Cambodia Microfinance Association

04/10/2026

កម្មវិធីសិក្ខាសាលាដ៏មានសារៈសំខាន់នេះ គឺជាផ្នែកមួយនៃកិច្ចខិតខំប្រឹងប្រែងរបស់សមាគមក្នុងការចូលរួម កសាងធនធានមនុស្សសម្រាប់វិស័យមីក្រូហិរញ្ញវត្ថុតាមរយៈការតភ្ជាប់រវាងគ្រឹះស្ថានអប់រំ និងអ្នកជំនាញក្នុងវិស័យ សំដៅពង្រឹងការត្រៀមខ្លួនរបស់យុវជនកម្ពុជាសម្រាប់ទីផ្សារការងារ ព្រមទាំងបង្កើតមូលដ្ឋានសម្រាប់ការអភិវឌ្ឍធនធានមនុស្ស និងវិស័យប្រកបដោយចីរភាព៕

អានបន្ត៖ 👇

ចំណេះដឹង ជំនាញ និងផ្នត់គំនិត គឺជាមូលដ្ឋានសំខាន់សម្រាប់ការរីកចម្រើនរបស់យុវជន។ ក្រៅពីការយល់ដឹងអំពីការចាត.....

03/10/2026

ហេតុអ្វីអ្នកគួរកត់ត្រាចំណូល និងចំណាយឱ្យបានត្រឹមត្រូវ?

02/10/2026

លោកជំទាវ ឌិត នីតា អនុប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា អញ្ជើញចូលរួមជាវាគ្មិនកិត្តិយស និងថ្លែងសុន្ទរកថាបិទសិក្ខាសាលាស្តីពី «ការពង្រឹងអភិបាលកិច្ច និងឧត្តមភាពប្រតិបត្តិការ ក្នុងវិស័យធនាគារ និងហិរញ្ញវត្ថុ ដើម្បីភាពរីកចម្រើនដោយចីរភាព»
-----------——
លោកជំទាវ ឌិត នីតា អនុប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានអញ្ជើញចូលរួមជាវាគ្មិនកិត្តិយសក្នុង កិច្ចពិភាក្សាតុមូលស្តីពី «ការពង្រឹងគុណភាពឥណទាន និងការគ្រប់គ្រងឥណទានមិនដំណើរការប្រកបដោយទំនួលខុសត្រូវ» ដែលជាផ្នែកមួយនៃសិក្ខាសាលាសម្រាប់ថ្នាក់ដឹកនាំតំបន់ និងសាខា ស្តីពី «ការពង្រឹងអភិបាលកិច្ច និងឧត្តមភាពប្រតិបត្តិការ ក្នុងវិស័យធនាគារ និងហិរញ្ញវត្ថុ ដើម្បីភាពរីកចម្រើនដោយចីរភាព» ដែលប្រព្រឹត្តទៅនៅថ្ងៃទី០១ ខែតុលា ឆ្នាំ២០២៦។

កិច្ចពិភាក្សាតុមូលនេះមានគោលបំណងចែករំលែកចំណេះដឹង និងឧត្តមានុវត្តពាក់ព័ន្ធនឹងការពង្រឹងគុណភាពឥណទាន ការកំណត់ហានិភ័យ ការគ្រប់គ្រង និងការដោះស្រាយបញ្ហាឥណទាន ជាពិសេសការពង្រឹងការដោះស្រាយបញ្ហាបណ្តឹងរបស់អតិថិជនប្រកបដោយប្រសិទ្ធភាព តម្លាភាព និងទាន់ពេលវេលា។ កិច្ចពិភាក្សានេះក៏បានផ្តោតលើវិធានការជាក់ស្តែងមួយចំនួនដែលថ្នាក់ដឹកនាំតំបន់ និងសាខាអាចយកទៅអនុវត្តក្នុងប្រតិបត្តិការប្រចាំថ្ងៃ ដើម្បីជំរុញដល់ការផ្តល់ឥណទានប្រកបដោយទំនួលខុសត្រូវ និងកាត់បន្ថយហានិភ័យនៃឥណទានមិនដំណើរការ (NPL)។ កិច្ចពិភាក្សានេះមានការអញ្ជើញចូលរួមពីតំណាង សមាគមធនាគារនៅកម្ពុជា និងមជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ (FCPC) ផងដែរ។

