Өвөрхангай аймаг Зоонозын Өвчин Судлалын Төв

30/10/2026

📌Албан хаагчдын мэдлэг, мэдээллийг дээшлүүлэх, архив, албан хэрэг хөтлөлтийн журам, стандартын хэрэгжилтийг хангах зорилгоор дотоод сургалт зохион байгууллаа.

Сургалтын хүрээнд:
- Шимэгч судлагч О.Батдулам “Үндэсний бичгээр цахим орчинд бичих нь” сэдвээр;
- Архив, бичиг хэргийн эрхлэгч Ц.Нандинсувд “Архив, албан хэрэг хөтлөлтийн үйл ажиллагаанд мөрдөгдөж буй хууль, тогтоомж болон анхаарах асуудлууд” сэдвээр тус тус мэдээлэл, арга зүйн сургалт явууллаа.
Тус сургалтаар албан хаагчдын үндэсний бичгийн хэрэглээний мэдлэгийг нэмэгдүүлэх, архив, албан хэрэг хөтлөлтийн талаарх хууль, эрх зүйн мэдлэгийг бататгах, албан бичиг боловсруулах, хөтлөх үйл ажиллагааны чанар, стандартыг сайжруулахад чиглэсэн мэдээлэл өгч, санал солилцлоо.

29/10/2026

⚠️ ГАЛЗУУ ӨВЧНӨӨС СЭРГИЙЛЬЕ!

Галзуу өвчин нь хүн, амьтанд халдварладаг, вирусээр үүсгэгддэг аюултай халдварт өвчин юм.

🐕 Та дараах зөвлөмжийг хэрэгжүүлээрэй.

Нохой, муураа галзуу өвчний эсрэг вакцинд тогтмол хамруулах

Гэрийн тэжээвэр амьтдаа хараа хяналтгүй сул тавихгүй байх

Эзэнгүй болон зэрлэг амьтанд ойртохгүй байх

Амьтанд хазуулсан, маажуулсан тохиолдолд шархыг савантай урсгал усаар 15 минут орчим сайтар угаах

ЯАРАЛТАЙ эмнэлгийн байгууллагад хандаж, галзуу өвчний эсрэг вакцин, шаардлагатай эмчилгээг хийлгэх

❗ Галзуу өвчний шинж тэмдэг илрэхийг хүлээж болохгүй!

АМЬТНЫГ ХАМГААЛЪЯ — АМЬ НАСАА ХАМГААЛЪЯ!

ӨВӨРХАНГАЙ АЙМГИЙН ЗООНОЗЫН ӨВЧИН СУДЛАЛЫН ТӨВ

26/10/2026

✅ ӨВӨРХАНГАЙ АЙМГИЙН ТӨГРӨГ СУМАНД НОХОЙН ТООЛЛОГО ХИЙЛЭЭ

Өвөрхангай аймгийн Төгрөг суманд 2026 оны 10 дугаар сарын 20–22-ны өдрүүдэд суурьшлын бүсийн золбин нохойн тоо толгой, тархалтыг тогтоох, эзэнтэй нохойн тоог тодруулах зорилгоор санамсаргүй түүврийн аргаар тооллого, судалгааны ажлыг зохион байгууллаа.
Сумын Онцгой комиссын гишүүд болон Эрүүл мэндийн төвийн эмч, ажилтнуудад “Зоонозын халдварт өвчний голомтын төлөв байдал, урьдчилан сэргийлэлт” сэдвээр сургалт зохион байгуулж, нийт 22 хүнийг хамрууллаа.

Мөн ерөнхий боловсролын сургуулийн 6–12 дугаар ангийн 160 суралцагчдад “Зоонозын халдварт өвчнөөс урьдчилан сэргийлэх нь” сэдвээр сургалт явуулж, холбогдох зөвлөмж, гарын авлага тараан, өдөр тутмын амьдралдаа халдвараас урьдчилан сэргийлэх зөв дадлыг хэвшүүлэх талаар мэдээлэл, зөвлөгөө өглөө.

📌 Судалгааны явцад нохойтой айл өрхөөс асуумж судалгаа авч “Галзуу өвчнөөс урьдчилан сэргийлэх”, “Бэтэг өвчнөөс урьдчилан сэргийлэх” зөвлөмжийг худалдааны төв, гэр хорооллын ус түгээх цэг мэдээллийн самбарт байршуулж, иргэдэд яриа таниулага хийлээ.

