اكاديمية ابسطهالك - عمرو بزان

Home
Saudi Arabia
Riyadh
اكاديمية ابسطهالك - عمرو بزان

Call Directions Website Contact the business

الهدف من الصحفه هو تحويل المحاسب العادي الى محاسب خطير على المجتمع المحاسبي

04/11/2026

المحاسب الخطير انتهت ..
الآن البرنامج التدريبي التطبيقي "قيد بالهلله"
دعواتكم لنا بالتوفيق في رحلة تدريبية جديدة 🙂
للتسجيل https://forms.gle/exDwdnfFpdLN3yiYA

04/11/2026

مش كل شركة بتكبر بتتطور .. ومش كل شركة بتبيع أكتر بتكسب أكتر !!

من واقع خبرتي في الإدارة المالية والتطوير التشغيلي .. اكتشفت إن التحدي الحقيقي اللي بيواجه شركات كتير مش في قدرتها على تحقيق النمو .. لكن في قدرتها على إدارة النمو ده وتحويله لربحية وتدفقات نقدية مستدامة

ممكن شركة تحقق زيادة كبيرة في المبيعات .. وفي نفس الوقت تعاني من ضعف السيولة وارتفاع التكاليف وتراجع هوامش الربحية .. وده لأن النمو حصل من غير ما يكون فيه نموذج تشغيل قادر يستوعبه

والحقيقة إن تطوير الشركات مش مجرد إعداد خطة استراتيجية أو إعادة رسم هيكل تنظيمي أو تطبيق نظام ERP جديد .. التطوير الحقيقي بيبدأ من تشخيص نموذج التشغيل وفهم العلاقة بين الإدارات وتحديد مواطن الخلل والهدر وإعادة تصميم العمليات والمسؤوليات والصلاحيات

ومن أكبر الأخطاء اللي بشوفها إن الشركات بتفصل بين الاستراتيجية والتشغيل والإدارة المالية .. رغم إن التلاتة لازم يكونوا مرتبطين ببعض

ببساطه الاستراتيجية بتحدد إحنا رايحين فين .. والتشغيل بيحدد هنوصل إزاي .. والإدارة المالية بتقيس إحنا بنتحرك بكفاءة ولا بنستهلك مواردنا من غير عائد حقيقي

وعلشان أي تحول مؤسسي ينجح .. لازم الشركة تبني أنظمة وسياسات وإجراءات ومؤشرات أداء تخليها قادرة تشتغل وتتوسع بكفاءة .. من غير اعتماد مفرط على أشخاص بعينهم

ومن وجهة نظري .. أكبر تحدي في مجال تطوير الأعمال والاستشارات مش إنك تكتشف المشكلة وتقدم توصيات لحلها .. لكن إنك تحول التوصيات لخطة تنفيذية واضحة .. وتتابع تطبيقها وتقيس أثرها على الربحية والسيولة وكفاءة التشغيل

لأن النجاح الحقيقي مش إن الشركة تكبر في حجم أعمالها وبس .. النجاح إن كفاءتها وربحيتها وقدرتها على الاستمرار يكبروا معاها

وفي النهاية عندي سؤال مهم .. هل شركتك عندها نموذج تشغيل وأنظمة قادرة تستوعب النمو والتوسع .. ولا كل ما حجم أعمالها بيكبر مشاكلها بتكبر معاه؟!

حبيبكم أبو مروان 🤝

02/11/2026

مش كل المشاكل والخلافات في بيئة العمل محتاجة إيميلات رسمية أو تصعيد للإدارة ..