ទន្ទឹមនឹងនេះ លោកជំទាវអនុប្រធានក្រុមប្រឹក្សាភិបាល ក៏បានអញ្ជើញថ្លែងសុន្ទរកថាបិទសិក្ខាសាលា ដោយបានគូសបញ្ជាក់ថា «ការរីកចម្រើនប្រកបដោយចីរភាព ជាជម្រើសល្អជាងការរីកចម្រើនដែលផ្តោតតែលើប្រាក់ចំណេញក្នុងរយៈពេលខ្លី»។ លោកជំទាវក៏បានលើកឡើងពីសារៈសំខាន់នៃការបន្តពង្រឹងកិច្ចការពារអតិថិជន ចំណេះដឹងហិរញ្ញវត្ថុ ក្រមប្រតិបត្តិការ ក្រមសីលធម៌ និងវិជ្ជាជីវៈ ព្រមទាំងការផ្តល់ឥណទានប្រកបដោយទំនួលខុសត្រូវ។

គួររំលឹកដែរថា សិក្ខាសាលានេះគឺជាវេទិកាដ៏មានសារៈសំខាន់សម្រាប់ថ្នាក់ដឹកនាំតំបន់ និងសាខា ក្នុងការពង្រឹងចំណេះដឹង និងសមត្ថភាពគ្រប់គ្រងប្រតិបត្តិការរបស់គ្រឹះស្ថាន តាមរយៈការរៀនសូត្រពីបទពិសោធជាក់ស្តែង ការពិភាក្សាលើបញ្ហាប្រឈម ព្រមទាំងឈ្វេងយល់អំពីវិធានការនានាដែលគ្រឹះស្ថានគួរអនុវត្តនៅក្នុងប្រតិបត្តិការរបស់ខ្លួន។ តាមរយៈការសហការរវាងសមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជា ដោយមានការគាំទ្រពីធនាគារជាតិនៃកម្ពុជា សិក្ខាសាលានេះ បានចូលរួមចំណែកយ៉ាងសំខាន់ក្នុងការពង្រឹងការអនុវត្តនៅក្នុងវិស័យធនគារ និងហិរញ្ញវត្ថុប្រកបដោយទំនួលខុសត្រូវ និងការអភិវឌ្ឍប្រកបដោយចីរភាព និងបរិយាបន្ន៕

02/10/2026

📣 សេចក្ដីថ្លែងការណ៍ ស្ដីពី ការបដិសេធចំពោះការផ្សព្វផ្សាយព័ត៌មានចចាមអារ៉ាម និងព័ត៌មានដែលគ្មានប្រភពច្បាស់លាស់តាមបណ្តាញសង្គម

01/10/2026

សមាគមមីក្រូហិរញ្ញវត្ថុកម្ពុជា រៀបចំសិក្ខាសាលាសម្រាប់ថ្នាក់ដឹកនាំតំបន់ និងសាខា ស្តីពីការពង្រឹងអភិបាលកិច្ច និងឧត្តមភាពប្រតិបត្តិការ
-----------——
សមាគមមីក្រូហិរញ្ញវត្ថុកម្ពុជា (CMA) និងសមាគមធនាគារនៅកម្ពុជា បានសហការរៀបចំសិក្ខាសាលាសម្រាប់ថ្នាក់ដឹកនាំប្រចាំតំបន់ និងសាខា ស្តីពី «ការពង្រឹងអភិបាលកិច្ច និងឧត្តមភាពប្រតិបត្តិការ ក្នុងវិស័យធនាគារ និងហិរញ្ញវត្ថុ ដើម្បីភាពរីកចម្រើនដោយចីរភាព» នៅថ្ងៃទី០១ ខែតុលា ឆ្នាំ២០២៦ ក្រោមការគាំទ្ររបស់ធនាគារជាតិនៃកម្ពុជា។

