អគ្គនាយកដ្ឋានលទ្ធកម្មសាធារណៈ

02/10/2026

ថ្ងៃសុក្រ ៦រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែតុលា ឆ្នាំ២០២៦ វេលាម៉ោង ០៩និង០០នាទីព្រឹក ឯកឧត្ដម ង៉ាន់ ភិរម្យ អគ្គនាយក នៃអគ្គនាយកដ្ឋានលទ្ធកម្មសាធារណៈ បានដឹកនាំកិច្ចប្រជុំប្រចាំខែ របស់អគ្គនាយកដ្ឋានលទ្ធកម្មសាធារណៈ កិច្ចប្រជុំនេះមានការចូលរួមពី ឯកឧត្តមអគ្គនាយករង លោក លោកស្រីប្រធាន អនុប្រធាននាយកដ្ឋាន ប្រធាន អនុប្រធានការិយាល័យ មន្ត្រី នៃអគ្គនាយកដ្ឋានលទ្ធកម្មសាធារណៈ ដើម្បីពិនិត្យនិងពិភាក្សាអំពី៖
១. របាយការណ៍នៃការអនុវត្តផែនការសកម្មភាពកែទម្រង់ក្រុមការងារទាំងបួន
២-របាយការណ៍នៃការអនុវត្តការងារប្រចាំខែសីហា និងខែកញ្ញា ឆ្នាំ២០២៦និងទិសដៅសម្រាប់អនុវត្តការងារក្នុងខែតុលា ឆ្នាំ២០២៦ របស់នាយកដ្ឋាននីមួយៗ និង
៣-បញ្ហាផ្សេងៗ។
នៅសាលប្រជុំធំ អគារ ឃ ទីស្ដីការក្រសួងសេដ្ឋកិច្ច និងហិរញ្ញវត្ថុ។

07/08/2026

ថ្ងៃសុក្រ ៩រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៧ ខែសីហា ឆ្នាំ២០២៦ វេលាម៉ោង ០៩និង០០នាទីព្រឹក ឯកឧត្ដម ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ បានដឹកនាំកិច្ចប្រជុំប្រចាំខែ ដែលមានការចូលរួមពីថ្នាក់ដឹកនាំ ទីប្រឹក្សា និងមន្ត្រីរាជការនៃអគ្គនាយកដ្ឋានលទ្ធកម្មសាធារណៈទាំងអស់ ដើម្បីពិនិត្យនិងពិភាក្សាអំពី៖
១-របាយការណ៍នៃការអនុវត្តផែនការសកម្មភាពកែទម្រង់របស់ក្រុមការងារទាំងបី
២-របាយការណ៍នៃការអនុវត្តការងារប្រចាំខែឧសភា ខែមិថុនា និងខែកក្កដា ឆ្នាំ២០២៦ និងទិសដៅសម្រាប់អនុវត្តការងារក្នុងខែសីហា ឆ្នាំ២០២៦ របស់នាយកដ្ឋាននីមួយៗ និង
៣-បញ្ហាផ្សេងៗ
នៅបន្ទប់ប្រជុំធំ អគារ គ ជាន់ផ្ទាល់ដី ទីស្ដីការក្រសួងសេដ្ឋកិច្ច និងហិរញ្ញវត្ថុ។

31/07/2026

នាព្រឹកថ្ងៃទី៣១ ខែកក្កដា ឆ្នាំ២០២៦
អគ្គនាយកដ្ឋានលទ្ធកម្មសាធារណៈនៃក្រសួងសេដ្ឋកិច្ច និងហិរញ្ញវត្ថុ បានរៀបចំសិក្ខាសាលា ស្តីពីការផ្សព្វផ្សាយយុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈបច្ចុប្បន្នកម្ម ឆ្នាំ២០២៥-២០២៨ និងលិខិតបទដ្ឋានគតិយុត្តពាក់ព័ន្ធនឹងលទ្ធកម្មសាធារណៈ ជូនគ្រប់ស្ថាប័នអនុវត្តលទ្ធកម្ម។