من واقع التجارب اللي عشتها خلال رحلتي المهنية في شركات وقطاعات مختلفة .. اكتشفت إن كتير من الخلافات بين الإدارات مش سببها اختلاف الأشخاص .. لكن غياب وضوح المسؤوليات والصلاحيات وعدم وجود خطط تشغيلية واضحة تنظم العلاقة بين الإدارات

والحقيقة إن وجود خطط تشغيلية واضحة وتواصل فعّال بين الإدارات مش بس بيحسن كفاءة العمل .. لكنه كمان بيقلل الخلافات وبيحمي الشركة من إهدار وقت وجهد وموارد كان ممكن استغلالها بشكل أفضل

واتعلمت كمان إن الهدف من أي نقاش مهني مش إن شخص يكسب النقاش وشخص تاني يخسره .. لأننا في النهاية مش في منافسة مع بعض .. إحنا بنشتغل علشان نحقق أهداف مشتركة ونحافظ على مصلحة الشركة

وعلشان كده .. قبل ما تفكر تكتب إيميل طويل أو تصعّد خلاف للإدارة .. جرّب تتكلم مع زميلك وتفهم وجهة نظره .. لأن ساعات خلافات بتاخد أيام من المراسلات والتصعيد ..

ممكن تتحل بكوباية قهوة في مكتب زميلك 🙂

حبيبكم أبو مروان ❤️

29/10/2026

عايزك تدخل على اليوتيوب
هتلاقيني شارح الفيديو دا من عشر سنين
تفضل شوف بنفسك https://youtu.be/7uWr--sisN4

شرحت فيه ازاي تعمل قيد يومي بكل بساطه واتحدى
عارف ياصديقي التصميم بالكامل بالحركات من تصميمي

مكنش فيه AI يساعدني .. لاحد كتبلي سكريبت ولا عملي مونتاج
إخراج بالكامل من إعدادي وتصميمي وخد أكتر من 4 أيام شغل

دي جزء من دورة المحاسب الخطير ..
دورة إتعملت بحب وإخلاص شديد لشباب المحاسبين

الدورة متاحه بالكامل مجانا على منصتي https://edu.amrbazan.com/
ادخل اتعلم ياصديقي وصدقني مليش مصلحه إني أغشك 🤝

وبعدين لما أقولك لاخطير إلا الخطير .. قول بعد كلامي آمين 💪

حبيبكم أبو مروان ❤️

25/10/2026

أغلب مشاكل الشركات مش مالية .. أصلها تشغيلي 🙂

من واقع خبرتي خلال مسيرتي المهنية في شركات وقطاعات مختلفة .. اكتشفت إن أغلب المشاكل المالية اللي بتواجه الشركات بيكون أصلها مشاكل تشغيلية .. بتظهر نتائجها في الأرقام والتقارير المالية

واحدة من أكبر المشاكل اللي لاحظتها هي غياب الربط الحقيقي بين الموازنات التشغيلية للإدارات المختلفة وبين النتائج الفعلية للإدارة المالية .. وده بيخلق فجوة بين التخطيط والتنفيذ

المشكلة مش في وجود انحرافات عن الموازنة .. لكن في الاكتفاء بمعرفة قيمتها من غير تحليل أسبابها .. هل المشكلة في التخطيط؟ ولا التنفيذ؟ ولا سوء إدارة الموارد؟ ولا مخاطر تشغيلية لم يتم التعامل معاها بالشكل الصحيح؟

علشان كده تحسين الأداء المالي لازم يبدأ بفهم حقيقي للعمليات التشغيلية .. وربط الموازنات بمؤشرات الأداء .. وتحليل الانحرافات وتقييم المخاطر .. ووضع حلول عملية تعالج أسباب المشاكل مش مجرد نتائجها

وده محتاج تكامل حقيقي بين الإدارة المالية وباقي الإدارات .. لأن كفاءة العمل المؤسسي مش مسؤولية إدارة واحدة

والخلاصة .. القوائم المالية بتوضح الشركة وصلت لفين .. لكن التحليل التشغيلي هو اللي بيفسر وصلت لكده ليه .. وإزاي تقدر تحسن أداءها وتضمن استمراريتها

وافتكر دايماً .. الأرقام المالية هي نتيجة قرارات تشغيلية .. ولو عايز تغير النتائج .. لازم تبدأ بإصلاح الأسباب .. وبفضل الله جاهزين نقدم أفضل الحلول من واقع خبرة حقيقة وتحديات نجحنا فيها بفضل الله على أرض الواقع ..