ថ្លែងក្នុងឱកាសបើកសិក្ខាសាលាដ៏មានសារៈសំខាន់នោះ លោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានសម្តែងការស្វាគមន៍ និងលើកឡើងពីសារៈសំខាន់នៃការពង្រឹងសមត្ថភាពថ្នាក់ដឹកនាំតំបន់ និងសាខា ដើម្បីឆ្លើយតបទៅនឹងការវិវត្ត និងបញ្ហាប្រឈមរបស់វិស័យធនាគារ និងហិរញ្ញវត្ថុ។ លោកបានគូសបញ្ជាក់ថា ភាពជោគជ័យរបស់គ្រឹះស្ថាន មិនគួរត្រូវបានវាស់វែងតាមរយៈកំណើនឥណទាន ឬប្រាក់ចំណេញប៉ុណ្ណោះទេ ប៉ុន្តែត្រូវផ្តោតលើគុណភាពនៃការគ្រប់គ្រង ការអនុលោមតាមបទប្បញ្ញត្តិ ការការពារអតិថិជន ការគ្រប់គ្រងហានិភ័យ និងការកសាងទំនុកចិត្តរយៈពេលវែងជាមួយសាធារណជន។ ជាមួយគ្នានេះ លោកក៏បានលើកឡើងពីតួនាទីដ៏សំខាន់របស់ថ្នាក់ដឹកនាំតំបន់ និងសាខា ក្នុងការដឹកនាំប្រតិបត្តិការនៅជួរមុខ និងជាអ្នកតំណាងឱ្យវប្បធម៌ តម្លៃ និងកេរ្តិ៍ឈ្មោះរបស់គ្រឹះស្ថាននៅក្នុងសហគមន៍។

សិក្ខាសាលាលើកទី៦ នេះគឺជាវេទិកាដ៏មានសារៈសំខាន់ ដែលប្រមូលផ្តុំថ្នាក់ដឹកនាំ និងអ្នកជំនាញពាក់ព័ន្ធនៅក្នុងវិស័យធនាគារ និងហិរញ្ញវត្ថុ ដើម្បីចែករំលែកចំណេះដឹង និងបទពិសោធន៍លើប្រធានបទសំខាន់ៗ រួមមាន បច្ចុប្បន្នភាពនៃវិស័យធនាគារ និងហិរញ្ញវត្ថុ គោលការណ៍អភិបាលកិច្ចល្អ គតិយុត្ត និងក្របខណ្ឌពាក់ព័ន្ធនឹងគ្រឹះស្ថានធនាគារ និងមីក្រូហិរញ្ញវត្ថុ។ មិនត្រឹមតែប៉ុណ្ណោះ សិក្ខាសាលានេះក៏នឹងចូលរួមចែករំលែកចំណេះដឹងពាក់ព័ន្ធនឹងការពង្រឹងគុណភាពឥណទាន ការគ្រប់គ្រងឥណទានមិនដំណើរការ ក៏ដូចជាការគ្រប់គ្រងសាខា និងការដោះស្រាយវិវាទរវាងអតិថិជន និងគ្រឹះស្ថានហិរញ្ញវត្ថុ ប្រកបដោយប្រសិទ្ធភាព តម្លាភាព និងទំនួលខុសត្រូវ។

គួរបញ្ជាក់ដែរថា ពិធីបើកសិក្ខាសាលានេះ ប្រព្រឹត្តទៅក្រោមអធិបតីភាព លោកបណ្ឌិត ឡាយ សុខហេង ឧបការីទេសាភិបាល និងជាអគ្គនាយកបទប្បញ្ញត្តិ និងបរិយាបន្នហិរញ្ញវត្ថុ នៃធនាគារជាតិនៃកម្ពុជា លោក សុខ វឿន ប្រធានក្រុមប្រឹក្សាភិបាល នៃសមាគមមីក្រូហិរញ្ញវត្ថុកម្ពុជា លោក តូច ចៅចេក អនុប្រធាននៃសមាគមធនាគារនៅកម្ពុជា ព្រមទាំងមានការអញ្ជើញចូលរួមពី តំណាងធនាគារជាតិនៃកម្ពុជា សមាគមធនាគារនៅកម្ពុជា ក្រុមហ៊ុនក្រេឌីត ប្យួរ៉ូ ខេមបូឌា (ស៊ីប៊ីស៊ី) មជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ ព្រមទាំងថ្នាក់ដឹកនាំតំបន់ និងសាខា នៃគ្រឹះស្ថានហិរញ្ញវត្ថុ និងភាគីពាក់ព័ន្ធជាច្រើនរូបផងដែរ៕

