21/11/2022
အလုပ်မရှိသေးခင် အကျိုးရှိအောင် ဘယ်လိုနေမလဲ??
-ဘွဲ့ရခါစ အလုပ်မရှိသေးဘူးလား?
-ကျောင်းထွက်ထားပြီး အလုပ်ရှာနေတာလား?
-အလုပ်ထွက်ခါစ အလုပ်သစ်ရှာနေတာလား?
အလုပ်ရှာနေတဲ့သူ ဘယ်သူပဲဖြစ်ဖြစ် ကြားကာလမှာ အကျိုးရှိအောင် ဘယ်လိုနေသင့်တယ်ဆိုတာ ပြောပြချင်ပါတယ်။
⑴ အချိန်ဇယားနဲ့ နေပါ။
ဘယ်နှစ်နာရီ ဘယ်နှစ်မိနစ်မှာ ဘာလုပ်မယ်ဆိုပြီး အတိအကျကြီး လုပ်စရာမလိုပါဘူး။အဓိက,က တစ်နေ့မှာ အကျိုးရှိတဲ့ အလုပ်မျိုး နှစ်ခု၊သုံးခု အနည်းဆုံးလုပ်ပါ။
-ည အရမ်းနောက်ကျထိမနေပါနဲ့။မနက်အိပ်ရာထနောက်ကျရင် လုပ်ချင်ကိုင်ချင်စိတ် ပျောက်သွားတတ်တယ်။
-တစ်နေကုန် ဟိုလျှောက်လည် ဒီလျှောက်လည်၊ဖုန်းနှိပ်၊TVကြည့်ရင်း ယောင် မနေမိပါစေနဲ့။
ဘေးက ပြောမယ့် ဘော်ဒါ မရှိတော့သလို၊လုပ်ဖော်ကိုင်ဖက်လည်း တွေလည်း မရှိသေးတော့ တစ်ယောက်တည်း အချိန်ဖြုန်းနေမိတတ်ပါတယ်။
⑵ တက်တက်ကြွကြွနေပါ။
တစ်နေကုန် အခန်းထဲအောင်းမနေပါနဲ့။သူငယ်ချင်းတွေနဲ့ တွေ့ပါ။လုပ်စရာမရှိရင် စိတ်က မကောင်းတဲ့ဘက်ကို အာရုံရောက်နေတတ်ပါတယ်။လုပ်ချင်တာ မလုပ်ရတော့ အားမလိုအားမရဖြစ်နေတတ်ပါတယ်။အရင်လို စိတ်မကြည်တော့ လူတွေနဲ့ အဆင်မပြေ။မိသားစုတွေ၊ အပေါင်းအသင်းတွေနဲ့လည်း အမြဲ ကတောက်ကဆ ဖြစ်တတ်ပါတယ်။တစ်ယောက်တည်း ကြာရင် depressionဝင်တတ်ပါတယ်။
-အလုပ်ဝင်နေတဲ့ သူငယ်ချင်းတွေနဲ့ တွေ့ပါ။ လုပ်ငန်းခွင်အကြောင်း၊အလုပ်သဘောအကြောင်း၊ဝန်ထမ်းဘဝအကြောင်း မေးပါ။
-ဘဝတူအလုပ်မရှိသေးတဲ့ သူငယ်ချင်းတွေနဲ့ တွေ့ရင် ကိုယ် ဒီရက်ပိုင်း လုပ်ဖြစ်တာတွေ ပြောပြပါ၊လတ်တလော အကျိုးရှိရှိနေဖို့ တိုက်တွန်းပါ။ကိုယ်နဲ့အတူ activity တစ်ခုခု၊အလုပ်တစ်ခုခု လုပ်ဖို့ စည်းရုံးပါ။
-အပေါင်းအသင်းတွေနဲ့ ဘောလုံးကန်၊ကြက်တောင်ရိုက်၊အားကစား⚽🎾တစ်ခုခုလုပ်ပါ။
-တစ်ယောက်တည်း ဖြစ်နေရင် gym သွားပါ။
-မနက်နဲ့ ညနေ ပုံမှန် ပြေးပါ၊လမ်းလျှောက်ပါ။
-တစ်နေကုန် အခန်းထဲ မနေပါနဲ့၊ဖုန်းနှိပ်မနေပါနဲ့။
⑶ သင်တန်းတက်။
အရင်ကထက် အချိန်တွေ ပိုနေတာပဲ။ဒီအချိန်တွေမှာ အသုံးဝင်တာတစ်ခုခု သင်ထားတော့ အလုပ်လုပ်တဲ့အခါ အကျိုးမရှိဘူးလား?
