Car Deals online

05/08/2020

ලීස් කරනවට වැඩිය කවුරුත් කැමතියි පහසුවෙන් ලෝන් එකක් ගන්න.
බැංකුවේන් රථවාහන ණයක් අරගෙන ඒ පහසුව ලොකුවට අත්විඳ ගන්න !

දැන්ම කතාකරන්න.
0768958040
0773979099

10/04/2020

මොකක්ද මේ MORATORIUM කියන්නෙ.??
=================================
වචනයක් විධියට නම් යම් ක්‍රියාවක් තාවකාලිකව අත් හිටුවීමක් නීතිමය විධියට නම් ණයලබාගත් කෙනාට ණය ගෙවීම කල් දැමීමට දෙන නීතිමය අවසරයක් මොරටෝරියම් එකක් කියනව.

උදාහරණ යක් බලමු ද ??
=====================
ඔබ ලබා ගන්නව රුපියල් ලක්ෂ 20 ක ණයක්.13% ක වාර්ෂික පොළියකට අවුරුදු 10 කින් සමාන වාරික වලින් ගෙවන්න. ඔබේ වාරිකය වෙන්නෙ රු.29 862.15 ක් වාරික 120 ක් සමානව ගෙවන්න. ඔබ පළවෙනි වාරිකය ගෙවනව. ඒ ගෙවන මුදලින් 8195.48 ක් ලබාගත් මුල් මුදලින් අඩු වෙනව. ඉතිරි 21,666.67 පොලිය විධියට අයවෙනව.

CAP 8195.48 + INT 21,666.67=29862.15

ඔන්න ඊළග මාසෙ ඔබේ ණය මුදල ලක්ෂ 20 නෙවේ මොකද ඒකෙන් 8195.48 ක් අඩු වුණා දැන් පොළී හැදෙන්නෙ 1,991,804 ට.එහෙම වාරික ගෙවන් යනව.ඔබ වාරික 12 ක් ම ගෙවනව 13 වාරිකය ගෙවන්න තියෙන්නෙ ඔබට අපහසුතාවක් ඇති වෙනව .
ඔබේ 13 වාරිකය හැදිල තියෙන්නෙ මෙහෙමයි.

CA:9326.80+IN:20535.35 = 29 862.15

ඔන්න ඔබ MORATORIUM එකක් ඉල්ලනව ඒ කියන්නෙ ණය ගෙවීම පමා කරන සහනයක්.

එතකොට මොකද වෙන්නෙ.??
========================
ඔබ ඉල්ලනව මාස 3 ක සහනයක්. මේකෙදි වෙන්නෙ ඔබ යතා තත්වයට පත් වෙනකන් ගෙවීම පමා කිරීමක් විතරයි.

සහනය ඔබට ලැබෙනව.ඒ මාසතුනට අදාල පොළිය 20535.35 * 3 ක් ඒ කියන්නෙ 61 606.05 ක් ඔබේ ණය ගිණුමට එකතු වෙනව.

මේ පොළිය ඔබ ඉදිරියේ දි ගෙවන්න වෙනව.ඒක තමා ණය පමා සහනයක් කියන්නෙ.නැතිව ණය කපා හැරීමක් නෙවේ.

දැන් අපි හිතමු ඉහත උදාහරණ ය අනුව මේ ණය සහනය ලබාගත් කෙනාට බැංකුව කියනව සහනය ඉවර වුණාම අර එකතු වුණ පොළිය සමාන වාරික 6 න් ගෙවන්න කියල.(උපකල්පනය කි .එක් එක් ආයතනව ල කාලය වෙනස් විය හැක.)
එතකොට
61606.05 / 6 = 10 267.67 යි.

ඔබේ සාමාන්‍ය වාරිකය 29 862.15 යි.
සහන කාලය ඉවර වෙලා ගෙවන්න වෙන පළවෙනි මාසෙ ඔබේ වාරිකය
29862.15 + 10 267.67 = 40 129.82 ක ගානෙ මාස 6 ක් ගෙවන්න වෙනව. ඊට අමතරව නොගෙවා හිටිය මාස 3 කාලයට අදාල අයවිය යුතු ප්‍රාග්ධන මුදල ණය ගෙවීම් කාලයට එකතු වෙනව වාරික 120 ණය මුදල වාරික 123 ක් වෙනව.

ඉතින් මොකක්ද ඕකෙ තියන සහනෙ..??
================================
මේ ණය පමා සහනය වැදගත් වෙන්නෙ ව්‍යාපාරික හා නිෂ්පාදන අංශ වලට. මේ වෙලාවෙ ඒ සියලු දේ බිද වැටිල. ඒත් ඒ අය තව ටික කාලෙකින් ආයෙ ව්‍යාපාර පටන් ගන්නව.ඒ අය ලබන්නෙ ස්ථාවර ආදායමක් නෙවේ .
විචල්‍ය ලාභයක් . ඔවුන්ට පුළුවන් එය කළමණාකරණය කර ගන්න.

එතකොට මාසික පඩි ගන්න අය..??
=============================
ඔබේ පඩිය මේ මාස තුනෙන් පස්සෙ වැඩි වෙනවද ??? ඔබේ වියදම් මේ මාස තුනෙන් පස්සෙ අඩුවෙනවද ?? ඒ දෙකම නොවෙනවනම් ඔබ කොහොමද මේ නොගෙවන පොළිය ත් එක්ක වෙනදට වැඩි වාරිකයක් ඉස්සරහට ගෙවන්නෙ.??

පඩි ගන්න අයට සහනෙ වැඩක් නැද්ද.??
=================================
සහනෙ වැදගත් වෙන පඩි ගන්න පිරිසක් ඉන්නව.
උදාහරණ 1

ගුරුවරයෙක් පඩිය ගන්නව.ඔහු අමතර පංති ආදායමක් ලබනව.එම අමතර ආදායමින් ලීසිං වාරික ගෙවන්න මෝටර් රථයක් අරන් තියනව.
ඔහුට දැන් අමතර ආදායම නෑ.එවිට ඔහු පඩි ගන්නව කියල මේක නොදී ඉදල බෑ.මොකද ඔහු වාරික ගෙවන්නෙ අමතර ආදායමින් බව අපි දන්නව.අමතර ආදායම ලැබෙන තෙක් ඔහුට මේ පමා සහනය වැදගත් වෙනව.

උදාහරණ 2

පුද්ගලික ආයතන වල කඩා වැටීම නිසා සේවක වැටුප 30% න් අඩු කරනව.එතකොට ඒ සේවකයින් පඩි ගත්තට ඒකෙන් ණය වාරික ගෙව්වොත් ජීවත් වෙන්න බෑ.ඒ අය පඩි ලබනව කියල මේක නොදී ඉදල හරියනවද ??
නෑ..මාස 6 න් විතර මේ තත්ව නිවැරදි වුණාම ඔවුන්ට නැවත වැටුප් සාමාන්‍ය පරිදි ලැබෙයි.
එවිට ඔවුන්ට පුලුවන් නැවත ණය ගෙවන්න.

මතක තියාගන්න මේ වෙලාවෙ සියළු මූල්‍ය ආයතනවලට මහබැංකුව නිර්දේශ කරල තියෙන්නෙ ණය පමා සහනයක් බව.

වෙනද වගේම පඩි ලැබෙන අය මේ සහනෙ අරන් අනාගතේ දවසක තමන්ට ලැබෙන සාමාන්‍ය පඩියෙන්ම මේ කාලෙට අදාල පොලී මුදලත් එක්ක ආයෙම ගෙවන්න වෙනවමයි.

එදාට ඔබට ඔබේ වියදම් කළමණාකරණය කරගන්න පුළුවන්නම් ඇති තරම් පමා සහන භුක්ති විදින්න.

දැන් මූල්‍ය ආයතනවලට බැණ බැණ යන්න එපා.ඒ අය ට දීල තියන උපදෙස් නෙ එයාල ක්‍රියාත්මක කරන්නෙ.ණය දීල තියෙන්නෙ එයාල ගෙදරින් ගෙනාව සල්ලි නෙවේනෙ.

දැනුවත්ව බුද්ධිමත්ව තීරණ ගමු. රැල්ලට යාම ලොකු විනාශයක මුලක්.

(((ඉහත දක්වා ඇත්තේ උපකල්පිත උදාහරණ යකි.මේ මොහොතේ එක් එක් ආයතන වල විවිධ කාල සීමා යටතේ විවිධ ආකාරයෙන් සහන කාලය තුල එක් රැස් වන පොළිය නැවත අය කර ගැනීමේ ක්‍රම හදුන්වා දී තිබිය හැක.

කරුණාකර එම අභ්‍යන්තර චක්‍රලේඛ උපදෙස් මේ හා ගලපන්නට ගොස් ව්‍යාකූලතා ඇතිකර නොගන්නා මෙන් කාරුණිකව ඉල්ලා සිටිමි.)))

25/03/2020

ලොන් වාරිකේ බැංකුවේන් කපලාද?

