What are the opening hours?

Monday 08:00 - 16:00 Tuesday 08:00 - 16:00 Wednesday 08:00 - 16:00 Thursday 08:00 - 16:00 Friday 08:00 - 16:00

Banka Qendrore e Republikës së Kosovës, Luan Haradinaj 2, Pristina (2026)

12/06/2026

Guvernatori i BQK-së me delegacionin e tij zhvillon vizitë zyrtare në Bankën Qendrore të Kroacisë

Një delegacion i Bankës Qendrore të Republikës së Kosovës (BQK), i kryesuar nga Guvernatori z. Ahmet Ismaili, zhvilloi vizitë zyrtare në Bankën Qendrore të Kroacisë (HNB), ku u prit nga Zëvendësguvernatori, z. Michael Faulend dhe ekipi i tij.

Gjatë takimit u diskutua për funksionin e rimëkëmbjes dhe përmbylljes, me fokus në funksionalizimin dhe avancimin e mëtejshëm të këtij funksioni në kuadër të BQK-së, në përputhje me praktikat më të mira dhe standardet ndërkombëtare. Diskutimet përfshinë gjithashtu zhvillimet në sektorin financiar dhe bankar, reformat në vijim, si dhe mundësitë për thellimin e bashkëpunimit ndërmjet dy institucioneve në fusha me interes të përbashkët.

Në kuadër të vizitës, ekipet profesionale të BQK-së dhe HNB-së zhvilluan takime teknike të fokusuara në kornizën ligjore dhe institucionale të përmbylljes në Kroaci dhe në Bashkimin Evropian. Diskutimet trajtuan planifikimin dhe testimin e përmbylljes, përcaktimin e funksioneve kritike, si dhe kërkesat lidhur me MREL-in. Këto takime shërbyen për shkëmbimin e përvojave dhe praktikave më të mira, në mbështetje të konsolidimit të këtij funksioni në BQK.

Guvernatori Ismaili zhvilloi takim edhe me Zëvendësguvernatoren, znj. Sandra Švaljek, me të cilën diskutoi mbi zhvillimet kryesore në sektorin bankar, proceset integruese dhe përvojën e Kroacisë në avancimin e kornizës institucionale dhe rregullative në kontekstin evropian.

I shoqëruar nga anëtarët e Bordit Menaxhues të Bankës Qendrore të Kroacisë, Zëvendësguvernatorja Švaljek dhe Zëvendësguvernatori Faulend, Guvernatori Ismaili vizitoi Muzeun e Parasë “Moneterra”, ku u prit nga Drejtorja e Muzeut, znj. Ines Merkl. Gjatë vizitës, ai u njoh nga afër me historikun e zhvillimit të sistemit financiar dhe monetar të Kroacisë, përfshirë procesin e integrimit në Bashkimin Evropian dhe në zonën euro.

Delegacioni i Bankës Qendrore të Republikës së Kosovës shprehu falënderimin për Bankën Qendrore të Kroacisë, menaxhmentin dhe ekipet profesionale të saj për mikpritjen, bashkëpunimin e afërt dhe shkëmbimin e vlefshëm të përvojave gjatë kësaj vizite zyrtare.

Të dy institucionet u pajtuan që të zgjerojnë më tej bashkëpunimin në fushën e rimëkëmbjes dhe përmbylljes, krahas bashkëpunimit të shkëlqyeshëm të deritanishëm në fusha të tjera me interes të përbashkët, i cili edhe u vlerësua lart.

Komunikata 🔗 https://short-url.org/1ru9n

11/06/2026

BQK dhe ATK nënshkruajnë Marrëveshje Bashkëpunimi për avancimin e shkëmbimit të informacionit dhe forcimin e integritetit financiar

Guvernatori i Bankës Qendrore të Republikës së Kosovës (BQK), z. Ahmet Ismaili, dhe Drejtori i Përgjithshëm i Administratës Tatimore të Kosovës (ATK), z. Mentor Hyseni, nënshkruan Marrëveshjen e Bashkëpunimit ndërmjet dy institucioneve, me qëllim forcimin e koordinimit institucional, avancimin e shkëmbimit të informacionit dhe mbështetjen e mekanizmave që kontribuojnë në stabilitetin, sovranitetin, integritetin dhe qëndrueshmërinë e sistemit financiar dhe ekonomik në Republikën e Kosovës.

Marrëveshja përcakton kornizën kryesore të bashkëpunimit ndërmjet BQK-së dhe ATK-së në fushat me interes të përbashkët, në përputhje me mandatet ligjore dhe legjislacionin në fuqi. Ajo krijon një bazë më të strukturuar për shkëmbimin e të dhënave dhe informacioneve relevante, koordinimin e aktiviteteve institucionale dhe mbështetjen e analizave që lidhen me stabilitetin financiar, zhvillimet makroekonomike, luftimin e ekonomisë joformale dhe adresimin e veprimtarive që mund të cenojnë integritetin financiar apo ekonomik të vendit.

Për BQK-në, marrëveshja forcon qasjen në informacione relevante për mbikëqyrjen financiare, analizën institucionale dhe vlerësimin e zhvillimeve që lidhen me stabilitetin dhe integritetin financiar. Për ATK-në, ajo mbështet administrimin tatimor, analizën e rrezikut dhe identifikimin më efikas të veprimtarive joformale apo shmangieve fiskale. Për të dy institucionet, marrëveshja rrit cilësinë e bashkëpunimit, shmang fragmentimin institucional dhe mundëson reagim më të koordinuar ndaj çështjeve me interes të përbashkët.