30/09/2026

ការប្រើប្រាស់បច្ចេកវិទ្យា AI Deep fake ក្នុងការឆបោកតាមអនឡាញ | ដោយ លោក សៅ សីហា ជា អ្នកផលិតមាតិការ និងស្រាវជ្រាវបច្ចេកវិទ្យា

បច្ចេកវិទ្យា AI Deepfake កាន់តែទំនើប កាន់តែបង្កើតរូបភាព វីដេអូ និងសំឡេងដូចមនុស្សពិតខ្លាំង។ ភាពទំនើប និងងាយស្រួលប្រើ បានធ្វើឱ្យបច្ចេកវិទ្យានេះ ក្លាយជាឧបករណ៍មួយ សម្រាប់ជនទុចរិតប្រើ ដើម្បីវាយប្រហារ ឬឆបោកអ្នកដទៃ។

30/09/2026

សមាគមមីក្រូហិរញ្ញវត្ថុកម្ពុជា រៀបចំកិច្ចប្រជុំក្លឹបគ្រឹះស្ថានឥណទានជនបទ
-----------——
សមាគមមីក្រូហិរញ្ញវត្ថុកម្ពុជា (CMA) បានរៀបចំកិច្ចប្រជុំក្លឹបគ្រឹះស្ថានឥណទានជនបទ (RCI Club) ប្រចាំខែកញ្ញា ឆ្នាំ២០២៦ នាព្រឹកថ្ងៃទី២៩ ខែកញ្ញា ឆ្នាំ២០២៦ នៅការិយាល័យគ្រឹះស្ថានមីក្រូហិរញ្ញវត្ថុ មហានគរ ម.ក ដោយមានការអញ្ជើញចូលរួមពី លោក ឌី ស៊ីថា ប្រធានក្លឹបគ្រឹះស្ថានឥណទានជនបទ និងជាសមាជិកក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា សមាជិកក្លឹប តំណាងសមាគមមីក្រូហិរញ្ញវត្ថុកម្ពុជា និងវាគ្មិនកិត្តិយស សរុបចំនួន ៣៥ រូប។

កិច្ចប្រជុំនេះមានគោលបំណង ពិភាក្សា និងផ្លាស់ប្តូរបទពិសោធលើបច្ចុប្បន្នភាព និងការវិវត្តនានាពាក់ព័ន្ធនឹងគ្រឹះស្ថានឥណទានជនបទ និងវិស័យហិរញ្ញវត្ថុនៅកម្ពុជា ពង្រឹងកិច្ចសហការជាមួយដៃគូពាក់ព័ន្ធ ដើម្បីគាំទ្រដល់ប្រតិបត្តិការ និងការអភិវឌ្ឍរបស់សមាជិកក្លឹប។

ក្នុងឱកាសនោះ ក៏មានការធ្វើបទបង្ហាញអំពីផលិតផល និងសេវាកម្មរបស់ធនាគារ វីង និងផលិតផល និងសេវាកម្មសវនកម្មរបស់ ក្រុមហ៊ុន Cam Accounting and Tax Service ព្រមទាំងពិភាក្សាអំពីផែនការសកម្មភាពរបស់ក្លឹប។ ជាមួយគ្នានេះ សមាជិកក៏បានពិភាក្សាអំពីការរៀបចំសិក្ខាសាលាប្រចាំឆ្នាំ ២០២៦ របស់ក្លឹបគ្រឹះស្ថានឥណទានជនបទផងដែរ។