බොත්තම ඔබලා හැමදේම කරන්න පුළුවන් කියල හිතන අයට

"බැංකුව අසාධාරණ විදියට ණය වාරිකය කපලා .. ජනාධිපතිතුමා කියන දෙය බැංකුව අහන්නෙ නැහැ " කියන අයට මෙන්න උත්තරය ..

සියලූම රජයේ සේවකයන්ට මෙන්ම පුද්ගලික අංශයේ සේවකයන්ගේ වැටුප් දැනටමත් ලැබී තිබෙනවා.
රටේ පවතිනා මේ තත්ත්වයේ බලපෑමකින් තොරව ඒ කාර්යය සිදු කරන ලද්දේ ‍යම් කිසි අදිසි හස්තයකින් නොවේ. පවතින අවදානම හමුවේ ඔබ හා ඔබේ පවුලේ අය නිවෙස් වලට වී ආරක්ෂිතව ඉන්නා ගමන් stay safe stay home යනුවෙන් post දාන අතරේ (සමහරක් නිවෙස් වලට වී pages වල post වලට පදනම් විරහිතව බැන බැන comment කරන අතරේ) ඔබේ ආයතනයේ වැටුප් අංශයේ සේවක සේවිකාවන් වගේම බැංකු වල සේවක සේවිකාවන් ඒ අවදානම අරගෙන වැඩට ගියාම තමයි ඔබේ වැටුප් නියමිත ආකාරයෙන් ඔබේ ගිණුම් වලට බැර වෙන්නේ.

ණය වාරික කැපීම කල් දමනවා යනුවෙන් යම් කිසි ප්‍රකාශයක් නිකුත් කල පසු ඒ මොහොතේ පටන් බැංකුවේ ණය පද්ධතිය පමණක් lockdown වෙන්නේ නෑ. සුපුරුදු පරිදි වැටුප් ගිණුම් ගත වූවා සේම ණය වාරිකයද සුපුරුදු පරිදි පරිඝණක පද්ධතිය මගින් ස්වයංක්‍රීයව අය වෙනු ලබනවා. ඒ ක්‍රියාවලිය යම් කිසි branch එකක කළමනාකරු ට තබා බැංකුවේ මහා කළමනාකරු ට වත් හිතූ මතේ වෙනස් කරන්න බැහැ. ඒ සදහා අදාළ හා අවශ්‍ය guideline සහ circulars මහ බැංකුවෙන් නිකුත් කිරීම පමණක් නොවේ ඊට අනුකූලව එක් එක් බැංකු වලින් internal circulars නිකුත් කිරීමත් අත්‍යාවශ්‍යයි. එසේ නොමැතිව යම් ප්‍රකාශයක් නිකුත් කළ පමණින් මෙය auto activate වෙන ක්‍රියාවලියක් නොවේ. ඒ ගැන ඔබ නොදන්නවා වුනාට ජනාධිපති තුමා නම් හොඳටම දන්නවා ඇති බව විශ්වාසයි. අදාළ උපදෙස් හා චක්‍රලේඛ ලැබුනු පසු ණය වාරික අය වීම සම්බන්ධව ඔබ සුදුස්සෙක් වේ නම් අය වූ මුදලද නැවත් ඔබගේ ගිණුමට බැර වනු ඇති. ඒ කාර්යය සිදු කිරීම සදහා ද පරිගණක පද්ධති වෙනස් කිරීමේ සිට අදාළ ණය සහනයන් සදහා සුදුසුකම් ලැබෙන loan customer තෝරා වෙන්කර ගැනීමේ සිට තවත් කාර්යයන් ගණනාවක් (one by one) manually කරන්න අවශ්‍යයි. ඒ කියන්නෙ මිනිස් ශ්‍රමයෙන් කරන්න තියනවා. නමුත රටේ පවතිනා තත්වය නිසා බැංකු ප්‍රධාන කාර්යාල වල හා ශාඛා වල සේවකයන් පැමිණෙන්නේ උපදෙස් ලැබිලා තියන විදියට ඉතාමත් අත්‍යවශ්‍ය කටයුතු වලට විතරයි මේ මොහොතේ.
ඒ ඔබගේ වැටුප් ගිණුම් ගත කිරීම , අත්‍යවශ්‍ය කවුන්ටර් සේවා සහ ATM යන්ත්‍ර වලට අවශය තරම් මුදල් සැපයීම ඇතුළුව තවත් අත්‍යවශ්‍ය සේවා වලට පමණයි. ඒ නිසා මේක සාදාරණව තේරුම් ගැනීම මේ මොහොතේ අවශ්‍යතාවක්. බැංකු වලට හිතූමතේ ණය වාරික කපා හරින්න ඉන්ද්‍රජාලික හැකියාවක් නෑ.

From FB

18/03/2020

"ලීසිං සහ ණය වාරික ගෙවීම් මාස 6 ක් දක්වා අත්හිටුවයි."

මෙවන් අවස්ථාවක විය හැකි දේ.. සම්පූර්ණ වාර්තාව කියවන්න.

අති ගරු ජනාධිපති තුමන් විසින් ජාතිය අමතා සිදු කල විශේෂ ප්‍රකාශය හරහා ලීසිං සහ ණය වාරික ගෙවීම් මාස 6 ක් දක්වා අත්හිටු වන බව සඳහන් කළා. මේ පිළිබඳ බොහෝ දෙනා ප්‍රශ්න කරන පසුබිමක, ඒ පිළිබඳ කෙටි සටහනක් අද ලීසිං මිතුරා තුළින් අප ඉදිරිපත් කරනවා.

බැංකුවක් හෝ ලීසිං ආයතනයක් ණය හා ලීසිං පහසුකම් ලබා දෙනුයේ ඔවුන්ද එම මුදල් වෙනත් පාර්ශව වලින් ( ආයෝජකයන්, තැන්පත් කරුවන්, වෙනත් බැංකු මගින් ලබා ගත් ණය ) ලබාගෙනයි. ණය හෝ ලීසිං පහසුකම් ලබා ගත් ඔබ ඒවායේ වාරික ගෙවීම් පමා කළද අදාළ ආයතනයන් හට ඔවුන් ගෙවීමට ඇති ණය වාරික හෝ ලාභාංශ පමා කල නොහැකියි.

තවද රටක ආර්ථිකයේ වැඩිම බරක් දරා සිටින්නේ රටක බැංකු පද්ධතිය වන අතර එම බැංකු මාස 6 ක කාලයක් පුරාවට කිසිම ආදායමක් නොමැතිව ගමන් කරන්නේ නම් මාස 3 ක් යාමට මත්තෙන් රටේ ආර්ථිකය කඩා වැටිය හැකිය.

ලීසිං සහ ණය වාරික ගෙවීම් මාස 6 ක් දක්වා ගෙවීම් නැවැත්වීම යන ආරංචිය ලද වහාම ඔබ විසින් ඔබගේ ණය හෝ ලීසිං නියෝජිත වරයාගෙන් ඒ පිළිබඳ විමසීමක් සිදු කරන්න ඇති.

නමුත් ඔහුට තවමත් ඒ පිළිබඳව නිසි පැහැදිලි කිරීමට නොහැකියි. මන්ද රජයේ මෙවන් තීරණයකට පසුව මෙය සිදු විය යුත්තේ කෙසේද යන්න පිළිබඳ පැහැදිලි කිරීමේ වාර්තාවක් ශ්‍රී ලංකා මහ බැංකුව මගින්, බැංකු හා මූල්‍ය පද්ධතියට ලබා දෙනවා. එම වාර්තාවට අනුවයි බැංකු පද්ධතිය ක්‍රියාත්මක වන්නේ.

🚗🚗🚗......................🚗🚗🚗.......................

මෙය ක්‍රියාත්මක විය හැකි ආකාරය පිළිබඳව පූර්ව නිගමයන් කීපයක් අප ඉදිරිපත් කරන්නම්..

✈🚘 මෙම මස පටන් පැමිණෙන ණය හා ලීසිං වාරික වල පොලී කොටස පමනක් අය කිරීම.

ඔබගේ ණය වාරිකය සැදී ඇත්තේ ණය මුදලේ කොටසක් මෙන්ම එම මුදලට සාපේකෂ වූ පොලී කොටසක් සමගයි. උදාහරණයක් ලෙස ඔබගේ ණය වාරිකය රු. 40,000/= ක් ලෙස සිතන්න. එම අගය තුළ ණය ලෙස රු. 25,000ක් හා පොලී ලෙස රු.15,000/=ක් ඇති බව උපකල්පනය කරන්න. මෙම නව තීරණයට අදාළව ඔබගෙන් පොලී කොටස පමනක් මාස 6 ක් යන තුරු අයකරන ලෙස බැංකු පද්ධතියට මහ බැංකුවෙන් උපදෙස් ලැබෙන්න පුළුවන්.

🚗🚗🚗......................🚗🚗🚗.......................

