01/11/2024
زي ما بيقولو : " سافر أنت لست شجرة"
فـ نحن عندنا في الشركة " إتحرك أنت لست شجرة"
وحقيقي نوينا إنو نسافر من مقرنا لي مقر جديد، ودا بعد زيادة عدد الموظفين والنزاعات الطبقية بين موظفين الطابق الرابع والطابق التاني في كل الألعاب من فيفا لي سيكوانس
وكانت فكرة الرحول دي مطلب أساسي بالذات بعد ما جو موظفين سايبر ديلفري في الطابق الأول وبدو يغلبو باقي الطوابق في كُل الألعاب
وهنا إشتغلت مكنة " أمانة ميييي حااااااارة" بين الموظفين وإشتعلت الشرارة وقررنا نكون تحت مُسمى " الرحول عِز العرب" ونرحل🤣
أها إتقسمنا لي 3 أتيام :
- تيم البقاء في بُري
- تيم كافوري
- تيم الخرطوم ٢
وبدينا لعب على نضافة، كل تيم كان بيحاول يضم أكبر عدد من الناس وهنا طبعًا ظهر إبداع أي زول بتاع ماركتنغ وسيلز وبدينا نشوف الكريتف بمزاج
* فـ تيم كافوري قرر يضم سُكان" أمدرمان، شرق النيل وبحري" ليهو، وأقنعوهم بفرق المسافات وسهولة الوصول، تحت شعار أقل قدر من الوقت والجهد
* جا تيم الخرطوم ٢ وأعلن إنو أي زول ساكن جنوب الحزام " كلاكلات، جبرة والخرطوم" دا خيار مناسب معاهم
وبدت المنافسة بين التيمين وبقوا يحصرو عدد الناس من سُكان المناطق أعلاه
العدد طلع قريب لي بعض
فـ تيم كافوري بدأ في الإغراء وقال : نحن بدينا نفتش لي فلل وعقارات تنفع تشيل أكتر من ١٥٠ موظف، وعظَّم موقفو بإنو عايزين ال١٥٠ كلهم في مكان واحد من أجل روح الفريق والهكذا أشياء
تيم الخرطوم ٢ قال ليه " قلتو كدي!" وطوالي صرحوا بي قرار : " نحن لقينا عمارات فيها بيلبوردات علشان يتخت فيها اللوقو بتاع سايبر من غير ما الشركة تدفع ٤ مليار شهريًا😎"
وكل ما تيم كافوري يفرفر، تيم الخرطوم كان بستخدم كرت الدفع والقروش كـ كرت ضاغط للشركة وخاصة لناس المالية 😂
إستمرت النزاعات والأفكار واللعب، وطول الفترة دي كل تيم كان بفطر براه ويعمل إجتماعات مقفولة يخطط فيها لطُرق إقناع مُبتكرة، ودفع رشاوي لي سُكان المناطق المُعينة وللـ HR وأي حاجة تتوقعوها للإقناع هم عملوها
وفي الأسبوع التالت من البرنامج دا وفي نص النزاعات ومكاني ومكانك جات صوت رسالة إيميل، حسمتنا كلنا
وعم الصمت مع سماع الصوت المرجو
وكانت محتواها
Dear all:
Hope this email find you will
مكان المقر الجديد في بُري، ويبعد 5 أمتار عن مقر الشركة الحالية
وصبت فينا مطرة حرفيًا ما مجاز 😂
وكان المعنى الحقيقي لي " يضع سرو في أضعف خلقو" وإنتصر التيم الما دخل في نزاع أصلًا وكان مكون من ٤،٣ عناصر فقط
وبهذا نعلن إنتصار الـ ٤ عناصر VS ١٥٠ عُنصر
بعدها شفنا المكان وكل الأتيام صرحت بي إعجابها بالمقر الجديد وبدوا في خيالهم طوالي تقسيم الغُرف على أقسام" البزنس، الماركتنغ، و الديلفري..الخ"
وأهو لسه ما قطعنا الزلط بي غادي، جات الكتاحة بي جاي 😢
نسأل اللّٰه إنو البلد ترجع آمنة، ونرجع ليها ونعمّرها وترجع ضحكاتنا الصادقة وروحنا الطيبة
وكلو يبقى حكاوي، بإذن اللّٰه.