23/10/2026

✅ЭЕРЭГ УУР АМЬСГАЛ- ЭРЧ ХҮЧТЭЙ ХАМТ ОЛОН НӨЛӨӨЛЛИЙН АРГА ХЭМЖЭЭ ЗОХИОН БАЙГУУЛЛАА.

Дэлхийн ёс зүйн өдрийг тохиолдуулан байгууллагын ёс зүйн багаас Эерэг уур амьсгал- Эрч хүчтэй хамт олон уриан дор нөлөөллийн арга хэмжээг нийт ажилчдын дунд зохион байгууллаа.

📍Уг арга хэмжээгээр:
- төрийн албан хаагчийн болон эмнэлгийн мэргэжилтний ёс зүйн хэм хэмжээг сурталчлан таниулах
- байгууллагын соёлын талаар ойлголтыг нэмэгдүүлэх
- хамт олны уур амьсгалыг сайжруулах хөгжилтэй асуулт, цэнгээнт тоглоом
- арга хэмжээнээс төрсөн сэтгэгдэлээ самбарт илэрхийлэх ажлуудыг хийлээ.

📍Эерэг ажлын байрыг бий болгох арга хэмжээнд идэвхтэй оролцсон хамт олондоо баярлалаа. Мөн бидний урилгыг хүлээн авч үнэтэй мэдлэгээ хуваалцсан аймгийн Насан туршийн суралцахуйн төвийн менежер Т.Мягмарсүрэн танд нийт хамт олны өмнөөс талархал илэрхийлье.
Эерэг орчин танаас эхэлнэ.
Өвөрхангай аймгийн Насан туршийн суралцахуйн төв

ЁС ЗҮЙН БАГ

23/10/2026

“ТОГТВОРТОЙ ИРЭЭДҮЙ-2026” СУРАЛЦАГЧДЫН ЭКО ЧУУЛГАН🌿🦠🐞🦟🌍
Өвөрхангай аймгийн Политехник коллежоос зохион байгуулсан “Тогтвортой ирээдүй-2026” сурагчдын эко чуулганы хүрээнд Өвөрхангай аймгийн ерөнхий боловсролын сургуулиуд, политехник коллежийн эко клубын суралцагчид, чиглүүлэгч багш нарт мал амьтнаас хүнд дамжин халдварладаг халдварт өвчин болон байгууллагын үйл ажиллагааны талаар танилцуулага мэдээллийг хүргэж ажиллаа.

🌳Байгаль дэлхийгээ хайрлан хамгаалж, эрүүл аюулгүй орчныг хамтдаа бүтээе😊

16/10/2026

✅ БОЭТ, СУМ, ӨРХИЙН ЭРҮҮЛ МЭНДИЙН ТӨВИЙН НЭМА НАРТ СУРГАЛТ ЗОХИОН БАЙГУУЛЛАА.

Зоонозын халдварын тандалтын үйл ажиллагааг таниулах, ард иргэдэд чиглэсэн урьдчилан сэргийлэх арга хэмжээг зохион байгуулах зорилгоор Бүсийн оношилгоо, эмчилгээний төв, сум, өрхийн эрүүл мэндийн төвүүдийн нийгмийн эрүүл мэндийн ажилтнуудад сургалт зохион байгууллаа.
Тус сургалтаар эрүүл мэндийн байгууллага болон ард иргэдэд чиглэсэн арга хэмжээний талаар анхаарах зүйлсийг онцоллоо. Нийгмийн эрүүл мэндийн ажилтнуудын мэдлэг, чадавхыг сайжруулснаар сургалт сурталчилгааг өвчлөлийн улиралд тааруулан, үр дүнтэй зохион байгуулахад чухал ач холбогдолтой юм.

14/10/2026

Хариуцлагатай төрийн түшээ аянд нэгдэж татварын өр төлбөрөө хуулийн хугацаанд улс орон нутгийн төсөвт төвлөрүүлж, татварын эрсдэлгүй байхыг уриалж байна.