මෙවන් අවස්ථාවන් ඔබට හිමිවන වාසි නොවේ. මෙය ඔබට හිමිවන සහනයක් පමනයි. සිතන්න ඔබ මෙම සහනය ලබා ගෙන මාස 6 ක් ලීසිං සදහා පොලී පමනක් ගෙවීම් කළේ නම්,ඔබට පහත කාරනා වලට මුහුණ දීමට සිදු වේවි.

✈🚘 ඔබේ ලීසිං හෝ ණය පහසුකම් ඈවර වන දිනය මාස 6 ක් පහුවේවි. ඔබ විසින් මාස 6 ක් සහනයක් ලබා ගන්නා සේම සාමාන්‍ය මාස 6 ක් ලීසිං හෝ ණය ඉදිරියට ගෙවීමට සිදු වනවා.

✈🚘 අදාළ දිනවලට සම්පූර්ණ රක්ෂණ අවසන් වී තෙවන පාර්ශව රක්ෂණය ලබා ගැනීමට බලා සිටින අය සඳහා නැවත සම්පූර්ණ රක්ෂණයක් ලබා ගැනීමට සිදු වනවා. මන්ද ලීසිං පහසුකම මාස 6 ක් ඉදිරියට ගොස් ඇති නිසා පෙර ගිවිසුමට අදාළ දිනයට ලීසිං පහසුකම ඈවර නොවේ. එම නිසා සම්පූර්ණ රක්ෂණයක් යටතේම එය අලුත් කල යුතුයි.

✈🚘මෙම මස හැර දැනටමත් හිගව පවතින වාරික ඔබට ගෙවිය යුතු වෙනවා. එම වාරික දැනටමත් පැමිණ ඇති අතර ඒ සදහා ආයතන වලට සහන ලබා දිය නොහැකියි. එයටද සහන අවශ්‍ය නම්, ලීසිං ආයතනය සමග සාකච්ඡා කර ලීසිං පහසුකම ප්‍රතිස්ථාපනය කර ගත යුතු වනවා.

✈🚘 ගෙවා නිම වන අගය වැඩි වේ. (Pay off balance). ඔබගේ ණය වාරික ගනන අදාළ කාලයෙන් අවසන් නොවන නිසා ඔබ ගෙවිය යුතු ගෙවා නිම වන අගය අනිවාර්යයෙන් මෙවන් අවස්ථාවන් වලදි වෙනස් විය හැකියි.

මෙම සහනය ඔබට අවශ්‍ය නම් ඔබ විසින් ඒ පිළිබඳව ලීසිං ආයතනය වෙත ලිපියක් මාර්ගයෙන් ඉල්ලා සිටිය යුතුයි. වර්තමානයේ රටේ පවතින පසු බිම තුළ ඔබේ ව්‍යාපාරය කඩා වැටී ඇත්නම් මෙම සහන කාලය ලබා ගෙන ඒවා නැවත ගොඩ නගා ගත හැකියි. එයටයි මෙම සහන කාලය හිමි වන්නේ.

මෙම සටහන අප ලීසිං මිතුරා පිටුවේ පූර්ව නිගමනයක් වන අතර මේ පිළිබඳව සවිස්තර වාර්තාවක් ශ්‍රී ලංකා මහ බැංකුව මගින් අදාළ උපදෙස් නියෝගය නිකුත් කල පසුව ඉදිරිපත් කරනු ඇත.

☝️උපුටා ගැනීමක්

23/01/2020

ණයක් ගන්න ගියාම මොනවද ඉල්ලන ලිපි ලේඛන කියලා නොදන්න අය, ඒ ලිපි ලේඛණ ඉල්ලන්නේ ඇයි කියලා නොදන්න අය මේ ලිපිය කියවන්න
🖕🖕🖕🖕🖕🖕🖕🖕🖕🖕

ණයක් ගන්න ගියාම ඉල්ලන ලිපි ලේඛන ගැන ගොඩක් අය සමාජ මාධ්‍යයන් වලට ඇවිත් බනිනවා අපි දැකල තියනවා. ණයක් ගන්නකොට ඉල්න ලිපි ⁣ලේඛන ගැනත්, ඒව ඉල්ලන්න බලපාන හේතු මොනවද කියන එකයි ගැන හැ⁣මෝම දැනුවත් වෙන්න ඕන. එතකොට මේ ගැටළු අඩු වෙනවා. අද ඒ ගැන කතා කරමු.

මූලික ණය වර්ග දෙකක් ගැන අපි අද කතා කරමු.

1. පෞද්ගලික ණය (Personal Loan)
2. නිවාස ණය (Housing Loan)

පෞද්ගලික ණයක් ගන්න කොට පුද්ගල ඇප දෙකක් හෝ එක් ඇපයක් ඉල්ලනවා. එතනදී අපි ඇප දෙකක් කියලා හිතමුකෝ. එතකොට ලෝන් එකට සම්බන්ධ වෙන්නේ තුන් දෙනයි. ඇපකරුවන් දෙදෙනා සහ ණය ගන්න කෙනා. ඔය තුන් දෙනාගේ,

1. ජාතික හැදුනුම්පතේ පිටපත් 03
2. වැටුප් වාර්තා 03
3. පත්වීම් ලිපි 03
4. සේවා සහතික 03
5. ණය ලබා ගන්නා අරමුණ දැක්වෙන ලිපියක්
6. ණය ලබා ගන්නේ නිවසක් ඉදි කිරීමට නම් ඒ සදහා ඇස්තමේන්තුවක්

ණයක් දෙනකොට අනිවාර්යෙන්ම හැදුනුම්පතේ පිටපත ඉල්ලනවා. ඒකට හේතු කිහිපයක් තියනවා. එකක් තමයි අදාළ කෙනා හදුනා ගැනීම. අනිත් එක තමයි ණයගෙවීම පැහැර හැරියොත් උසාවි යන කොට නීතිමය අවශ්‍යතාවයක් වීම.

වැටුප් වාර්තාව ඉල්ලන්නේ ණය ගෙවන්න පුලුවන් ආදායමක් තියනවද කියලා බලන්න. දළ වැටුපෙන් 60% ක් පමණක් ණය වාරික විදිහට කපන්න පුළුවන්. කලින් ගත්ත ණය, අළුතින් ගන්න ණය හා EPF වගේ වෙනත් කැපෙන සියල්ල දළ වැටුපෙන් 60% ක් ඇතුළේ තියෙන්න ඕන. නැත්නම් ණය ණය ගන්න කෙනාට ජීවත් වෙන්න ආදායමක් නැති වෙනවා. සමහරු "අපිට ජීවත් වෙන්න පුළුවන්; ජීවත් වෙන එක අපි බලාගන්නම්; මුළු පඩියම උනත් කපන්න" කියලා කියනවා. ඒත් ණය පැහැර හැරියට පස්සේ උසාවි යන්න උනොත් උසාවියෙන් සලකා බලනවා දළවැටුපෙන් 60% ඉක්මවලද කියලා. එහෙම 60% ඉක්මවලා ලෝන් එක දීලා තියනවා නම් බැංකුවට අවාසි විදිහට තමයි තීන්දුව දෙන්නේ. මොකද ඒ 60% නීතිය මේ රටේ පොදු නීතියක්. ඉතිං නීති කඩන්න බැංකුවකට හැකියාවක් නැති නිසා.


ඊළගට ගොඩක් අය අහනවා පත්වීම් ලිපියත් අරගෙන සේවා සහතිකයකුත් ඉල්ලන්නේ ඇයි කියලා. පත්වීම් ලිපිය වැඩ තහනමකට ලක් වෙච්ච කෙනෙක් ළගත් තියනවා. නමුත් සේවා සහතිකය කියන්නේ ලෝන් එක ගන්න සතියකට කලින් තමන් වැඩ කරන ආයතන පුධානියාගෙන් තමන් දැනටත් සේවයේ ඉන්නවා කියලා ගන්න සහතිකයක්. ඒ නිසා බනින්න කලින් ඇයි මේවා ඉල්ලන්නේ කියලා දැනගෙන හිටියාම හරි. තමන්ට නොතේරෙන දේවල් තියනවා කියලා දැනගත්තාම වැඩේ ගොඩ. ගොඩක් වෙලාවට බනින්නේ අනවබෝධය නිසානේ. ඒ නිසයි මේ දැනුවත් කරන්නේ. මේක පුළුවන් තරම් ෂෙයා කරලා දැනුවත් සමාජයක් බිහි කරන්න දායක වෙන්න කියලා මම ඉල්ලනවා.

නිවාස ණයක් ගන්නවා නම්, ගෙදර හදන ඉඩම ඇපයට තියන්න ඕන. ලෝන් එක දෙන්නේ වාරික වශයෙන්. කලින් කීව පෞද්ගලික ණය එක වතාවෙන්ම දෙනවා. නමුත් නිවාස ණය එහෙම දෙන්නේ නැහැ. පළමු වාරිකයෙන් අත්තිවාරම දාලා බාගයක් බිත්ති බදින්න ඕන. දෙවන වාරිකයෙන් බිත්ති වල ඉතිරි ටික බැදලා වහළේ ගහන්න ඕන. තුන්වන වාරිකයෙන් කපරාරැව කරන්න ඕන. සිමෙන්ති දාන්න හෝ ටයිල් කරන්න ඕන.

