Navy Tailor

11/02/2021

03/09/2020

ការយល់ឃើញថា រដ្ឋាភិបាលកម្ពុជា បានងាកទៅរកចិនជាខ្នងបង្អែក ដើម្បីគេចពីនឹមគ្រប់គ្រងរបស់វៀតណាម គឺជារឿងដែលគ្រោះថ្នាក់បំផុត។ ប្រទេសកម្ពុជា មានកិច្ចព្រមព្រៀងទីក្រុងប៉ារីស មានប្រជាជន មានគំនិតជាតិនិយមចំនួនច្រើន បើរដ្ឋាភិបាលកម្ពុជា ពិតជាចង់គេចពីនឹមគ្រប់គ្រងរបស់វៀតណាម មែន គឺមិនពិបាកទាល់តែសោះ។ នៅក្នុងបញ្ហាព្រំដែន ប្រទេសកម្ពុជា ធ្លាប់យកកិច្ចព្រមព្រៀងទីក្រុងប៉ារីស ប្ដឹងពីការឈ្លានពានរបស់ប្រទេសថៃ កាលពីឆ្នាំ២០០៨ បានជោគជ័យ ហេតុអ្វីក៏មិនយកកិច្ចព្រមព្រៀងទីក្រុងប៉ារីស ទៅប្ដឹងដោះស្រាយជាមួយខាងភាគីវៀតណាមផងដែរទៅ? បញ្ហាជនអន្តោប្រវេសន៍ខុសច្បាប់រស់នៅក្នុងប្រទេសកម្ពុជា និងបញ្ហាជាច្រើនទៀតនៅក្នុងប្រទេសកម្ពុជា សុទ្ធតែអាចយកកិច្ចព្រមព្រៀងទីក្រុងប៉ារីស ទៅដោះស្រាយបាន ហេតុអ្វីរដ្ឋាភិបាលកម្ពុជា មិនព្រមយកមកប្រើការ? បញ្ហាការពង្វក់ប្រជាពលរដ្ឋ អត់ឱ្យខ្វល់ពីបញ្ហានយោបាយ ដោយការដាក់សម្ពាធផ្សេងៗ និងការព្យាយាមបិទប្រព័ន្ធផ្សព្វផ្សាយជាច្រើន ដែលនិយាយពាក់ព័ន្ធបញ្ហាប្រវត្តិសាស្ត្រ បញ្ហានយោបាយបច្ចុប្បន្នភាព បើរដ្ឋាភិបាលកម្ពុជា ពិតជាចង់គេចចេញពីនឹមគ្រប់គ្រងវៀតណាមមែន ហេតុអ្វីក៏មិនជួយសម្រួលឲ្យប្រជាពលរដ្ឋ ឲ្យពួកគាត់មានចំណេះដឹងទូទៅ នឹងមានឱកាសចូលរួមនយោបាយទាំងអស់គ្នា?? ទាំងអស់នេះសុទ្ធតែជាកលល្បិចរបស់វៀតណាម ដើម្បីឲ្យអន្តរជាតិនិងប្រជាជនខ្មែរចំនួនធំ យល់ឃើញថា កម្ពុជាកំពុងតែងាកទៅរកចិន ជាខ្នងបង្អែក ដើម្បីគេចពីនឹមគ្រប់គ្រងរបស់វៀតណាម ហើយកលល្បិចមួយនេះ ពិតជាបានផលរបស់វៀតណាមមែន គឺអន្តរជាតិនិងប្រជាជនកម្ពុជា មួយចំនួនធំ បានគិតបែបហ្នឹង។

