07/08/2025
सुर्खेतमा ८ तोला सुन र ५० हजार नगद चोरी गर्ने पक्राउ !
जिल्ला प्रहरी कार्यालय, सुर्खेतका अनुसार साउन २१ गते बिहान करिब साढे ११ बजेको समयमा यरीचोक, सुर्खेत स्थित कल्पना मल्लको घरबाट २.५ तोला सुनको सिक्री, २.५ तोलाको इन्डियन मंगलसूत्र, २ तोलाको बेरुवा औंठी, १ तोलाको काँक्रेविहार औंठी, झाला, क्लिप, ब्रासलेट र नगद ५० हजार रुपैयाँ चोरी भएको थियो भने घटनाबारे सुचना प्राप्त हुनासाथ प्रहरी कार्यालय सुर्खेतबाट खटिएको प्रहरी टोलीले घटनास्थल आसपासको सीसीटीभी फुटेजलगायतको सहायताले अनुसन्धान थालेको थियो।
अनुसन्धानको क्रममा सुनका गरगहना चोरी गर्ने वीरेन्द्रनगर–६ शान्तिटोल बस्ने १८ वर्षीय अर्जुन गहतराजलाई नियन्त्रणमा लिइएको प्रहरीले जनाएको छ। प्रहरीले उनको साथबाट चोरी भएका सामग्रीमध्ये सुनको ब्रासलेट, लेडिज औंठी, बेरुवा औंठी र सिक्री फेला पारेको छ। हाल पक्राउ परेका गहतराज विरुद्ध चोरी सम्बन्धी मुद्दा दर्ता गरी थप अनुसन्धान भइरहेको प्रहरीले जनाएको छ
Surkhet - सुर्खेत
