Mᴏɴʏᴡᴀ Mᴏɴᴇʏ Exᴄʜᴀɴɢᴇs

หน้าหลัก
ประเทศไทย
Bangkok
Mᴏɴʏᴡᴀ Mᴏɴᴇʏ Exᴄʜᴀɴɢᴇs

03/07/2026

ထိုင်းတစ်နိုင်ငံလုံးကို ပါးစပ်အဟောင်းသား ဖြစ်သွားစေခဲ့တဲ့ ထိုင်း.ထီ ပထမဆု ၂၃ စောင် မဟာကံထူးရှင် ထွက်ပေါ်လာ

ဇူလိုင် ၁ ရက်နေ့က ထွက်ရှိသွားခဲ့တဲ့ ထိုင်း.ထီ ဖွင့်ပွဲအပြီးမှာတော့ ထိုင်းတစ်နိုင်ငံလုံး ပါးစပ်အဟောင်းသား ဖြစ်သွားရလောက်မယ့် ကံထူးရှင်တစ်ဦး ပေါ်ထွက်လာခဲ့ပါတယ်။

ဒီတစ်ခေါက် ပထမဆု ထွက်ရှိခဲ့ပြီးတဲ့နောက် Krungthai ဘဏ်ရဲ့ တရားဝင် ထုတ်ပြန်ချက်အရ Pao Tang အက်ပလီကေးရှင်းအတွင်းမှာ စုစုပေါင်း ပထမဆုမဲ ၃၀ စောင် ရှိခဲ့တဲ့အထဲကမှ ကံထူးရှင်တစ်ဦးတည်းက နံပါတ်တူလက်မှတ် ၂၃ စောင်အထိ တစ်ပြိုင်တည်း ဝယ်ယူထားခဲ့တာ ဖြစ်ပါတယ်။

ဒါကြောင့် အဆိုပါ မဟာကံထူးရှင်ဟာ တစ်ဦးတည်းတင် ဘတ် ၁၃၈ သန်းကို ကံထူးသွားခဲ့တာ ဖြစ်ပါတယ်။ ခရုန်းထိုင်းဘဏ်ရဲ့ ထုတ်ပြန်ချက်အရ ကျန်ရှိတဲ့ ပထမဆု ၇ စောင်ထဲမှာတော့ လက်မှတ် ၁ စောင်ချင်း ဆွတ်ခူးသူ ၃ ဦးနဲ့ လက်မှတ် ၂ စောင်တွဲ ဆွတ်ခူးသူ ၂ ဦးတို့ ပေါ်ထွက်ခဲ့တယ်လို့ သိရပါတယ်။

ဒါဟာ ထိုင်း.ထီသမိုင်းမှာ ဖြစ်ခဲလှတဲ့အတွက် ထိုင်းဆိုရှယ်အသုံးပြုသူတွေ စိတ်ဝင်တစား ဆွေးနွေးနေကြသလို "သူဌေးသစ်က ဘယ်သူလဲ" ဆိုတာကို ထိုင်းမီဒီယာတွေက လိုက်လံရှာဖွေနေကြပြီဖြစ်ပါတယ်။
#ထိုင်းသတင်း #ထိုင်းထီ #ဘတ်၁၃၈သန်း #ထိုင်းငွေလွှဲဝန်ဆောင်မှု #ထိုင်းရောက်ရွှေမြန်မာ #ဝန်ဆောင်ခသက်သာ #ယုံကြည်စိတ်ချရ

02/07/2026

(2.07.2026) အရမ်းကိုမှ စိတ်မကောင်းစရာသတင်း

အသက် 11နှစ်ပဲ ရှိသေးတဲ့ ကလေးဟာ၊ သူ့အဖေရဲ့ ကားကို ခိုးလာပီး အပြင်ထွက်ကားမောင်းတာ

လမ်းပေါ်မှာ လမ်းလျောက်တရားကျင့်နေတဲ့ ဘုန်းဘုန်းတွေကို တိုက်မိလို့ နေရာတင် ဘုန်းဘုန်း (၅)ပါး ပျံတော်မူသွားပါတယ်။

ထိုင်းနိုင်ငံ- မုဒက်ဟန်မြို့မှာ (၂)ရက်နေ့ မနက် 11:50က ဖြစ်သွားတာပါ။

11နှစ်ကလေး အဖေရဲ့ ကားခိုးလာပီး မောင်းနှင်မှုကြောင့်၊ နေရာတင် (၅)ပါးပျံတော်မူ၊
ပြင်းထန်ရသွားတာက (၇)ပါး၊
ဒဏ်ရာ အသင့်အတင့်ရတာက (၂၀)ပါးဖြစ်ပါတယ်။

ဘုန်းဘုန်းတို့ကို အရေးပေါ် ဆေးရုံပို့လိုက်ကြပီး မကြာခင် ဘုန်းဘုန်း နောက်ထပ် (၃)ပါး ပျံတော်မူသွားပီး၊ အခုပျံတော်မူသွားကြတာ ဘုန်းဘုန်း (၈)ပါးရှိပါပီလို့သိရပါတယ်။

လက်ရှိ ဆေးရုံမှာ အရေးပေါ် စောင့်ကြည့်နေကြပီး- 11နှစ် ကလေးရဲ့ အမှုကိစ္စကို ဆက်လက် ဆောင်ရွက်သွားမယ်လို့ သိရပါတယ်

08/06/2026

စီးပွားရေးကျပ်တည်းနေချိန်မှာ အဝစား ၁၀ ဘတ် နဲ့ လူအများကို ကူညီပေးနေတဲ့ ထိုင်းအမျိုးသမီး1ဦး

ထိုင်းနိုင်ငံ စူဖန်ဘူရီခရိုင်မှာ အသက် 45 နှစ်အရွယ် အမျိုးသမီး1ဦး ဖွင့်လှစ်ထားတဲ့ ထမင်းဆိုင်တစ်ဆိုင်ဟာ လူမှုကွန်ရက်ပေါ်မှာ ချီးကျူးမှုများစွာ ရရှိထာပါတယ်

ဆိုင်မှာ စားသုံးသူတွေဟာ ထမင်းဟင်းကို တစ်ပွဲလျှင် 10 ဘတ်သာ ပေးပြီး
အဝစားနိုင်ကြသလို အိမ်ယူစားလိုသူများအတွက်တော့ တစ်ထုပ်လျှင် 20 ဘတ်ဖြင့် ရောင်းချပေးနေပါတယ် ပီတော့ သောက်ရေခဲတစ်ခွက်ကိုလည်း 2 ဘတ်သာ သတ်မှတ်ရောင်းချပေးထာတယ်

ဆိုင်ရှင်က နေ့စဉ် ဟင်းအမျိုးအစား 10မျိုးခန့် ချက်ပြုတ်ရောင်းချပေးနေပြီး အမြတ်အစွန်းများများ မကျန်ကြောင်း သိရှိသော်လည်း အလုပ်သမားများ၊ နေ့စားလုပ်သားများနှင့် ဝင်ငွေနည်းမိသားစုများ စားဝတ်နေရေး အဆင်ပြေစေရန် ရည်ရွယ်၍ ဈေးနှုန်းချိုသာစွာ ရောင်းချပေးခြင်းဖြစ်ကြောင်း ပြောကြားခဲ့ပါတယ်။
ဒီအမျိုးသမီးဟာ ယခင်က “ပလာထူ” ဟုခေါ်သည့် ထိုင်းရိုးရာငါးကင်နှင့် ငါးထွက်ကုန်များ ရောင်းချခဲ့သော်လည်း ကုန်ကျစရိတ်များ မြင့်တက်လာမှုကြောင့် လုပ်ငန်းပြောင်းလဲကာ ယခုကဲ့သို့ ထမင်းဟင်းဆိုင် ဖွင့်လှစ်ခဲ့တာဖြစ်ပါတယ်။

သတင်းထွက်ပေါ်လာပြီးနောက် လူမှုကွန်ရက်အသုံးပြုသူ အများအပြားက သူမရဲ့ စေတနာ၊ မေတ္တာနဲ့ လူမှုအကျိုးပြုစိတ်ဓာတ်ကို ချီးကျူးဂုဏ်ပြုခဲ့ကြပြီး ယနေ့ခေတ်လို ကုန်ဈေးနှုန်းမြင့်တက်နေချိန်မှာ အဝစား 10 ဘတ်နဲ့ ရောင်းချပေးတာဟာ အမှန်တကယ် ရှားပါးတဲ့ စေတနာပါ
#ထိုင်းသတင်း #သတင်းစုံ #ထမင်းအဝစား #ထမင်းဆိုင် #တဆယ်ဘတ် #ထိုင်းရောက်ရွှေမြန်မာ
#ထိုင်းငွေလွှဲဝန်ဆောင်မှု #ယုံကြည်စိတ်ချရ #ဝန်ဆောင်ခသက်သာ

07/06/2026

📢 Online ကနေ ရက် 90 တင်နည်းကို အသေးစိတ် တင်ပေးလိုက်ပါတယ်။

ထိုင်းနိုင်ငံမှာ ရောက်ရှိနေကြတဲ့ ညီအစ်ကို မောင်နှမများအတွက် ကုန်ကျစရိတ် မလိုအပ်ဘဲ မကုန်သင့်တာတွေ မကုန်ရအောင်၊ စေတနာအရင်းခံပြီး ကတိပေးထားသည့်အတိုင်း မျှဝေတင်ပေးခြင်း ဖြစ်ပါတယ်။

📌 မှတ်ချက်
Online ကနေ ရက် 90 တင်တဲ့အခါ ရက် 90 မပြည့်ခင် 15 ရက်အလိုလောက်ကတည်းက တင်ထားဖို့ အကြံပြုလိုပါတယ်။