නිවාස ණයක් ගන්න කොට X ඉඩම ඇපයට තියලා Y ඉඩමේ ගේ හදන්න දෙන්නෙ නැහැ. මොකද ⁣එහෙම උනොත් ණය පැහැර හැරීමකදී ඇපයට තිබ්බ ඉඩම හිස් ඉඩමක් නිසා ඒක විකුනලා අපි දුන්න ණයයි ඒකේ පොළියයි පියවා ගන්න බැහැ. ඇපයට තිබුන ඉඩමෙම ගේ හැදුවොත් ගේකුයි ඉඩමකුයි දෙකක් තියන නිසා ඒක වෙන්දේසි කරලා ණය මුදලයි පොළියයි පියවා ගන්න පුළුවන්.

ඒ නිසා තමයි ගේ හදන ඉඩමේ ඔප්පුව අපි තියා ගන්නේ ඇපයට. ඒ ඔප්පුවට අමතරව පත්ඉරු ගන්න ඨ්ක අවුරුදු 30 ක. ඒකෙන් අපි බලනවා මේ ඉඩම අවුරුදු 30 ක් ආපස්සට කාටද අයිති වෙලා තිබුනේ කියලා. ඒ පත්ඉරු බලලා අපි ඒ ඉඩමට හිමිකම් වා⁣ර්තාවක් හදනවා. ඒක කරන්නේ බැංකුවේ පැනල් ලෝයර්. නිවාස ණය ගන්න පුලුවන් ඉඩමක් මිලදී ගැනීමක් සදහාත්. එතනදී මේක වැදගත් වෙනවා. නෑදෑයෙක්ට අයිති ඉඩමක් ගන්නවාද කියලා ඒකෙන් බලාගන්න පුලුවන්. සාමාන්‍යයෙන් අම්මා, තාත්තා, සහෝදර සහෝදරියන්ට අයිති ඉඩම් ගන්න ලෝන් දෙන්නේ නැහැ. එතනදී ඇත්තටම ලෝන් එක ගන්නේ ඉ⁣ඩම ගන්න නෙවෙයි. වෙනත් අවශ්‍යතාවයකට. එතකොට ලෝන් එක ගත්ත කෙනා ණය පැහැර හරින්න තියන සම්භාවිතාව වැඩියි. මොකද ඒ ඉඩම සින්න උනත් එයාට ගානක් නැහැ. මොකද ඒක එයාගේ ඉඩමක් නෙවෙයි. ඒක අම්මා තාත්තා හෝ සහෝදරයෙකුට අයිති එකක්. ඒ නිසා ඒ වගේ දේවල් තේරුම් ගන්න තමයි පත්ඉරු හා හිමිකම් වාර්තාව ගන්නේ.

විථිරේඛා හා නොපවරා ගැනීමේ සහතිකයක් ඉල්ලනවා නිවාස ණයකදී. ඒකෙන් අපි බලනවා පාරේ මධ්‍ය රේඛාවේ ඉදන් අඩි කීයක් දුරින්ද ගෙදරට අත්තිවාරම දාන්න ඕන කියලා.

මාර්ග සංවර්ධන අධිකාරියට අයත් පාරක නම් පාරේ මධ්‍ය රේඛාවේ සිට අඩි 50 ක්ද නගර සභා පාරක නම් පාරේ මධ්‍ය රේඛාවේ සිට අඩි 25 ක්ද දුරින් අත්තිවාරම් දැමිය යුතුය. එය තීරණය කිරීම උදෙසා තමයි විථිරේඛා සහතිකයක් ගේන්න කියන්නේ.

එම සීමාව උල්ලංඝණය කරලා අත්තිවාරම් දැම්මොත් බැංකුවක් නිති විරෝධී වැඩකට උදව් කලා වෙනවා.

ඊළගට හදන ගෙයි ප්ලෑන් එක අනුමත කරගන්න කියලා අපි කියනවා. සාමාන්‍යයෙන් අපි ගෙයක් හදනකොට රටේ තියන නීති රීති වලට අනුගත වෙන්න ඕන. කුඩා ඉඩමක මායිමටම අල්ලලා ගේ හදලා ඒකේ වහලේ ගහන කොට බිත්තියෙන් පිටට යන වහළ කොටස (අගුව) අල්ලපු ඉඩමට යන්න බැහැ. අපේ ගේ වහලේ වතුර අල්ලපු වත්තට වැටෙන්න බැහැ. අල්ලපු ගෙදරට හුළං එන්න බැරි වෙන තරම් උසට තාප්ප ගහන්න බැහැ. අල්ලපු වත්තේ බොන ළිද කිටුටුවෙන් අපේ ගේ ටොයිලට් වළ හදන්න බැහැ. අපේ ගෙදර ජනේලේ පියන ඇරෙන කොට ඒ පියන අල්ලපු ගෙදර බිත්තියේ වදින්න බැහැ. ජනෙල් පියන එළියට ඇරෙනවනම් එහා වත්තට අඩි 7 ක් මෙපිටින් ගේ හදන්න ඕන. මෙන්න මේ වගේ දේවල් නගර සභාවේ ඉන්න T O ඇවිත් පරීක්ෂා කරලා තමයි ගොඩනැගිල්ලට අනුමැතිය දෙන්නේ. නැත්නම් අපි නීති විරෝධී වැඩකට මුදල් දුන්නා වෙනවා. ඒ නිසා තමයි බැංකුව කියන්නේ ප්ලෑන අනුමත කරගෙන එන්න කියලා.

ඔප්පුවක් ලියන කොට ඒකත් හරියටම කරන්න ඉගෙන ගන්න ඕන. අම්මා තාත්තට කියන්න ඕන ඔයාලගේ නමට ඔප්පු ලියන කොට කවදාහරි ලෝන් එකක් ගන්න පුළුවන් වෙන්න හරියටම ඒක කරන්න කියලා. ඒක කරන හැටි මම කියන්නම්.

අපි හිතමු පර්චස් 60 ක ඉඩමක් තියක කෙනෙක් ගැන. ඒකට සින්නක්කර ඔප්පු තියනනා කියලා හිතමු. එයා ඔප්පුව ලියනවා හරියට මිනින්දෝරු සැලැස්මක් හදන්නැතුව. නොබෙදූ ඉඩමක් විදිහට. ඒ කියන්නේ "මා හට අයත් පර්චස් 60 මාගේ දරුවන් තිදෙනාට සමානව බෙදා දෙමි" කියලා. ඒ ලියන වෙලාවේ දෙමාපියෝ ඕක ගැන ගැඹුරට හිතන්නැහැ. එහෙම ලීවාම ඒක සින්නක්කර ඔප්පුවක් උනත් නිරවුල් ඉඩමක් නෙවෙයි. ඒක හරියටම ලියන්නේ මෙහෙමයි.

මිනින්දෝරු කෙනෙක් ගෙනැල්ලා මුළු ඉඩමටම ප්ලෑන් එකක් අදිනවා මුලින්ම. ඊට පස්සේ ඒක සමාන කොටස් තුනකට පර්චස් 20 ගානේ බෙදලා ඒ එක එක කොටසට වෙනම ප්ලෑන් එකක් ඇදලා ඒ කොටස් 3 ලොට් අංක 01,02,03 කියලා වෙන් කරනවා. ඊට පස්සේ ලොට් අංක 01 X ට, ලොට් අංක 02 Y ට, ලොට් අංක 03 Z ට කියලා ඔප්පුව ලියනවා. ආන්න එතකොට ජයභූමි ඔප්පු තියන ඉඩමක් උනත් ඒක නිරවුල්. ඒකට ලෝන් ගන්න පුලුවන්. එහෙම හරියටම වෙන් කරන්නැතුව ලිව්වොත් සින්නක්කර ඔප්පු තිබුනත් ඒක නිරවුල් නැහැ. මොකද සමානව තුන් දෙනාට අයිතියි කියලා ලිව්වාම විවිධ ගැටළු එනවා. අපි හිතමු ඒ පර්චස් 90 ඉඩමේ ගෙයක් තියනවා කියලා. තුන් දෙනාම ඒ ගෙදර තියන කොටස ඉල්ලුවොත් ? ඒක නිරවුල නැහැ නේද ? අර විදිහට ලොට් තුනකට බෙදලා ලිවුවාම කිසිම අවුලක් නැහැ. දෙමාපියන් මේ ගැන දැනුවත් කරන්න. ඒ වගේම ඔයාලා දෙමාපියෝ වෙච්ච දවසටත් හරියටම ඉඩම් බෙදන්න. වැටවල් ගහලම වෙන් කරන්න. නැත්නම් ඔයාලා නැති කාලෙට ඔයාලගේ දරුවෝ නිකරුණේ සහෝදරකම් අමතක කරලා රණ්ඩු වෙනවාමයි.

