17/05/2023
මහජන බැංකුවේ ‘වාසි කෝටියයි’ සුපිරි ජයග්රාහකයාට හිමි
රුපියල් කෝටියක ත්යාග මුදල පිරිනැමේ.
මහජන බැංකුවේ 'People's Remittance වාසි කෝටියයි, එවන්නයි දිනන්නයි’ අවසන් මහා දිනුම් ඇදීමේ රුපියල් කෝටියක් හිමි සුපිරි ජයග්රාහකයා වූ දෙහිවල පදිංචි එම්. ඒ. සුරංජන පෙරේරා මහතාට හිමි චෙක්පත, මහජන බැංකුවේ සභාපති සුජීව රාජපක්ෂ හා වැඩබලන ප්රධාන විධායක නිලධාරි/ සාමාන්යාධිකාරි ක්ලයිව් ෆොන්සේකා යන මහත්වරුන් අතින් ඔහු වෙත පිරිනැමීම කොළඹ 02, මහජන බැංකුවේ ප්රධාන කාර්යාලයේදී පසුගියදා සිදුකෙරිණි.
මේ අවස්ථාවට මහජන බැංකුවේ ජ්යෙෂ්ඨ නියෝජ්ය සාමාන්යාධිකාරී (එතෙර ගනුදෙනු සේවා) රොහාන් පතිරගේ, සහකාර සාමාන්යාධිකාරිනි (එතෙර ගනුදෙනු සේවා) අරුණි ලියනගුණවර්ධන, අලෙවි ප්රධානී නාලක විජයවර්ධන සහ ජ්යෙෂ්ඨ කළමනාකාරිනී (එතෙර ගනුදෙනු සේවා) තිළිණි පෙරේරා යන මහත්ම මහත්මීන් සහ බැංකු නිලධාරින් එක් වූහ.
රටේ ආර්ථිකය ශක්තිමත් කිරීමට මෙන්ම ළබැඳියන්ගේ ජීවන තත්ත්වය නගා සිටුවීම සඳහාත් වෙහෙස මහන්සිය නොබලා රැකී රක්ෂාවල නියැලෙන ශ්රී ලාංකික විදෙස් ශ්රමිකයින් දිරිමත් කර ඔවුන්ව ඇගයීමේ අරමුණින්, ‘People's Remittance වාසි කෝටියයි’ දිනුම් ඇදීම 2022 මහජන බැංකුව ආරම්භ කරන ලදී. මේ වැඩසටහන යටතේ වසර අවසානයේ තෝරාගන්නා සුපිරි ජයග්රාහකයාට රුපියල් කෝටියක් සහ මාසික ජයග්රාහකයින්ට රුපියල් මිලියනය බැගින් පිරිනැමිණි. මීට අමතරව සතිපතා වාසනාවන්ත ජයග්රාහකයින් 48 දෙනෙකුට කැරට් 22 රන් කාසි ද, 2022 දෙසැම්බර් 31 දක්වා තෝරාගත් දිනපතා ජයග්රාහකයින් 334 දෙනෙකුට රුපියල් 10,000 බැගින් වූ මුදල් ත්යාග ද පිරිනැමිණි.
මේ වැඩපිළිවෙල තවදුරටත් ඉදිරියට ගෙන යමින් මහජන බැංකුව 'People's Remittance වාසි කෝටියයි 2023’ ද දියත් කර ඇති අතර, මෙහි අවසන් මහා දිනුම් ඇදීමේ ජයග්රාහකයාට මුදලින් රුපියල් කෝටියක් (රු.10,000,000ක්) පිරිනැමේ. එමෙන්ම දෙවැනි ත්යාගය ලෙස රුපියල් මිලියන 3ක් සහ තෙවැනි ත්යාගය ලෙස රුපියල් මිලියන 2ක් ලබාදෙයි. මීට අමතරව මාසික ජයග්රාහකයාට රුපියල් මිලියනයක් බැගින් සහ සතිපතා ජයග්රාහකයාට රුපියල් ලක්ෂය බැගින් පිරිනැමීමට කටයුතු යොදා ඇත. වැඩියෙන් මුදල් එවන තරමට දිනුම් අවස්ථා වැඩිවේ.
2023 දෙසැම්බර් 31 වැනිදා දක්වා මහජන බැංකුවේ පුද්ගලික ගිණුම් වලට එවන සේවක ප්රේෂණ, මහජන බැංකු ශාඛා කවුන්ටරයකින් මුදල් ලබාගැනීම (B2B) සඳහා එවන සේවක ප්රේෂණ සහ Western Union, Ria හෝ ඊට සමාන වෙනත් මාධ්යයන් ඔස්සේ මහජන බැංකු ශාඛා වලින් මුදල් ලබාගැනීම සඳහා එවන ප්රේෂණ ලබන සියලුම ගනුදෙනුකරුවන් මේ දිනුම් ඇදීමට සුදුසුකම් ලබයි.