အကြောင်းကတော့ တစ်ခါတစ်ရံ စနစ်အမှားကြောင့်ဖြစ်စေ၊ အချက်အလက် မကိုက်ညီမှုကြောင့်ဖြစ်စေကျတာမျိုး ကြုံရနိုင်ပါတယ်။ အဲ့ဒီလို ဖြစ်ခဲ့ရင် လူဝင်မှုကြီးကြပ်ရေးရုံး (Immigration) ကို ကိုယ်တိုင်သွားရောက် တင်ပြရတာမျိုး ရှိနိုင်တာကြောင့် အချိန်မီ ဆောင်ရွက်နိုင်ရန် ရက်ကြိုတင်တင်ထားခြင်းက ပိုမိုသင့်တော်ပါတယ်။

အားလုံး အဆင်ပြေချောမွေ့စွာ အသုံးပြုနိုင်ကြပါစေ။ 🙏

#ရက်၉၀ထုနည်း

#ထိုင်းငွေလွှဲဝန်ဆောင်မှု
#ထိုင်းရောက်မြန်မာလုပ်သား
#ယုံကြည်စိတ်ချရ
#ဝန်ဆောင်ခသက်သာ

#ทุกคนและผู้ติดตาม

#ထိုင်းရောက်ရွှေမြန်မာ

#ทุกคน
#ผู้ติดตาม

05/06/2026

မြန်မာနိုင်ငံသားဇနီးမောင်နှံရဲ့ ပျောက်ဆုံးသွားတဲ့ သမီးလေး အေးမွန် ကို တွေ့ခဲ့ရင် အကြောင်းကြားပေးကြပါ။

သမီးလေးအသက်က 2နှစ် 3လရှိပီး၊ အရပ်အမြင့် 70စင်တီမီတာ၊ ကိုအလေးချိန် 15ကီလို၊ဆံပင်တိုတို၊ အသားညိုညို၊ ညာဘက်ပေါင်မှာ မွေးရာပါ အမှတ်မဲရှိပါတယ်ရှင့်

ပျောက်တဲ့နေ့က (28.05.2026)နေ့က ခန့်မှန်းချိန် မနက်10:00ဝန်းကျင်မှာ၊ အမေဆီကို လိုက်သွားရင်းရုတ်တရက် ပျောက်ဆုံးသွားပါတယ်။

ပျောက်တဲ့နေ့က အင်ကျီ ပန်းရောင်လေးနဲ့၊ ဖိနပ် အပြာရောင်ကို စီးထားပါတယ်။

သမီးလေးတို့ နေထိုင်တဲ့မြို့က ဖန်ငါမြို့မှာ နေကြပါတယ်။

တကယ်လို့ သမီးလေးကို တွေ့ခဲ့ရင် (080-775-2673)
ကိုဆက်သွယ် အကြောင်းကြားနိုင်ပါတယ်လို့ သတင်းမှာ ဖော်ပြထားပါတယ်ရှင့်။

#ထိုင်းရောက်မြန်မာလုပ်သား #မြန်မာကလေး #ပျောက်ဆုံး #ထိုင်းငွေလွှဲဝန်ဆောင်မှု #ယုံကြည်စိတ်ချရ #ဝန်ဆောင်ခသက်သာ

05/06/2026

မြန်မာကိုယ်ဝန်ဆောင် ညီမလေး ဘတ် (၆) သန်း ပထမဆုကြီး ကံထူး 🎉

တကယ်ကို မယုံနိုင်စရာကောင်းလောက်အောင် ဝမ်းသာပီတိဖြစ်ရတဲ့ ဖြစ်ရပ်လေးတစ်ခုပါဗျာ။ 🥰

သူမကတော့ ထိုင်းနိုင်ငံ၊ မဲဆောက်မြို့က ဈေးတစ်ခုမှာ ဟင်းသီးဟင်းရွက်တွေ ရောင်းချရင်း ဘဝကို ပင်ပင်ပန်းပန်း ရုန်းကန်နေရတဲ့ အသက် (၂၅) နှစ်အရွယ် ညီမလေးတစ်ယောက်ပါ။ လက်ရှိမှာတော့ ကိုယ်ဝန် (၅) လွယ်ထားရတဲ့ မိခင်လောင်းတစ်ဦးလည်း ဖြစ်ပြီး မိသားစုအနာဂတ်အတွက် နေ့မနား ညမနား ကြိုးစားနေသူ ဖြစ်ပါတယ်။

🍀 ထီသည်ခေါ်ရာကစခဲ့တဲ့ ကံကြမ္မာအလှည့်အပြောင်း

ဒီနေ့ (ဇွန်လ ၁ ရက်နေ့) နေ့လယ် ၁၂ နာရီလောက်မှာ ဈေးထဲကို ထီသည်ဦးလေးကြီး ရောက်လာပြီး "ထီလေး ဝယ်သွားပါဦး" လို့ ခေါ်တာနဲ့ ညီမလေးလည်း စိတ်ကူးပေါက်တာနဲ့ ထီလက်မှတ်တစ်စောင်ကို ရွေးဝယ်လိုက်ပါတယ်။ သူမဝယ်လိုက်တဲ့ ထီလက်မှတ်လေးကို ခင်ပွန်းဖြစ်သူကလည်း သေသေချာချာနဲ့ တန်ဖိုးထားပြီး သိမ်းဆည်းပေးထားခဲ့တာပါ။

💸 မယုံနိုင်စရာ ညနေခင်း ၄ နာရီ

ညနေ ၄ နာရီမှာ ထိုင်းထီရလဒ်တွေ ထွက်လာတဲ့အခါမှာတော့ လင်မယားနှစ်ယောက်လုံး အံ့ဩလွန်းလို့ အော်ဟစ်မိတဲ့အထိ ဖြစ်သွားခဲ့ရပါတယ်။ ဘာဖြစ်လို့လဲဆိုတော့ သူတို့ဝယ်ထားတဲ့ (173770) နံပါတ်လေးဟာ ဘတ် (၆) သန်း (၆,၀၀၀,၀၀၀ ဘတ်) တန်ဖိုးရှိတဲ့ ပထမဆုကြီး တည့်တည့် တိုးနေလို့ပါပဲ။

"ကံကောင်းမယ်လို့ လုံးဝကို မထင်ထားခဲ့မိပါဘူး" လို့ ရင်ဖွင့်လာတဲ့ ညီမလေးတို့ ဇနီးမောင်နှံဟာ ဒီဆုကြေးငွေလေးနဲ့ လက်ရှိရှိနေတဲ့ အကြွေးသမျှကို အမြန်ဆုံး ဆပ်သွားမှာဖြစ်ပြီး ကျန်တဲ့ငွေတွေကိုတော့ မွေးလာမယ့် ရင်သွေးလေးရဲ့ အနာဂတ်နဲ့ မိသားစုဘဝ ပိုမိုကောင်းမွန်လာစေဖို့အတွက် သေချာစီမံ သုံးစွဲသွားမယ်လို့ ဆိုပါတယ်။

ဘဝရဲ့ အခက်ခဲဆုံးနဲ့ အပင်ပန်းဆုံး အချိန်မျိုးမှာမှ ကံတရားက ဒီလိုမျိုး ကြီးမားတဲ့ ဆုလာဘ်ကြီး ပေးသနားလိုက်တာ တကယ်ကိုပဲ ဝမ်းမြောက်ဂုဏ်ယူစရာ ကောင်းလှပါတယ်။

ညီမလေးရေ... မကြာခင် မွေးဖွားလာတော့မယ့် ရင်သွေးလေးနဲ့အတူ မိသားစုဘဝလေး စိတ်ချမ်းသာ၊ ကိုယ်ကျန်းမာစွာနဲ့ ရုန်းကန်ရတဲ့ဘဝကနေ လွတ်မြောက်ပြီး သာယာပျော်ရွှင်စွာ ရှေ့ဆက်နိုင်ပါစေကြောင်း ဆုမွန်ကောင်း တောင်းပေးလိုက်ရပါတယ်နော်။ 🤰❤️👶
#ထိုင်းရောက်မြန်မာလုပ်သား #မြန်မာကိုယ်ဝန်ဆောင်မိခင် #ထိုင်းထီ #ပထမဆု #ထိုင်းငွေလွှဲဝန်ဆောင်မှု #ဝန်ဆောင်ခသက်သာ #ယုံကြည်စိတ်ချရ

30/05/2026

မဟာချိုင်တွင် စက်ရုံမီးလောင်၍ မြန်မာလုပ်သား၏ ဘတ် ၉ သိန်းခန့်ရှိ ရွှေနှင့် ငွေသားများ မီးထဲပါသွား

Dawei Watch | မေ ၂၀

ထိုင်းနိုင်ငံ၊ စမွတ်စခွန်ခရိုင်၊ မဟာချိုင်ဒေသတွင် စက်ရုံအတွင်း မီးလောင်မှုဖြစ်ပွားရာမှ မြန်မာအလုပ်သမားတစ်ဦး သိမ်းဆည်းထားသော ရွှေဆွဲကြိုးနှင့် ငွေသားများ မီးထဲပါသွားကြောင်း ထိုင်းသတင်းဌာနများတွင် ဖော်ပြသည်။

စမွတ်စခွန်ခရိုင်၊ ကထူးဘန်ဒေသတွင် ယနေ့ နံနက် ၁၀ နာရီခန့်က အလူမီနီယံထုတ်လုပ်သည့် စက်ရုံအတွင်း မီးလောင်မှု ဖြစ်ပွားခဲ့ခြင်းဖြစ်သည်။

စက်ရုံအတွင်း မီးလောင်မှုကို မီးသတ်ယာဉ် ၁၀ စီးဖြင့် ငြိမ်းသတ်ခဲ့ရပြီး စက်ရုံခေါင်မိုးနှင့် ပစ္စည်းများ ပြိုကျကာ ထိခိုက်ပျက်စီးသွားခဲ့သည်။

