31/07/2026
ທສວ ສະຫຼຸບປະຈໍາປີ 2025 ແລະ ທິດທາງແຜນການປະຈໍາປີ 2026............
ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໄດ້ຈັດ ກອງປະຊຸມສະຫຼຸບວຽກງານ ປະຈໍາປີ 2025 ແລະ ທິດທາງແຜນການປະຈໍາປີ 2026 ຂຶ້ນວັນທີ 31 ກໍລະກົດ 2026 ທີ່ ໂຮງແຮມ ລາວພລາຊາ ເປັນປະທານຂອງ ທ່ານ ພຸດທະວັນ ນັນທະວົງ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ຮອງປະທານສະພາບໍລິຫານ ທສວ ເຊິ່ງມີສະມາຊິກສະພາບໍລິຫານ ທສວ, ບັນດາຜູ້ຕາງໜ້າຈາກກະຊວງ-ອົງການ, ສະຖາບັນການເງິນ ແລະ ທະນາຄານທຸລະກິດທີ່ເປັນຄູ່ຮ່ວມມື, ວິສາຫະກິດ ແລະ ແຂກຖືກເຊີນເຂົ້າຮ່ວມ ຈຳນວນ 105 ທ່ານ.
ກອງປະຊຸມປະຈຳປີ 2025 ຂອງ ທສວ ໃນຄັ້ງນີ້ ໄດ້ສຸມໃສ່ການສະຫຼຸບ ແລະ ຕີລາຄາຜົນການດໍາເນີນວຽກງານ ທສວ ໃນຮອບໜຶ່ງປີຜ່ານມາ ແລະ ທິດທາງແຜນການວຽກງານຈຸດສຸມ ໃນປີຕໍ່ໄປ. ພ້ອມທັງການລາຍງານຈາກຕົວແທນທະນາຄານທຸລະກິດ ທີ່ເປັນຄູ່ຮ່ວມມື ແລະ ຫົວໜ່ວຍວິສາຫະກິດທີ່ໄດ້ຮັບການສະໜອງທຶນສິນເຊື່ອ ແລະ ທຶນໂຄງການວິຊາການ ຈາກ ທສວ ກ່ຽວກັບຜົນສຳເລັດໃນການນຳທຶນໄປໝູນໃຊ້ເພື່ອຂະຫຍາຍການຜະລິດ ແລະ ພັດທະນາທຸລະກິດ. ພ້ອມດຽວກັນນັ້ນຜູ້ເຂົ້າຮ່ວມຍັງໄດ້ປະກອບຄຳຄິດເຫັນຢ່າງກວ້າງຂວາງ ເພື່ອເປັນຂໍ້ມູນໃນການປັບປຸງການຄຸ້ມຄອງ-ບໍລິຫານກອງທຶນ ແລະ ຍົກສູງຄຸນນະພາບການບໍລິການຕໍ່ ຈນກ.
ໃນໂອກາດນີ້ ທ່ານ ພຸດທະວັນ ນັນທະວົງ ຮອງລັດຖະມົນຕີກະຊວງ, ຮອງປະທານສະພາບໍລິຫານ ທສວ ໄດ້ມີຄຳເຫັນຊີ້ນຳ ໂດຍເນັ້ນໜັກໃຫ້ ທສວ ສືບຕໍ່ປັບປຸງການຄຸ້ມຄອງ-ບໍລິຫານກອງທຶນໃຫ້ມີຄວາມໂປ່ງໃສ, ຍົກສູງປະສິດທິພາບໃນການນຳໃຊ້ແຫຼ່ງທຶນ, ຂະຫຍາຍໂອກາດການເຂົ້າເຖິງແຫຼ່ງທຶນຂອງ ຈນກ ໃຫ້ຫຼາຍຂຶ້ນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມແນວທາງນະໂຍບາຍ ຂອງພັກ ແລະ ລັດຖະບານ.
ພ້ອມນັ້ນ ຍັງໄດ້ມີພິທີມອບໃບຍ້ອງຍໍ ແລະ ໃບຊົມເຊີຍ ໃຫ້ແກ່ບັນດາທະນາຄານ ແລະ ສະຖາບັນການເງິນ ທີ່ເປັນຄູ່ຮ່ວມມືກັບ ທສວ ທີ່ມີຜົນງານດີເດັ່ນ. ພ້ອມທັງເຂົ້າຢ້ຽມຊົມບູດວາງສະແດງສິນຄ້າຜະລິດຕະພັນຂອງບັນດາ ຈນກ ທີ່ໄດ້ຮັບການສະໜອງທຶນຈາກ ທສວ.
ທ່ານສາມາດຕິດຕາມຂໍ້ມູນ-ຂ່າວສານອື່ນໆໄດ້ອີກທີ່ເວັບໄຊ: https://laoedaily.com.la/
ຫຼື ກົດຕິດຕາມຮັບຊົມໄດ້ກ່ອນໃຜທີ່: https://www.youtube.com/
ຕິກຕັອກ: https://www.tiktok.com/
#ຂ່າວເສດຖະກິດການຄ້າ
#ເສດຖະກິດການຄ້າ