សិក្ខាសាលានេះដឹកនាំដោយឯកឧត្តមបណ្ឌិត ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាតំណាងដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និង ឯកឧត្តម ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ ដោយមានការអញ្ជើញចូលរួមពីតំណាងគណៈកម្មាធិការលទ្ធកម្ម, ប្រធានអង្គភាពលទ្ធកម្ម, និងតំណាងអង្គភាពថវិកាអាណាប័កផ្ទេរសិទ្ធិពេញលេញថ្នាក់កណ្តាល នៃក្រសួង ស្ថាប័ន, សហគ្រាសសាធារណៈនិងគ្រឹះស្ថានសាធារណៈរដ្ឋបាល, និងអង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ ដែលចូលរួមផ្ទាល់នៅសណ្ឋាគារ សុខា ភ្នំពេញ សរុបប្រមាណ ៣១០នាក់ និងរដ្ឋបាលរាជធានី ខេត្ត, រដ្ឋបាលក្រុង ស្រុក ខណ្ឌ, និងតាមបណ្តាមន្ទីរជំនាញរាជធានី ខេត្តចូលរួមតាមប្រព័ន្ធអនឡាញ ដោយប្រើប្រាស់កម្មវិធី Zoom សរុបប្រមាណ ៩៨៥នាក់។

គោលបំណងនៃការរៀបចំសិក្ខាសាលានាថ្ងៃនេះ គឺដើម្បីផ្សព្វផ្សាយយុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈបច្ចុប្បន្នកម្ម ឆ្នាំ២០២៥-២០២៨ និងលិខិតបទដ្ឋានគតិយុត្តពាក់ព័ន្ធនឹងលទ្ធកម្មសាធារណៈចំនួន ២ រួមមាន៖ ១. ប្រកាសលេខ ១៧៨ សហវ.ប្រក.អលសា ចុះថ្ងៃទី១១ ខែមីនា ឆ្នាំ២០២៦ ស្តីពីការផ្តល់កម្រិតទឹកប្រាក់សិទ្ធិ សម្រេចលទ្ធកម្មសាធារណៈ ជូនអង្គភាពថវិកាអាណាប័កផ្ទេរសិទ្ធិពេញលេញរដ្ឋបាលថ្នាក់ជាតិ, និង ២. ប្រកាសលេខ ៣៩៣ សហវ.ប្រក.អលសា ចុះថ្ងៃទី១ ខែមិថុនា ឆ្នាំ២០២៦ ស្តីពីផែនការលទ្ធកម្ម។

10/07/2026

ថ្ងៃសុក្រ ១១រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែកក្កដា ឆ្នាំ២០២៦ វេលាម៉ោង ០៩:០០ ព្រឹក ឯកឧត្តម ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ បានដឹកនាំសហការី ចូលរួមប្រជុំឆ្លងរបាយការណ៍សវនកម្មផ្ទៃក្នុងជាមួយថ្នាក់ដឹកនាំអគ្គនាយកដ្ឋានសវនកម្មផ្ទៃក្នុងដែលដឹកនាំដោយលោកជំទាវ ង៉ែត ម៉ូវីឡែន អគ្គនាយកនៃអគ្គនាយកដ្ឋានសវនកម្មផ្ទៃក្នុង នៅបន្ទប់ប្រជុំធំ របស់អគ្គនាយកដ្ឋានសវនកម្មផ្ទៃក្នុង អគារ ច ទីស្ដីការក្រសួងសេដ្ឋកិច្ច និងហិរញ្ញវត្ថុ។

07/04/2026

ព្រឹកថ្ងៃទី៧​ ខែមេសា​ ឆ្នាំ២០២៦​ ឯកឧត្តម​ ង៉ាន់​ ភិរម្យ​ អគ្គនាយកនៃអគ្គនាយកដ្ឋានលទ្ធកម្មសាធារណៈ​ បានចូលរួមពិធី "ប្រកាសដាក់ឱ្យអនុវត្តជាផ្លូវការនូវគម្រោងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) ជំហានទី៤ ឆ្នាំ ២០២៦-២០៣០" ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ នៅសណ្ឋាគាររ៉េស៊ីដង់សុខាភ្នំពេញ។