မီးလောင်မှုကြောင့် ထိခိုက်ဒဏ်ရာရရှိသူ မရှိကြောင်း သတင်းများအရ သိရသည်။

မီးငြိမ်းသတ်ပြီးနောက် မြန်မာအလုပ်သမား ခေါင်းဆောင်တစ်ဦးက စက်ရုံအတွင်း သိမ်းဆည်းထားသော တန်ဖိုးရှိ ပစ္စည်းများကို ရှာဖွေပေးရန် တောင်းဆိုခဲ့သဖြင့် ကူညီရှာဖွေပေးခဲ့ကြသည်။

၎င်း၏ အိတ်ထဲတွင် ငွေသား ဘတ် ၂ သိန်းနှင့် (ဘတ် ၇ သိန်းခန့် တန်ဖိုးရှိ) ၁၀ ဘတ်သား အလေးချိန်ရှိ ရွှေဆွဲကြိုးကို စားပွဲခုံအတွင်း သိမ်းဆည်းထားခဲ့ခြင်းဖြစ်ကြောင်း အဆိုပါ မြန်မာအလုပ်သမားက ဆိုသည်။

သို့သော်လည်း မီးလောင်ကျွမ်းသွားမှုကြောင့် ငွေသားနှင့် ရွှေများအားလုံး ရှာမတွေ့ခဲ့ကြောင်း သတင်းတွင် ဖော်ပြထားသည်။

လက်ရှိတွင် မီးလောင်မှု ဖြစ်ပွားရသည့် အကြောင်းအရင်းကို တာဝန်ရှိသူများက စုံစမ်းစစ်ဆေးနေဆဲဖြစ်သည်။

Ref: Khaosod, Thaipost, Thairath
#ထိုင်းသတင်း #ထိုင်းရောက်မြန်မာလုပ်သား #စက်ရုံ #မီးလောင်မှု #ထိုင်းငွေလွှဲဝန်ဆောင်မှု #ယုံကြည်စိတ်ချရ #ဝန်ဆောင်ခသက်သာ

30/05/2026

၁၉၉၈ ခုနှစ်မှာ ကားလ်ဘွတ်ရှ်ဘီ (Karl Bushby) ဟာ တောင်အမေရိကတိုက်ရဲ့ တောင်ဘက်အစွန်းဆုံးကနေ သူ့ရဲ့အိမ်ရှိရာ အင်္ဂလန်နိုင်ငံအထိ လမ်းလျှောက်ပြန်မယ်ဆိုပြီး ဘားတစ်ခုမှာ လောင်းကြေးထပ်ခဲ့ပါတယ်။ ၁၂ နှစ်လောက်ပဲ ကြာမယ်လို့ သူထင်ခဲ့ပေမယ့် အခုဆိုရင် ၂၇ နှစ်ကြာ ခရီးစဉ်ကြီး ဖြစ်လာခဲ့ပါပြီ။ သူဟာ တိုက်ကြီး ၄ တိုက်နဲ့ နိုင်ငံပေါင်း ၂၅ နိုင်ငံကို ဖြတ်သန်းပြီး မိုင်ပေါင်း ၃၁,၀၀၀ ကို လမ်းလျှောက်ခဲ့ပါတယ်။ ရေခဲနေတဲ့ ဘဲရင်းရေလက်ကြားကိုလည်း ရွေ့လျားနေတဲ့ ပင်လယ်ရေခဲပြင်တွေပေါ်ကနေ ခြေလျင်ဖြတ်ကူးခဲ့ပါတယ်။ ကိုလံဘီယာနဲ့ ပနားမားကြားက အသက်အန္တရာယ်များတဲ့ ဒါရီယန်တောအုပ်ကြီးကိုလည်း အသက်ရှင်လျက် ဖြတ်ကျော်နိုင်ခဲ့ပါတယ်။ ဘယ်တော့မှ မချိုးဖောက်တဲ့ သူ့ရဲ့ စည်းမျဉ်းနှစ်ခုကတော့ ခရီးဆက်ဖို့အတွက် စက်တပ်ယာဉ် ဘာမှမသုံးဘူးဆိုတာနဲ့ ခြေလျင်လျှောက်ပြီး မရောက်မချင်း အိမ်မပြန်ဘူး ဆိုတာပါပဲ။ ၂၀၁၃ ခုနှစ်မှာ ရုရှားက သူ့ကို ပြည်ဝင်ခွင့် ၅ နှစ်ပိတ်ပင်လိုက်တဲ့အခါ အသနားခံဖို့အတွက် လော့စ်အိန်ဂျလိစ်ကနေ ဝါရှင်တန်ဒီစီမှာရှိတဲ့ ရုရှားသံရုံးအထိ မိုင် ၃,၀၀၀ ကျော်ကို လမ်းလျှောက်သွားခဲ့ပြီး အဲဒီပိတ်ပင်မှုကို ပယ်ဖျက်နိုင်ခဲ့ပါတယ်။ ၂၀၂၄ ခုနှစ်မှာတော့ ဥရောပကိုသွားဖို့ အီရန်နဲ့ ရုရှားကို ဖြတ်လျှောက်လို့မရတဲ့ မဖြစ်နိုင်တဲ့ အတားအဆီးတစ်ခုနဲ့ ကြုံတွေ့ခဲ့ရပါတယ်။ ဒါကြောင့် ကက်စပီယန်ပင်လယ်ကို ၃၁ ရက်ကြာ ရေကူးဖြတ်သန်းခဲ့ပြီး ကီလိုမီတာ ၂၈၈ အထိ ခရီးဆက်ခဲ့ပါတယ်။ သူက ရေကူးသမားတစ်ယောက် မဟုတ်ပေမယ့်လည်း ဒီလိုလုပ်နိုင်ခဲ့ပါတယ်။ အခုချိန်မှာတော့ သူဟာ ဟန်ဂေရီနိုင်ငံကို ရောက်နေပြီဖြစ်ပြီး သူ့ရဲ့မွေးရပ်မြေ အင်္ဂလန်နိုင်ငံ၊ ဟာလ်မြို့နဲ့ ၉၃၂ မိုင်လောက်ပဲ ကွာဝေးပါတော့တယ်။ ၂၀၂၆ ခုနှစ် စက်တင်ဘာလမှာ ခရီးစဉ်ပြီးဆုံးမယ်လို့ ခန့်မှန်းရပါတယ်။ ဆယ်စုနှစ် သုံးခုနီးပါး ခရီးဆက်ပြီးတဲ့နောက်မှာတော့ ခေတ်သစ်သမိုင်းမှာ အကြမ်းတမ်းဆုံး ခြေလျင်ခရီးစဉ်ကြီးတစ်ခုရဲ့ နိဂုံးချုပ်ကို တဖြည်းဖြည်း ရောက်ရှိလို့လာပါပြီ။ သူ စတင်ခဲ့တုန်းက အသက် ၂၉ နှစ်ဖြစ်ပြီး အခုဆိုရင်တော့ အသက် ၅၆ နှစ် ရှိနေပါပြီ။
#ထိုင်းငွေလွှဲဝန်ဆောင်မှု #ယုံကြည်စိတ်ချရ #ဝန်ဆောင်ခသက်သာ

30/05/2026

ကျွန်တော် အလုပ်ကနေ အိမ်ပြန်ဖို့ ကားမောင်း
လာချိန်မှာ၊ ကောင်းကင်ကြီး ကွဲအက်သွားသလို
မျိုး မိုးတွေ သဲသဲ မဲမဲ ရွာချပါတော့တယ်။

မိုးက တဖြေးဖြေး ပိုသည်းလာပါတယ်။

မကြာခင်မှာပဲ ကားလမ်းမပေါ်အထိ ရေတွေ လျှံတက်လာခဲ့ပါတယ်။

ရေစီးက အရှိန်ရစပြုနေပြီဖြစ်လို့ ရေကျော်နေတဲ့ လမ်းပိုင်းကို စိုးရိမ်စိတ်နဲ့ အနိုင်နိုင် ဖြတ်ကျော်ခဲ့ရပါတယ်။

ရေကျော်နေတဲ့နေရာက တဖြေးဖြေး ရေစီးအရမ်းသန်လာပါတယ်။

ကျွန်တော်ကတော့.... ကျွန်တော့်ရဲ့ ထရပ်ကားကို တံတားပေါ် ရောက်အောင် အနိုင်နိုင် မောင်းတက်ခဲ့ရပါတယ်။

အဲဒီအချိန်မှာပဲ ကျောင်းကြိုပို့ ဘတ်စ်ကားတစ်စီးကို ကျွန်တော် မြင်လိုက်ရပါတယ်။

"ရစ်ဗားဆိုက်" _ Riverside မူလတန်းကျောင်းက၊ မူကြိုကျောင်းသားလေးတွေ အပြည့်ပါလာတဲ့ အဝါရောင် ကျောင်းကားတစ်စီးပါ။

ကားဖြတ်ကျော်နေတဲ့အချိန်မှာ ရေစီးက အရှိန်ရနေတဲ့အတွက်၊ လမ်းပေါ်ကနေ ရေစီးနဲ့ မျောပါသွားပြီး ကွန်ကရစ် အတားအဆီးတစ်ခုမှာ ဘေးတိုက် ကန့်လန့်ခံပြီး ညပ်နေခဲ့ပါတယ်။

ရေက ကားဘီးတွေကိုကျော်ပြီး ပြတင်းပေါက် အောက်ခြေအထိ တက်လာတာနဲ့အမျှ ကားကြီးက တဖြည်းဖြည်း စောင်းလာခဲ့ပါတယ်။

ကျောင်းဆရာမ တစ်ယောက်ကတော့ ကားခေါင်မိုး အပေါက်ကနေ အပြင်ကို တွယ်တတ်ပြီး၊ ဖုန်းတစ်လုံးနဲ့ အော်ဟစ် အကူအညီတောင်း နေခဲ့ပါတယ်။

ကလေးတွေကို ကူညီဖို့ ကားထဲ သူ ပြန်ဝင်မသွားပါဘူး။ ကားအမိုးပေါ်မှာပဲ ကြောက်လန့်တကြား ရပ်နေခဲ့တာပါ။