Өвөрхангай аймгийн ЗДТГ-тай хамтран Төрийн албан хаагчдын татварын боловсрол, татвар төлөх ухамсар, хариуцлагыг нэмэгдүүлэх, татварын хууль тогтоомжийг хэрэгжүүлэхэд дэмжлэг үзүүлэх зорилгоор “ХАРИУЦЛАГАТАЙ ТӨРИЙН ТҮШЭЭ” аяныг зохион байгуулж байна.
Аяны хүрээнд төрийн байгууллага, төрийн албан хаагчдад татварын хууль тогтоомж, татвар төлөх хугацаа, цахим татварын үйлчилгээний талаар мэдээлэл, зөвлөгөө хүргэх, татварын өр төлбөр үүсэхээс урьдчилан сэргийлэх, үүссэн өр төлбөрийг хууль тогтоомжийн дагуу шийдвэрлэхэд чиглэсэн сургалт, сурталчилгааны ажлыг зохион байгуулах юм.
Татвар төлөгчид дараах албан ёсны системүүдээр нэвтэрч, өөрийн татварын үлдэгдэл, өр болон тайлангаа хянах боломжтой:
• Цахим татварын систем (etax.mta.mn): Хувь хүн болон аж ахуйн нэгжүүд нэвтэрч татварын тайлангаа тушаах, дутуу төлөлтийг харах, татварын тодорхойлолт авах боломжтой.
• Татвар төлөх цахим систем (itax.mta.mn/): Авто тээврийн хэрэгсэл, үл хөдлөх хөрөнгө, хог хаягдлын хураамж зэрэг орон нутгийн татварыг онлайнаар төлөхөд зориулагдсан.
• E-Mongolia систем: "Татварын байгууллага" цэс рүү орж иргэд, хуулийн этгээдийн татварын тодорхойлолтоо QR кодтойгоор шууд татан авах боломжтой.
Хэрэв танд татварын өр төлбөр, тайлан гаргалттай холбоотой асуулт байвал аймгийн Татварын газрын 7032-2651, 7032-2615, 7032-2220 дугаараас зөвлөгөө авах боломжтой.
“Хариуцлагатай төрийн түшээ” аянд нэгдэж, татварын өр төлбөрөө хуулийн хугацаанд улс орон нутгийн төсөвт төвлөрүүлж, татварын эрсдэлгүй байхыг уриалж байна.

14/10/2026

Бэтэг өвчин нь нохой, чоно зэрэг махчин амьтдын ялгадасаар дамжин бохирдсон ус, хүнсний бүтээгдэхүүн, шороог гараар дамжуулан амьсгалын болон хоол боловсруулах замаар хүнд халдварладаг.

Халдвар дамжих үндсэн зам
• Үүсгэгч: Echinococcus granulosus (уйланхайт бэтэг) ба Echinococcus multilocularis (цулцант бэтэг) гэх туузан хорхойн авгалдай буюу өндөг юм.
• Халдварын эх уурхай: Гол төлөв халдвартай нохой, муур болон зэрлэг махчин амьтад байдаг.

Өвчний онцлог
• Хүнд халдварласны дараа шимэгч нь ихэвчлэн элэг, уушгинд байрлаж, 5-10 жилийн хугацаанд аажмаар томроод уйланхай (киста) үүсгэдэг.
• Шинж тэмдэг нь удаан хугацаанд мэдэгддэггүй.

Урьдчилан сэргийлэх
• Нохойг жил бүр туулгаж, эмчлэх.
• Нохой барьсны дараа гараа савандаж сайтар угаах.
• Малын бэтэгтэй эрхтэнийг нохойд өгөхгүй байх, булж устгах.

12/10/2026

“ХОС БИЧИГТЭН III” АЯНД АМЖИЛТТАЙ ОРОЛЦОЖ “ХОС БИЧИГТЭН” АЛБАН БАЙГУУЛЛАГА БОЛЛОО.