බැරි වෙලාවත් හරියට වෙන් නොකර සමාන කොටස් දරුවෝ තුන් දෙනාට අයිතියි කියලා ඔප්පුව ලීවම කියමුකෝ. ඔන්න දැන් තුන් දෙනාගෙන් එක්කෙනෙක් ලෝන් එකක් ගන්න යනවා. එතකොට අර සහෝදරයෝ තුන් දෙනාම අත්සන් කරන්න ඕන. එක්කෙනෙක් රට ගිහින් හිටියොත් මොකද වෙන්නේ ? එක්කෙනෙක් මැරිලා හිටියොත් මොකද වෙන්නේ ? එක්කෙනෙක් මැරුනොත් එයාගේ දරුවෝ සහ බිරිද කියන සියළු දෙනා අත්සන් කරන්න ඕන. එයාලා ඒ වෙනකොටත් ඔයාලා එක්ක තරහ වෙලා හිටියොත් අත්සන් කරයිද ?

ටිකක් හිතන්න..... ඔප්පු ලියනකොට හරියටම ලියන්න.

දැන් ලෝන් එක ගන්න කතාවට ආයෙම යමු. ලොන් එකක් ගන්නවා නම් තමන්ගේ වැටුප අදාළ බැංකු ශාඛාවට කලින්ම යවන්න. වෙනත් ආදායම් තියනවා නම් ඒකත් ගිණුමට දාන්න. හෙට ඒ මුදල ඕන උනත් අද එකවුන්ට් එකට දාලා හෙට ආපහු ගන්න. එතකොට ඔයාලගෙ ආදායම් මාර්ග ගැන රෙකෝඩින් එකක් තියනවා. ලෝන් ගන්න ලේසියි එහෙම උනොත්.

බැංකුවක් ලෝන් එකක් දෙනකොටම හිතනවා "මේක අය නොවුනොත්?" කියලා. මොකද බැංකුව ණයට දෙන්නේ අනුන්ගේ සල්ලි. ඒ නිසා ණය අය කර ගන්න බැරි නම් ඒ තැන්පත් කරුවන්ට එයාලගේ මුදලුයි පොළියයි ගෙවන්න බැරි වෙනවා.

අපේ මිනිස්සු කරන සමහර හොර වැඩ නිසා තමයි නීති රීති දැඩි වෙන්නේ. මේ වගේ ආර්ටිකල් එකක් දැම්මාම පිටරටවල් වල ඉන්න අය කමෙන්ට් කරනවා "ලංකාවේ බැංකු තමයි ලෝකේ නැති දේවල් ඉල්ලන්නේ; අපි ඉන්න රටවල් වල නම් එහෙම නැහැ" කියලා. ඉන්න මිනිස්සුන්ගේ හැසිරීම අනුව තමයි නීති රීති අළුතින් එකතු වෙන්නේ. ඒකයි හේතුව. ඒක තේරුම් ගන්න ඕන හැමෝම.

දැන් සමහර බටහිර රටවල් වල තුවක්කුවක් බොහොම ලේසියෙන් ගන්න පුලුවන්. ඇයි ඒ ? කවුරුත් තුවක්කුවක් අරන් කාටවත් වෙඩි තියන්න යන්නැති නිසා. එහෙම දෙයක් උනත් ඒක වෙන්නේ බොහොම කලාතුරකින්. ඒත් අපේ වගේ රටක ලේසියෙන්ම තුවක්කුවක් දුන්නොත් මොනවා වෙයිද ? ඒ නිසා තමයි තුවක්කු නීතිය අපේ රටේ ටිකක් දැඩි කරලා තියෙන්නේ. තේරුණා නේ ? ඒක බැංකු ලෝන් වලටත් පොදුයි.

හොදම දේ තමයි ලෝන් එකක් ළගදී ඕන උනේ නැතත් ඔප්පු තිරප්පු දැන්ම හරියට හදලා තියා ගන්න එක. එතකොට කවදා හරි ලෝන් එකක් ඕන නම් එදාට පහසුයි.

නොපවරා ගැනීමේ සහතිකය කියලා එකකුත් ඉල්ලනවා නගර සභාවෙන් අරන් එන්න කියලා ලෝන් එකක් ගන්න යද්දී. සමහර ඉඩම් උඩින් ළගදීම අධි ධාරිතාවයක විදුලි රැහැන් පද්ධතියක් යන්න නියමිතයි කියලා හිතන්නකෝ. ඒක දැනගන්න ඉඩම් හිමියා, ඒ ඉඩම ඇපයට තියලා ණය ගෙවීම පැහැර හැරියොත් ? ?? එතකොට ඒ ඉඩම ලොකු ගානකට විකුන ගන්න බැංකුවට හැකියාවක් නැහැ. මොකද ඒකට උඩින් විදුලි රැහැන් ගියාට පස්සේ ඒකේ ගෙයක් හදන්නවත්, පොල් වවන්න වත් බැහැ. කවුරුත එහෙම ඉඩම් ගන්නේ නැහැ. ඒක තහවුරු කර ගන්න තමයි ඉදිරි කටයුතු සදමා මෙම ඉඩම පවරා ගැනීමට බලාපොරොත්තු නොවේ කියලා රිපෝට් එකක් ඉල්ලන්නේ.

දැන් දැනුවත් උනානේ ඇයි මේ ඩොකියුමන්ට් ගොඩක් ඉල්ලන්නේ කියලා. ඒ නිසා බැංකු වලට බැනලා වැඩක් නැහැ. අවබෝධයෙන් ඒ ටික හදලා කල්තියාව සූදානම්ව ඉන්න.

යමක් ඉගෙන ගන්න ඇති කියලා හිතනවා. ෂෙයා කරලා අනිත අයව දැනුවත් කරන්න.

Crishantha Dissanayake

08/07/2019

19/06/2019

හුගක් අය FD rates ගැන උනන්දු නිසා තව සති 2කින් වෙන්න යන දෙයක් ගැන කියන්න හිතුනා. මහ බැංකුව උපරිම පොලී අනුපාතයන් හැම වානිජ බැංකුවකටම දාලා තියෙන්නේ කියලා හුගක් අය දැන් දන්නවා.

මේ මාසෙ ඉවරවෙනකොට වසරක් සදහා කල්පිරීමේදී බැංකුවකින් ගෙවන උපරිම පොලිය තනි ඉලක්කමකට එන්න පුලුවන් බව 99.9% ම Sure කියන්න පුලුවන්.

ඒකියන්නේ 1year at Maturity FD rate එක 9.90% විතර වෙයි.

FD දාන්න ඉන්නවනම් දැන්ම දාගන්න. හුගක් බැංකු නොගෙව්වට ඕනම බැංකුවට 11.54% ක් 1year at Maturity FD එකකට ගෙවන්න තාම පුලුවන්.

19/06/2019

වාණිජ බැංකු විසින් ක්‍රෙඩිට් කාඩ් පත් වෙනුවෙන් අයකරනු ලබන පොළී අනුපාතිකය 32% ක් දක්වා ඉහළ නංවා ඇතැයි වාර්තා වේ. 2019 ජූනි මාසයේ සිට මෙලෙසින් ක්‍රෙඩිට් කාඩ් සඳහා අයකරනු ලබන පොළිය ඉහළ ගොස් තිබේ.

මේ අතර ශ්‍රී ලංකා මහ බැංකුවේ නවතම වාර්තාවලට අනුව 2019 අප්‍රේල් මාසය වන විට මෙරට බැංකු සහ මූල්‍ය සමාගම් විසින් නිකුත් කර තිබෙන
මුළු ක්‍රෙඩිට් කාඩ්පත් වෙනුවෙන් ගෙවිය යුතු සමස්ත හිඟ මුදල් ප්‍රමාණය රුපියල් බිලියන 110.27 ක් ලෙසින් ගණන් බලා ඇත. මෙය 2019 මාර්තු මාසය අවසානය වනවිට පැවති රුපියල් බිලියන 107.97 ක්වූ හිඟ ගෙවීම් ප්‍රමාණය හා සැසඳීමේ දී රු. බිලියන 2.29 ක ඉහළ යාමකි.

මීට පෙර අවස්ථාවක දී කළ විමසීමකට ප්‍රතිචාර දක්වමින් ශ්‍රී ලංකා මහ බැංකුවේ ජ්‍යෙෂ්ඨ නියෝජ්‍ය අධිපති ආචාර්ය නන්දලාල් වීරසිංහ මහතා පැවසුවේ, ඉහළ පොළී අනුපාතික හේතුවෙන් ගනුදෙනුකරුවන් ක්‍රෙඩ්ට් කාඩ්පත් වැනි ණය උපකරණ භාවිතයට යොමු වීම අධෛර්යමත්වීමක් සිදුවන බවයි.