Aspektet teknike, mënyrat e zbatimit, format e shkëmbimit të të dhënave, përgjegjësitë operative dhe çështjet tjera të nevojshme për zbatimin praktik të marrëveshjes do të përcaktohen përmes procedurave standarde operative, në përputhje me kërkesat ligjore.

Duke marrë parasysh zhvillimet në sektorin financiar, digjitalizimin e shërbimeve financiare, avancimin e infrastrukturës së pagesave dhe proceset e integrimit të mëtejshëm të Kosovës në tregjet financiare evropiane, kjo marrëveshje paraqet një hap të rëndësishëm drejt forcimit të bashkëpunimit institucional dhe rritjes së kapaciteteve për adresimin e sfidave të përbashkëta.

BQK dhe ATK mbeten të përkushtuara që, përmes kësaj marrëveshjeje, të kontribuojnë në forcimin e integritetit financiar, mbrojtjen e interesit publik dhe zhvillimin e qëndrueshëm ekonomik të Republikës së Kosovës.

🔗 https://shortlink.uk/1roEv

11/06/2026

Guvernatori Ismaili mirëpret Misionin e ri të Asistencës Teknike të Thesarit të SHBA-së për forcimin e mëtejshëm të kapaciteteve AML/CFT në Kosovë

Guvernatori i Bankës Qendrore të Republikës së Kosovës (BQK), z. Ahmet Ismaili, priti një Mision të Asistencës Teknike në kuadër të projektit të ri të Zyrës për Asistencë Teknike (OTA) të Departamentit të Thesarit të SHBA-së, të udhëhequr nga ekspertët z. Joseph W. Burke dhe z. Norman Smith.

Misioni u fokusua në forcimin e mëtejshëm të kapaciteteve institucionale dhe ekspertizës mbikëqyrëse të BQK-së në fushën e Parandalimit të Pastrimit të Parave dhe Luftimit të Financimit të Terrorizmit (AML/CFT), duke u mbështetur në bashkëpunimin e vazhdueshëm me Thesarin e SHBA-së dhe takimet e nivelit të lartë të mbajtura në Washington DC, gjatë Takimeve Pranverore në prill 2026, si dhe kërkesën e BQK-së të dorëzuar në dhjetor 2024.

Guvernatori Ismaili paraqiti një pasqyrë të mandatit, detyrave dhe përgjegjësive të BQK-së, me theks të veçantë në rolin e saj në ruajtjen e integritetit të sistemit financiar, forcimin e mbikëqyrjes AML/CFT dhe luftimin e falsifikimit të monedhës. Ai theksoi reformat kryesore të ndërmarra nga BQK-ja për të rritur integritetin financiar, qëndrueshmërinë institucionale dhe përafrimin me standardet ndërkombëtare.

Gjatë takimit, Guvernatori Ismaili nënvizoi gjithashtu progresin e arritur në avancimin e kornizës rregullative dhe mbikëqyrëse, përfshirë zbatimin e vazhdueshëm të mbikëqyrjes të bazuar në rrezik, hartimin e rregulloreve për kripto-asetet dhe licencimin e ofruesve të shërbimeve të kripto-aseteve, si dhe forcimin e mekanizmave të shqyrtimit të investimeve për institucionet e reja që hyjnë në tregun e Kosovës. Diskutimet përfshinë gjithashtu përmirësimin e mëtejshëm të praktikave të mbikëqyrjes së institucioneve financiare dhe procedurave të përshtatshmërisë dhe integritetit (fit-and-proper).

Një pjesë e rëndësishme e diskutimit u fokusua në projektin e ri që do të zbatohet në bashkëpunim ndërmjet Ministrisë së Financave, Bankës Qendrore të Republikës së Kosovës, Njësisë së Inteligjencës Financiare dhe Zyrës së Kryeprokurorit të Shtetit. Projekti synon forcimin e kornizës së integritetit financiar të Kosovës përmes mbështetjes këshilluese nga ekspertë në fushën e Parandalimit të Pastrimit të Parave, Luftimit të Financimit të Terrorizmit dhe Financimit të Përhapjes (AML/CFT/CPF).

Kjo nismë është e dizajnuar për të rritur koordinimin ndërinstitucional, për të forcuar përputhshmërinë me standardet ndërkombëtare dhe për të përmirësuar efektivitetin e përgjithshëm të kornizës së Kosovës për parandalimin dhe adresimin e rreziqeve të krimit financiar.

Me këtë rast, Guvernatori Ismaili nënshkroi Termat e Referencës për projektin, duke riafirmuar përkushtimin e BQK-së për avancimin e kornizës kombëtare AML/CFT/CPF, forcimin e bashkëpunimit institucional dhe kontributin në mbrojtjen e sistemit financiar të Kosovës.

Guvernatori Ismaili shprehu mirënjohje të thellë ndaj Departamentit të Thesarit të SHBA-së për mbështetjen e vazhdueshme, asistencën teknike dhe bashkëpunimin institucional. Ai vlerësoi lart rolin e Thesarit të SHBA-së në forcimin e funksioneve thelbësore të BQK-së, rritjen e kapaciteteve institucionale dhe mbështetjen e ruajtjes së integritetit financiar në Republikën e Kosovës.