តាមរយៈកិច្ចប្រជុំ និងការផ្លាស់ប្តូរបទពិសោធជាប្រចាំ ក្លឹបគ្រឹះស្ថានឥណទានជនបទ បន្តដើរតួនាទីជាវេទិកាដ៏សំខាន់សម្រាប់សមាជិកក្នុងការចែករំលែកចំណេះដឹង បទពិសោធ និងព័ត៌មានពាក់ព័ន្ធនឹងវិស័យ ព្រមទាំងពង្រឹងកិច្ចសហប្រតិបត្តិការ និងការគាំទ្រគ្នាទៅវិញទៅមក សំដៅលើកកម្ពស់សមត្ថភាព និងនិរន្តរភាពរបស់គ្រឹះស្ថានឥណទានជនបទនៅកម្ពុជា។

សមាគមមីក្រូហិរញ្ញវត្ថុកម្ពុជា សូមថ្លែងអំណរគុណដល់គ្រឹះស្ថានមីក្រូហិរញ្ញវត្ថុ មហានគរ ម.ក ដែលបានផ្តល់ទីតាំងរៀបចំកិច្ចប្រជុំ ព្រមទាំងធនាគារ វីង ក្រុមហ៊ុន Cam Accounting and Tax Service សមាជិកក្លឹប តំណាងសមាគមមីក្រូហិរញ្ញវត្ថុកម្ពុជា និងវាគ្មិនកិត្តិយសទាំងអស់ ដែលបានចូលរួមចែករំលែកចំណេះដឹង បទពិសោធន៍ និងទស្សនៈដ៏មានតម្លៃ ដើម្បីរួមចំណែកដល់ការពង្រឹងវិស័យឥណទានជនបទនៅកម្ពុជា៕

29/09/2026

សមាគមមីក្រូហិរញ្ញវត្ថុកម្ពុជា ជំរុញចំណេះដឹងហិរញ្ញវត្ថុ និងការត្រៀមខ្លួនសម្រាប់អាជីពរបស់យុវជនកម្ពុជា
-----------——
នាថ្ងៃទី២៨ ខែកញ្ញា ឆ្នាំ២០២៦ សមាគមមីក្រូហិរញ្ញវត្ថុកម្ពុជា (CMA) សហការជាមួយ សាកលវិទ្យាល័យជាតិមានជ័យ រៀបចំសិក្ខាសាលាស្តីពី «ចំណេះដឹងផ្នែកហិរញ្ញវត្ថុ និងការត្រៀមខ្លួនរបស់យុវជនក្នុងអាជីពវិជ្ជាជីវៈនៃវិស័យមីក្រូហិរញ្ញវត្ថុ» ដោយមានការចូលរួមពី លោក ឌី ស៊ីថា សមាជិកក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លោក ង៉ោ ច័ន្ទនរៈ សាកលវិទ្យាធិការរង នៃសាកលវិទ្យាល័យជាតិមានជ័យ លោក ឈន វឌ្ឍនៈ អគ្គលេខាធិការសមាគមមីក្រូហិរញ្ញវត្ថុកម្ពុជា ព្រមទាំងថ្នាក់ដឹកនាំ សាស្ត្រាចារ្យ និងសិស្ស-និស្សិតជាច្រើននាក់។

សិក្ខាសាលានេះមានគោលបំណងលើកកម្ពស់ចំណេះដឹងផ្នែកហិរញ្ញវត្ថុ និងបញ្ជ្រាបការយល់ដឹងអំពីវិស័យធនាគារ និងហិរញ្ញវត្ថុ ជាពិសេសវិស័យមីក្រូហិរញ្ញវត្ថុ និងការចូលរួមចំណែករបស់វិស័យក្នុងការអភិវឌ្ឍសេដ្ឋកិច្ច និងសង្គម។ សិក្ខាសាលានេះក៏ជាវេទិកាចែករំលែកចំណេះដឹង និងបទពិសោធន៍ល្អៗពាក់ព័ន្ធនឹងឱកាសការងារ និងការត្រៀមខ្លួនសម្រាប់អាជីពក្នុងវិស័យមីក្រូហិរញ្ញវត្ថុដល់សិស្ស-និស្សិតនៃសាកលវិទ្យាល័យជាតិមានជ័យ។

