29/07/2020
ទីផ្សារមាសពិភពលោកប្រែប្រួល នាំឱ្យមាសនៅមីយ៉ាន់ម៉ាឡើងថ្លៃ
ថ្ងៃទី ០១ ខែ កក្កដា ឆ្នាំ ២០១៦ ម៉ោង ១២:៤៥
ប្រទេសមីយ៉ាន់ម៉ា ៖ លេខាធិការនៃសមាគមសហគ្រិនមាសក្រុងយ៉ាំងហ្គោន លោកWin Myint បានឲ្យដឹងថា តម្លៃមាសបានកើនឡើងដល់៨១២.០០០ខ្យាដក្នុង១ទីកាល់ (០.៥៧៦អោន) នៅថ្ងៃទី១៦ មិថុនា ដែលនេះជាតម្លៃខ្ពស់ថ្មីមួយ ។
លោកបានបន្តថា កត្តាចម្បងដែលនៅពីក្រោយកំណត់ត្រានេះ គឺជាការប្រមូលផ្តុំយ៉ាងខ្លាំងនៅលើទីផ្សារអន្តរជាតិ ។ តម្លៃមាសនៅទីផ្សារបច្ចុប្បន្ននាទីក្រុងញូវយ៉ក មានតម្លៃក្រោម១.១០០ដុល្លារក្នុងមួយអោនកាលពីខែមករា និងតម្លៃជាង១.៣០០ដុល្លារក្នុង១អោន កាលពីសប្តាហ៍មុន ។
តម្លៃមាសនៅមីយ៉ាន់ម៉ាកាលពីឆ្នាំមុន ត្រូវបានជំរុញដោយការប្រែប្រួលនៃអត្រាប្តូរប្រាក់ខ្យាដ និងដុល្លារ ។ ប្រាក់ខ្យាដធ្លាក់ចុះយ៉ាងខ្លាំង បើធៀបនឹងប្រាក់ដុល្លារ ទើបធ្វើឲ្យគេទិញមាសវិញ ។
បច្ចុប្បន្ននេះ អត្រាប្តូរប្រាក់ខ្យាដ និងដុល្លារ មានស្ថិរភាពត្រឡប់មកវិញ ធ្វើឲ្យតម្លៃមាសប្រែប្រួលតាមតម្លៃទីផ្សារអន្តរជាតិ ។ ប៉ុន្ដែ ខណៈដែលតម្លៃមាសនៅទីផ្សារពិភពលោកកំពុងត្រូវបានជំរុញដោយភាពមិនប្រាកដប្រជានៃនយោបាយនិងសេដ្ឋកិច្ច គឺស្រដៀងគ្នាដែរថា តម្លៃមាសក៏ងាយប្រែប្រួលទៅតាមនោះផងដែរ ។ នេះបើតាមការលើកឡើងរបស់អ្នកជួញដូរមាស ។
លោក Tin Tun ប្រធានសមាគមពាណិជ្ជករមាស ទីក្រុងម៉ង់ដាឡៃ បាននិយាយថា ៖ « សព្វថ្ងៃនេះ មិនមានការប្រែប្រួលច្រើនទេនៅក្នុងអត្រាប្តូរប្រាក់ដុល្លារ និងខ្យាដ ។ តម្លៃមាសនៅមីយ៉ាន់ម៉ាពឹងផ្អែកទាំងស្រុងលើតម្លៃមាសពិភពលោក ដែលបានកើនឡើង និងមានការប្រែប្រួលច្រើន » ។
លោកបន្ថែមថា តម្លៃនៅក្នុងមួយថ្ងៃប្រែប្រួលទៅតាមទីផ្សារពិភពលោក បានកើនឡើងទ្វេដងប្រហែលពី១៥ដុល្លារ ទៅ៣០ដុល្លារក្នុង១អោននៅខែមិថុនា ។ នេះដោយសារតែមានការព្រួយបារម្ភអំពីការចាកចេញរបស់អង់គ្លេសពីសហភាពអឺរ៉ុប ដែលវាបានប៉ះពាល់ដល់ទីផ្សារមូលធន និងជំរុញឱ្យវិនិយោគិនងាកមកវិនិយោគលើមាសវិញ ។
ការភ័យខ្លាចទាំងនេះបានលេចឡើងនៅពេលដែលប្រទេសអង់គ្លេសបានបោះឆ្នោតចាកចេញពីសហភាពអឺរ៉ុប កាលពីថ្ងៃទី២៣ មិថុនា កន្លងមក ដែលធ្វើឲ្យមានការតក់ស្លុតតាមរយៈទីផ្សារហិរញ្ញវត្ថុ និងបង្កឱ្យមានការកើនឡើងនៃតម្លៃមាសភ្លាមៗ ។
លោក Win Myint បានបន្តទៀតថា ប្រសិនបើតម្លៃមាសលើទីផ្សារពិភពលោកនៅតែខ្ពស់ មាសរបស់ប្រទេសមីយ៉ាន់ម៉ា ក៏ទំនងជាមិនធ្លាក់ចុះពីកំណត់ត្រាថ្មីរបស់ខ្លួនដែរ ។
លោក Tin Tun បានឱ្យដឹងថា ការធ្លាក់ចុះនៅផ្នែកផ្សេងទៀតនៃសេដ្ឋកិច្ចរបស់មីយ៉ាន់ម៉ា ដូចជាអចលនទ្រព្យ ក៏បានជំរុញឱ្យអ្នកវិនិយោគក្នុងស្រុកបែរទៅរកការវិនិយោគលើមាសដូចគ្នា ៕
