Народна банка на Република Северна Македонија (Народната банка) е централна и емисиона банка на Република Северна Македонија.
ЦЕЛИ И ЗАДАЧИ
Согласнo со Законот за Народната банка на Република Македонија, основна цел на Народната банка е постигнување и одржување на ценовната стабилност.
Друга цел на Народната банка, којашто ѝ е подредена на основната цел, е да придонесува кон одржување на стабилен, конкурентен и пазарно ориентиран финансиски систем.
Народната банка ја поддржува општата економска политика без да го загрози остварувањето на основната цел и во согласност со принципот на отворена пазарна економија со слободна конкуренција.
За остварувањето на предвидените цели, Народната банка ги врши следниве задачи:
- ја утврдува и ја спроведува монетарната политика;
- учествува во определување на режимот на девизниот курс;
- ја утврдува и ја спроведува политиката на девизниот курс;
- ги чува и управува со девизните резерви;
- ги издава и управува со книжните и кованите пари на Република Северна Македонија;
- ги евидентира и ги следи кредитните операции со странство и го изготвува платниот биланс на Република Северна Македонија;
- прибира и изготвува статистички податоци заради извршувањето на задачите согласно со закон;
- воспоставува, развива, регистрира и врши надзор над сигурноста, стабилноста и над ефикасноста на системите за плаќање, порамнување и клиринг;
- регулира, издава дозволи и врши супервизија на банки, штедилници, друштва за издавање електронски пари и на други финансиски институции на начинот утврден со овој или друг закон;
- врши надзор над примената на прописите со кои се уредува девизното работење, менувачкото работење, вршењето услуги на брз трансфер на пари, системите за спречување на перење пари и заштита на потрошувачите, во согласност со овој или друг закон;
- врши работи на фискален агент на Владата на Република Северна Македонија;
- учествува во меѓународни институции и организации во врска со прашања коишто се во нејзина надлежност;
- организира тргување и порамнување на хартии од вредност на пазарите преку шалтер и
- врши други активности во врска со извршувањето на нејзините задачи во согласност со Законот за Народната банка на Република Македонија и друг закон.
Оваа страница е еден од каналите на комуникација на Народната банка со јавноста, преку коишто се информира за тековното работење и за остварувањето на целите и задачите, како и за оцените и ставовите на институцијата. Преку страницата може да се постават прашања и да се упатат коментари на коишто навремено ќе биде одговорено, во рамки на надлежностите на Народната банка.
На страницата не се дозволени објави и коментари коишто содржат навреда на лична, етничка или каква било друга основа, објави и коментари со политичка содржина, како и објави и коментари со неточни информации.
