Caniogan Credit & Development Cooperative

10/09/2026

Isang matagumpay at makabuluhang araw na naman ng pagtulong ang ating naisagawa sapagkat ngayon po ang huling araw ng masayang pamamahagi ng tig-5 kilong bigas para sa ating mga minamahal na kasapi.

Sa kabuuan ay libo-libo ang bilang ng pamilya ang ating napasaya sa pamamagitan ng ating programa. Layunin ng gawaing ito na kahit sa mumunting kaparaanan makatulong at makapagbigay pag-asa sa bawat isa. Lalo at higit sa panahon na dumadaan ang lahat sa pagsubok at pangangailangan, mahalagang maramdaman na hindi tayo nag-iisa, isa sa kaagapay natin ay ang ating Kooperatiba.

Mag-iingat po tayong lahat, patuloy po nating ipanalangin na tuluyan ng bumuti na ang panahon at humupa na ang pagbaha sa iba’t-ibang lugar upang maibsan ang kalamidad at pagsubok na ating kinakaharap.

Maraming salamat po sa inyong walang sawang pagtitiwala at suporta sa Caniogan Credit & Development Cooperative!

09/09/2026

September 9, 2026 - Narito ang ilan sa mga larawan mula sa Day 5 ng ating isinagawang Rice Distribution.

Dumagsa pa rin ang bilang ng mga nagtungo sa iba’t-ibang sangay ng kooperatiba at nabigyan ng tig-5 kilong bigas. Patuloy ang ating suporta dahil sa kasalukuyan ay marami pa rin ang nakararanas ng mabigat na kalagayan dulot ng malalim na pagbaha sa kani-kanilang lugar.

Para sa mga hindi pa po nakakatanggap, mangyaring magtungo sa alinmang sangay upang makuha ang inyong bigas. Para naman sa mga nakatanggap na, ipaalam po natin ito sa iba pa nating mga kakilalang kasapi upang sila man ay mabigyan ng tulong mula sa kooperatiba.

Palagi po tayong manalangin para sa kaligtasan ng lahat, manatili tayong matatag at puno ng pag-asa. Malalampasan po natin ang pagsubok na ito at sama-samang makakabangon.

08/09/2026

September 08, 2026 - Ngayon po ay isinagawa ang ikaapat na araw ng pamimigay ng bigas para sa ating mga kasapi. Isa na namang masayang araw ng pagbabahagi, kung saan mas marami pa po sa ating mga kasapi ang nabigyan ng tulong.

Dama natin kung gaano kahalaga ang munting tulong na ito sa inyong pang-araw-araw na pangangailangan at batid natin na hindi lamang ito simpleng ayuda mula sa ating Koop, kundi ito ay isa sa mabuting paraan upang maipakita natin ang kahalagahan ng bawat kasapi.

Magpapatuloy po ang ating pamamahagi bukas, maaari po kayong mag-claim sa alinmang 13 sangay ng ating kooperatiba.

Patuloy po tayong mag-ingat at dalangin po natin ang kaligtasan ng bawat isa.

07/09/2026

Sa kabila ng masungit na panahon at maraming lugar pa rin ang apektado ng pagbaha, dumami pa ang nabahagian ng tulong sa ikatlong araw ng pagbibigay ng bigas sa mga kasapi ng ating kooperatiba.

Lubos na nagagalak ang pangasiwaan sa pagsasagawa ng ganitong aktibidad sapagkat batid natin na hindi madali ang buhay sa ganitong sitwasyon. Naniniwala tayo na ang bawat munting ambag ay may malaking halaga sa bawat isa sa panahon ng kalamidad.

Tuloy-tuloy po ang pag-abot natin sa ating mga kasapi. Tingnan po ang inyong schedule o kung kayo man ay may transaksyon sa kooperatiba, maaari na po ninyong makuha ang inyong bahagi.

Manatiling ligtas po ang lahat, patuloy po nating ipanalangin ang magandang panahon at ang tuluyang paghupa ng baha.

04/09/2026

Ikalawang araw na ng pamamahagi ng tig-5 kilong bigas para sa ating mga kasapi—isang simpleng handog ng kooperatiba na naglalayong makapagbigay ng kaunting ginhawa sa bawat pamilya.

Sa kabila ng kalamidad na ating pinagdadaanan, pinili pa rin ng nakararami na maging masaya, matatag, at magpasalamat. Hindi matapos tapos ang pagpapaabot ng taos-pusong pasasalamat mula sa mga napagkalooban ng tulong. Ang kanilang mga ngiti at positibong pananaw ang nagsisilbing inspirasyon upang patuloy nating isulong ang malasakit at pagtutulungan sa ating kooperatiba.

03/09/2026

Ngayong araw ay nagpasimula na ang pag-aabot ng munting tulong para sa ating mga kasaping naapektuhan ng pagbaha.

Sa unang araw ng pamimigay, nakapagkaloob tayo ng humigit-kumulang 1,900 na tig-5 kilong bigas na ipinamahagi sa mga kasapi sa lahat ng 13 sangay ng ating kooperatiba.

Sa tulong at biyaya ng Panginoon, patuloy tayong magmamalasakit at magtutulungan upang maging magaan ang pagharap sa mga pagsubok at kalamidad.

Maraming salamat sa lahat ng mga kasapi, ipagpatuloy po natin ang pagtangkilik sa ating kooperatiba.

02/09/2026