-ဘာသာစကား၊ကွန်ပျူတာ၊အရောင်းအဝယ် နဲ့ marketingလို တကယ်လိုအပ်မယ့် အခြေခံသင်တန်းတွေ တက်ပါ။
-ကိုယ့်ဝါသနာအရ ဖုန်း၊လက်ပ်တော့ပြင်၊ကား၊စက်ပြင်၊အပ်ချုပ်သင်၊အလှပြင် စတာတွေလည်း တက်ပါ။
-ကိုယ်လုပ်မယ့် အလုပ်က လိုအပ်မယ်ဆိုရင် အဆင့်မြင့်၊ကျွမ်းကျင်အဆင့် သင်တန်းတွေ တက်ပါ။
-လိုအပ်ရင် certificate အသိအမှတ်ပြုလက်မှတ်ပေးမယ့် သင်တန်းတွေ တက်ပါ။
⑷ ပိုက်ဆံရှာထား။
ပုံမှန်ဝင်ငွေ မရသေးခင် အိတ်စောင့်လေး သုံးဖို့ ရှိထားတော့ မကောင်းဘူးလား။လိုအပ်တဲ့ သင်တန်းတွေတက်ဖို့၊အဝတ်အစား ဝယ်ဖို့၊စာအုပ်ဝယ်ဖို့ စတာတွေအတွက် ပိုက်ဆံလောက်လောက်ငှငှရှိတော့ စိတ်မချမ်းသာရဘူးလား။
-အသုံးအစွဲ ချွေတာပါ။
-အစားအသောက်၊အလည်အပတ်လျှော့ပါ။
-အရင်းနည်းနည်းနဲ့ အွန်လိုင်းရှော့ပင်းလုပ်ကြည့်ပါ။
-အပြင်မှာ ကား၊ဆိုင်ကယ်၊ဖုန်း ဝယ်ရောင်း၊ပွဲစားလုပ်ကြည့်ပါ။
-အသိမိတ်ဆွေ၊ဆရာ၊ဆရာမ အကူအညီနဲ့ ဂိုက်လုပ် စာပြပါ။
-မိဘဆွေမျိုးတွေရဲ့ အလုပ်မှာ လတ်တလော ဝင်လုပ်ပါ။
-သူငယ်ချင်းအလုပ်၊ဆိုင်မှာ အချိန်ပိုင်း ဝင်ကူလုပ်ပေးပါ။
-ဘဏ်မှာ ပုံမှန် အပတ်စဉ်၊လစဉ် ရသလောက် သွားစုထားပါ။
⑸ အင်္ဂလိပ်စာ လေ့လာ။
အင်္ဂလိပ်စာကို ဘယ်သူမှရှောင်လို့မရပါဘူး။လုပ်ငန်းထဲမှာ ပြောရင် နားလည်ဖို့၊ပြန်ပြောတတ်ဖို့ လိုပါတယ်။အလုပ်နဲ့ ဆိုင်တဲ့ စာ၊E-Mail,သတင်း၊ကြော်ငြာဖတ်တတ်ဖို့လိုပါတယ်။အရေးအသားမကျွမ်းကျင်ရင်တောင် ဖတ်ရင်၊ကြားရင် နားလည်အောင်၊ပြောတတ်အောင် လေ့လာထားပါ။
-အင်္ဂလိပ်စကားပြောသင်တန်းတက်ပါ။ပညာဒါန သင်တန်းတွေ ရှိတယ်။
-နေ့တိုင်း အင်္ဂလိပ်စာလုံးအသစ် သုံးလုံးလောက် ကျက်ပါ။
-အင်္ဂလိပ် သီချင်းတွေ နားထောင်ပါ။
