24/08/2026
🌿 ප්රසාදයෙන් ලියූ පුණ්ය අනුමෝදනාව 🌿
මෙය කිසිදු දායක පින්වතෙකුගේ සිත රිදවීමටවත්, කිසිවෙකුට වඩා කෙනෙකු උසස් කර පෙන්වීමටවත් ලියූවක් නොවේ.
වසර ගණනාවක් පුරා ජයවීර අයියා ඇතුළු පවුලේ සැම විසින් නොකඩවා සිදුකරගෙන එන මෙම පුණ්ය චාරිත්රය දකිද්දී, භික්ෂුවක ලෙස මාගේ සිත තුළ ඇති වූ ප්රසාදය හා සතුට නිසාම මෙය සටහන් කරමි.
දානය යනු සෑම කෙනෙකුටම තම තමන්ගේ ශ්රද්ධාව අනුව සිදුකළ හැකි උතුම් පුණ්ය කර්මයකි. ඒ නිසා මෙය කිසිවෙකු සමඟ සංසන්දනය කිරීමක් නොවේ. සෑම දායක පින්වතෙකුගේම දානයත්, ශ්රද්ධාවත්, කැපවීමත් අපට එකසේ ගෞරවනීයයි.
එහෙත් වසර පහක් හයක් පුරාවට තමන්ට නියමිත 24 වන දින දානයට පෙර දින සවස ගිලන්පස රැගෙන පැමිණීමත්, පසුදින උදෑසන දානය පූජා කිරීමත් නොකඩවා සිදුකරන මේ පවුලේ සතිමත් බව දකිද්දී, ඒ පිළිබඳව වචනයක් නොකියා සිටීමට මට නොහැකි විය.
මෙවැනි පුණ්ය ක්රියාවන් පිළිබඳව ප්රසාදය පළ කිරීමෙන් කිසිවෙකු අඩු කිරීමක් හෝ වෙනත් අයෙකු උසස් කිරීමක් සිදු නොවේ.
පින්කමක අලංකාරය ඇත්තේ අන් අය පරදවා ඉදිරියට යාම තුළ නොව, තමන්ගේ ශ්රද්ධාව නොකඩවා රැකගැනීම තුළය.
අහස්වෙහෙර පුදබිම ආරම්භ කළ මුල් කාලයේදී මා විසින් දායක පින්වතුන්ට එක්තරා ඉගැන්වීමක් සිදු කළෙමි.
“පසුදින දානය පූජා කිරීමට නියමිත නම්, පෙර දින සවස පුදබිමට පැමිණ බුදුරජාණන් වහන්සේ උදෙසාත්, වැඩ සිටින කුඩා සාමණේර ස්වාමීන් වහන්සේලා උදෙසාත් ගිලන්පස පූජා කර, පසුදින දානය සිහිපත් කරමින් පින් රැස්කර ගන්න.”
කාලය ගතවීමත් සමඟ බොහෝ දෙනාගේ කාර්යබහුල ජීවිතයත්, අවිවේකී බවත් නිසා මෙම පුරුද්ද තරමක් මඟහැරී ගිය අවස්ථා තිබුණි.
එහෙත් ජයවීර අයියා, අක්කා සහ දරුවන් තමන්ගේ දානය පූජා කිරීමට සූදානම් බව පෙන්වමින්, සෑම මාසයකම නොකඩවා මෙම ගිලන්පස දානය රැගෙන ඒම කිසිවිටෙකත් අමතක නොකළහ.
එය හුදෙක් ආහාර පූජාවක් පමණක් නොවේ.
එය ශ්රද්ධාව, සතිමත්භාවය, කෘතගුණය සහ අඛණ්ඩ පුණ්ය චේතනාව පෙන්වන සුන්දර ආදර්ශයකි.
ඒ නිසා ගමේ අනෙක් සැමගෙන්ද එක් කරුණක් කරුණාවෙන් ඉල්ලා සිටිමි.
කෙනෙකුගේ වචනයකින් තවත් දායකයෙකු පිළිබඳව ඔබගේ සිත වෙනස් කරවීමටත්, දායක පින්වතුන් අතර අමනාපයක් ඇති කිරීමටත්, “අපිට වඩා ඔවුන්ට සැලකිල්ලක්” වැනි සිතුවිලි ඇති කිරීමටත් කිසිවෙකු උත්සාහ කළහොත් ඒ වචනවලට ඉක්මනින් හසු නොවී, ඉවසීමෙන් හා නුවණින් කටයුතු කරන්න.
පන්සලක් යනු එකිනෙකා සමඟ තරඟ කරන ස්ථානයක් නොව,
එකිනෙකාගේ පින් අනුමෝදන් වී, එකිනෙකාට මෙත් සිතින් ආශීර්වාද කරන පුණ්ය භූමියකි.
එබැවින් කිසිවෙකුගේ කතාබහක් නිසා පවුලක් තවත් පවුලක් සමඟ අමනාප නොවේවා.
කිසිවෙකුගේ වචනයක් නිසා පින් සිත් බිඳී නොයාවේවා.
දානයේ පිරිසිදු චේතනාව මෙන්ම, එකිනෙකා කෙරෙහි ඇති පිරිසිදු හදවත්ද රැකගනිමු.
ජයවීර අයියා ඇතුළු පවුලේ සැම විසින් සිදුකරන මේ පුණ්ය කටයුතු තව තවත් සාර්ථක වේවා!
එම සියලු කුසල් බලයෙන් මියගිය බබානිස් පියතුමාටත්, මැණියන් ඇතුළු පවුලේ මියගිය සියලු ඥාතීන්ටත් පුණ්යානුමෝදනා වේවා!
ඔවුන්ට මේ පින් අනුමෝදන් වී සුවපත් වේවා.
යහපත් භවයක් ලැබේවා.
නිවන් සුව අවබෝධ කරගැනීමට මේ පුණ්ය බලය හේතු වේවා!
සියලු දායක පින්වතුන්ගේ පින්කම් අපගේ සාධු නාදයටම පාත්ර වේවා.
සියලු දෙනාගේ ශ්රද්ධාව වැඩේවා.
මෙත් සිත් වැඩේවා.
අමනාපකම් දුරුවේවා.
පුණ්යයෙන් පිරුණු මේ පුදබිම තවත් බොහෝ කාලයක් සියලු දෙනාටම සෙත සලසන පින්බිමක් වේවා.
🙏 තෙරුවන් සරණයි!
සාධු! සාධු! සාධු!