🔗 https://shortlink.uk/1wPfn

05/06/2026

𝗗𝗲𝗽𝗮𝗿𝘁𝗮𝗺𝗲𝗻𝘁𝗶 𝗘𝘃𝗿𝗼𝗽𝗶𝗮𝗻 𝗶 𝗙𝗠𝗡-𝘀𝗲̈ 𝘃𝗹𝗲𝗿𝗲̈𝘀𝗼𝗻 𝗕𝗤𝗞-𝗻𝗲̈: 𝗠𝗼𝗱𝗲𝗿𝗻𝗶𝘇𝗶𝗺 𝗶 𝘁𝗵𝗲𝗹𝗹𝗲̈ 𝗶𝗻𝘀𝘁𝗶𝘁𝘂𝗰𝗶𝗼𝗻𝗮𝗹, 𝗾𝗲𝘃𝗲𝗿𝗶𝘀𝗷𝗲 𝗲 𝗮𝘃𝗮𝗻𝗰𝘂𝗮𝗿 𝗱𝗵𝗲 𝗿𝗲𝗳𝗼𝗿𝗺𝗮 𝗺𝗲 𝗿𝗲𝘇𝘂𝗹𝘁𝗮𝘁𝗲 𝗸𝗼𝗻𝗸𝗿𝗲𝘁𝗲

Në një intervistë ekskluzive për RTK, të realizuar në kuadër të Konferencës Rajonale të nivelit të lartë të organizuar nga Banka Qendrore e Republikës së Kosovës me temën “Kornizat e politikave dhe rregullimit në një mjedis në ndryshim”, Zëvendësdrejtori i Departamentit Evropian të Fondit Monetar Ndërkombëtar, z. Mark Horton, vlerësoi lart progresin e Kosovës dhe reformat e ndërmarra nga BQK-ja gjatë viteve të fundit.

Duke folur për zhvillimet në Kosovë, z. Horton e cilësoi vendin si një histori suksesi dhe një partner të rëndësishëm të FMN-së. Ai theksoi se vitet e fundit kanë qenë një periudhë intensive modernizimi dhe transformimi për BQK-në, duke prekur pothuajse çdo segment të funksionimit të saj. Po ashtu, ai vlerësoi progresin në forcimin e rregullimit dhe mbikëqyrjes së sektorit financiar, zhvillimin e sistemeve moderne të pagesave, rritjen e përfshirjes financiare dhe përmirësimin e kapaciteteve institucionale.

Një vlerësim të veçantë ai i kushtoi reformave të brendshme organizative të BQK-së, duke përmendur modernizimin e qeverisjes institucionale, avancimin e politikave të menaxhimit të burimeve njerëzore, reformimin e proceseve të rekrutimit, zhvillimin e politikave për mbështetjen dhe avancimin profesional të stafit, si dhe forcimin e kapaciteteve analitike dhe profesionale.

Sipas z. Horton, këto reforma përfaqësojnë një transformim të gjerë institucional që e ka bërë BQK-në më moderne, më efektive dhe më të përgatitur për sfidat e ardhshme. Ai shprehu hapur admirimin për ritmin dhe përmasën e ndryshimeve të realizuara, duke theksuar se FMN-ja ka qenë dëshmitare e një përpjekjeje mbresëlënëse reformuese.

Z. Horton vlerësoi gjithashtu lidershipin e BQK-së për vizionin, vendosmërinë dhe proaktivitetin në zbatimin e një agjende ambicioze reformash, e cila ka prekur si funksionet kryesore të bankës qendrore, ashtu edhe organizimin e saj të brendshëm. Ai theksoi se bashkëpunimi i ngushtë ndërmjet FMN-së dhe BQK-së përmes asistencës teknike ka dhënë rezultate konkrete, pasi Kosova është ndër vendet që jo vetëm pranon rekomandimet profesionale, por i zbaton ato me efikasitet.

Në vlerësimin e tij, reformat e ndërmarra nga BQK-ja gjatë viteve të fundit kanë kontribuar ndjeshëm në forcimin e stabilitetit financiar të Kosovës, në rritjen e qëndrueshmërisë së sektorit financiar dhe në përgatitjen e vendit për standardet dhe aspiratat e integrimit evropian.

𝘐𝘯𝘵𝘦𝘳𝘷𝘪𝘴𝘵𝘦̈𝘯 𝘦 𝘻. 𝘏𝘰𝘳𝘵𝘰𝘯 𝘮𝘶𝘯𝘥 𝘵𝘢 𝘨𝘫𝘦𝘯𝘪 𝘬𝘦̈𝘵𝘶, 𝘵𝘦̈ 𝘱𝘶𝘣𝘭𝘪𝘬𝘶𝘢𝘳 𝘯𝘨𝘢 𝘬𝘢𝘯𝘢𝘭𝘪 𝘻𝘺𝘳𝘵𝘢𝘳 𝘪 𝘙𝘛𝘒: https://youtu.be/ScP65tadJAQ?si=LicJgNSRtu6GLbXM&t=359

Paraprakisht, në një prononcim për RTK, z. Tobias Adrian vlerësoi lart rolin e BQK-së, si dhe stabilitetin dhe sofistikimin e sektorit financiar në Kosovë, duke u shprehur i impresionuar me dinamizmin ekonomik të vendit, energjinë e qytetarëve dhe cilësinë e politikave ekonomike dhe financiare. Ai më pas vlerësoi konferencën e organizuar nga BQK-ja, duke theksuar se temat e diskutuara si tokenizimi, inteligjenca artificiale, paraja digjitale dhe kripto-asetet pasqyrojnë debatet globale dhe janë thelbësore për adresimin e sfidave dhe mundësive që sjell transformimi i financave.