-Facebook သုံးရင် Entrepreneur,Forbes,Success Magazine တွေရဲ့ pageက ဆောင်းပါးတွေကို ဖတ်ပါ။
-အင်္ဂလိပ်လို post ရေးတင်ကြည့်ပါ။
-မိသားစု၊သူငယ်ချင်းနဲ့ အပြန်အလှန်ပြောကျင့်ကြည့်ပါ။
-အင်္ဂလိပ်စာနဲ့ နေ့တိုင်း ပုံမှန်ထိတွေ့ပါ။
⑹ ပတ်ဝန်းကျင်ကို ကူညီပါ။
ကိုယ့်မှာ အချိန်ရှိတုန်း လိုအပ်တဲ့သူကို ကူညီပေးပါ။သူများလည်း အဆင်ပြေ အကျိုးရှိသလို ကိုယ့်ကိုလည်း အများက တန်ဖိုးရှိတဲ့သူဆိုတာ သိလာပါလိမ့်မယ်။
-မိဘအိမ်အလုပ်၊ရုံးအလုပ်မှာ တတ်နိုင်တဲ့နေရာက ဝင်ကူပေးပါ။
-အကို၊အမ၊ဦးလေး၊အဒေါ်တွေက မအားလို့ မလုပ်နိုင်တာ လုပ်ပေးလိုက်ပါ၊မသွားနိုင်တာ သွားပေးလိုက်ပါ။
-သူငယ်ချင်းက အလုပ်ကိစ္စခရီးသွားတဲ့အခါ အဖော်မရှိလို့ အကူအညီတောင်းရင် လိုက်သွားပေးလိုက်ပါ။
⑺ ပရဟိတလုပ်ပါ။
ပိုက်ဆံလှူမှ ပရဟိတ မဟုတ်ပါဘူး။ကိုယ်တတ်တဲ့ပညာ၊ရှိတဲ့ ခွန်အား၊အားတဲ့အချိန် ပေးပြီး ချို့တဲ့,လိုအပ်သူကို အကူအညီပေးတာလည်း ပရဟိတ မြောက်ပါတယ်။အခက်အခဲရှိတဲ့သူကို ကူညီရတာ ကုသိုလ်ရသလို ကိုယ့်မှာလည်း ပုံရိပ်ကောင်းတစ်ခု ရှိလာပါတယ်။
-မြို့နယ် လူမှုကူညီရေးအသင်း၊ပညာဒါနသင်ပေးတဲ့ အသင်း၊အမှိုက်ကောက် အသင်း၊သွေးလှုရှင်အသင်း စတဲ့အသင်းမျိုးတွေ join ပါ။
-သူငယ်ချင်းတွေ စုပြီး မိဘမဲ့ကျောင်း၊မျက်မမြင်ကျောင်း၊ဘိုးဘွားရိပ်သာတွေမှာ လုပ်အားပေးပါ။အားလုံး မုန့်ဖိုးတွေစုပြီး တစ်ရက်စာ ထမင်းဖြစ်ဖြစ်လှူဒါန်းပါ။
-ကျူရှင်မတတ်နိုင်တဲ့ ပတ်ဝန်းကျင်က ကလေးတွေကို စာသင်ပေးကြည့်ပါ။
⑻ စာဖတ်ပါ။
အလုပ်လုပ်ရင်သိဖို့လိုမယ့် အကြောင်းတွေ၊အခြေခံဗဟုသုတတွေ ရှာပြီးလေ့လာထားပါ။
-အလုပ်အင်တာဗျူးနဲ့ လူတွေ့စစ်တဲ့နေရာမှာ လိုမယ့် ဗဟုသုတဆိုင်ရာစာအုပ်တွေ၊
