06/09/2026
MEET THE FOUNDER | Ré paper studio-ийн үүсгэн байгуулагч Г.Эрчиссаран
"Бизнесээ ганцаараа авч явах үеийн их стресс, хуримтлагдсан олон бодлыг цэгцлэхэд бясалгал хамгийн их тусалдаг"
Их сургуулиа төгсөөд байгальд ээлтэй, нөхцөл сайтай, цалингийн хувьд ч боломжийн том компанид ажиллаж байсан ч миний хүссэн зүйл биш байв. Хэчнээн тохилог орчин байсан ч сонирхол нийцэхгүй ажил хүнийг амархан туйлдуулж, ажлаас халширч эхэлдэг юм билээ. Тэгээд "буруу галт тэргэнд суучихсан бол аль болох эрт мэдсэн хойноо шууд буух хэрэгтэй" гэдэг шиг ажлаасаа гарч, уур амьсгалын өөрчлөлтөд бодитой хувь нэмэр оруулах зорилгоор аргалаас цаас гаргаж авах “Ré paper studio” төслөө эхлүүлсэн юм.
Манай улсад өдөрт 150 мянган тонн малын өтөг бууц ялгардаг бөгөөд ихэнх нь хэрэглэгдэхгүй хаягддаг. Энэхүү түүхий эдийг ашиглан цаашид автомат үйлдвэрлэл нэвтрүүлж чадвал нэг тонн цаас тутамд 20 мод аварч, 300-500 кг нүүрсхүчлийн хий ялгарахаас сэргийлэх боломжтой юм. Одоо бид үйл ажиллагаагаа эхлүүлээд 3 жил болж байгаа бөгөөд Японы Токиогийн их сургуулийн лабораторитой хамтран энэхүү автомат үйлдвэрийн судалгаа, хөгжүүлэлтийг ахиулахаар ажиллаж байна.
Гэвч бүх зүйлийг тэгээс нь, өөрийн гараар бүтээх нь залуу бизнес эрхлэгчийн хувьд амаргүй шүү дээ. Тогтсон орлогогүй, хадгаламжаараа амьдарч, гэрийнхээ гал тогоонд ганцаараа өдөржин аргалаа угааж, буцалгаж, интернэтээс мянга гаруй судалгааны ажил, ном уншиж суусаар 6 сарын дараа л анхны цаасны хэлбэрийг гаргаж авсан. Химич мэргэжилтэй учраас цаас хийх процессыг судлахад хангалттай гэж бодсон ч компани байгуулаад эхэлмэгц нягтлан бодох, хүний нөөц, борлуулалт, маркетинг гээд нэг дор 10 гаруй мэргэжлийн ажлыг зэрэг сурч, амжуулах шаардлага тулгарсан.
Жижиг бизнест хөрөнгө оруулалтын орчин амаргүй, дээрээс нь сонгуулийн үеэр их хэмжээний дүнтэй захиалгын саналууд ирж байсан ч өөрийн баримталдаг үнэт зүйл, ёс зүйгээсээ урвахгүйн тулд татгалзсан тохиолдол ч бий. Энэ бүх амаргүй цаг үед намайг танихгүй хэр нь манай бүтээгдэхүүний үнэ цэнийг ойлгож, итгэж дэмждэг хэрэглэгчид, гэр бүл, найз нөхөд минь хамгийн том “нөмөр” нөөлөг болдог.
Бизнес эхлүүлээд бүх асуудлыг ганцаараа шийдэх шаардлага гарахад толгой дотор маш олон бодол, стресс хуримтлагддаг юм билээ. Ийм үед бясалгалаар хичээллэх нь надад хамгийн их тус болдог. Миний хувьд бясалгал яг л спорттой адилхан санагддаг. Спортод амжилт гаргахын тулд өдөр бүр бэлтгэл хийж, асар их тууштай байдал, сахилга бат шаарддаг шиг бясалгал ч мөн оюун санаагаа өдөр бүр тогтвортой дасгалжуулахыг шаарддаг. Учир нь аливаа асуудлын 99 хувь нь зөвхөн толгой дотор байдаг бөгөөд бясалгаж бодлоо цэгцэлчихвэл тэр олон стресс зүгээр л дарааллаар нь шийдэх ёстой даалгавар болж хувирдаг. Бизнес гэдэг төгс зүйл биш, алдаа гарна, унах ч үе байна. Гол нь унахаас айхгүйгээр, өнгөрсөнд харамсахгүй, ирээдүйд санаа зовохгүйгээр одоо цагтаа төвлөрч, урагшаа харсан сэтгэл зүйтэй байх нь чухал. Баг хамт олон, ажилчдадаа эрүүл соёл, орчныг бий болгож, бие биедээ итгэлтэй байж чадвал өсөх боломж үргэлж нээлттэй байдаг.
Би энэ бизнесээ эхлэхдээ дөнгөж бакалавраа төгссөн, туршлагагүй, гэнэн, юм ч зарж үзээгүй шинэхэн төгсөгч байсан. Гэвч өөрийн сурсан мэдлэг, хөдөлмөрлөсөн хөдөлмөрийг хэн ч булааж авдаггүй бөгөөд "Эзэн хичээвэл заяа хичээнэ" гэдэг үнэн юм билээ.
Би чадсан юм чинь та ч гэсэн чадна аа!
👉 Бизнесийн зээлийн хүсэлт илгээх:
https://app.numur.mn/t/nbfi-0001/loan-request/6/apply
📞 Дэлгэрэнгүй мэдээлэл: 7511-1133
#ТаЧадна #БизнесийнЗээл