အသက် ၅ နှစ်အရွယ် ကလေးငယ် ၂၃ ယောက်ကတော့ ကားထဲမှာ ကျန်နေခဲ့တုန်းပါပဲ။

တံတားပေါ်က လူတွေကတော့ ဖုန်းတွေမြှောက်ပြီး ဗီဒီယိုရိုက်နေကြတယ်။ ဘယ်သူမှ ဆင်းမကယ်ကြပါဘူး။

အဲဒီနောက်မှာ မော်တော်ဆိုင်ကယ်သမားတွေ ရောက်လာခဲ့ပါတယ်။

သူတို့ကလည်း အခြားသူများနည်းတူ သဲထန်တဲ့မိုးရေတွေနဲ့ ရေကျော်နေတဲ့ ကားလမ်းနေရာမှာ ပိတ်မိနေတာပါ။ သူတို့က 'ဟဲလ်စ် အန်ဂျယ်လ်စ်' _Hells Angels ဆိုင်ကယ်ဂိုဏ်းက ဆိုင်ကယ်သမား ၁၅ ယောက်ဖြစ်ပါတယ်။

သူတို့က ရပ်ထားတဲ့ ကားတွေရဲ့ အနောက်မှာ ဆိုင်ကယ်တွေကို ရပ်ပြီး ကျွန်တော်တို့ မြင်နေရတဲ့ မြင်ကွင်းကို လှမ်းကြည့်ကြပါတယ်။

အဲဒါကတော့ ကလေးတွေနဲ့ ပြည့်နေတဲ့ ဘတ်စ်ကားကြီးဟာ မကြာခင် ဝမ်းနည်း ကြေကွဲဖွယ်ရာ ဖြစ်တော့မှာပါ။
သူတို့ထဲက 'တင့်ခ်' _ Tank လို့ ခေါ်တဲ့ လူက ရေထဲကို ပထမဆုံး ဆင်းသွားခဲ့ပါတယ်။

သူက အရပ် ၆ ပေ ၄ လက်မ၊ ကိုယ်အလေးချိန် ပေါင် ၃၀၀ ခန့်ရှိပြီး လမ်းတွင် တွေ့ပါက လူတိုင်း ရှောင်ကွင်းသွားရလောက်အောင် တက်တူးတွေ တစ်ကိုယ်လုံး ပြည့်နေတဲ့သူပါ။

ဘာစကားတစ်ခွန်းမှ မပြောဘဲ သူ တံတားပေါ်ကနေ ရေထဲကို ဆင်းသွားပါတယ်။
"ဟင့်အင်း..."
ကားအမိုးပေါ်က ဆရာမက အော်ပြောပါတယ်။

"သူတို့နား မလာနဲ့။ ရှင့်မှာ ခွင့်ပြုချက် လုပ်ပိုင်ခွင့် မရှိဘူး။ ဒီကို မီးသတ်ဌာနက လာနေပြီ။"

'တင့်ခ်' က ဘတ်စ်ကားဆီကို ရောက်နေပါပြီ။ ကားထဲကို ရေတွေဝင်နေပါပြီ။ ရေတွေက ကလေးတွေရဲ့ ရင်ဘတ်အထိ ရောက်နေတဲ့အတွက်၊ ကလေးငယ်လေးများမှာ ခေါင်း အပေါ်ကို မော့ထားရင်း အသက်ရှူနေကြရပါတယ်။

"တံခါးဖွင့်စမ်း..." လို့ 'တင့်ခ်' က ဟိန်းဟောက်ပြီး အော်လိုက်ပါတယ်။

"ကားမောင်းသမားဆီမှာ သော့ပါသွားတယ်" လို့ ဆရာမက ပြန်အော်ပြောပါတယ်။

ကားမောင်းသမားက မရှိတော့ပါဘူး။ နောက်မှ သိရတာကတော့ ရေစကြီးတာနဲ့ သူက အရင်ဆုံး ထွက်ပြေးသွားခဲ့တာပါ။

နစ်မြုပ်နေတဲ့ ဘတ်စ်ကားထဲမှာ အသက် ၅ နှစ်အရွယ် ကလေး ၂၃ ယောက်ကို သော့ပိတ်ပြီး ထားရစ်ခဲ့တာ ဖြစ်ပါတယ်။

'တင့်ခ်' က ကားအနောက်ဘက်ကို ကူးသွားပြီး အရေးပေါ်ထွက်ပေါက် မှန်ကို သူ့ရဲ့ လက်ဗလာနဲ့ ထုရိုက်ပါတော့တယ်။

လုံခြုံရေးမှန်ဆိုတော့ အလွယ်တကူနဲ့ ကွဲအက်သွားတာမျိုး မရှိပါဘူး။

ကျွန်တော်ကြည့်နေရင်း သူ့ရဲ့လက်မှာ သွေးတွေ မြင်လိုက်ရပါတယ်။ လက်ဖဝါးတွေလည်း စုတ်ပြတ်သတ်သွားကာ သွေးတွေဟာ လက်မောင်းကနေတစ်ဆင့် ရေထဲကို စီးကျနေပါတယ်။

နောက်ထပ် ဆိုင်ကယ်သမားတွေဖြစ်တဲ့ 'ဒီဇယ်' _ Diesel၊ 'စပိုက်ဒါ' _Spider နဲ့ 'ဘုဒ်စ်' _Boots တို့လည်း ရေထဲကို ခုန်ချလာကြပါတယ်။

သူတို့က ရေစီးသန်နေတဲ့ နေရာမှာ. တစ်ယောက်လက်ကို တစ်ယောက်ချိတ်လိုက်ကြပြီး ကြံ့ကြံ့ခံနိုင်ဖို့ ရုန်းကန်ခဲ့ကြပါတယ်။

အဆုံးမှာတော့ 'တင့်ခ်'က မှန်ကို ခွဲနိုင်ခဲ့ပါတယ်။ သူဟာ သွေးထွက်နေတဲ့ လက်မောင်းတွေကို ကွဲအက်နေတဲ့ မှန်ပြတင်းပေါက်ထဲ ထိုးသွင်းပြီး ကားထဲကို ဝင်သွားခဲ့ပါတယ်။

"သူတို့ကို အပြင်ထုတ်တော့။ အခုချက်ချင်း။" လို့ သူက သူ့ရဲ့ ညီအစ်ကိုတွေကို လှမ်းအော်ပြောလိုက်တယ်။

သူတို့က ကလေးတွေကို မှန်အပေါက်ကနေတစ်ဆင့် လက်ဆင့်ကမ်း ပေးကြပါတော့တယ်။

ဦးခေါင်းခွံပုံတွေနဲ့ သေမင်းတက်တူးတွေ ပြည့်နေတဲ့ လူဗလကြီးတွေဟာ အသက် ငါးနှစ်အရွယ် ကလေးငယ်တွေကို ဖန်ခွက်လေးတွေလို ညင်သာစွာ ကိုင်တွယ်ပြီး ကယ်တင်နေကြပါတယ်။

ကောင်မလေးတစ်ယောက်ကို 'ဒီဇယ့် ဆီ' လက်လွှဲပေးတဲ့အချိန်မှာ 'စပိုက်ဒါ' ဟာ မျက်ရည်တွေ ကျနေရှာတယ်။

"သမီးလေး ဘာမှမဖြစ်တော့ဘူးနော်၊ ဦးတို့ ကယ်လိုက်ပြီ။"လို့ အားပေးစကားပြောပါတယ်။

ဆရာမ ကတော့ ကားအမိုးပေါ်မှာပဲ ရှိနေတုန်း၊ ဖုန်းဆက်နေတုန်းပါပဲ။

"သူတို့က လူဆိုးဂိုဏ်းက လူတွေ... သူတို့ ကလေးတွေဆီ ရောက်လာပြီ... ရဲတွေ အမြန်လွှတ်ပေးပါ" လို့ ဖုန်းထဲက အရေးပေါ်အော်ပရေတာကို အော်ဟစ်ပြောနေခဲ့ပါတယ်။

"ခင်ဗျား... ပါးစပ်ပိတ်ပြီး လာကူစမ်းဗျာ။" လို့ 'ဘုဒ်စ်' က လှမ်းအော်ပြောပေမဲ့ ဆရာမက သူ့စကားကို အရေးမစိုက်ပါဘူး။

ဘတ်စ်ကားကြီးက အသံအကျယ်ကြီး ထွက်လာပြီး နေရာရွေ့သွားကာ ပိုပြီး စောင်းသွားခဲ့ပါတယ်။ အခုဆိုရင် ရေက ပြတင်းပေါက်တွေအထိ ရောက်လာပါပြီ။

အဲဒီအချိန်မှာပဲ အသက် ၅ နှစ်အရွယ် ကလေးမလေး တစ်ယောက်ရဲ့ အော်သံကြောင့် အခြေနေ ပြောင်းလဲသွားပါတယ်။
"သမီးမောင်လေး ခုံအောက်ထဲမှာ..."