28/03/2026

27/03/2026

នាព្រឹកថ្ងៃសុក្រ ៩កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៧ ខែមីនា ឆ្នាំ២០២៦ អគ្គនាយកដ្ឋានលទ្ធកម្មសាធារណៈនៃក្រសួងសេដ្ឋកិច្ចនិងហិរញ្ញវត្ថុបានរៀបចំសិក្ខាសាលាស្តីពីការផ្សព្វផ្សាយប្រកាសលេខ ៩៨៦ សហវ.ប្រក ចុះថ្ងៃទី៣០ ខែធ្នូ ឆ្នាំ២០២៤ ស្តីពីលទ្ធកម្មតាមរយៈការផ្តល់ប្រព្រឹត្តិកម្មអនុគ្រោះជូនអ្នកដេញថ្លៃ សហគ្រាសធុនមីក្រូ (សិប្បកម្ម) តូច និងមធ្យម និងអ្នកពាក់ព័ន្ធ។ សិក្ខាសាលានេះដឹកនាំដោយ ឯកឧត្តម ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈនៃក្រសួងសេដ្ឋកិច្ចនិងហិរញ្ញវត្ថុ តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។
សិក្ខាសាលានេះមានការអញ្ជើញចូលរួមពីថ្នាក់ដឹកនាំនិងមន្ត្រីជំនាញនៃអគ្គនាយកដ្ឋានលទ្ធកម្មសាធារណៈ និងឧកញ៉ា លោក លោកស្រី អ្នកនាង កញ្ញា ប្រធាន/តំណាងក្រុមហ៊ុន សហគ្រាស និងសហគ្រាសធុនមីក្រូ (សិប្បកម្ម) តូច និងមធ្យម ដែលមានការចូលរួមផ្ទាល់នៅទីស្តីការក្រសួងសេដ្ឋកិច្ចនិងហិរញ្ញវត្ថុ និងចូលរួមតាមប្រព័ន្ធអនឡាញ ដោយប្រើប្រាស់កម្មវិធី Zoom សរុបប្រមាណ ២០៩នាក់។

គោលបំណងនៃការរៀបចំសិក្ខាសាលានាថ្ងៃនេះគឺដើម្បីផ្សព្វផ្សាយប្រកាសលេខ ៩៨៦ សហវ.ប្រក ចុះថ្ងៃទី៣០ ខែធ្នូ ឆ្នាំ២០២៤ ស្ដីពីលទ្ធកម្មតាមរយៈការផ្តល់ប្រព្រឹត្តិកម្មអនុគ្រោះ ដែលបានផ្សព្វផ្សាយដាក់ឱ្យប្រើប្រាស់លើកដំបូងកាលពីថ្ងៃទី២៦ ខែសីហា ឆ្នាំ២០២៥កន្លងទៅ ដោយមានការចូលរួមពីគ្រប់ក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល រដ្ឋបាលរាជធានីខេត្ត មន្ទីរជំនាញរាជធានីខេត្ត និងដៃគូអភិវឌ្ឍន៍។ ឯកឧត្តមអគ្គនាយកក៏បានជម្រាបជូនផងដែរថាប្រកាសនេះបានរៀបចំឡើងក្រោមគំនិតផ្តួចផ្តើមដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងគោលបំណងដើម្បីគាំទ្រដល់ការអភិវឌ្ឍនិងពង្រីកវិស័យឧស្សាហកម្មក្នុងប្រទេសកម្ពុជា ដោយលើកទឹកចិត្តដល់ផលិតផលក្នុងស្រុក និង/ឬក្រុមហ៊ុន សហគ្រាស ឬរូបវន្តបុគ្គលក្នុងស្រុក ជាពិសេសលើកស្ទួយសហគ្រាសធុនមីក្រូ តូច និងមធ្យមឱ្យចូលរួមក្នុងលទ្ធកម្មសាធារណៈ ដើម្បីរួមចំណែកដល់ការបង្កើតការងារដល់ប្រជាពលរដ្ឋ, ការជំរុញភាពច្នៃប្រឌិតនិងនវានុវត្តន៍, ការលើកកម្ពស់ផលិតភាព, ការកាត់បន្ថយការធ្វើចំណាកស្រុក, ពង្រឹងស្មារតីជាតិនិយមនិងជំរុញចរន្តសេដ្ឋកិច្ចជាតិ, បង្កើតទីផ្សារពាណិជ្ជកម្មក្នុងស្រុក, កាត់បន្ថយការពឹងផ្អែកលើផលិតផលបរទេស, ការបង្កើនសមត្ថភាពប្រកួតប្រជែងក្នុងទីផ្សារ, និងការអភិវឌ្ឍវិស័យឯកជនស្របតាមរបៀបវារៈគោលនយោបាយនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