Ndërkaq, Guvernatori Ismaili në prononcimin e tij theksoi se sektori financiar i Kosovës vlerësohet për stabilitetin dhe kuadrin e tij rregullator, duke veçuar bashkëpunimin me FMN-në, nga i cili BQK-ja përfiton përmes mbi 15 projekteve të asistencës teknike në fusha kyçe financiare. Sa i përket konferencës, ai theksoi se ajo shërbeu si platformë për shkëmbimin e përvojave dhe praktikave më të mira ndërkombëtare mbi financat digjitale, tokenizimin dhe kripto-asetet, duke përmendur edhe avancimin e kornizës ligjore dhe rregullative që krijon bazat për një treg të sigurt dhe të rregulluar, pavarësisht sfidave që sjellin teknologjitë e reja.

Konferenca rajonale dy ditore mblodhi në Prishtinë përfaqësues të lartë të FMN-së, bankave qendrore dhe institucioneve financiare nga rajoni dhe më gjerë. Ndër pjesëmarrësit kryesorë ishin z. Tobias Adrian, kryekëshilltar financiar dhe drejtor i Departamentit të Tregjeve Monetare dhe Kapitalit në FMN, si dhe z. Yigit Yaşar, drejtor ekzekutiv dhe anëtar i Bordit Ekzekutiv të FMN-së, së bashku me bashkëpunëtorët e tyre.

𝘗𝘳𝘰𝘯𝘰𝘯𝘤𝘪𝘮𝘦𝘵 𝘦 𝘥𝘩𝘦̈𝘯𝘢 𝘯𝘨𝘢 𝘻. 𝘈𝘥𝘳𝘪𝘢𝘯, 𝘎𝘶𝘷𝘦𝘳𝘯𝘢𝘵𝘰𝘳𝘪 𝘐𝘴𝘮𝘢𝘪𝘭𝘪 𝘥𝘩𝘦 𝘦𝘮𝘪𝘴𝘪𝘰𝘯𝘪𝘯 𝘦 𝘱𝘭𝘰𝘵𝘦̈ 𝘪 𝘨𝘫𝘦𝘯𝘪 𝘬𝘦̈𝘵𝘶: https://www.youtube.com/watch?v=ScP65tadJAQ

04/06/2026

Stabiliteti financiar global dhe sfidat e reja të sektorit financiar në fokus të ligjëratës publike të BQK-së me Fondin Monetar Ndërkombëtar

Banka Qendrore e Republikës së Kosovës (BQK) në kuadër të Konferencës Rajonale të nivelit të lartë me temën “Kornizat e politikave dhe rregullimit në një mjedis në ndryshim”, të mbajtur më 3 dhe 4 qershor 2026 në Prishtinë, organizoi ligjëratën publike me temë “Vlerësimi i Stabilitetit Financiar Global: Ku qëndrojmë?”.

Ligjërata publike u zhvillua në bashkëpunim me Fakultetin e Ekonomisë të Universitetit të Prishtinës dhe solli në diskutim Guvernatorin e BQK-së, z. Ahmet Ismaili, dhe z. Tobias Adrian, Krye-Këshilltar Financiar dhe Drejtor i Departamentit për Tregje Monetare dhe të Kapitalit në Fondin Monetar Ndërkombëtar (FMN). Aktiviteti u hap nga Prodekanja e Fakultetit të Ekonomisë, znj. Vlora Prenaj, e cila përshëndeti të pranishmit dhe vlerësoi rëndësinë e këtij aktiviteti, si dhe bashkëpunimin institucional ndërmjet BQK-së dhe Fakultetit të Ekonomisë.

Në fokus të diskutimit ishin zhvillimet më të fundit në stabilitetin financiar global dhe implikimet e tyre për ekonomitë e vogla, të hapura dhe të euroizuara. Në këtë kontekst, u trajtuan pasiguritë makrofinanciare, ndryshimet në kushtet financiare globale, zhvillimet në ndërmjetësimin financiar jobankar dhe rreziqet potenciale që mund të burojnë nga këto zhvillime për stabilitetin financiar.

Diskutimi përfshiu gjithashtu rëndësinë e qëndrueshmërisë së sektorit bankar, politikave të kujdesshme makroprudenciale, mbikëqyrjes efektive dhe të bazuar në rrezik, si dhe forcimit të kapaciteteve institucionale për identifikimin, monitorimin dhe adresimin në kohë të rreziqeve sistemike.

Një pjesë e veçantë e ligjëratës iu kushtua zhvillimeve strukturore që po e transformojnë sektorin financiar, përfshirë pagesat dhe financën digjitale, inteligjencën artificiale, rreziqet kibernetike, kripto-asetet dhe paranë digjitale. Në këtë drejtim, u theksua nevoja për korniza rregullatore dhe mbikëqyrëse që mundësojnë inovacion të sigurt, duke ruajtur njëkohësisht stabilitetin financiar, integritetin e tregut dhe mbrojtjen e konsumatorëve.

Për BQK-në, këto çështje kanë rëndësi të veçantë në kontekstin e ruajtjes së stabilitetit financiar, forcimit të rezistencës institucionale, avancimit të mëtejshëm të reformave rregullatore dhe mbikëqyrëse, si dhe përafrimit me standardet dhe praktikat më të mira evropiane. Stabiliteti financiar, si një e mirë publike, mbetet parakusht për zhvillim të qëndrueshëm ekonomik, besim në sistemin financiar dhe mirëqenie të qytetarëve.