-လူမှုဆက်ဆံရေး၊အရောင်းအဝယ်၊စီမံခန့်ခွဲမှုအကြောင်းအရာတွေ ဖတ်ပါ။
-ဦးနုရဲ့ မိတ္တဗလဠီကာ၊ဆရာဖေမြင့်၊ဗန်းမော်သိန်းဖေတို့ရဲ့ စာအုပ်တွေ၊ဇေယတု၊အောင်လှိုင်၊ဒိုဂျေဆန်း တို့ မြန်မာပြန်စာအုပ်တွေရှာဖတ်ပါ။
⑼ ဟောပြောပွဲတွေ၊ networking ပွဲတွေတက်ပါ။
ပညာကိုလိုချင်ရင် ပညာရှိရာ သွားရပါတယ်။
-ကိုယ့်မြို့နဲ့ ပတ်ဝန်းကျင်က ဟောပြောပွဲ၊Barcamp တွေ၊workshop, စတာတွေ နားစွင့်နေပါ။
-ကိုယ်စိတ်ဝင်စားတဲ့ အကြောင်းအရာနဲ့ ပက်သက်ရင် သွားတက်ပါ။လေ့လာမှတ်သားပါ။
-ပွဲက လူတွေနဲ့ မိတ်ဆက်ပါ။စကားပြောကြည့်ပါ။သူတို့ လုပ်ငန်းနယ်ပယ်အကြောင်း စိတ်ဝင်တစား လေ့လာကြည့်ပါ။
⑽ ကိုယ်စိတ်ဝင်စားတဲ့ လုပ်ငန်းကို လေ့လာပါ။
ကိုယ်ဘာအလုပ်ကို ဝါသနာပါလဲ?အရောင်းအဝယ်လား၊စာရင်းအင်းလား၊ကွန်ပျူတာလား၊စက်ပစ္စည်းလား သိအောင်လုပ်။ကိုယ်ဝါသနာ ပါတဲ့အလုပ်ရဲ့ တစ်နေ့တာ တာဝန်၊လုပ်ငန်းလည်ပတ်ပုံ၊ရမယ့်လစာ၊လုပ်ပိုင်ခွင့်၊ တက်လမ်း၊အခက်အခဲ၊အဆင်မပြေမှူတွေ ကို သိအောင်လုပ်ပါ။
-ရုပ်မြင်သံကြားနဲ့ media မှာ လုပ်ချင်လား။
ဘယ်နေရာလုပ်ချင်တာလဲ၊ဘာအလုပ်လုပ်ချင်တာလဲ၊ကိုယ်လုပ်ချင်တဲ့အလုပ်အတွက် လိုတဲ့ skill နဲ့ အတွေ့အကြုံတွေက ဘာတွေလဲ၊ကိုယ့်အသိထဲမှာ ဒီလိုလုပ်နေတဲ့သူရှိလား။သူ နေ့တဓူဝ ဘာတွေလုပ်ရလဲ။အလုပ်က ဘယ်လောက် ခက်ခဲလဲ။လစာ ဘယ်လောက်ရလဲ။ဘယ်မှာနေရလဲ စသဖြင့်။
-ဖုန်းအရောင်းဆိုင်ဖွင့်ဖို့ စိတ်ဝင်စားရင် ကိုယ့်ပတ်ဝန်းကျင်က ဖုန်းဆိုင်တွေ ဘယ်လို run နေလဲ။ဘယ်လောက် ရောင်းနေရလဲ။ဘာတံဆိပ်အဓိကရောင်းနေလဲ။သူတို့ ဘယ်လောက်ရင်းထားလဲ၊ဝန်ထမ်းဘယ်လောက်လိုလဲ၊ ဘာတွေ သိဖို့၊သင်ဖို့ လိုလဲ။ စသဖြင့် လက်လှမ်းမှီသလောက် မေးမြန်း လေ့လာကြည့်ပါ။