18/03/2026

នៅថ្ងៃអង្គារ និងថ្ងៃពុធ ១៤-១៥រោច ខែផល្គុន ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី១៧-១៨ ខែមីនា ឆ្នាំ២០២៦ នៅអគារអគ្គនាយកដ្ឋានពន្ធដារ (GDT Tower) ឯកឧត្ដម ង៉ាន់ ភិរម្យ អគ្គនាយក នៃអគ្គនាយកដ្ឋានលទ្ធកម្មសាធារណៈ អមដោយ ឯកឧត្ដមអគ្គនាយករង និងមន្រ្តីជំនាញ បានចូលរួមកិច្ចប្រជុំត្រួតពិនិត្យការងារប្រចាំឆ្នាំ២០២៥ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ «គណនេយ្យភាពសមិទ្ធកម្ម» ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការ ដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ។

08/03/2026

របៀបសរសេរកាលបរិច្ឆេទចន្ទគតិ និងសុរិយគតិ នៅក្នុងលិខិតបទដ្ឋានគតិយុត្ត និងលិខិតរដ្ឋបាល ឱ្យបានត្រឹមត្រូវ៖
👉លិខិតគតិយុត្ត៖ ត្រូវសរសេរកាលបរិច្ឆេទនៅផ្នែក«បញ្ចប់នៃលិខិត»
👉លិខិតរដ្ឋបាល ឬឯកសារផ្សេងទៀត៖ ត្រូវសរសេរកាលបរិច្ឆេទនៅផ្នែក «ក្បាលលិខិត»
👉គ្មានលេខ ០ (សូន្យ) ពីមុខទេ​ ថ្ងៃទី១, ទី២, ទី៣, …
👉 លិខិតទំនាក់ទំនងជាមួយបរទេស៖ ត្រូវប្រើតែកាលបរិច្ឆេទតាមសុរិយគតិប៉ុណ្ណោះ។

06/03/2026

តាំងនាមថ្នាក់ដឹកនាំ និងមន្ត្រីរាជការនៃអគ្គនាយកដ្ឋានលទ្ធកម្មសាធារណៈ ក្រសួងសេដ្ឋកិច្ចនិងហិរញ្ញវត្ថុ និងក្នុងនាមខ្លួនខ្ញុំផ្ទាល់ យើងខ្ញុំសូមសម្ដែងនូវសេចក្តីសោមនស្សរីករាយយ៉ាងក្រៃលែង និងសូមចូលរួមអបអរសាទរដោយស្មោះអស់ពីដួងចិត្ត ជូនចំពោះ សម្តេចសេដ្ឋវិទូភក្តី ក្នុងឱកាសដែលត្រូវបាន ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រោសព្រះរាជទាននូវគោរមងារជា សម្ដេចសេដ្ឋវិទូភក្តី គាត ឈន់ នាថ្ងៃទី៣ មីនា ឆ្នាំ២០២៦។ ការទទួលបានគោរមងារដ៏ឧត្តុងឧត្តមនាពេលនេះ គឺជាសក្ខីភាពដ៏ពិសិដ្ឋដែលឆ្លុះបញ្ចាំងនូវទេពកោសល្យ ស្នាដៃ ដ៏ឆ្នើមបំផុតរបស់ សម្តេចសេដ្ឋវិទូភក្តី ក្នុងបេសកកម្មបម្រើជាតិមាតុភូមិ និងប្រជាជនកម្ពុជា ជាពិសេសក្នុងវិស័យសេដ្ឋកិច្ចនិងហិរញ្ញវត្ថុជាតិ។ សូម សម្តេចសេដ្ឋវិទូភក្តី ទទួលនូវគារវកិច្ចដ៏ស្មោះស្ម័គ្រអស់ពីដួងចិត្តពីយើងខ្ញុំទាំងអស់គ្នា