📌Өвөрхангай аймгийн хэмжээнд зохион байгуулагдсан “Хос бичигтэн III” нөлөөллийн аян, болзолт уралдаанд амжилттай оролцож “Хос бичигтэн” албан байгууллага ангилалд тусгай байр эзэллээ. Тус аян нь үндэсний бичгийн хэрэглээг түгээн дэлгэрүүлэх, эх хэл, бичиг үсэг, өв соёлоо эрхэмлэн хөгжүүлэх зорилготой бөгөөд төрийн болон төрийн бус байгууллага, аж ахуйн нэгж, төрийн албан хаагч, архив, албан хэрэг хөтлөлтийн ажилтнуудын дунд зохион байгуулагдсан юм. Энэхүү амжилт нь үндэсний бичгийн хэрэглээг нэмэгдүүлэх, хос бичгээр албан хэрэг хөтлөх соёлыг төлөвшүүлэх үйлсэд хамт олны гаргаж буй хичээл зүтгэлийн илэрхийлэл боллоо.

📌Монгол бичгээ эрхэмлэн дээдэлж, өв соёлоо түгээн дэлгэрүүлэх үйлсэд хамтдаа!

Эх сурвалж: Зарим фото зургийг Аймгийн Засаг Даргийн Тамгийн газрын цахим хуудаснаас авав.

“ᠬᠣᠣᠰ ᠪᠢᠴᠢᢉᠲᠡᠨ III” ᠠᠶᠠᠨ ᠳ᠋ᠤ ᠠᠮᠵᠢᠯᠲᠠᠲᠠᠢ ᠣᠷᠤᠯᠴᠠᠵᠤ “ᠬᠣᠣᠰ ᠪᠢᠴᠢᢉᠲᠡᠨ” ᠠᠯᠪᠠᠨ ᠪᠠᠢᠭᠤᠯᠤᠯᠭᠠ ᠪᠣᠯᠤᠯᠠ᠃
ᠥᠪᠦᠷᠬᠠᠩᠭᠠᠢ ᠠᠢᠮᠠᠭ ᠤ᠋ᠨ ᠬᠡᠮᠵᠢᠶᠡᠨ ᠳ᠋ᠦ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠳᠠᠭᠰᠠᠨ “ᠬᠣᠣᠰ ᠪᠢᠴᠢᢉᠲᠡᠨ III” ᠨᠥᠯᠦᠭᠡᠯᠡᠯ ᠦ᠋ᠨ ᠠᠶᠠᠨ᠂ ᠪᠣᠯᠵᠤᠯᠲᠤ ᠤᠷᠤᠯᠳᠤᠭᠠᠨ ᠳ᠋ᠤ ᠠᠮᠵᠢᠯᠲᠠᠲᠠᠢ ᠣᠷᠤᠯᠴᠠᠵᠤ “ᠬᠣᠣᠰ ᠪᠢᠴᠢᢉᠲᠡᠨ” ᠠᠯᠪᠠᠨ ᠪᠠᠢᠭᠤᠯᠤᠯᠭᠠ ᠠᠩᢉᠢᠯᠠᠯ ᠳ᠋ᠤ ᠲᠤᠰᠬᠠᠢ ᠪᠠᠢᠷᠢ ᠡᠵᠡᠯᠡᠯᠡ᠃
