用錢會順暢好多，唔使每個月靠仔女幫手轉來轉去。

不過，有幾個位一定要睇清楚，唔好聽到「跨境支付」四個字就以為乜戶口都得。

根據香港年金公司資料，現階段要用呢個服務，收款戶口需要係保單持有人親身喺中國內地指定銀行開立嘅 I 類個人人民幣戶口，而且必須係本人名義，不接受聯名戶口。簡單講，唔係隨便搵個內地戶口，甚至仔女戶口，就可以收年金。

另外，香港年金本身係以港元計算每月年金，之後先兌換成人民幣入內地戶口。所以每月港元年金金額係固定，但實際收到幾多人民幣，就會受當時匯率影響。唔收手續費係好事，但匯率風險就仍然存在。

咁邊啲人要特別留意呢？

第一，已經買咗香港年金，又經常喺內地生活嘅退休人士。以前可能要自己由香港戶口轉錢上去，依家多咗一個直接收人民幣嘅選擇，可以研究下係咪適合自己。

第二，準備北上養老，但主要退休收入仍然來自香港嘅人士。你唔應該只係諗「內地生活費平啲」，更加要諗每個月現金流點樣去到你真正生活嗰個地方。

第三，仔女正幫父母安排退休生活嘅家庭。好多長者唔係無錢，而係唔熟跨境銀行、App、戶口、提款同換匯。與其等到父母真係搬上去先手忙腳亂，不如早少少陪佢哋了解清楚。

不過小編都要講句公道說話，呢個服務方便，唔代表一定要將所有退休錢都搬上內地。如果你仲有香港醫療、保險、屋企開支、管理費、家人支援，或者日後可能需要返香港處理大病，香港戶口仍然要保留足夠港元現金。

退休現金流最忌一刀切。唔係見到北上生活平，就全部轉人民幣；亦唔係因為怕麻煩，就完全唔理內地生活開支。最穩陣係分清楚：日常生活錢放邊度、緊急備用錢放邊度、香港開支點樣扣、內地開支點樣用。

小編最後提提大家，如果你屋企有長者已經買咗香港年金，或者正考慮退休後多啲時間喺大灣區生活，呢單新聞絕對值得收藏，記得同屋企人傾一下。

資料參考：香港年金公司公開資料及相關新聞報道

#樂齡見習生 #香港年金 #北上退休 #大灣區生活 #退休生活 #退休規劃 #長者理財 #跨境支付 #人民幣 #香港退休 #銀髮生活 #現金流

樂齡見習生

13/09/2026

11/09/2026

09/09/2026

08/09/2026

07/09/2026

04/09/2026

01/09/2026

01/09/2026

27/08/2026

25/08/2026

Address

Website

Alerts

Contact The Business

Shortcuts

Share

Category

Listing takedown request