ក្នុងនោះ លោក ឈន វឌ្ឍនៈ អគ្គលេខាធិការ សមាគមមីក្រូហិរញ្ញវត្ថុកម្ពុជា បានធ្វើបទបង្ហាញអំពីតួនាទីរបស់សមាគម ទិដ្ឋភាពទូទៅនៃវិស័យមីក្រូហិរញ្ញវត្ថុកម្ពុជា និងការចូលរួមចំណែករបស់វិស័យក្នុងការអភិវឌ្ឍសេដ្ឋកិច្ច ព្រមទាំងតម្រូវការ និងឱកាសការងារក្នុងវិស័យមីក្រូហិរញ្ញវត្ថុ។ ចំណែកលោក ឌី ស៊ីថា បានចែករំលែកចំណេះដឹងស្តីពីការកំណត់គោលដៅហិរញ្ញវត្ថុ ការរៀបចំថវិកា ការបង្កើតទម្លាប់សន្សំ ការលើកកម្ពស់ការប្រើប្រាស់ប្រាក់រៀល និងការប្រើប្រាស់សេវាហិរញ្ញវត្ថុឌីជីថលប្រកបដោយសុវត្ថិភាព។

គួររំលឹកដែរថា ការលើកកម្ពស់ចំណេះដឹងផ្នែកហិរញ្ញវត្ថុ គឺជាអាទិភាពការងារដ៏សំខាន់របស់សមាគម និងវិស័យ ក្នុងការរួមចំណែកលើកកម្ពស់បរិយាបន្នហិរញ្ញវត្ថុ និងការអភិវឌ្ឍវិស័យប្រកបដោយចីរភាព។ សមាគមមីក្រូហិរញ្ញវត្ថុកម្ពុជា នឹងបន្តពង្រឹង និងពង្រីកការអប់រំចំណេះដឹងផ្នែកហិរញ្ញវត្ថុ ព្រមទាំងការយល់ដឹងអំពីវិស័យ ជាពិសេសក្នុងចំណោមយុវជន តាមរយៈការបន្តសហការជាមួយគ្រឹះស្ថានអប់រំ សមាជិក និងដៃគូពាក់ព័ន្ធ ដើម្បីរួមចំណែកកសាងធនធានមនុស្សប្រកបដោយចំណេះដឹង ជំនាញ និងសមត្ថភាព និងគាំទ្រដល់ការរីកចម្រើនរបស់វិស័យហិរញ្ញវត្ថុនៅកម្ពុជាប្រកបដោយចីរភាព៕

28/09/2026

ការប្រើប្រាស់ឥណទានដោយមានផែនការច្បាស់លាស់ និងការគ្រប់គ្រងហិរញ្ញវត្ថុបានត្រឹមត្រូវ អាចក្លាយជាកម្លាំងជំរុញសម្រាប់ការពង្រីកមុខរបរ និងកសាងជីវភាពគ្រួសារឱ្យកាន់តែប្រសើរ។

ក្នុងវីដេអូនេះ លោក ក្រិត សាវ៉ាន់ កសិករ ជនជាតិដើមភាគតិច​ព្រៅ នៅខេត្តរតគិរី នឹងចែករំលែកអំពីវិធីសាស្ត្រក្នុងការប្រើប្រាស់ឥណទានឱ្យចំគោលដៅដើម្បីពង្រីកមុខរបររបស់លោក។ សូមទស្សនាការចែករំលែករបស់លោក ដូចតទៅ!