ᠲᠤᠰ ᠠᠶᠠᠨ ᠨᠢ ᠦᠨᠳᠦᠰᠦᠨ ᠤ ᠪᠢᠴᠢᠭ ᠦ᠋ᠨ ᠬᠡᠷᠡᢉᠯᠡᠭᠡ ᠶ᠋ᠢ ᠲᠦᠭᠡᠭᠡᠨ ᠳᠡᠯᠭᠡᠷᠡᢉᠦᠯᠬᠦ᠂ᠡᠬᠡ ᠬᠡᠯᠡ᠂ ᠪᠢᠴᠢᠭ ᠦᠰᠦᠭ᠂ ᠥᠪ ᠰᠣᠶᠤᠯ ᠢ᠋ᠢᠠᠨ ᠡᠷᠬᠢᠮᠯᠡᠨ ᠬᠥᢉᠵᠢᢉᠦᠯᠬᠦ ᠵᠣᠷᠢᠯᠭᠠᠲᠠᠢ ᠪᠥᠭᠡᠳ ᠲᠥᠷᠦ ᠶ᠋ᠢᠨ ᠪᠣᠯᠤᠨ ᠲᠥᠷᠦ ᠶ᠋ᠢᠨ ᠪᠤᠰᠤ ᠪᠠᠢᠭᠤᠯᠤᠯᠭᠠ᠂ᠠᠵᠤ ᠠᠬᠤᠢ ᠶ᠋ᠢᠨ ᠨᠢᠭᠡᠴᠡ᠂ ᠲᠥᠷᠦ ᠶ᠋ᠢᠨ ᠠᠯᠪᠠᠨ ᠬᠠᠭᠠᠭᠴᠢ᠂ ᠠᠷᠬᠢᠸ᠂ ᠠᠯᠪᠠᠨ ᠬᠡᠷᠡᠭ ᠬᠥᠲᠦᠯᠦᠯᠲᠡ ᠶ᠋ᠢᠨ ᠠᠵᠢᠯᠲᠠᠨ ᠨᠤᠭᠤᠳ ᠤ᠋ᠨ ᠳᠤᠮᠳᠠ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠳᠠᠭᠰᠠᠨ ᠶᠤᠮ᠃
ᠡᠨᠡ ᠬᠦ ᠠᠮᠵᠢᠯᠲᠠ ᠨᠢ ᠦᠨᠳᠦᠰᠦᠨ ᠪ ᠪᠢᠴᠢᠭ ᠦ᠋ᠨ ᠬᠡᠷᠡᢉᠯᠡᠭᠡ ᠶ᠋ᠢ ᠨᠡᠮᠡᢉᠳᠡᢉᠦᠯᠬᠦ᠂ ᠬᠣᠣᠰ ᠪᠢᠴᠢᠭ ᠢ᠋ᠢᠡᠷ ᠠᠯᠪᠠᠨ ᠬᠡᠷᠡᠭ ᠬᠥᠲᠦᠯᠬᠦ ᠰᠣᠶᠤᠯ ᠢ᠋ ᠲᠥᠯᠦᠪᠰᠢᢉᠦᠯᠬᠦ ᠦᠢᠯᠡᠰ ᠲᠦ ᠬᠠᠮᠲᠤ ᠣᠯᠠᠨ ᠤ᠋ ᠭᠠᠷᠭᠠᠵᠤ ᠪᠤᠢ ᠬᠢᠴᠢᠶᠡᠯ ᠵᠢᠳᠭᠦᠯ ᠦ᠋ᠨ ᠢᠯᠡᠷᠬᠡᠢᠯᠡᠯ ᠪᠣᠯᠤᠯᠠ᠃
ᠮᠣᠩᠭᠣᠯ ᠪᠢᠴᠢᠭ ᠢ᠋ᠢᠡᠨ ᠡᠷᠬᠢᠮᠯᠡᠨ ᠳᠡᠭᠡᠳᠦᠯᠡᠵᠦ᠂ ᠥᠪ ᠰᠣᠶᠤᠯ ᠢ᠋ᠢᠠᠨ ᠲᠦᠭᠡᠭᠡᠨ ᠳᠡᠯᠭᠡᠷᠡᢉᠦᠯᠬᠦ ᠦᠢᠯᠡᠰ ᠲᠦ ᠬᠠᠮᠲᠤ ᠳ᠋ᠤ ᠪᠠᠨ!

06/10/2026

🦠 БЭТЭГ ӨВЧНӨӨС УРЬДЧИЛАН СЭРГИЙЛЬЕ

Бэтэг өвчин нь нохой болон бусад махчин амьтдаар дамжин хүнд халдварлах боломжтой, удаан хугацаанд шинж тэмдэггүй явж байгаад хүний элэг, уушги зэрэг эрхтэнд хүнд хэлбэрийн эмгэг үүсгэдэг өвчин юм.

⚠️ Халдвараас сэргийлэхийн тулд:
• Нохой, мууртай харьцсаны дараа гараа сайтар угаах
• Нохойг тогтмол туулгалтад хамруулах
• Нохой, муурны ялгадастай болгоомжтой харьцах
• Мал, амьтны дотор эрхтнийг түүхий болон дутуу болгож хэрэглэхгүй байх
• Мал нядлах, дотор эрхтэн боловсруулах үед ариун цэврийг сайтар сахих
• Хүүхдийг эзэнгүй болон золбин нохойтой тоглуулахгүй байх

👉 Өөрийн болон гэр бүлийнхээ эрүүл мэндийг хамгаалж, бэтэг өвчнөөс урьдчилан сэргийлье!