حبيبكم أبو مروان 🤝

09/10/2026

ونبدأ بتوفيق من المولى عز وجل
تحدي جديد في رحلتي المهنيه 💪

30/09/2026

شكراً لكل شخص 🤝
وثق في إسم عمرو بزان 🙂
وباذن الله القادم أجمل وافضل 💪
رقم موبايل الاستشارات 0545652613
حبيبكم أبو مروان ❤️

06/09/2026

نصيحة لصديقي المدير المالي ..
الكلام ده تقريباً محدش قاله قبل كده على السوشيال ميديا 🙂

في فرق مهم جداً بين ميزان المراجعة المالي وميزان المراجعة التشغيلي .. الميزان المالي من أهم أغراضه إعداد القوائم المالية وفقاً للسياسات المحاسبية وأساس الاستحقاق .. أما ما أسميه هنا ميزان المراجعة التشغيلي فهو رؤية إدارية للأرقام هدفها مراقبة الموازنة وتحليل الانحرافات ومعرفة الأداء الحقيقي لكل فترة

والفرق ده بيظهر غالباً في شركات المقاولات وشركات التشغيل والصيانة .. خصوصاً لما يكون حجم الأعمال كبير .. لأن الشغل بيتنفذ يومياً على أرض الواقع .. بينما الفواتير والمستندات ومعلومات التكلفة ممكن توصل للمالية في توقيت مختلف .. وهنا لازم تفرق بين إمتى الرقم ظهر عندك .. وإمتى النشاط نفسه حصل فعلاً ؟

خليني أبسطهالك .. إحنا في مايو ووصلت فاتورة تخص شغل اتنفذ في مارس .. طبيعي جداً إن المالية تكون عملت استحقاقها الطبيعي في مارس بقيمة الأعمال اللي اتنفذت فعلاً وفقاً للمعلومات المتاحة وقت الإقفال .. ولما الفاتورة توصل في مايو بيتسوى الاستحقاق وممكن يظهر فرق بين القيمة المقدرة والقيمة الفعلية .. ولو الإقرار الضريبي للفترة اتقدم بالفعل فالضريبة ليها معالجتها وتوقيتها وفقاً للضوابط .. لكن في النهاية الشغل نفسه يخص مارس مش مايو

المشكلة تبدأ لما تيجي تحلل انحرافات موازنة مايو مباشرة من ميزان المراجعة المالي .. لأن الميزان ممكن يكون فيه تسويات وفروق تخص فترات سابقة .. وفي نفس الوقت ممكن يكون فيه أعمال اتنفذت فعلاً في مايو ولسه جزء من معلوماتها موصلش للمالية .. وساعتها ممكن يظهر قدامك فرق بين الموازنة والفعلي وتعتبره إنحراف في أداء التشغيل .. بينما جزء من الفرق ده سببه توقيت التسجيل أو تسويات محاسبية ملهاش علاقة بأداء مايو نفسه

علشان كده لو بتحلل موازنة مايو .. لازم تقارنها بالأعمال والتكاليف اللي تخص مايو فعلاً .. وتستبعد تأثير الفترات السابقة وتضيف أثر الأعمال اللي تخص الفترة .. وبعدها تقدر تعرف هل الانحراف سببه سعر أو كمية أو إنتاجية أو هدر أو تغير في حجم الأعمال .. ولا مجرد فرق توقيت .. وده بالضبط دور ميزان المراجعة التشغيلي 🤝

وخلي بالك .. إحنا مش بنتكلم عن دفترين أو مجموعتين مختلفتين من الأرقام .. إحنا بنتكلم عن نفس الأرقام لكن برؤيتين مختلفتين .. الميزان المالي يخدم المحاسبة وإعداد القوائم المالية .. والميزان التشغيلي يخدم الإدارة ومراقبة الموازنة وتحليل الانحرافات .. وفي النهاية لازم يكون فيه ربط واضح بينهم ..

