24/03/2019
بغيت نشري طوموبيل، شنو ندير؟
بالنسبة إلى بغيتي تشري طوموبيل جديدة من la maison، كتمشي عندهم وكتفاهم معاهم على الثمن، باش تخلصهم، كي طلبو منك تجيب ليهم شيك سيرتيفي (Chèque certifié )، كتاخدو من البنكة ديالك بطبيعة الحال، كي كون فيه المبلغ لي بغيتي تخلص بيه ومكيبقاش عندك لحق تيريهم. إلا كنتي غدي تشري الطوموبيل كريدي وهادشي لي كي كون غالبا، كتعطيهم تسبيق (Avance) تاهوا شيك روكوموندي، وكتمشي للوكالة البنكية لي مدايرة شراكة مع la maison باش دير كريدي لبقية المبلغ الإجمالي، لي كتكون تافقت معاهم مسبقا على المدة ديال كريدي بشهورة.
مني كتكمل هاد الإجراءات، كتمشي تْخَرَّجْ طوموبيل و كي عطيوك معاها ورقة ديال دوبلفي W مؤقتة في حدود 30 يوم، ولكن خاصك حتى تخلص تأمين السيارة و الضاريبة على حساب طوموبيل شحال فيها من خيل (كيف ما هو موضح في الجدول في أول تعليق).
بالنسبة للتأمين، مادام طوموبيل يلا خرجتيها جديدة، حاول تستافد من الإمتيازات كاملة ديال التأمين، كين واحد الميزة سميتها لافرونشيز la franchise،واخا غادي طلع لك غالية شوية، لكن راه مهمة بزاف, كتكون عبارة على واحد نسبة مؤوية لي كتخلصها مني كتكون نتا لي فوتيف فشي حادثة لا قدر لله،. وما تنساش راه خاصك تمشي la maison تجيب لاكارت ڭريز المؤقتة قبل 30يوم, من بعد شهر أو شهرين، كتمشي Services des mines باش تاخد لاكارت ڭريزالنهائية، وفي حالة دازت شهر ومازال ماخرجاتش لك، كدي ليهم لاكارت ڭريز المؤقتة إزيدو فيها مدة شهر أخرى.
أما إلى بغيتي تشري طوموبيل مستعملة، فالإجراءات كتختالف شوية على الجديد، أول حاجة قبل مادير حتى شي حاجة مع مولاها، خاصك ضروري تجرب التوموبيل، ديماريها، وحاول تجربها فطرقان مختلفة، اوتوروت،بيست أو طريق عادية، خاصك تعرف شي حوايج كي تعلقو بالطوموبيل: شحال كتستهلك، شحال ضاربة من كيلوميتر،واش première main ،واش عندوMain levée، يعني واش ديال مولاها %100، شوف الحالة ديال رويض، ضواو، سينيالات، الكلاكسون،المرايات،واش فايت فيها شي كسيدة، شنو هوما الإصلاحات لي دارو فيها ...يعني كل التفاصيل لي خاصها تقلّب. أهم حاجة هي خا صك تأكد من N° Chassis لي في طوموبيل يكون مطابق لي في لاكارت ڭريز، وخاصو يكون باين مزيان،إلى بانو لك شي أرقام ما بينينش مزيان أو ممسوحين، دير بنّاقص.
عجباتك طوموبيل، لقيتي كلشي مزيان، دابا خاصك تمشيو ديرو لا فيزيت la visite technique، إلى دازت لا فيزيت مزيان و كلشي هو هداك، دابا خاصك تمشي تكاتب مع مول الطوموبيل، غادي تحتاج واحد المطبوع رمادي، شريه من المكتبة، سميتو: "وصل إيداع ملف صالح ل60 يوم" وغادي تمشيو لشي ملحقة إدارية او سوق السيارات ، باش تكاتبو، من بعد خاصك تمشي لدار ضاريبة باش تخلص على الخيل (50 درهم/الخيل)+300 درهم (رسوم القباضة)+ فوتوكوبي ديال لاكارت ديالك تكون ليڭاليزي.هاد الدوصي كامل كديه services des mines، باش يخرجو لك كارت ڭريزcarte gris مؤقتة، وبعد 15 يوم غادي ترجع عندهم باش تاجد لاكارت ڭريز النهائية، وآخر حاجة ما تنساش تأمين ديال طوموبيل.
نتمنى تكونو ستافدتو من هاد الموضوع، ماتنساوش تبارطاجيوه مع صحابكم، باش تاهوما يعرفو شنو يديرو.
