27/08/2026
අද පිංවත් නිකිණි පුර පසලොස්වක පොහොයයි. සම්බුද්ධ සාසනයේ ඉහල වැදගත් කමින් යුත් උතුම් පෝය දිනයක් වශයෙන් නිකිණි පුර පොහෝ දිනය හැඳින්විය හැකි ය.
බුදු රජාණන්වහන්සේ පර්යාප්ති ධර්මය චිරස්ථායි කිරීමට මුල් පියවර තබන ලද්දේ අදවන් නිකිණි පොහොය දිනකදී ය. පළමුවන ධර්ම සංගායනාව ආරම්භ කළේ බුදු රජාණන්වහන්සේ පිරිනිවන් පා තෙමසක් ගතවීමෙන් පසුවය. සම්බුද්ධ පරිනිර්වාණයෙන් තෙමසකට පසුව නිකිණි මස පර්යාප්ති සාසනය චිරස්ථායී කිරීම සඳහා අඩිතාලම දැමූ පොහොය නිකිණි පොහොය ලෙස බෞද්ධ ඉතිහාසයේ සඳහන් වේ. ඒ අනුව අජාසත්ත රජතුමාගේ අනුග්රහය ඇතිව මහා කාශ්යප මහරහතන් වහන්සේගේ ප්රධානත්වයෙන් ආනන්ද, අනුරුද්ධ, උපාලි යන මහ රහතන් වහන්සේ ප්රධාන පන්සියයක් මහරහතන් වහන්සේලාගේ සහභාගිත්වයෙන් රජගහනුවර වේහර පර්වතයේ සත්තපර්ණි .ගුහාද්වාරය ඉදිරිපිට ඉදිකරවු අලංකාර මණ්ඩපයකදී ප්රථම ධර්ම සංඝායනාව ආරම්භ කරන ලද්දේ නිකිණි පුන් පොහොය දිනයේදීය.
පළමු ධර්ම සංගායනාවට මූලිකත්වය ගත් ධර්ම භාණ්ඩාගාරික ආනන්ද හිමියන් අරහත් මාර්ගයට පිවිසියේද අදවන් නිකිණි පොහෝ දිනකය.
බුද්ධ ශාසනයේ භික්ෂූන් වහන්සේලා උදෙසා පැනවූ වස් විසීම වස්සාන කාලයට සිදුවේ. මේ එම කාලයයි. වස්වැසීම වකවානු දෙකකට සීමාකොට පනවන ලදී. ඒ පෙරවස් සහ පසුවස් වශයෙනි. ඇසළ මස පුර පසළොස්වක දිනට පසුදා පෙරවස් විසීමද, පෙරවස් විසීමට නොහැකි වූ භික්ෂුවකට නිකිණි පොහොයදා පොහොය කොට ඊට පසුදා පසුවස් විසීමට ද පැනවීය. ඒ අනුව පසුවස් විසීමේ දිනය වශයෙන් ද නිකිණි පොහොය වැදගත් වේ.
ශ්රී ලංකාවට නිකිණි පොහොය වඩාත් වැදගත් වන්නේ මහනුවර ශ්රී දළඳා මාලිගාවේ ඇසළ පෙරහර මංගල්යයේ අවසන් රන්දෝළි පෙරහර පැවැත්වෙන්නේ නිකිණි පසළොස්වක පොහෝ දින වීම නිසායි.