ودي غالباً واحدة من أكبر أسباب الخلاف بين الإدارة المالية والإدارة التشغيلية .. وبتبان أكتر كل ما حجم الأعمال والمشروعات يكبر .. المالية شايفة اللي اتسجل في الدفاتر .. والتشغيل شايف اللي حصل على أرض الواقع .. وساعات الإدارة العليا بتكون أقرب لرواية التشغيل لأنهم الأقرب للعمليات وعندهم تفاصيل أدق عن اللي اتنفذ فعلاً .. خصوصاً لو المالية بتعرض أرقام الميزان من غير ما تربطها بالواقع التشغيلي

وهنا يظهر المدير المالي المميز .. مش اللي كل تركيزه مع فريقه إن ميزان المراجعة يتظبط والإقفال الشهري يخلص في ميعاده .. دي أساسيات المهنة .. النجاح الحقيقي إنك تكون فاهم أرقامك التشغيلية .. عارف موازناتك بتتنفذ إزاي؟ .. وفين الانحراف وليه حصل ؟ .. وفاهم بشكل واضح احتياجات التشغيل .. وفي نفس الوقت بتدير الصرف والسيولة وفقاً لموازنة نقدية واضحة مش وفقاً لرصيد البنك المتاح وقتها

ببساطة .. الميزان المالي بيقولك حساباتك وصلت لفين .. والميزان التشغيلي بيقولك شغلك ماشي إزاي .. والموازنة النقدية بتقولك تقدر تكمل إزاي .. والمدير المالي المميز لازم يكون فاهم التلاتة .. مهم جدا إن إدخالات الفريق المالي تكون صح لان دي بداية شغلك .. لكن قيمتك الحقيقية إنك تكون فاهم المشهد اللي صنع الأرقام

وأخيراً .. الكلام اللي فوق ده مش كلام ChatGPT ولا تنظير من كتاب .. دي تجربة حقيقية عشتها لما كنت المدير المالي لقطاع تشغيل وصيانة الحرمين الشريفين .. ودرع التكريم اللي استلمته في آخر يوم عمل ليا في الشركة .. استلمته من الإدارة التشغيلية نفسها 🙂

وعلشان كده تجربة الحرمين كانت من أجمل التجارب اللي عشتها كمدير مالي .. لأنها علمتني إن نجاح المالية مش إن التشغيل يجنبها أو يقلق منها .. نجاحها الحقيقي إن التشغيل يثق فيها ويشوفها شريك في نجاحه .. وإن محدش بينجح لوحده ..

لان النجاح الحقيقي عبارة عن فريق مؤمن بإمكانيات بعضيه .. وإدارة عليا عندها رؤية وفاهمة المشهد .. ومدير مالي قادر يفهم لغة التشغيل ويترجمها لأرقام تساعد الإدارة تاخد القرار الصح .. وطبعاً قبل كل ده وبعده .. التوفيق الأول والأخير هو من رب العالمين ..

حبيبكم أبو مروان ❤️

03/09/2026

نصيحة لصديقي المدير المالي ..
محدش غالباً هيقولهالك علناً غير حبيبك أبو مروان 🙂

مش مهم تكون شاطر في الأرقام .. ولا مهم تكون شاطر في التعامل مع البشر .. المهم تكون فاهم المشهد .. ولو سمحت حاول تفهم كلامي صح بعد إذنك 🤝

من كتر ما بقينا مشغولين بالمواضيع الرنانة والتنظير في مهنتنا .. نسينا أساسيات المهنة نفسها .. والأهم إننا نسينا إن المالية مش شغالة لوحدها .. وإن أرقامك في الآخر هي انعكاس للي بيحصل في كل إدارات الشركة

بقينا نتكلم كتير عن أحدث الأدوات والنماذج والاستراتيجيات .. وده كله مهم طبعاً .. لكن في نفس الوقت ممكن تدخل شركة تلاقي واقعها التشغيلي في خبر كان !! .. التحصيل مش متظبط .. المخزون مش متراقب .. المشتريات مش مرتبطة بالاحتياج الفعلي .. وكل إدارة شغالة بطريقتها ومفيش ربط حقيقي بينهم !!