“ක්‍රෙඩිට් කාඩ් යනු අවදානම ඉහළ ණය උපකරණයක්. එය ගනුදෙනුකරු මත තීරණය වන්නේ. ඊට ගෙවිය යුතු ගාස්තුව ඒ අනුව තීරණය විය යුතුයි. ක්‍රෙඩිට් කාඩ් යනු දිගු කාලීන ණය පහසුකමක් නොවෙයි. එය කෙටි කාලීන දෙයක්. නියමිත දිනට හිඟ මුදල් පියවීමෙන් පොළී ගෙවීමෙන් වැළකී සිටින්න පුළුවන්. පොළිය වැඩිවීම තුළින් ගනුදෙනුකරුවන් මෙවැනි ණය උපකරණ වෙත යොමු වීම අධෛර්යයමත් වීමක් සිදුවෙනවා“, යැයි ශ්‍රී ලංකා මහ බැංකුවේ නියෝජ්‍ය අධිපති ආචාර්ය නන්දලාල් වීරසිංහ මහතා වැඩිදුරටත් පැවසීය.

Copied from Media House

12/06/2019

ලීසිං පහසුකමක් එහෙම නැත්නම් ෆිනෑන්ස් සේවාවක් හෝ වාහන ණයක් හරහා ඔබෙර් සිහින කරා යනවනම් වැදගත් වෙන කරුණු කීපයක්.🚗🏦💸💵

තමන්ගෙම කියලා වාහනයක් අපි කාගෙත් සුන්දර බලාපොරොත්තුවක්! එහෙම කෙනෙක් නැත්තම් බොහොම කලාතුරකින්. මේ සිහිනය මෝටර් සයිකලයේ ත්‍රී වීලරයේ සිට ඉහළට දිව යනවා. කොහොම නමුත් සම්පූර්ණයෙන්ම මුදල් එකවර ගෙවල වාහනයක් මිලදී ගන්න පුලුවන් හැකියාව තියෙන්නෙ ඉතාම අල්ප පිරිසකට. රටේ පාරක් බැලුවොත් ධාවනය වෙන වාහන වලින් වැඩි ප්‍රතිශතයක් කිසියම් මූල්‍ය සේවාවකට යටත්ව ලබාගත් ඒවා.
ඉතිං මේ ලිපියෙන් අද මම කතාකරන්න බලාපොරොත්තු වෙන්නෙ ලීසිං පහසුකමක් එහෙම නැත්නම් ෆිනෑන්ස් සේවාවක් හෝ වාහන ණයක් හරහා ඔබෙර් සිහින කරා යනවනම් වැදගත් වෙන කරුණු කීපයක්.

✔අංක 5 තමයි ඉතා වැදගත් කම්මලිනම් ඒක මුලින් කියවලා ඉන්න. වතුර එකක් බීලා 😂

1. ඔබ මිලදී ගැනීමට බලාපොරොත්තු වෙන්නෙ අලුත්ම වාහනයක් නම් එය ඉතාම හොද තීරණයක්. මොකද පාවිච්චි කල වාහණයක් ලීස්/ෆිනෑන්ස් කරලා ගන්න එක තරමක් අවධානම් කාරණයක් නඩත්තු සහ වියදම් අතින්. ලංකාවෙ සෙකන්ඩ් හෑන්ඩ් මාකට් එකේ විකුණන්න තියන වාහන වලින් 99% ම මොකක් හරි මරාළයක්. මතක තියාගන්න හොද වාහනයක් ලේසියකට මිනිහෙක් විකුණන්නෙ නෑ. පාවිච්චි කරපු එකක් ගන්නවනම් පෞද්ගලිකව හොදින්ම දන්න උදේ හවස දැක්ක දන්න කෙනෙක් පාවිච්චි කල වාහනයක් ගන්න එක තමයි හොද. නැත්තම් ඉතිං ළමයි දෙතුන් දෙනෙක් එක්ක ගෑණියෙක් ගත්තා වගේ තමයි. හැම මාසෙම වාරිකෙයි රෙපෙයාර් වියදමයි එකට එද්දි හරිම සනීපයි. ❤
මගේ පෞද්ගලික අත්දැකීම් එක්ක මම කියන්නෙ අලුත්ම එකක් හෝ ලංකාවෙ බාවිතා නොකල ලියාපදිංචිය නොකල වාහනයකට යන්න. 👍

2. කීයක් ලීසින් දානවද?
මේක හරිම කල්පනාවෙන් ගන්න ඕනෙ තීරණයක්. මොකද එක වාරිකයක් හිර වුණොත් කපෝති ඊලඟ මාසෙ ඩබල්! 😂
ඉතිං මම කියන්නෙ තමන්ගෙ මාසික ආදායම ගණන් කරලා, එයින් වියදම අඩු කරලා ඉතිරි ගානෙන් 25% එන වාරිකයක් හිර නොවී මනුස්සයෙක්ට ගෙවන්න පුලුවන්.
උදාහරණයක් ඔයාගෙ පඩිය 35,000/= නම් බයික් එකේ වාරිකේ 15,000/= ක් වුණොත් ලගදිම විකුණන්න වෙයි පාඩුපිට. ඊලඟ කොටස් වල තේරුම් කරන්නම්. දිගටම කියවන්න.
සාමාන්‍යයෙන් ලීසිං සමාගමක් හෝ බැංකුවක් වාහනේ වටිනාකමෙන් 70% සිට 90% දක්වා මුදලක් ඔබට ලබා දෙනවා. මේක වාහනය අනුව වෙනස් වෙනවා. සාමාන්‍යයෙන් අවම‍ය වාහනයේ වටිනාකමෙන් 1/3 ක් අතිං දාන්න ඕනෙ. තමන්ගෙ ආදායම අනුව සහ අතේ තියන මුදල අනුව ඒක තීරණය කරන්න. කවදාවත් අතේ කරේ තියන සේරම හූරළා වාහන ගන්න එපා. ගත්තු දවසෙ ඉදං ඕනෑම වාහනයක තියෙන්නෙ වියදම් මිසක් ආදායමක් නෙවෙයි( වානිජ වාහන හැර)

3. ගන්න ඕනෙ ලීසිංද ෆිනෑන්ස්ද VL ද?
මෙහෙමයි ලීසිං සහ ෆිනෑන්ස් දෙක අතර ලොකු වෙනසක් නෑ. දෙකේම මුදදර ගාස්තු එහෙම තියනවා ලොකුවට පැහැදිලි වෙනස ලීසිං/ෆිනෑන්ස් වල තියෙන්නෙ සම වාරික ඒ කියන්නෙ පලමු වාරිකයෙ ඉදං අවසන් වාරිකය වෙනකම් එකම ගාන ගෙවන්න ඕනෙ. විවිධාකාර ආයතන අවසන් වාරික හෝ මැද වාරික ලෙස මදක් විශාල වාරිකයක් දාලා ඔයාගෙ ප්‍රධාන වාරිකය අඩු කරලා දෙනවා. හබැයි ශුවර් එකටම ඒ වාරිකය ගෙවාගන්න පුලුවන් නම් විතරක් එහෙම කරගන්න නැත්තම් අමාරුයි. කොහොමටත් ඒ ක්‍රමය සුදුසු නෑ.. ඒක කොම්පැණිකාරයින්ගෙන් ගැටයක් වාරිකේ අඩු කරලා පෙන්වන්න. අපි දන්නෙ නෑ අපිට කවදා මුදල් අපහසුතාවක් ඒවිද කියලා. ඒ නිසා සම වාරිකයකට යන එක අවධානම අඩුයි.
VL එහෙම නැත්නම් වාහණ ණය වල වෙනස වාරිකය එන්න එන්න අඩු වෙනවා. ඒ කියන්නෙ කැපිටල් එක වාරිකෙන් වාරිකෙ අඩු වෙමින් පොලිය හැදෙන්නෙ. මේක තරමක් වාසි සහගත නමුත් පොලී අනුපාතය වෙනස් වෙන්න පුලුවන් නිසා රටේ ආර්ථිකය අනුව වාරිකය වැඩි වෙන්නත් පුලුවන්. අපි දන්නෙ නෑ අවුරුදු 2-3 කින් රට කොතන තියේද කියලා. ඒ නිසා කෝකටත් තමන් ගෙවන මුදල ස්තීරව දන්න සම වාරිකයකට යන එක හොදයි.

4. අවුරුදු කීයකට දානවද ලීස් එක?
තවත් වැදගත්ම දෙයක් දැන් වසර 7 දක්වා ලීසිං දෙනවා. ☺️ වාරිකේ නම් අඩු වෙයි හැබයි ගෙවිලා එද්දි ගත් මුදල වගේ 85% වඩා පොලියක් ගෙවීමට ඔබට සිදුවෙනවා. සාමාන්‍යයෙන් බයික් / ත්‍රීරෝද රථ වලට උපරිම දෙන්නෙ වසර 3 යි. ( වාරික 36) ඊට වඩා දෙන ආයතන තිබ්බත් ඒවයෙ පොලිය ඉතා ඉහලයි.
වාහනයක් නම් උපරිම වාරික 60 ( අවුරුදු 5ක් 😂) යන එක තමයි හොද. වඩා වාසි වාරික 36 හෝ 48 න් ඉවර කරගන්න එක. කාලය වැඩි වෙන්න වෙන්න පොලිය වැඩි වෙනවා. මොකද මුලු මුදලටමයි පොලිය හැදෙන්නෙ. ඒ නිසා අවසන් වාරිකෙත් ගෙවලා ඉවර වෙනකම් මුල් ණය මුදලට පොලිය හැදෙනවා.