အသက် ၃ နှစ်အရွယ် ကောင်လေး ဟာ တကယ်တော့ ဒီကျောင်းကားပေါ်မှာ ပါလာရမယ့်သူ မဟုတ်ပါဘူး။

သူတို့အမေက အလုပ်နှစ်ခု လုပ်နေရပြီး ကလေးထိန်းကျောင်း ပို့ဖို့ ပိုက်ဆံမတတ်နိုင်တာကြောင့် အစ်မဖြစ်သူက မောင်လေးကို ကားပေါ် ခိုးတင်လာခဲ့တာပါ။

ရေတွေ ဝင်လာတဲ့အချိန်မှာ ကလေးက ထိုင်ခုံကြားက ကြမ်းပြင်ပေါ်မှာ ထိုင်နေခဲ့တာပါ။

'တင့်ခ်' ဟာ အသက်ကို ဝဝရှူပြီး နောက်ကျိနေတဲ့ ရွှံ့ရေအောက်ထဲကို ငုပ်လျှိုးဝင်သွားခဲ့တယ်။ မျက်စိရှေ့ကနေ ပျောက်ကွယ်သွားတယ်။ ခဏနေတော့ ရေပေါ် ပြန်တက်လာပြီး အမောတကော အသက်ရှူတယ်။ ပြီးတော့ ရေထဲ ထပ်ငုပ်သွားပြန်တယ်။

သူ မှန်ခွဲတုန်းက ရထားတဲ့ ဒဏ်ရာတွေကနေ သွေးတွေ အဆက်မပြတ် စီးကျလာတာကြောင့် သူ့ပတ်ပတ်လည်က ရေတွေဟာ နီရဲလို့သွားခဲ့တယ်။

ဘတ်စ်ကားကြီးက ဝုန်းခနဲ ယိုင်နဲ့သွားပြီး သံထည်တွေ အချင်းချင်း ပွတ်တိုက်သံကြီးက စူးစူးဝါးဝါး ထွက်ပေါ်လာခဲ့တယ်။

"တင့်ခ်..အပြင်ထွက်ခဲ့တော့။ ကားက ရေစီးနဲ့ပါတော့မယ်.." လို့ သူ့အဖွဲ့သားတွေက လှမ်းအော်ကြတယ်။

ကလေး ၂၂ ယောက်ကတော့ အပြင်ကို ရောက်သွားခဲ့ပြီ။ ဒါပေမဲ့ 'တင့်ခ်' ကတော့ ကားထဲမှာပဲ ရှိနေတုန်း၊ ရေငုပ်နေတုန်း၊ သူတစ်ခါမှ မမြင်ဖူး၊ မသိဖူးတဲ့ အသက် ၃ နှစ်အရွယ် ကလေးလေးကို ရှာဖွေနေတုန်းပါပဲ။
ဘတ်စ်ကားကြီးက ၄၅ ဒီဂရီထက်မက ပိုစောင်းသွားခဲ့ပြီ။ ခွဲထားတဲ့ မှန်ပြတင်းပေါက်ကနေတစ်ဆင့် ရေတွေ ဝုန်းဝုန်းနဲ့ တိုးဝင်လာပြီး ထွက်ပေါက်က ရေအောက်ကို ရောက်သွားပါပြီ။

အဲဒီအချိန်မှာပဲ 'တင့်ခ်' ရေပေါ် ပြန်တက်လာခဲ့ပါတယ်။ သူ့ရဲ့ လက်မောင်းထဲမှာ ကလေး လေး ပါလာခဲ့ပါတယ်။ ကလေးလေးက ပျော့ခွေပြီး မလှုပ်တော့ပါဘူး။

ဒါပေမဲ့ သူတို့ ထွက်ရမယ့် ပြတင်းပေါက်က အခုဆို ရေအောက်ထဲ လုံးဝ မြုပ်သွားခဲ့ပြီ။ အဲဒီပေါက်ကနေပဲ အပြင်ထွက်ဖို့နည်းလမ်း ရှိပါတော့တယ်။

တင့်ကား ဟာ အသက်ကို တစ်ချက်တည်း အဝရှူပြီး ကလေးကို သူ့ရင်ဘတ်မှာ မြဲမြံစွာ ပွေ့ဖက်ကာ ရေအောက်ထဲရောက်နေတဲ့ အပေါက်ကနေ ငုပ်လျှိုး ထွက်လိုက်ပါတယ်။

ရေစီးသန်လှတဲ့ ရေလှိုင်းတွေက သူတို့ကို ရေစီးအတိုင်း မျောပါသွားစေပြီး ကွန်ကရစ် တံတားတိုင်ကြီးဆီကို ဆွဲခေါ်သွားပါတော့တယ်။

အဲဒီတံတားတိုင်ကြီးကို သွားဆောင့်မိရင် သူတို့နှစ်ယောက်စလုံး သေသွားနိုင်ပါတယ်။

'စပိုက်ဒါ' ဟာ ချိတ်ထားတဲ့ လူသားကွင်းဆက်ကနေ ရုန်းထွက်ပြီး သူတို့နောက်ကို အမြန်ကူးခပ်ခဲ့ပါတယ်။

တံတားပေါ်ကနေလည်း နောက်ထပ် ဆိုင်ကယ်သမားတွေ ရေထဲကို ထပ်ပြီး ခုန်ချလာကြပါတယ်။

သူတို့ဟာ ရေစီးကြောင်းကို ဖြတ်ပြီး အလျားလိုက်အတိုင်း၊ အသည်းအသန်နဲ့ လူသားကွင်းဆက်အသစ်တစ်ခုကို ထပ်ပြီး တည်ဆောက်လိုက်ကြတယ်။

တိုင်နဲ့ မဆောင့်မိခင် သုံးစက္ကန့်အလိုမှာ 'ဘုထ်စ်' က' စပိုက်ဒါ' ရဲ့ လက်ကို ဖမ်းမိလိုက်တယ်။

ရေစီးရဲ့ အရှိန်အဟုန်ပြင်းလွန်းတာကြောင့် သူတို့လက်တွေ ပြုတ်ထွက်လုနီးပါး ဖြစ်ခဲ့ပေမဲ့ နောက်ဆုံးတော့ မြဲမြံစွာ ဖက်တွဲထားနိုင်ခဲ့ကြပါတယ်။

သူတို့က 'တင့်ခ်' နဲ့ ကလေးကို တံတားတိုင်ဆီ ဆွဲခေါ်လာခဲ့ကြတယ်။ 'တင့်ခ်' ကတော့ သတိလစ်နေခဲ့ပြီး သူ့ရဲ့လက်မောင်းတွေကတော့ ကလေးလေးကို တင်းတင်းကြပ်ကြပ် ပွေ့ဖက်ထားတုန်းပါပဲ။
ကလေးကတော့ အသက်မရှူတော့ပါဘူး။

'ဒီဇယ်' က 'တင့်ခ်' ကို ပြုစုပေးနေချိန်မှာ 'စပိုက်ဒါ' ကတော့ ကလေးလေးရဲ့ သေးငယ်တဲ့ ခန္ဓာကိုယ်ပေါ်မှာ နှလုံးနှိုးတဲ့ အသက်ကယ်နည်း ကို စတင်လုပ်ဆောင်ပေးပါတယ်။

ကွန်ကရစ်တိုင်ကို ဖက်တွဲထားရင်းနဲ့ပဲ ဒီလူတွေဟာ စွန့်စားပြီး ကယ်တင်ခဲ့ရတဲ့၊ အသက်တွေကို ဆက်လက်ရှင်သန်ခွင့်ရဖို့ အသည်းအသန် ကြိုးစားပေးခဲ့ကြပါတယ်။

ကလေးက ချောင်းဆိုးလိုက်ပြီး ရေတွေ အန်ထွက်လာခဲ့တယ်။ အဲဒီနောက်မှာတော့ ငိုသံလေး ထွက်ပေါ်လာခဲ့တယ်။ ဒါဟာ ကျွန်တော့်ဘဝတစ်လျှောက် ကြားဖူးသမျှထဲမှာ အလှပဆုံး အသံပါပဲ။

'တင့်ခ်'က မျက်လုံးပွင့်လာခဲ့တယ်။ "ကလေးတွေကော..." လို့ သူက တိုးတိုးလေး မေးရှာပါတယ်။

"အားလုံး ဘေးကင်းတယ်။ တစ်ယောက်မကျန်ပဲ...ဆရာမလည်းပါတယ်" လို့ ဖြေကြပါတယ်။

သူတို့ရဲ့ အနောက်မှာတော့ ဘတ်စ်ကားကြီးဟာ လုံးဝ တိမ်းမှောက်သွားပြီး ရေအောက်ထဲကို နစ်မြုပ်သွားခဲ့ပါတော့တယ်။

မီးသတ်ဌာနကတော့ အားလုံး ပြီးဆုံးသွားပြီး မိနစ် ၂၀ ကြာမှ ရောက်လာတာပါ။

အစပိုင်းမှာတော့ မီးသတ်ဌာနက သူတို့ပဲ ကယ်တင်ခဲ့သလိုမျိုး ပြုလုပ်ခဲ့ကြသေးတယ်။ ဖုန်းနဲ့ ရိုက်ထားတဲ့ ဗီဒီယိုတွေ အများကြီး အွန်လိုင်းပေါ် ရောက်မလာခင်အထိပေါ့။

ဗီဒီယိုတွေထဲမှာ ကျွန်တော်တို့အကုန်လုံး ရပ်ကြည့်နေချိန်မှာ 'ဟဲလ်စ် အန်ဂျယ်လ်စ်' _Hells Angels အဖွဲ့သားတွေက ရေထဲခုန်ချနေကြတာ။

တက်တူးအပြည့်နဲ့ လက်မောင်းတွေက ကလေးငယ်လေးတွေကို ဘေးကင်းရာဆီ လက်ဆင့်ကမ်း ပေးနေကြတာ။

လူဆိုးလို့ အထင်ခံရသူတွေ က ကလေးတွေကို ကယ်တင်နေချိန်မှာ ကျောင်းဆရာမကတော့ အမိုးပေါ်မှာ ရပ်ပြီး ဘာမှမလုပ်ဘဲ နေခဲ့တာတွေကို အထင်အရှား မြင်လိုက်ရပါတယ်။

'တင့်ခ်' ဟာ သူ့ရဲ့လက်တွေမှာ အချက်ပေါင်း ၆၀ တောင် ချုပ်ခဲ့ရပါတယ်။

သွေးသွင်းခဲ့ရတယ်။ ရေထဲက အမှိုက်သရိုက် အပိုင်းအစတွေနဲ့ ဆောင့်မိလို့ နံရိုး ၃ ချောင်း ကျိုးသွားခဲ့ပါတယ်။

ဒါပေမဲ့ သူ အသက်ရှင်ခဲ့ပါတယ်။

ကလေး ၂၃ ယောက်စလုံး အသက်ရှင်ခဲ့ကြတယ်။ သုံးနှစ်အရွယ်ကလေးလေး 'မားကပ်စ်' လည်း အသက်ရှင်ခဲ့ပါတယ်။

