09/05/2026
- Со стапка од 72% успешно вработување кај менторираните лица, социјалното менторство на „Паблик“ покажува дека „невработливи“ луѓе не постојат. Постојат луѓе на кои им е потребна вистинска поддршка, систем и некој што ќе поверува во нив – сподели нашата извршна директорка, Климентина Илијевски на регионалната конференција за социо-економска инклузија на ранливите групи во Западен Балкан, која се одржа на 6-ти и 7-ми мај во Белград, во организција на Германското друштво за меѓународна соработка и развој ГИЗ.
Таа зборуваше за моќта на социјалното менторство и за тоа како поддршката може да ја промени професионалната, но и животната траекторија на луѓето.
- Ме радува што методологијата создадена овде, во Македонија, покажа дека функционира во различни контексти во земјите на Западен Балкан - од градски средини до рурални области, од млади без работно искуство, до жени жртви на насилство и лица со попречености. Ова е возможно преку адаптациите што се направени за различните групи што ги вклучуваме во програмата. Но, универзалното јадро е истото: секој човек има потенцијал, но потребна му е длабока, персонализирана поддршка за да го активира – сподели Илијевски.
Таа објасни дека социјалното менторство не значи само подготовка за интервју или пишување CV, туку опфаќа длабоко разбирање на личната приказна, создавање чувство на припадност и сигурност, надминување на лимитираните верувања, враќање на самодовербата, градење социјални конекции, развој на стратегии за справување со предизвици на работното место.
- Ставаме акцент на препознавање на афинитетите и капацитетите кај менторираните лица кои низ процес на поддршка, ги освестуваат и ги ставаат во служба на нивниот развој. Процесот на менторство трае од 6 до 12 месеци и вклучува редовни индивидуални сесии со социјален ментор, кој ја дава поддршката и пред вработувањето, но и во првите месеци после вработувањето.
#СоцијалноМенторство #СоцијалноМенторствоПаблик
GIZ North Macedonia