5. ඉතා වැදගත්:
මගදි වාහනය ලීසිං පිට විකුණන්න හෝ ලීසිං එක closed කරන්න හිතන්න එපා. එහෙම කලොත් පාඩු පිට පාඩු. අනිවාර්යයෙන් අවසන් වාරිකය තෙක් ගෙවන්න. නැත්තම් හිත හදාගෙන අතෑරලම දාන්න.
මොකද වෙන්නෙ මේකයි. හිතන්න ඔයා අතින් ලක්ෂ 5 ක් ලාදා වාහණයක් ගේනවා. වාහනේ ලක්ෂ 30 ක් වෙනවා. ඔයා ලක්ෂ 25 ක් ලීස් කරනවා. ඒ කියන්නෙ සාමාන්‍යයෙන් මාසෙට වාරිකය 55,000/= වගේ වෙනවා (වසර 5) හිතන්න ඔයා අවුරුදු 1 හමාරක් ගෙවලා වාහනය විකුණන්න හිතනවා ඒ කියන්නෙ මේ වෙද්දි 55,000*18 ලක්ෂ 9.90 ක් ගෙවලා, මූලිකව ලක්ෂ 5 සමග ඔයාට ලක්ෂ 14.90 ක් වියදම් ( රෙපෙයාර් හැර 😐) ෆිනෑන්ස් එකට ඔයා ගෙවන්න ඕනෙ 55,000* 60 = ලක්ෂ 33 ක්. පොළිය = 33-25 = ලකශ 8 ක්. තවම ගෙවලා තියෙන්නෙ පොළියෙන් 240,000/= ඔයා ලීස් එක ක්ලෝස් කරණවනම් සාමාන්‍යයෙන් මුලු පොලියෙන් 90% යි ගෙවන්න ඕනෙ ඒ කියන්නෙ 720,000/= ක් පොලිය ඉතුරුයි. තව ඔයාට ගෙවන 4,80,000/= තියනවා. පොලිය විතරක්. මේ වෙද්දි මුදලෙන් ගෙවිලා තියෙන්නෙ 990,000- 240,000 = 750,000/= යි. ඒ කියන්නෙ ලක්ෂ 25 න් තව 1,750,000/= ක් තියනවා මුදල ඒක පොලිය එක්ක ඔබ 17/50 + 4/80 = 22 ලක්ෂ තිස් දහසක් ලීසින් එක ක්ලෝස් කරනවනම් දෙන්න ඕනෙ. එහෙමයි ගණන් හැදිල්ල. මුදල ලක්ෂ 7 යි 50 ක් ගෙවලා කියලා නෑ.. අයවිය යුතු 90% පොලිය ගෙවන්න ඕනෙ. ඒ කියන්නෙ ක්ලෝස් වෙද්දි 22 ලක්ෂ 30,000/= කම්පනි එකට ගෙවන්න අපි බැදී ඉන්නවා. හරියට බැලුවම ඔයා වාරික 18 දි මුදල විදියට අඩු කරන් තියෙන්නෙ දෙලක්ෂ හැත්තෑ දාහයි. හබැයි ලක්ෂ 9.90 ක් ම ගෙවලා. කොහොමද ටොපිය 😂😂 ඔන්න ඔතනදි තමයි එල්ලුනේ කොටි වලිගෙ කියලා තේරෙන්නෙ.
ඒ නිසා කවදාවත් ලීස් එකක් මගදි නවත්වන්න හිතන්නවත් එපා.. ✋✋✋

ඉතිං ඔයා හිත හදාගන්න මෙහෙම අමතකද මේ මරාලෙ ගද්දි අතිං 5 ක් දුන්නනෙ. 😐 ඉතිං ඒ 5 යි ගෙවපු ලක්ෂ 9.90 යි. ගෙවන්න තියන 22 ලක්ෂ /30 යි එකතු කරන්න. එකතුව 37 ලක්ශ විසිදාහක්. ඒ ගානට දැන් වාහනය කොන්ඩෙ නැති චීනෙක් හොයං විකුණගන්න පුලුවන් නම් ඔයා බේරෙනවා. ගෙවපු ලක්ෂ 5 යි වාරික ලක්ෂ 9.90 එක්ක. කම්පනි එකෙන් ඔයාට එයාලගෙ ගාන අඩු කරන් ලක්ෂ 14.90ක් අතට දෙයි. ඒත් මේ තරම් සුන්දර නෑ වාහනේ විකුණන එක ගොඩක් වෙලාවට පාඩු පිටයි දෙන්න වෙන්නෙ. දන්නවනෙ වාහනයක සෙකන්ඩ් හෑන්ඩ් මාකට් අඩු වෙනවා. 30 ට ගත් එක 30 ටම වගේ දුන්නත් ලක්ෂ 30 න් ලීසිං එකේ ගාන දුන්නම ඉතුරු 770,000/= අතින් දුන් ලක්ෂ 5 කපුවම 270,000/= ඉතුරියි. ගෙව්වා වාරික 18 ලක්ෂ 9.90 න් ඒ 270,000/= අඩු කරාම 720,000/= ක් පාඩුව.
ඒ කියන්නෙ වාහනෙන් ඔයා හත් ලක්ෂ විසි දාහක් පාඩුයි ගත්තු මිලටම වික්කත්.
කොහොමද ඒක 😂

✔ලීස් පිට සේල් ඔප්ෂන් නම්බර් #02
ගෙවාගෙන යන්න කාටහරි දීම.

මිනිස්සු වාහන ගනීද ඔයාට දැන් අතට ලක්ෂ 14.90 ක් දීලා. නෑ.. අලුතෙන් ගන්න එකා හොයන්නෙ අඩුම ගාන අතෙන් දීලා ගෙවන්න තියන එකක්. ඒ නිසා කීයටවත් අතට 14.90 ක් ගන්න වෙන්නෙ නෑ. කොහොමහරි අතට 10.90 ක් අරං 4 පාඩු පිට දුන්නා කියමුකො. නීත්‍යානුකූලව ඔබ කරන්නෙ වරදක්. කෙසේ නමුත් ලීසිං වාහන අතින් අත යනවා. මෙහෙම ගිහිලා ගත් එකෙක් මේක ගෙවන්නෙ නැතුව වාහනේ ඉස්සුවොත් (සීස් කිරීම) වාහනේ අඩු මුදලකට කම්පණි එකෙන් වෙන්දේසි කරලා ඉතිරි මුදලට ඔබට ණඩු දානවා. අනිවාර්යයෙන් ඔබට එය ගෙවන්න වෙනවා. ඒ නිසා ලීසිං පිට වාහනයක් විකුණනවනම් නීත්‍යානුකූලව දිවුරුම් ප්‍රකාශ අරං විකුණන එකයි ඇගට ගුණ ඊට වඩා හොද හිත හදාගන්න එක. මොකද කොහොම කරත් අවසානෙ කුණුගොඩ එන්නෙ ඔයාට.

6. එහෙමනම් ඉතිං අවසාන වශයෙන් කියන්න තියෙන්නෙ 1 වාරිකයෙ සිට අවසන් වාරිකය දක්වා ගෙවන්න බැරිනම් වාහන ලීස් කරලා ගන්න එපා. ඊට වැඩිය හොදයි පයින් යන්න. රෑට සනීපෙට නින්ද යනවා. මම මේ දේවල් කිව්වෙ වසර 10 ක ලීසිං පාරිභෝගිකයෙක් විදියට වාහන 2 ක (ත්‍රිරෝද රථයක්/කාරයක්) අමිහිරි අත්දැකීම් වලින්. ලීසිං වලින් පාඩු කරං ආයතන වලට බැණලා පළක් නෑ.. ( ගිණි පොලී ලීසිං කාක්කො නැතුව නෙවෙයි) කොහොම වුණත් ඉල්ලං කන්නෙ අපිමයි. මේ වෙද්දි මමත් කාරයක් සහ මෝටර් සයිකලයක් ලීසිං පිට දුවනවා. හොද සමාගමක් තෝරාගන්න. කළමණාකරු සහ රිකවරි මහත්මා සමග අවංකව සුහදශීලී වන්න. ඔවුන්ට ඔබේ වාහනය උස්සන්න ඕනෙ නෑ.. ගෙවන්නෙ නෑ, ඉස්සුවා, වෙන්දේසි කරා කියන්නෙ ඔවුන්ටත් එකී බිස්නස් එක closed වෙනකම් නිවනක් නෑ.. අපි අපේ මූල්‍ය විණය නිවැරදිව පවත්වාගෙන යමු.ගෙවන්න බැරි ණය නොවී ඉමු, ණයක් වුණොත් එය ගෙවන්න පුරුදු වෙමු. ඒක සැමට වඩා යහපත්.

copied - පිරිමි පරිච්ඡේදය -

16/11/2018

https://www.moneta.lk/article/2018/11/what-is-crib-its-objectives-an-introduction

CRIB is the back born for the credit borrower and lender operation in Sri Lanka. Proper functioning of the financial sector is heavily dependent on CRIB.