Në përmbyllje të aktivitetit, u zhvillua një bashkëbisedim i hapur me studentë, profesorë, përfaqësues të institucioneve dhe pjesëmarrës të tjerë. Në këtë pjesë u adresuan pyetje dhe komente lidhur me zhvillimet në stabilitetin financiar global, sfidat e reja rregullatore dhe rolin e bankave qendrore në një mjedis financiar gjithnjë e më kompleks.

BQK shpreh mirënjohje ndaj Fondit Monetar Ndërkombëtar për bashkëpunimin e vazhdueshëm dhe mbështetjen profesionale të ofruar ndër vite, veçanërisht përmes angazhimit të Departamentit për Tregje Monetare dhe të Kapitalit. Ky bashkëpunim ka kontribuar në forcimin e kapaciteteve të BQK-së në fushën e stabilitetit financiar, mbikëqyrjes bankare, politikës makroprudenciale dhe përgatitjes institucionale për adresimin e rreziqeve të reja në sektorin financiar.

Njëherësh, BQK falënderon Fakultetin e Ekonomisë të Universitetit të Prishtinës për bashkëpunimin në realizimin e këtij aktiviteti dhe për kontributin në nxitjen e debatit akademik e profesional mbi çështje me rëndësi strategjike për sektorin financiar dhe ekonominë e vendit.

BQK mbetet e përkushtuar në forcimin e mëtejshëm të rezistencës së sistemit financiar, avancimin e reformave në përputhje me standardet evropiane dhe thellimin e bashkëpunimit me partnerët ndërkombëtarë, në funksion të një sektori financiar të sigurt, të qëndrueshëm dhe në shërbim të ekonomisë së Republikës së Kosovës.

Komunikata 🔗 https://short-url.org/1qX1s

04/06/2026

BQK organizoi takim me sektorin financiar vendor në kuadër të Konferencës Rajonale për Paranë Digjitale

Në kuadër të Konferencës Rajonale të nivelit të lartë për Kripto-asetet dhe Paranë Digjitale, me temë “Kornizat e politikave dhe rregullimit në një mjedis në ndryshim”, të organizuar nga Banka Qendrore e Republikës së Kosovës (BQK), u mbajt takimi me përfaqësues të institucioneve vendore dhe ndërkombëtare të sektorit financiar.

Takimi kishte në fokus zhvillimet më të fundit në stabilitetin financiar global, implikimet e tyre për rajonin dhe Kosovën, si dhe rëndësinë e dialogut të vazhdueshëm ndërmjet autoriteteve, sektorit financiar dhe partnerëve ndërkombëtarë në adresimin e rreziqeve dhe sfidave të reja.

Aktiviteti u hap nga z. Sebastian Sosa, Përfaqësues Rajonal Rezident për Ballkanin Perëndimor i Fondit Monetar Ndërkombëtar, i cili theksoi rëndësinë e bashkëpunimit ndërinstitucional dhe të politikave të kujdesshme për ruajtjen e stabilitetit financiar, forcimin e qëndrueshmërisë ekonomike dhe avancimin e reformave në sektorin financiar.

Në kuadër të takimit, z. Tobias Adrian, Krye-Këshilltar Financiar dhe Drejtor i Departamentit të Tregjeve Monetare dhe të Kapitalit në Fondin Monetar Ndërkombëtar, prezantoi Raportin Global të Stabilitetit Financiar të FMN-së. Prezantimi trajtoi zhvillimet kryesore në tregjet financiare ndërkombëtare, rreziqet ndaj stabilitetit financiar global, si dhe rekomandimet për forcimin e rezistencës së sistemeve financiare përballë sfidave aktuale dhe atyre të ardhshme.

Në diskutim morën pjesë drejtues dhe zyrtarë të BQK-së, përfaqësues të sektorit bankar, kompanive të sigurimeve, institucioneve financiare jobankare, kompanive të teknologjisë financiare, partnerëve ndërkombëtarë dhe mediave.

Pjesëmarrësit shkëmbyen pikëpamje mbi zhvillimet ekonomike dhe financiare, rreziqet e mundshme për sektorin financiar, si dhe mundësitë për avancimin e mëtejshëm të stabilitetit, inovacionit, digjitalizimit dhe gjithëpërfshirjes financiare në Kosovë.

BQK mbetet e përkushtuar në promovimin e dialogut profesional, bashkëpunimit ndërinstitucional dhe koordinimit me partnerët vendorë dhe ndërkombëtarë, me qëllim ruajtjen e stabilitetit financiar, forcimin e qëndrueshmërisë së sektorit financiar dhe mbështetjen e zhvillimit të tij të qëndrueshëm në Republikën e Kosovës.

Komunikata 🔗 https://short-url.org/1qX3e

04/06/2026

Delegacioni i BQK-së takohet me delegacionin e FMN-së

Delegacioni i Bankës Qendrore të Republikës së Kosovës (BQK) i udhëhequr nga Guvernatori, z. Ahmet Ismaili dhe i përbërë nga Zëvendësguvernatorët Milot Cakaj dhe Nesrin Shileku-Shala, u takua me delegacionin e Fondit Monetar Ndërkombëtar (FMN).

Delegacioni i FMN-së u udhëhoq nga z. Tobias Adrian, Krye-Këshilltar Financiar dhe Drejtor i Departamentit të Tregjeve Monetare dhe të Kapitalit dhe përbëhej nga z. Yigit Yasar, Drejtor Ekzekutiv në FMN, z. Mark Horton, Zëvendësdrejtor i Departamentit Evropian të FMN-së dhe z. Hajdari Korbi.