နောက်တစ်နေ့မှာတော့ မိဘတွေဟာ 'ဟဲလ်စ် အန်ဂျယ်လ်စ်' _Hells Angels အဖွဲ့ရဲ့ ကလပ်အသင်းရုံးခန်းဆီကို ရောက်လာကြပါတယ်။ ပြဿနာရှာဖို့ မဟုတ်ပါဘူး၊ ကျေးဇူးတင်စကားပြောဖို့ပါ။

မိခင်တွေဟာ လွန်ခဲ့တဲ့တစ်ရက်ကဆိုရင် လမ်းပေါ်မှာ တွေ့ရင်တောင် ရှောင်သွားမယ့် သားရေအင်္ကျီဝတ်ထားတဲ့ လူကြမ်းကြီးတွေကို ဖက်ပြီး ငိုကြပါတယ်။ ဖခင်တွေကတော့ စကားတောင် မပြောနိုင်ဘဲ ပတ်တီးစည်းထားတဲ့ လက်တွေကို ဆွဲကိုင် နှုတ်ဆက်ကြပါတယ်။

မမ 'မီယာ' နဲ့ မောင်လေး'မားကပ်စ်' တို့ရဲ့ အမေဖြစ်သူ 'ရှရွန်' ဟာ 'တင့်ခ်' ရဲ့ ရှေ့မှာ ဒူးထောက်ကျသွားပြီး ....
"ရှင် ကျွန်မရဲ့ ကလေးနှစ်ယောက်စလုံးကို ကယ်ပေးခဲ့တာ။ ကျွန်မမှာ ပြောစရာ စကားလုံးတောင် မရှိတော့ပါဘူး" လို့ ပြောရှာပါတယ်။

'တင့်ခ်' ကလည်း သူမနဲ့အတူ လိုက်ပြီး ဒူးထောက်လိုက်ကာ

"အစ်မ... ကျွန်တော်တို့အဖွဲ့ထဲက ဘယ်သူမဆို ဒီလိုပဲ လုပ်မှာပါ။ ကလေးတွေ ဒုက္ခရောက်နေတာ မြင်ရင် ကူညီရမယ်၊ ဒါပါပဲ" လို့ ပြောခဲ့ပါတယ်။

"ဒါပေမဲ့ တခြားလူတွေအကုန်လုံးကတော့ ရပ်ကြည့်နေကြတာပဲလေ။" လို့ အမေဖြစ်သူက ပြောပါတယ်။

"အဲဒီလို လူမျိုးတွေက ကိုယ်ခြင်းစာစိတ်နည်းပါးတဲ့ သူတွေ မို့လို့ပေါ့ " လို့ ပြန်ပြောပါတယ်။

ကျောင်းဆရာမ 'မစ္စပက်တာဆန်' _Miss Peterson ကတော့ အလုပ် အထုတ်ခံလိုက်ရပါတယ်။

ကြောက်လန့်ပြီး မလုပ်တတ်မကိုင်တတ် ဖြစ်သွားခဲ့လို့ မဟုတ်ပါဘူး။ ကြောက်စိတ်ဆိုတာ လူသားတိုင်းမှာ ရှိတတ်ပါတယ်။

ဒါပေမဲ့ သူမဟာ ကယ်ဆယ်ရေးလုပ်ငန်းကို တက်တက်ကြွကြွနဲ့ တားဆီးဖို့ ကြိုးစားခဲ့တဲ့အတွက်ကြောင့် အထုတ်ခံရတာပါ။

သူမရဲ့ ခြေထောက်အောက် ၁၀ ပေအကွာမှာ ကလေးတွေ ရေနစ်နေချိန်မှာ၊ ဆိုင်ကယ်သမားတွေကို အန္တရာယ်ပြုမယ့်လူတွေပါဆိုပြီး 911 ကို ဖုန်းဆက်တိုင်ကြားခဲ့လို့ ဖြစ်ပါတယ်။

ဖုန်းထဲက အသံသွင်းထားတဲ့ မှတ်တမ်းတွေက သူမ အပြစ်လုပ်ခဲ့မှန်း အထင်အရှား သက်သေပြနေခဲ့ပါတယ်။
ကားမောင်းသမားကတော့ ကလေးတွေကို အန္တရာယ်ထဲ ပစ်ထားခဲ့မှု အတွက်၊ အမှုပေါင်း ၂၃ မှုနဲ့ တရားစွဲဆိုခြင်း ခံခဲ့ရတယ်။တစ်ယောက်ချင်းစီအတွက် အမှုဖွင့်ခံရတာပါ။

တစ်လအကြာ မြို့မိမြို့ဖအစည်းအဝေးပွဲမှာ 'တင့်ခ်' ဟာ စင်မြင့်ပေါ်က စကားပြောစင်မှာ ဒဏ်ရာအမာရွတ်တွေနဲ့ မတ်တတ်ရပ် စကားပြောခဲ့ပါတယ်။

"လူတွေက ဒီအမှတ်တံဆိပ်တွေကို မြင်ရင်၊" လို့ သူက သူ့ရဲ့ ဂျာကင်အင်္ကျီက တံဆိပ်ကို ကိုင်ရင်း ပြောလိုက်တယ်။

"သူတို့ကို ရာဇဝတ်ကောင်တွေလို့ မြင်ကြတယ်။ အန္တရာယ်ကောင်တွေလို့ မြင်ကြတယ်။ ကြောက်ရမယ့်သူတွေလို့ ထင်ကြတယ်။"

သူ ခဏရပ်လိုက်ပြီး - "ဒါပေမဲ့ ကျွန်တော်တို့ကလည်း မိသားစုရှိတဲ့ အဖေတွေပါပဲ။ သားသမီးတွေပါပဲ။ ညီအစ်ကိုတွေပါပဲ။ ''

"ကျွန်တော်တို့ အဲဒီကလေးတွေကို ကယ်ခဲ့တာ ကျွန်တော်တို့က သူရဲကောင်းမို့လို့ မဟုတ်ပါဘူး။ သူတို့ ကယ်တင်ဖို့ လိုအပ်နေချိန်မှာ ကျွန်တော်တို့က အဲဒီနေရာမှာ ရှိနေခဲ့လို့ပါ။ ဒါဟာ တစ်ခုတည်းသော အကြောင်းပြချက်ပါပဲ။"

ကျန်းကျန်းမာမာနဲ့ ပြုံးရွှင်နေတဲ့ 'မားကပ်စ်' လေးက အပြေးလာပြီး 'တင့်ခ်' ရဲ့ ခြေထောက်ကို ဖက်လိုက်ပါတယ်။
လူကောင်ကြီးကြီး 'တင့်ခ်' က ကလေးလေးကို ဒဏ်ရာရထားတဲ့ သူ့လက်နဲ့ အသာအယာ မချီလိုက်ပါတယ်။

"ဒီ ကလေးကမှ တကယ့် သူရဲကောင်းပါ၊" လို့ တင့်ခ် က အသံတွေ တုန်ရီပြီး ပြောပါတယ်။

"သူက ရေအောက်မှာ သုံးမိနစ်နီးပါး တောင့်ခံနိုင်ခဲ့တယ်။ သူ ရှင်သန်ဖို့အတွက် ရုန်းကန်ခဲ့တာ။ ကျွန်တော်တို့က သူ ဆက်ပြီး ရုန်းကန်ရှင်သန်နိုင်ဖို့ အခွင့်အရေးလေးတစ်ခု ပေးခဲ့ရုံပါပဲ။"

စကားဆုံးတဲ့အခါ ပရိသတ်တွေရဲ့ လက်ခုပ်သြဘာသံတွေဟာ မရပ်မနား ထွက်ပေါ်နေခဲ့ပါတယ်။

ဒါဟာ လွန်ခဲ့တဲ့ နှစ်နှစ်က ဖြစ်ရပ်ပါ။

တင့်ခ် ရဲ့ လက်တွေမှာတော့ အမာရွတ်တွေ အမြဲတမ်း ကျန်ရစ်ခဲ့ပြီပါ။

မှန်တွေကို ထုခွဲခဲ့ရလို့ လက်ဆစ်တစ်ချို့ ကောက်ကွေးပြီး လက်သီးနှစ်ဖက်စလုံးမှာ အမာရွတ်တွေ ထင်ကျန်နေခဲ့တာပါ။

သူကတော့ ဒါတွေကို စစ်ပွဲကရတဲ့ ဒဏ်ရာတွေလို့ ခေါ်တယ်။

"ကျွန်တော့်ဘဝမှာ တကယ်ကို အရေးအကြီးဆုံးဖြစ်ခဲ့တဲ့ တစ်ခုတည်းသော တိုက်ပွဲကရတဲ့ ဒဏ်ရာပေါ့။"

အခုဆိုရင် အဲဒီဆိုင်ကယ်ကလပ်အဖွဲ့ဟာ မူကြိုကလေးတွေကို စာအုပ်ဖတ်ပြကြတယ်။

ဆိုင်ကယ်စီး ဘေးကင်းရေး အစီအစဉ်တွေ လုပ်ပေးကြတယ်။

ကျောင်းတွေရဲ့ ရန်ပုံငွေပွဲတိုင်းမှာ ပါဝင်ပေးကြတယ်။

အရင်က ဒီမြို့က လူတွေ ကြောက်ခဲ့ရတဲ့ လူကြမ်းကြီးတွေဟာ အခုတော့ အကူအညီလိုအပ်တိုင်း ပထမဆုံး အဖိတ်ကြားခံရတဲ့သူတွေ ဖြစ်လို့နေပါပြီ။

မီယာ နဲ့ မားကပ်စ် တို့ဟာ အပတ်စဉ် စနေနေ့တိုင်း အဖွဲ့ရဲ့ ရုံးခန်းဆီ လာလည်ကြပြီး သူတို့အမေက မုန့်တွေ လာပေးတတ်တယ်။