يعني ببساطة .. تنظير في شغل متقدم وشكله من بره مبهر .. في حين إن أساسيات الشغل نفسها مش بتتطبق صح جوه الشركة !!

وطبيعي مع الوقت إن المشاكل التشغيلية دي تضغط على السيولة .. فنروح للتمويل .. وبعد فترة القرض وفوايده يبقوا ضغط إضافي .. فنفكر في تمويل جديد علشان نسدد القديم .. مع إن المشكلة التشغيلية اللي وصلتنا للوضع ده من البداية لسه موجودة !! .. وهنا السؤال الأهم .. إحنا فعلاً عندنا مشكلة تمويل؟ .. ولا عندنا مشكلة تشغيل بنحاول نغطيها بالتمويل؟!!

وطبعاً إنت كمدير مالي أول ما تشوف الوضع ده هتتحمس .. هتقول هنربط الإدارات ببعض .. هنظبط الموازنات .. هنراجع الانحرافات .. هنحدد المسؤوليات .. وهنبدأ نصلح طريقة الشغل .. ودا كلام جميل جداً ..

بس هنا بقى نصيحتي ليك .. قبل ما تشمر وتسخن .. افهم المشهد الأول 😃

هل الإدارة فعلاً عايزة تتغير؟ .. هل مستعدة تطبق الصح حتى لو ده هيغير طريقة شغل موجودة من سنين؟ .. هل مستعدة تحاسب وتحدد مسؤوليات؟ .. ولا المشاكل معروفة من زمان والكل متعايش معاها؟

وأنا هنا مش بقولك ريّح دماغك واستسلم بالعكس .. حاول واعمل اللي عليك .. قدم حلولك واثبت وجهة نظرك بالأرقام .. واعمل شغلك بالشكل اللي يرضي ضميرك المهني .. لكن حبيبك أبو مروان جايلك من المستقبل وبيقولك .. أعصابك وراحة بالك أهم ✋️

لأنك لو اكتشفت إن الإدارة عارفة المشكلة ومش عايزة تغيرها .. متقضيش عمرك تحاول تغير واقع أصحابه اختاروا يكملوا بيه .. خصوصاً إنك مع الوقت ممكن تلاقي نفسك داخل في صراعات وتعارض مصالح مع ناس الوضع الحالي مناسب جداً ليهم

ساعتها اعمل شغلك كويس .. حافظ على مهنيتك .. واعتبر المكان محطة وكُل فيها عيش لحد ما ربنا يكرمك بالمكان الأفضل .. وبإذن الله المكان الأفضل ده ميكونش في الجنة 🙂

الخلاصة يا عزيزي .. مش كل ما تعرف الصح يبقى لازم تقدر تطبقه .. لأن التطبيق محتاج بيئة وإدارة عندها رغبة حقيقية في التغيير .. فمتدخلش كل معركة لمجرد إنك شايف المشكلة وعارف حلها .. اعمل اللي عليك .. لكن افهم المشهد الأول .. ومتدفعش من أعصابك تمن مشكلة أصحابها نفسهم مش عايزين يحلوها !!

حبيبكم أبو مروان ❤️

24/07/2026

الأصل ثابت .. والأخلاق الحقيقة .. بتبان وقت الخلاف 🙂

Address

Riyadh
021935

Telephone

+201096060353

Website

https://edu.amrbazan.com/

Alerts

Be the first to know and let us send you an email when اكاديمية ابسطهالك - عمرو بزان posts news and promotions. Your email address will not be used for any other purpose, and you can unsubscribe at any time.