Në takim mori pjesë edhe Ministri në detyrë i Financave, z. Hekuran Murati, i cili diskutoi politikat e stabilitetit makrofinanciar dhe zhvillimet aktuale makroekonomike.

Takimi u fokusua në zhvillimet globale financiare dhe makroekonomike, si dhe ndikimin e tyre në ekonomitë e vogla dhe të hapura, me theks të veçantë në rëndësinë e stabilitetit financiar, politikave të kujdesshme, mbikëqyrjes efektive dhe qëndrueshmërisë institucionale në adresimin e rreziqeve të reja dhe pasigurive.

Palët diskutuan gjithashtu prioritetet strategjike të BQK-së, bashkëpunimin e vazhdueshëm me FMN-në dhe rolin e asistencës teknike në mbështetjen e reformave në fusha kyçe, përfshirë stabilitetin financiar, mbikëqyrjen bankare, politikën makroprudenciale, qeverisjen institucionale, sistemet e pagesave, financat digjitale dhe zhvillimin e kapaciteteve.

Guvernatori Ismaili shprehu mirënjohjen e BQK-së për mbështetjen e vazhdueshme të FMN-së dhe theksoi rëndësinë e partneritetit strategjik ndërmjet FMN-së dhe BQK-së në avancimin e reformave, forcimin e kapaciteteve institucionale dhe mbështetjen e zhvillimit të qëndrueshëm të sektorit financiar të Kosovës.

BQK-ja ritheksoi përkushtimin për thellimin e mëtejshëm të bashkëpunimit me FMN-në, në përputhje me mandatin e saj për ruajtjen e stabilitetit financiar dhe avancimin e modernizimit të sektorit financiar sipas standardeve dhe praktikave më të mira ndërkombëtare.

Komunikata 🔗 https://short-url.org/1wk9a

04/06/2026

Guvernatori Ismaili pret në takim Krye-Këshilltarin Financiar dhe Drejtorin e Departamentit të Tregjeve Monetare dhe të Kapitalit në FMN, z. Tobias Adrian

Guvernatori i Bankës Qendrore të Republikës së Kosovës (BQK), z. Ahmet Ismaili, priti në takim Krye-Këshilltarin Financiar dhe Drejtorin e Departamentit të Tregjeve Monetare dhe të Kapitalit në Fondin Monetar Ndërkombëtar (FMN), z. Tobias Adrian.

Në takim u diskutuan zhvillimet kryesore në sektorin financiar, prioritetet strategjike të Bankës Qendrore të Republikës së Kosovës, si dhe bashkëpunimi i vazhdueshëm me Fondin Monetar Ndërkombëtar në fusha me rëndësi për ruajtjen e stabilitetit financiar dhe avancimin e reformave institucionale.

Guvernatori Ismaili e informoi z. Adrian për ecurinë e sektorit financiar në Kosovë, duke theksuar se sektori mbetet mirë i kapitalizuar, likuid dhe me performancë të qëndrueshme. Në këtë kontekst, u veçua rëndësia e forcimit të mëtejshëm të mbikëqyrjes së bazuar në rrezik, avancimit të kornizës rregullative dhe mbikëqyrëse, zbatimit të politikave makroprudenciale, si dhe përafrimit të vazhdueshëm me standardet dhe praktikat më të mira evropiane.

Një pjesë e rëndësishme e diskutimit iu kushtua zbatimit të Planit Strategjik të BQK-së, si kornizë orientuese për reformat institucionale dhe modernizimin e sektorit financiar. Në këtë kuadër, u diskutuan prioritetet që lidhen me modernizimin e sistemeve të pagesave, digjitalizimin financiar, mbrojtjen e konsumatorëve financiarë, forcimin e qeverisjes institucionale, zhvillimin e kapaciteteve dhe avancimin e mëtejshëm të tregjeve financiare.

Guvernatori Ismaili dhe z. Adrian shkëmbyen pikëpamje edhe mbi zhvillimet aktuale në mjedisin financiar ndërkombëtar dhe implikimet e tyre për ekonomitë e vogla dhe të hapura, me theks të veçantë në rëndësinë e politikave të kujdesshme, mbikëqyrjes efektive dhe qëndrueshmërisë institucionale në përballjen me rreziqet e reja dhe pasiguritë globale.

Në përmbyllje të takimit, Guvernatori Ismaili shprehu mirënjohjen e BQK-së për mbështetjen e vazhdueshme të Fondit Monetar Ndërkombëtar, përfshirë përmes asistencës teknike, këshillimit profesional dhe dialogut të rregullt në fusha kyçe si stabiliteti financiar, mbikëqyrja bankare, politika makroprudenciale, qeverisja institucionale dhe zhvillimi i kapaciteteve.

Ai ritheksoi përkushtimin e BQK-së për të vazhduar bashkëpunimin e ngushtë me FMN-në, në funksion të forcimit të mëtejshëm të stabilitetit financiar, rritjes së qëndrueshmërisë institucionale dhe avancimit të sektorit financiar në përputhje me standardet ndërkombëtare dhe procesin e integrimit evropian.