02/11/2018

ක්‍රෙඩිට් කාඩ්පතක් යනු ඕනෑම අයෙකුට භාවිත කළ හැකි පහසු සහ කාර්යක්ෂම මුල්‍ය සේවාවකි. ඇතැමුන් ක්‍රෙඩිට් කාඩ්පත් දෙස බලන්නේ තමාගේ බැංකු ඉතුරුම් සහ ඉපයීම් විනාශ කර දමන භයානක අවියක් ලෙසයි. ඇත්තවශයෙන්ම එය තීරණය වන්නේ ඔබ එය භාවිත කරන ආකාරය මතයි. ලොව හොදම ක්‍රෙඩිට් කාඩ්පත වුණත් ඔබ අවිධිමත් ලෙස එය භාවිත කරනවා නම් ඔබට නියමාකාරයෙන් උදවු නොකරනු ඇත.

ශ්‍රී ලංකාවේ ක්‍රෙඩිට් කාඩ්පත් වර්ග 50ක් පමණ සාමාන්‍ය පාරිභෝගිකයන් සඳහා වෙන්ව ඇත. මින් ඔබට වඩාත්ම ගැලපෙන ක්‍රෙඩිට් කාඩ්පත කුමක්ද කියා ඔබ දන්නවද ? එය ඔබට අවිශ්වාස නම් කණගාටු නොවන්න. එය ඉතාමත් පහසුයි.මෙම ලිපියෙන් අප ඔබ දැනුවත් කරන්නේ ඔබට වඩාත්ම ගැලපෙන ක්‍රෙඩිට් කාඩ්පත තෝරාගන්නේ කෙසේද යන්නයි.

කාඩ්පත් සහ ඔබේ ජිවන රටාව

කාඩ්පත් වර්ගය තෝරාගැනීමට පෙර ඔබ ඔබේ ජිවන රටාව හරිහැටි අවබෝධ කරගත යුතුයි. ඔබ නිරතුරුවම සංචාරයේ යෙදෙන හෝ නිවාඩු නිකේතන සහ හෝටල් වෙත යන එන අයෙක් නම් ඔබට වඩාත්ම ගැලපෙන්නේ සංචාරක සහ විනෝද කටයුතු සදහා වැඩි වාසි ලබා දෙන ක්‍රෙඩිට් කාඩ්පත්ය. ඔබ ගුවන් ගමන් හෝ නිවාඩු නිකේතන සහ හෝටල් වෙන්කරනවා නම් ඒ සඳහා විශේෂ වාසි ලබා දෙන ක්‍රෙඩිට් කාඩ්පත් වර්ග කීපයක් ඇත.

ඔබ වැඩි වශයෙන් භාණ්ඩ මිලදී ගැනීම් සම්බන්ධයෙන් කටයුතු කරනවානම්, භාණ්ඩ මිලදී ගැනීම් සදහා විශේෂ වාසි ලබා දෙන ක්‍රෙඩිට් කාඩ්පතක් තෝරා ගැනීම වැදගත්ය. එසේම ඔබ නිරතුරුවම අවන්හල්වලින් ආහාර ඇනවුම් කරන්නේනම් හෝ නිතර අවන්හල් වෙත යන අයෙක් නම් ඒ සම්බන්ධයෙන් විශේෂ වාසි ලබාදෙන ක්‍රෙඩිට් කාඩ්පතක් තෝරා ගැනීම වැදගත්ය.

ඔබ ඉහත සදහන් ආකාරයට ඔබේ ජිවන රටාව හෝ ඔබේ වියදම් රටාව තෝරාගත් පසු ඔබට පහසුවෙන් ක්‍රෙඩිට් කාඩ්පත් වර්ග කීපයක් සංසන්දනය කරමින් ඔබට වඩාත්ම ගැලපෙන ක්‍රෙඩිට් කාඩ්පත තෝරාගත හැකිය.

වාර්ෂික ගාස්තු, සම්බන්ධ වීමේ ගාස්තු සහ පොළී අනුපාත

වාර්ෂික ගාස්තු,සම්බන්ධ වීමේ ගාස්තු සහ පොළී අනුපාත බැංකුවෙන් බැංකුවට මෙන්ම ඇතැම් විට කාඩ් පතෙන් කාඩ්පතට වෙනස් විය හැකිය. සමහර බැංකු වාර්ෂික ගාස්තු වලින් නිදහස් කරනු ලබන අතර සමහර බැංකු සම්බන්ධීකරණ ගාස්තු කපා හරිනු ලබන්නේ පාරිභෝගිකයන් ආකර්ෂණය කරගැනීමට අනුගමනය කරන උපක්‍රමයක් ලෙසයි. මේ සම්බන්ධයෙන් ඔබ වඩාත් අවදානය යොමු කරලිය යුතු වන්නේ වාර්ෂික ගාස්තු, සම්බන්ධ වීමේ ගාස්තු සහ පොළී අනුපාත ගාස්තු සමහර පැකේජයන්හි ඉතා ඉහළ අගයක් ගන්න බැවිනි.

ක්‍රෙඩිට් කාඩ්පත් සඳහා අයකරන අනෙකුත් ගාස්තු

වාර්ෂික ගාස්තු, සම්බන්ධ වීමේ ගාස්තු සහ පොළී අනුපාත වලට අමතරව, තවත් සමහර වැදගත් ගාස්තු කීපයක් පිළිබඳව ඔබ දැනුවත් විය යුතුය. ප්‍රමාද ගාස්තු ගෙවීම්, ණය සිමාව ඉක්මවිමේ ගාස්තු, මුදල් ආපසු ගැනීමේ ගාස්තු සහ නව කාඩ් පතක් ලබාගැනීමේ ගාස්තු ඒ අතර ප්‍රධාන වේ. ඔබ ක්‍රෙඩිට් කාඩ්පතක් තෝරාගැනීමේදී, සැම විටම නිර්දේශ කරනු ලබන්නේ ඉහත සඳහන් කරනු ලැබූ අනෙකුත් ගාස්තු පිළිබඳව ඔබේ විශේෂ අවදානය යොමු කල යුතු බවයි.

ශේෂය මාරු කිරීමේ පහසුකම

ශේෂය මාරු කිරීමේ පහසුකම යනු, එක ක්‍රෙඩිට් කාඩ් පතක ඇති ගිණුමේ ශේෂය එම ආයතනයේම හෝ වෙනත් ආයතනයක ගිණුමක් වෙත මාරු කිරීමයි. මෙය ඉතාමත් හොද සේවාවකි. මෙයින් ඔබට අපහසුවකින් තොරව හදිසි අවස්තාවයකදී, ඉක්මනින් සහ පහසුවෙන් මුදල් ලබා ගත වෙයි. ඇතැම් බැංකු මෙම පහසුකම සඳහා ඉතා අඩු පොළී අනුපාතයක් පමණක්අය කරනු ලබයි. ඔබ ඉතාමත් අවදානයෙන් ණය පාලනය කරනු ලබන අයෙක් නම්, මෙම පහසුකම ඔබට ඉතාමත් වැදගත් වන බව නොඅනුමානයි. නමුත් එසේ නොවන්නෙකුට එය නිර්දේශ කල නොහැක්කේ අවසානයේ මේ මගින් භයානක අත්දැකීමක් ඔබට අත් කර දිය හැකි නිසාවෙනි.

ඕනෑම ක්‍රෙඩිටි කාඩ්පතක් මිලදී ගැනීමට පෙර එහි කොන්දේසි පිළිබඳ දෙවරක් කියවා බැලීම වැදගත්ය. ඔබ ක්‍රෙඩිට් කාඩ්පත භාවිත කිරීමට පටන් ගත් පසු, ඔබගේ සම්පුර්ණ ණය මුදල නියමිත දිනට පෙර ගෙවීමට වග බලා ගැනීම අනිවාර්ය වේ. ක්‍රෙඩිට් කාඩ්පතක් භාවිත කිරීමට තීරණය කරන්නේ නම්, එය වගකීමක් ඇතිව භාවිත කිරීමට කටයුතු කරන්න. මෙම ලිපිය කියවන ඔබට එය නිසි ආකාරයෙන් සිදු කළ හැකි බව විශ්වාසයි. ඔබ මේ ලිපිය ගැන සිතන්නේ කුමක්ද? G