⑾ Facebook ကို အကျိုးရှိရှိသုံး။
Fb မှာ ပို့စ်တွေ ခဏခဏတင်၊meme,ဟာသ video တွေ share နေရင် ကိုယ် အလုပ်မရှိမှန်း၊တစ်နေကုန် လိုင်းသုံးပြီး အပျင်းဖြေနေမှန်း လူသိပါတယ်။
-တခါတလေ အပန်းဖြေတဲ့အနေနဲ့ ကြည့်ပါ။အမြဲတမ်းတော့ မ shareနေပါနဲ့။
-Fb ပေါ်မှာ တန်ဖိုးရှိတဲ့ အကြောင်းအရာတွေ၊စိတ်ခွန်အားဖြစ်စေမယ့် စာတွေ၊လူငယ် ပညာပေးပို့စ်တွေ၊လုပ်ငန်းဆိုင်ရာ ဗဟုသုတတွေကို ရှာဖတ်ပါ။ဒါမျိုးတွေ ရေးတဲ့ page တွေ၊ပုဂ္ဂိုလ်တွေကို follow လုပ်ထားပါ။
-ကိုယ်လုပ်ချင်တဲ့ လုပ်ငန်းဆိုင်ရာ group တွေ ဝင်ပြီး ကြည့်ပါ။
-ကိုယ်စိတ်ဝင်စားတဲ့ event တွေရဲ့ အချက်အလက်တွေကို ရှာကြည့်ပါ။
-ကိုယ့် account ထဲက လူတွေထဲမှာ ကိုယ့် အနာဂတ် ဘောစိလောင်း၊လုပ်ဖော်ကိုင်ဖက်လောင်းတွေ၊customer ဖြစ်လာနိုင်တဲ့သူတွေ ပါနိုင်တယ်။သူတို့က ကိုယ့်ကို တန်ဖိုးရှိတဲ့သူဆိုတာ သိနေဖို့လိုတယ်။
အလုပ်မရှိဖူးဆိုတာ ယာယီပါ။ဒီအတောအတွင်းမှာ ကိုယ့်ဘက်က တာဝန်ကျေအောင် ပြင်ဆင်စရာ ရှိတာ ပြင်ဆင်ထား။အလုပ်အင်တာဗျူးမှာ သေချာပြင်ဆင်ထားတဲ့သူက သူများထက် ခေါင်းတစ်လုံးသာတယ်၊ကိုယ်ပိုင်အလုပ်,လုပ်မယ်ဆိုရင်လည်း ကိုယ့်မှာ သူများတွေလို ကကြီးက စ,စရာမလိုဘူး။
အချိန်လေးစားတယ်။လုပ်ချင်ကိုင်ချင်စိတ်လည်း ရှိတယ်။ဗဟုသုတလည်းရှိတယ်။နာမည်ကောင်းလည်း ရှိတယ်။အပေါင်းအသင်း network လည်းရှိတယ်။လုပ်ငန်းကိုလည်း လေ့လာပြီးသားဆိုတော့ တစ်ဝက်လောက် ကြိုးစားပြီးသား မဖြစ်ဘူးလား။
ဒါကြောင့် ဒီအချိန်လေးမှာ ကျွန်တော်ပြောသွားတဲ့ အချက်လေးတွေကို တတ်နိုင်သမျှ ကြိုးစားလုပ်ကြည့်ပါ။အလုပ်မရှိသေးခင်မှာ အကျိုးရှိရှိနေကြည့်ပါ။
#စာစုများ