Vizita e z. Adrian në Kosovë lidhet me pjesëmarrjen e tij në Konferencën Rajonale të nivelit të lartë “Kornizat e politikave dhe rregullimit në një mjedis në ndryshim”, të organizuar nga Banka Qendrore e Republikës së Kosovës. Konferenca mbledh përfaqësues të lartë të bankave qendrore, institucioneve financiare dhe partnerëve ndërkombëtarë për të diskutuar zhvillimet aktuale në fushën e kripto-aseteve, parasë digjitale, rregullimit financiar dhe prioritetet strategjike për stabilitetin dhe modernizimin e sektorit financiar.

Komunikata 🔗 https://short-url.org/1qUvv

03/06/2026

Mbahet paneli i nivelit të lartë i bankave qendrore të rajonit për Kripto-Asetet, Paranë Digjitale dhe kornizat rregullative

Në kuadër të Konferencës Rajonale për Kripto-asetet dhe Paranë Digjitale, të organizuar nga Banka Qendrore e Republikës së Kosovës (BQK), u mbajt sesioni i nivelit të lartë me pjesëmarrjen e përfaqësuesve të Fondit Monetar Ndërkombëtar (FMN) dhe bankave qendrore të rajonit.

Sesioni u zhvillua në kuadër të temës "Kornizat e politikave dhe rregullimit në një mjedis në ndryshim", duke trajtuar ndikimin e kripto-aseteve, formave digjitale të parasë dhe inovacionit financiar në stabilitetin financiar, mbikëqyrjen rregullative, sistemet e pagesave dhe integritetin e tregjeve financiare.

Në pjesën e parë të sesionit, prezantime tematike u mbajtën nga përfaqësues të bankave qendrore të rajonit, përfshirë z. Trajko Slaveski, Guvernator i Bankës Kombëtare të Republikës së Maqedonisë së Veriut; z. Ahmet Ismaili, Guvernator i Bankës Qendrore të Republikës së Kosovës; znj. Gordana Kalezić; Zëvendësguvernatore e Bankës Qendrore të Malit të Zi; si dhe drejtueses znj. Valentina Semi nga Banka e Shqipërisë.

Përmes prezantimeve te strukturuara, pjesëmarrësit paraqitën zhvillimet më të fundit në fushën e financave digjitale, modernizimit të sistemeve të pagesave, avancimit të mbikëqyrjes dhe përafrimit të kornizave rregullative me standardet ndërkombëtare dhe ato të Bashkimit Evropian. Diskutimet evidentuan prioritetet e përbashkëta të rajonit, përfshirë nevojën për politika të koordinuara, kapacitete të avancuara mbikëqyrëse dhe qasje të kujdesshme ndaj zhvillimeve të reja teknologjike.

Më pas, në kuadër të panelit të nivelit të lartë të bankave qendrore të rajonit, me pjesëmarrjen edhe të z. Tobias Adrian, Krye-Këshilltar Financiar i FMN-së dhe Drejtor i Departamentit të Tregjeve Monetare dhe të Kapitalit, dhe nën moderimin e z. Mark Horton, Zëvendësdrejtor i Departamentit Evropian në FMN, diskutimet u fokusuan në rreziqet për stabilitetin financiar dhe transmetimin e politikave monetare, koordinimin rregullativ ndërshtetëror, zhvillimin e shërbimeve financiare digjitale, si dhe mbikëqyrjen e "stablecoins" dhe tregjeve të kripto-aseteve.

Pjesëmarrësit theksuan se zhvillimi i financave digjitale duhet të mbështetet në rregullim të bazuar në rrezik, mbikëqyrje efektive, mbrojtje të konsumatorëve dhe investitorëve, ruajtje të integritetit financiar dhe forcim të bashkëpunimit rajonal e ndërkombëtar. Në këtë drejtim, u diskutua edhe rëndësia e adresimit të rreziqeve që lidhen me sigurinë kibernetike, parandalimin e pastrimit të parave dhe financimit të terrorizmit, si dhe implikimet e mundshme të valutave digjitale të bankave qendrore.

Nga diskutimet e panelit rezultoi se, përballë një mjedisi financiar në ndryshim të shpejtë, autoritetet rregullative dhe mbikëqyrëse duhet të ndërtojnë korniza të qarta, proporcionale dhe të harmonizuara, të cilat mundësojnë inovacionin e përgjegjshëm, por njëkohësisht mbrojnë stabilitetin financiar, funksionimin e tregjeve dhe besimin e publikut.

Konferenca po shërben si platformë rajonale për shkëmbimin e përvojave, praktikave më të mira dhe perspektivave institucionale ndërmjet politikëbërësve, rregullatorëve dhe ekspertëve ndërkombëtarë, me synim promovimin e zhvillimit të qëndrueshëm të financave digjitale në funksion të ekonomisë, qytetarëve dhe stabilitetit të sistemit financiar.

U ritheksua përkushtimi për të mbështetur transformimin digjital të sektorit financiar përmes politikave të përgjegjshme, forcimit të kapaciteteve institucionale, modernizimit të infrastrukturës financiare dhe përafrimit të mëtejshëm me standardet evropiane dhe ndërkombëtare.

03/06/2026

Nisin punimet e Konferencës Rajonale të nivelit të lartë për Kripto-asetet dhe Paranë Digjitale, të organizuar nga BQK

Banka Qendrore e Republikës së Kosovës (BQK) hapi punimet e Konferencës Rajonale për Kripto-asetet dhe Paranë Digjitale, me temën “Kornizat e politikave dhe rregullimit në një mjedis në ndryshim”, i cili po mbahet në Prishtinë më 3 dhe 4 qershor 2026.