27/09/2026

សមាគមមីក្រូហិរញ្ញវត្ថុកម្ពុជា បន្តរួមចំណែកកសាងធនធានមនុស្ស និងពង្រឹងចំណេះដឹងហិរញ្ញវត្ថុសម្រាប់យុវជនកម្ពុជា
-----------——
នាថ្ងៃទី២៧ ខែកញ្ញា ឆ្នាំ២០២៦ សមាគមមីក្រូហិរញ្ញវត្ថុកម្ពុជា (CMA) សហការជាមួយ សាកលវិទ្យាល័យអន្តរជាតិ ឌូវី រៀបចំកម្មវិធីសិក្ខាសាលាស្តីពី «ចំណេះដឹងផ្នែកហិរញ្ញវត្ថុ និងការត្រៀមខ្លួនរបស់យុវជនក្នុងអាជីពវិជ្ជាជីវៈនៃវិស័យមីក្រូហិរញ្ញវត្ថុ» ដោយមានការចូលរួមពី លោក ឌី ស៊ីថា សមាជិកក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លោក ភន ម៉ុច សាកលវិទ្យាធិការរងនៃសាកលវិទ្យាល័យអន្តរជាតិ ឌូវី លោក ឈន វឌ្ឍនៈ អគ្គលេខាធិការសមាគមមីក្រូហិរញ្ញវត្ថុកម្ពុជា ព្រមទាំងថ្នាក់ដឹកនាំ សាស្ត្រាចារ្យ និងសិស្ស-និស្សិតនៃសាកលវិទ្យាល័យអន្តរជាតិ ឌូវី ជាច្រើននាក់។

សិក្ខាសាលានេះមានគោលបំណងលើកកម្ពស់ចំណេះដឹងផ្នែកហិរញ្ញវត្ថុ និងបញ្ជ្រាបការយល់ដឹងអំពីធនាគារនិងហិរញ្ញវត្ថុជាពិសេសវិស័យមីក្រូហិរញ្ញវត្ថុក្នុងការអភិវឌ្ឍសេដ្ឋកិច្ច និងសង្គម។ សិក្ខាសាលាដដែលនេះក៏ជាវេទិការចែករំលែកនូវចំណេះដឹងព្រមទាំងពិសោធល្អៗពាក់ព័ន្ធនឹងឱកាសការងារក្នុងវិស័យមីក្រូហិរញ្ញវត្ថុដល់សិស្ស-និស្សិតនៃសាកលវិទ្យាល័យអន្តរជាតិ ឌូវី។

ទន្ទឹមនឹងនេះ លោក ឈន វឌ្ឍនៈ អគ្គលេខាធិការ សមាគមមីក្រូហិរញ្ញវត្ថុកម្ពុជា បានធ្វើបទបង្ហាញអំពីតួនាទីរបស់សមាគម ទិដ្ឋភាពទូទៅនៃវិស័យមីក្រូហិរញ្ញវត្ថុកម្ពុជា និងការចូលរួមចំណែករបស់វិស័យក្នុងការអភិវឌ្ឍសេដ្ឋកិច្ច ព្រមទាំងតម្រូវការ និងឱកាសការងារក្នុងវិស័យមីក្រូហិរញ្ញវត្ថុ។ ខណៈ លោក ឌី ស៊ីថា បានចែករំលែកចំណេះដឹងស្តីពីការកំណត់គោលដៅហិរញ្ញវត្ថុ ការរៀបចំថវិកា ការបង្កើតទម្លាប់សន្សំ ការលើកកម្ពស់ការប្រើប្រាស់ប្រាក់រៀល និងការប្រើប្រាស់សេវាហិរញ្ញវត្ថុឌីជីថលប្រកបដោយសុវត្ថិភាព។

តាមរយៈការបន្តសហការជាមួយគ្រឹះស្ថានអប់រំ សមាជិក និងដៃគូពាក់ព័ន្ធ សមាគមបន្តប្តេជ្ញាចិត្តចូលរួមលើកកម្ពស់ចំណេះដឹងផ្នែកហិរញ្ញវត្ថុ ការប្រើប្រាស់សេវាហិរញ្ញវត្ថុប្រកបដោយការទទួលខុសត្រូវ និងការត្រៀមខ្លួនសម្រាប់អាជីពដល់យុវជនកម្ពុជា សំដៅរួមចំណែកកសាងធនធានមនុស្សដែលមានសមត្ថភាព និងគាំទ្រដល់ការរីកចម្រើនប្រកបដោយចីរភាពរបស់វិស័យហិរញ្ញវត្ថុនៅកម្ពុជា។