ဘိုင်ကာတွေက ကလေးတွေကို အင်ဂျင်စက်တွေအကြောင်း၊ ညီအစ်ကို စိတ်ဓာတ်အကြောင်းနဲ့ လူတစ်ယောက်ကို အပြင်ပန်းပုံစံ ဘယ်လိုပဲရှိရှိ ကူညီပေးရမယ်ဆိုတဲ့ အကြောင်းတွေကို သင်ပေးကြတယ်။

အဲဒီနေ့က ဓာတ်ပုံဟာ နေရာအနှံ့ ပျံ့နှံ့သွားခဲ့ပါတယ်။ 'တင့်ခ်'က 'မားကပ်စ်'ကို ရင်ခွင်ထဲမှာ ရွှံ့တွေနဲ့ သွေးတွေနဲ့ ပွေ့ပိုက်ထားတဲ့ပုံပေါ့။

ဒီပုံရိပ်တစ်ခုတည်းကပဲ တစ်နိုင်ငံလုံးက ဘိုင်ကာတွေအပေါ် မြင်တဲ့ အမြင်ကို ပြောင်းလဲစေခဲ့ပါတယ်။

သူတို့ဟာ အန္တရာယ်ကောင်တွေ မဟုတ်ပါဘူး။ တခြားလူတွေ ရပ်ကြည့် နေကြတဲ့အချိန်မှာ ရေထဲကို အရင်ဆုံး ခုန်ဆင်းပေးမယ့်သူတွေ ဖြစ်ပါတယ်။

ကလေး ၂၃ ယောက်ဆီ သေမင်း ရောက်လာတဲ့အချိန်မှာ 'ဟဲလ်စ် အန်ဂျယ်လ်စ်' အဖွဲ့ဝင်တွေက တုံ့ပြန် ကယ်ဆယ်ခဲ့ပေးခဲ့တယ်။
ပြီးတော့... သေမင်းဟာ ရှုံးနိမ့်သွားခဲ့ပါတယ်။

(ဘာသာပြန်)
#မေတ္တာဖြင့်ပြန်လည်မျှဝေပါသည်။

30/05/2026

ဆိုင်ပိတ်လိုက်ရင် ယွမ် ၂၀,၀၀၀ ဆုံးရှုံးရမယ်ဆိုတာသိရက်နဲ့လည်း ဆိုင်ပိတ်ပါမယ်ဆိုတဲ့ ရှောက်စန်းဟူရဲ့အကင်ဆိုင်လေး ပိတ်လိုက်ပြီ

မကြာသေးမီရက်ပိုင်းက တရုတ်နိုင်ငံ အန်းဟွေးပြည်နယ် စုကျိုးမြို့က အကင်ဆိုင်ပိုင်ရှင်တစ်ဦး နာမည်ကျော်သွားခဲ့ပါတယ်။

သူ့ဆိုင်ရဲ့ရောင်းအားကောင်းမှုကြောင့်မဟုတ်ဘဲ သူ ဆိုင်ပိတ်ခဲ့တာကြောင့် နာမည်ကျော်သွားခဲ့တာပါ။

ဆိုင်ဖွင့်ပြီးတစ်လမကြာသေးခင် လုပ်ငန်းစတင်ခါစ ဖောက်သည်ရဖို့ အဓိကကျတဲ့ အချိန်ကာလမှာ “မိသားစုကိစ္စရှိသည့်အတွက် ဆိုင် ၇ ရက် ပိတ်ထားမည်ဖြစ်ပါ၍ ၇ ရက်နောက်ပိုင်းမှသာ ပြန်လည်ဖွင့်လှစ်ပါမည်” ဆိုတဲ့အသိပေးစာကို ရုတ်တရက် စာကပ်ဖော်ပြလာခဲ့ပါတယ်။

အဆိုပါဆိုင်ပိုင်ရှင်ရဲ့နာမည်ဟာ ရှောက်စန်းဟူဖြစ်ပြီး “90’s born” လူငယ်တစ်ဦးဖြစ်ပါတယ်။ ၂၀၁၉ ခုနှစ်မှာ သူက ရိုးတွင်းခြင်ဆီစတမ်ဆဲလ်အလှူရှင်တစ်ဦးအဖြစ် စာရင်းပေးသွင်းထားခဲ့ပါတယ်။

၂၀၂၅ ခုနှစ် စက်တင်ဘာလမှာ တရုတ်အမျိုးသားရိုးတွင်းခြင်ဆီသိုလှောင်ဌာနမှ ရှောက်စန်းဟူကို သွေးရောဂါဝေဒနာရှင် ကလေးငယ်နဲ့ ကနဦးကိုက်ညီမှုရှိကြောင်း အသိပေးလာခဲ့ပါတယ်။

ဒါပေမဲ့ ကနဦးကိုက်ညီမှုဟာ ပထမအဆင့်သာရှိသေးပြီး နောက်ပိုင်းမှာ စည်းကမ်းတင်းကြပ်တဲ့ ကျန်းမာရေးဆေးစစ်ချက်၊ ရက်ချိန်းပြန်ပြခြင်းနဲ့ အချိန်ရှည်ကြာစွာ စောင့်ဆိုင်းခြင်းတို့ကို အဆင့်ဆင့်ဖြတ်သန်းခဲ့ရပါတယ်။

ယခုနှစ် ဖေဖော်ဝါရီကို ရောက်မှ ရှောက်စန်းဟူဟာ ဒေသတွင်းဆေးရုံမှာ နောက်ဆုံးအဆင့် ကျန်းမာရေးဆေးစစ်ချက်ကို ပြီးမြောက်သွားခဲ့ပါတယ်။ ဧပြီလ ၁၄ ရက်နေ့မှာ သွေးထုတ်ခြင်းအစီအစဉ်ကို သတ်မှတ်ဆုံးဖြတ်ခဲ့ပြီး ဧပြီလ ၂၇ ရက်နေ့မှ ၃၀ ရက်နေ့အထိကို ဟယ်ဖေမြို့မှာ သွေးလှူဒါန်းမှု ဆောင်ရွက်ခဲ့ပါတယ်။

အကင်ရောင်းတဲ့အလုပ်ဟာ ညမအိပ်ဘဲ ရေရှည်လုပ်ကိုင်ရပါတယ်။ မိမိလှူဒါန်းတဲ့သွေးအရည်အသွေးဟာ ငယ်ရွယ်နုနယ်သေးတဲ့ကလေးငယ်ရဲ့သေရေးရှင်ရေးနဲ့ သက်ဆိုင်နေမှန်း ရှောက်စန်းဟူ သိထားပါတယ်။
ဒါကြောင့်မိမိခန္ဓာကိုယ်ကျန်းမာရေးကို အကောင်းဆုံးအနေအထားဖြစ်အောင်လို့ သွေးမလှူဒါန်းမီ အလုပ်ရပ်နားကာ အနားယူဖို့ သူ ဆုံးဖြတ်လိုက်ပါတယ်။ ဒီလိုအနားယူမှုဟာ အနည်းဆုံးလဝက်လောက် ကြာပါတယ်။

အဲဒီအချိန်မှာ သူ့ရဲ့အကင်ဆိုင်ကလည်း ရောင်းအားတက်နေတဲ့အချိန်ပါ။ ဆိုင်ပိတ်လိုက်ရင် ဝင်ငွေရုတ်တရက် ရပ်တန့်သွားမယ်ဆိုတဲ့သဘောရှိပါတယ်။ လူတစ်ယောက်က ဒီဆုံးရှုံးမှုကို သူ့ကိုယ်စား တွက်ချက်ပေးဖူးပါတယ်။ ဆိုင်ရပ်နားလိုက်တဲ့ ၁၀ ရက်ကျော်မှာ ကြိုတင်ပြင်ဆင်ထားရတဲ့ လတ်လတ်ဆတ်ဆတ် စားသောက်ကုန်ကြမ်းတွေကို သိမ်းဆည်းထားလို့မရတော့ပါဘူး။ အများစုကို လွှင့်ပစ်ရင်လွှင့်ပစ် ဒါမှမဟုတ် သူများကို ပေးကမ်းပစ်လိုက်ရပါမယ်။

ပြီးတော့ ဆိုင်ခန်းငှားရမ်းခ၊ အလုပ်သမားစရိတ် ဘာဘာညာညာ အားလုံးပေါင်းလိုက်ရင် ယွမ် ၂၀,၀၀၀ နီးပါး ဆုံးရှုံးနစ်နာရပါလိမ့်မယ်။ ဒါပေမဲ့ ရှောက်စန်းဟူက “ဘာပဲပြောပြော ဒါက လူ့အသက်တစ်ချောင်းပါ၊ ငွေက ဒါနဲ့ လုံးဝနှိုင်းယှဉ်လို့မရပါဘူး။” လို့ ပြတ်ပြတ်သားသား ပြောခဲ့ပါတယ်။

လူ့အသက်ကယ်ဖို့ ရှောက်စန်းဟူ ဆိုင်ပိတ်လိုက်တဲ့ကိစ္စဟာ မကြာခင်မှာပဲ ဖောက်သည်ဟောင်းတွေကြားထဲမှာ သတင်းပျံ့နှံ့သွားခဲ့ပါတယ်။ ဖောက်သည်တွေကို မစိုးရိမ်ရစေဖို့ ရှောက်စန်းဟူက အင်တာနက်ပေါ်ကနေ အမှန်တရားကို စာရေးသား ဖော်ပြခဲ့ပါတယ်။ သူက အလုပ်အကိုင် ပြောင်းဖို့မဟုတ်ကြောင်း၊ ဟယ်ဖေမြို့မှာ ရိုးတွင်းခြင်ဆီစတမ်ဆဲလ် သွားရောက်လှူဒါန်းပြီး အသက် ၃ နှစ်အရွယ် သွေးရောဂါဝေဒနာရှင်လေးကို ကယ်တင်ဖို့သာဖြစ်ကြောင်း ပြောပြလာခဲ့ပါတယ်။