Ky organizim i nivelit të lartë mbledh përfaqësues nga Fondi Monetar Ndërkombëtar (FMN), guvernatorë dhe përfaqësues të bankave qendrore të rajonit, drejtues të institucioneve financiare, partnerë ndërkombëtarë, përfaqësues të komunitetit akademik, sektorit financiar dhe ekspertë të fushës së financave digjitale.

Konferenca përkon me vizitën e parë në Kosovë të z. Tobias Adrian, Krye-Këshilltar Financiar i FMN-së dhe Drejtor i Departamentit të Tregjeve Monetare dhe të Kapitalit, i cili merr pjesë në disa sesione të agjendës dyditore, përfshirë fjalimin kryesor, diskutimet me bankat qendrore të rajonit, takimin me sektorin financiar vendor dhe ligjëratën publike.

Duke hapur punimet e Konferencës, Guvernatori i Bankës Qendrore të Republikës së Kosovës, z. Ahmet Ismaili, theksoi se zhvillimet e shpejta teknologjike, përfshirë kripto-asetet, format digjitale të parasë, financat e decentralizuara, inteligjencën artificiale dhe sistemet moderne të pagesave, po ndikojnë në mënyrë të thellë në funksionimin e sektorit financiar global.

Ai nënvizoi se këto zhvillime tashmë janë pjesë e agjendës strategjike të bankave qendrore, rregullatorëve dhe industrisë financiare, duke krijuar mundësi për rritjen e efikasitetit, gjithëpërfshirjes financiare, transparencës dhe uljen e kostove të shërbimeve financiare. Njëkohësisht, Guvernatori Ismaili theksoi se këto zhvillime sjellin edhe sfida të rëndësishme për stabilitetin financiar, mbrojtjen e konsumatorëve, integritetin e tregjeve, parandalimin e pastrimit të parave dhe ruajtjen e besimit në sistemin financiar.

Në këtë kontekst, Guvernatori Ismaili theksoi se për vendet e Ballkanit Perëndimor, të cilat karakterizohen nga ekonomi të hapura, ndërlidhje të ngushta financiare dhe flukse të rëndësishme të remitancave, financat digjitale paraqesin një mundësi të rëndësishme për avancimin e integrimit rajonal, modernizimin e shërbimeve financiare dhe përafrimin me tregun financiar evropian.

Ai veçoi progresin e Kosovës në modernizimin e infrastrukturës së pagesave, avancimin e pagesave të shpejta dhe procesin e integrimit në Zonën e Vetme të Pagesave në Euro, si pjesë e përpjekjeve të BQK-së për të ofruar shërbime më të shpejta, më të sigurta dhe më efikase për qytetarët dhe bizneset.

Guvernatori Ismaili theksoi se inovacioni financiar duhet të mbështetet nga korniza të qarta, proporcionale dhe të bazuara në rrezik, të cilat mundësojnë zhvillimin e teknologjisë, por njëkohësisht ruajnë stabilitetin financiar, mbrojnë konsumatorët dhe forcojnë integritetin e tregut.

Në përfundim të fjalës së tij, Guvernatori Ismaili shprehu mirënjohjen për bashkëpunimin e vazhdueshëm me Fondin Monetar Ndërkombëtar, veçanërisht me Departamentin e Tregjeve Monetare dhe të Kapitalit, i cili ka dhënë kontribut të rëndësishëm në forcimin e kapaciteteve institucionale, modernizimin e sektorit financiar dhe avancimin e reformave në Kosovë.

Në fjalimin e tij kryesor, z. Tobias Adrian, krye-Këshilltar Financiar i FMN-së dhe Drejtor i Departamentit të Tregjeve Monetare dhe të Kapitalit, derisa prezantoi zhvillimet kryesore globale, theksoi rëndësinë e ndërtimit të kornizave të qëndrueshme të politikave dhe rregullimit te harmonizuar për të adresuar mundësitë dhe rreziqet që sjell transformimi digjital i financave, duke ruajtur stabilitetin financiar, integritetin e tregjeve dhe besimin publik.

Një fjalë mirëseardhjeje për të pranishmit mbajti edhe Ministri në detyrë i Financave, z. Hekuran Murati, i cili paraqiti pikëpamjet mbi rëndësinë e koordinimit ndërinstitucional, politikave ekonomike dhe krijimit të kushteve për zhvillim, inovacion dhe stabilitet makroekonomik.

Punimet e Konferencës do të vijojnë me prezantime dhe diskutime profesionale nga bankat qendrore të rajonit, përfaqësuesit e FMN-së, sektori financiar dhe partnerët ndërkombëtarë.

Në ditën e dytë të agjendës parashihet edhe një takim me palët vendore të sektorit financiar, prezantimi i Raportit Global të Stabilitetit Financiar të FMN-së, si dhe një diskutim publik ndërmjet Guvernatorit Ismaili dhe z. Tobias Adrian në Fakultetin e Ekonomisë të Universitetit të Prishtinës.

Komunikata 🔗 https://short-url.org/1wg19

Banka Qendrore e Republikës së Kosovës

12/06/2026

11/06/2026

11/06/2026

05/06/2026

04/06/2026

04/06/2026

04/06/2026

04/06/2026

03/06/2026

03/06/2026

Address

Opening Hours

Website

Alerts

Contact The Business

Shortcuts

Share

Category

Monday	08:00 - 16:00
Tuesday	08:00 - 16:00
Wednesday	08:00 - 16:00
Thursday	08:00 - 16:00
Friday	08:00 - 16:00