ကွန့်မန့်များထဲမှာ စာနာမှုအပြည့်ရှိတဲ့ နွေးထွေးကြည်နူးဖွယ်ရာ ကျီစားတဲ့စကားသံများ ရုတ်ခြည်း ပြည့်နှက်သွားခဲ့ပါတယ်။ အင်တာနက်အသုံးပြုသူများက အွန်လိုင်းပေါ်ကနေ “ဆိုင်ရှင်ရေ တုတ်ထိုးတွေ ဒီတိုင်းထားခဲ့၊ ကျွန်တော်တို့ အစိမ်းလိုက်စားလို့ရတယ်။” “ကိုယ့်ဘာသာကိုယ် ကင်မယ်၊ ခင်ဗျား ဘေးမှာထိုင်ပြီး အနားယူနေရင် ရပြီ။” “QR code သာ တင်ထားလိုက်၊ ကျွန်တော်တို့ ကိုယ့်ဘာသာကိုယ်ကင်စားမယ်။” လို့ အသီးသီးပြောလာကြပါတယ်။

အခုလို ရယ်စရာကောင်းတဲ့ ကွန့်မန့်တွေကို ဖတ်ရင်း ရှောက်စန်းဟူရဲ့အပြုံးထဲမှာ မျက်ရည်ဝဲလာပါတယ်။ သူ့ရဲ့မွန်မြတ်သော လုပ်ရပ်ကို လူတွေက ဒီလိုမျိုးအပွင့်လင်းဆုံး အနွေးထွေးဆုံးနည်းလမ်းများနဲ့ အသိအမှတ်ပြု အားပေးထောက်ခံနေကြတယ်ဆိုတာကို သူ့စိတ်ထဲမှာ ရှင်းရှင်းလင်းလင်း သိထားပါတယ်။

ဒါကြောင့်လည်း သူ့အနေနဲ့ နွေးထွေးကြည်နူးမှုကို အပြည့်အဝခံစားရပြီး ဒီခရီးစဉ်ဟာ သူ့အတွက် အဓိပ္ပာယ်အပြည့်ရှိတယ်လို့ မှတ်ယူလာမိပါတယ်။

ဧပြီလ ၂၂ ရက်နေ့မှာ ရှောက်စန်းဟူက ဟယ်ဖေမြို့မှာ ဆေးရုံတက်ဖို့ ခရီးစတင်ခဲ့ပါတယ်။ ခရီးလမ်းတစ်လျှောက်မှာ သူက “သူငယ်ချင်းတို့ရေ ငါ boss သွားချလိုက်ဦးမယ်၊ ပြီးရင် ပြန်လာခဲ့မယ်။” လို့ ရယ်မောစရာ ဗီဒီယိုအတိုတစ်ခု တင်ခဲ့ပါတယ်။ ဒါပေမဲ့ တကယ့်လက်တွေ့မှာ “boss သွားတိုက်” ရတဲ့ ဖြစ်စဉ်က ဗီဒီယိုထဲကလို ပေါ့ပေါ့ပါးပါးနဲ့ ပျော်စရာကောင်းနေတာမဟုတ်ပါဘူး။

သွေးမလှူဒါန်းခင်မှာ သူက နေ့တိုင်း ဆဲလ်ပွားလှုံ့ဆော်ဆေး နှစ်ကြိမ်ထိုးရပါတယ်။ ဒီဆေးဟာ ရိုးတွင်းခြင်ဆီထဲက စတမ်ဆဲလ်များကို သွေးတွင်းထဲမှာ လည်ပတ်ပြန့်ပွားစေပါတယ်။ ဘေးထွက်ဆိုးကျိုးကတော့ တစ်ကိုယ်လုံး ညောင်းညာကိုက်ခဲနေတတ်ပါတယ်။ လူတွေက စိုးရိမ်တကြီးနဲ့ သူ့ကို ဘယ်လိုနေလဲလို့ မေးမြန်းလာတိုင်း သူက “ဘာမှမဖြစ်ပါဘူး၊ အအေးမိသလောက်ပဲ ရှိပါတယ်။” လို့ ရယ်မောရင်း ပြောတတ်ပါတယ်။

ဧပြီလ ၂၇ ရက်နေ့က သွေးလှူဒါန်းတဲ့နေ့ပါ။ ရှောက်စန်းဟူက သွေးထုတ်ကုတင်ပေါ်မှာ ပက်လက်လှဲနေပြီး လက်မောင်းနှစ်ဖက်မှာ ဆေးထိုးပိုက်ကြီးကြီးနှစ်ချောင်း ထိုးထားပါတယ်။ နီနီရဲရဲ သွေးရည်တွေဟာ လက်မောင်းတစ်ဖက်ကနေ စီးထွက်လာပြီး စတမ်ဆဲလ်ခွဲထုတ်စက်ထဲကို စီးဝင်သွားပါတယ်။ အဖိုးတန်တဲ့ ရိုးတွင်းခြင်ဆီ စတမ်ဆဲလ်များကို တိကျစွာထုတ်ယူပြီးနောက် ကျန်သွေးရည်ကို နောက်လက်မောင်းတစ်ဖက်ကနေ ရှောက်စန်းဟူရဲ့ကိုယ်ထဲကို ပြန်လည်စီးဝင်သွားပါတယ်။

၄ နာရီနီးပါး ကြာမြင့်တဲ့ကာလတစ်လျှောက်မှာ သူက တစ်ကိုယ်လုံး လှုပ်လို့မရပါဘူး။ သွေးထုတ်ခြင်း ပြီးဆုံးတဲ့အခါ ရှောက်စန်းဟူဟာ အန်းဟွေးပြည်နယ်ရဲ့ ၈၆၈ ယောက်မြောက် ရိုးတွင်းခြင်ဆီ စတမ်ဆဲလ်အလှူရှင် ဖြစ်လာခဲ့ပါတယ်။

တကယ်တော့ ဒီနှစ်ထဲမှာ အသက် ၃၄ နှစ်ရှိပြီဖြစ်တဲ့ ရှောက်စန်းဟူဟာ Blue Sky Rescue (BSR) ကယ်ဆယ်ရေးအဖွဲ့ဝင်လည်း ဖြစ်ပါတယ်။ သူက ၂၀၁၃ ခုနှစ်မှာ Blue Sky Rescue (BSR) ကယ်ဆယ်ရေးအဖွဲ့မှာ ပါဝင်ခဲ့ပြီး ၁၃ နှစ်လုံးလုံး ကယ်ဆယ်ရေးလှုပ်ရှားမှုပေါင်းများစွာကို သူပါဝင်ဆောင်ရွက်ခဲ့ပါတယ်။

မိသားစုဝင်တွေက ရှောက်စန်းဟူရဲ့အသက်အန္တရာယ်ကို အမြဲတမ်းစိတ်ပူနေရတာကြောင့် အန္တရာယ်များတဲ့ကယ်ဆယ်ရေးတွေမှာ သိပ်မပါဝင်ဖို့ သူ့ကို ဖျောင်းဖျကြပါတယ်။ သူကတော့ မိသားစုဝင်တွေကို အမြဲတမ်းနှစ်သိမ့်စကားဆိုပြီး လက်တွေ့လှုပ်ရှားမှုဖြင့် ပရဟိတအလုပ်ကို ကြိုးစားလုပ်ကိုင်ကာ ချစ်ခြင်းမေတ္တာ လက်ဆင့်ကမ်းမျှဝေပေးခဲ့ပါတယ်။ ဂုဏ်ပြုချီးမွမ်းမှု အမျိုးမျိုးရှိလာတဲ့အခါမှာလည်း ရှောက်စန်းဟူရဲ့အဖြေဟာ ရိုးရှင်းလှပါတယ်။ “ကိုယ့်မိသားစုကို စောင့်ရှောက်နိုင်တဲ့တစ်ချိန်တည်းမှာပဲ ပိုလျှံတဲ့အချိန်တွေကို လူအများအတွက် ပေးဆပ်ရတာဟာ ကောင်းတဲ့အလုပ်တစ်ခုပဲလို့ ကျွန်တော်ထင်ပါတယ်။”

တစ်ဖက်မှာ မိသားစုဝမ်းရေးအတွက် ရှာဖွေစားသောက်နေရတဲ့အလုပ်ဖြစ်ပြီး တစ်ဖက်မှာတော့ ရင်းနှီးကျွမ်းဝင်မှုမရှိတဲ့ ကလေးငယ်ရဲ့အသက်တစ်ချောင်းဖြစ်နေပါတယ်။ အကျိုးစီးပွားနဲ့ မေတ္တာတရားကို ရွေးချယ်ရာမှာ 90’s born အကင်ဆိုင်ပိုင်ရှင် ရှောက်စန်းဟူက တွေဝေတုံ့ဆိုင်းနေခြင်း မရှိခဲ့ပါဘူး။

“အရှုံးပေါ်” တဲ့ စာရင်းတစ်ခုနဲ့ “အဖြစ်မှန် ဖုံးကွယ်” ထားတဲ့ အသိပေးစာတစ်စောင်ဖြင့် နွေးထွေးမှုအရှိဆုံး စေတနာရက်ရောမှု အရှိဆုံးအဖြေကို ပေးသွားခဲ့ပါတယ်။ သာမန်လူတွေရဲ့ရိုးသားဖြူစင်မှုနဲ့တာဝန်ယူတတ်မှုဟာ လေးစားစရာအကောင်းဆုံးပဲဖြစ်ပါတယ်။

သူ့ရဲ့အကင်ဆိုင်ဟာ ခေတ္တယာယီ မီးငြှိမ်းထားရပေမဲ့ သူ့ရဲ့စိတ်ကောင်းစေတနာဟာ လူ့စိတ်ရဲ့အမြင့်မြတ်ဆုံးအလင်းရောင်ကို ထွန်းညှိခဲ့ပြီး ရုန်းကန်လှုပ်ရှားနေကြတဲ့ လူ့လောကကြီးကို နွေးထွေးမှုမေတ္တာတရား ပိုမိုရှိလာစေပါတယ်။