ក្នុងពេលបច្ចុប្បន្ននេះ កងទ័ពរបស់ចិន បានឈរជើងនៅក្នុងទឹកដីប្រទេសកម្ពុជា ចុះបើសិនជា មានបញ្ហានៅសមុទ្រចិនខាងត្បូង តើប្រទេសខ្មែរនឹងក្លាយទៅជាយ៉ាងណា? សូមបងប្អូនពិចារណាដោយខ្លួនឯងចុះ ព្រោះខ្ញុំបានសរសេរចំនួនពីរសំណេរកន្លងមកហើយ។ ក្នុងបញ្ហាសមុទ្រចិនខាងត្បូង ប្រទេសចិន គឺបានគ្រប់គ្រងដែនសមុទ្រនិងកោះមួយចំនួនរួចជាស្រេច ទោះជាមានរឿងអ្វីកើតឡើង ក៏ចិនបានចំណេញរួចជាស្រេច។ ចំណែកអាមេរិកវិញ លោកដូណាត្រាំ ដើម្បីការពារតំណែងរបស់ខ្លួន ជាប្រធានាធិបតីអាមេរិក បន្ត ក៏បានបង្កើតរឿងជាច្រើននៅសមុទ្រចិនខាងត្បូងដូចគ្នា ដើម្បីគាំពារប្រជាប្រិយភាពរបស់ខ្លួននៅទឹកដីប្រទេសអាមេរិក នៅក្នុងនោះក៏បានបែរមុខព្រួញសេដ្ឋកិច្ច យកក្រុមហ៊ុនយក្សបច្ចេកវិទ្យាទូរស័ព្ទចំនួន២ ដកចេញពីប្រទេសវៀតណាម ងាកទៅរកឥណ្ឌាដើម្បីការពារសេដ្ឋកិច្ចផងដែរ ទាំងនេះនេះសុទ្ធតែអាមេរិច មានផលចំណេញរួចស្រេចនៅក្នុងនោះ។ រីឯខាងប្រទេសវៀតណាមវិញ ព្រោះតែចង់ឲ្យសង្គ្រាមសមុទ្រចិនខាងត្បូង ផ្ទះឡើង បានធ្វើជាអ្នកចេញមុខជាងគេ នៅក្នុងបញ្ហាជម្លោះដែនសមុទ្រនោះ និងបង្កហេតុជាច្រើនតាមព្រំដែនគោកនិងព្រំដែនទឹក រវាងប្រទេសកម្ពុជានិងប្រទេសវៀតណាមថែមទៀត បើសិនជាមានបញ្ហាជម្លោះនៅដែនសមុទ្រចិនខាងត្បូងកើតឡើង ប្រទេសកម្ពុជា ប្រាកដជាវៀតណាម អាចចូលឈ្លានពានដោយស្របច្បាប់អន្តរជាតិ ក្នុងលេសថា ការការពារប្រជាជនខ្លួន ព្រោះមានអន្តរជាតិជាច្រើន ក៏បានទទួលស្គាល់ថា ប្រទេសកម្ពុជា ពិតជាងាកទៅរកចិន ជាខ្នងបង្អែកពិតមែន (នេះហើយជារឿងគ្រោះថ្នាក់បំផុត កាលពីមុន ប្រទេសកម្ពុជា មានកិច្ចព្រមព្រៀងទីក្រុងប៉ារីស ដូច្នេះខាងភាគីវៀតណាម មិនអាចចូលឈ្លានពានកម្ពុជា ដោយចំមុខបានឡើយ តែបើសិនជាមានជម្លោះនៅដែនទឹកសមុទ្រចិនខាងត្បូង ប្រាកដជាគេហៅថាសង្រ្គាមលោកលើកទី៣ ហើយប្រទេសខ្មែរមានហានិភ័យជាងគេ ដោយសារមានវត្តមានកងទ័ពចិន នៅក្នុងប្រទេសកម្ពុជា ហើយជាទីកន្លែងដែលចិនត្រូវចល័តទ័ព ដឹកស្បៀងនិងបង្កសង្គ្រាមផ្សេងៗ។)

ចុះបើសិនជាគ្មានសង្រ្គាមនៅសមុទ្រចិនខាងត្បូងកើតឡើងទេ ដោយសារអ្នកដែលជាប់ឆ្នោតជាប្រធានាធិបតីថ្មី របស់អាមេរិក គឺខាងគណបក្សប្រជាធិបតេយ្យ នយោបាយអន្តរជាតិ និងបញ្ហាសមុទ្រចិនខាងត្បូងមានការប្រែប្រួល តើវៀតណាមអាចចំណេញអ្វីខ្លះ? ចម្លើយគឺងាយយល់ទេ គឺចំណេញសន្ធិសញ្ញាព្រំដែនគោកថ្មី ឥលូវគេសម្រេចប្រើប្រាស់រួមគ្នា នូវផែនទីថ្មី ហៅថា ផែនទីព្រំដែន ខ្នាត ១/២៥ ០០០។ ផែនទីខ្នាត ១/២៥ ០០០ គឺជាផែនទីស្តីពីព្រំដែន កម្ពុជា.វៀតណាម។ មានន័យថា គេស៊ីលើសមុនទៀត តាំងពីខ្នាត១/១០០០០០ ចុះមកដល់ខ្នាត១/៥០០០០ ឥលូវចុះមកដល់ ផែនទីខ្នាត ១/២៥ ០០០ (កន្លែងនេះខ្ញុំគ្រាន់តែចង់បញ្ជាក់ប្រាប់បងប្អូនថា គេចំណេញច្រើនណាស់ តែខ្ញុំមិនហ៊ានសរសេរពន្យល់លម្អិតនោះទេ ដោយសារខ្លាចមានប៉ះពាល់ដល់សុវត្ថិភាពផ្ទាល់ខ្លួន របស់ខ្ញុំដែរ) និងការបោះតង់តាំងពីលក្ខណៈធម្មតា រហូតដល់សាងសង់ជាលក្ខណៈរឹងមាំ ប្រៀបបាននឹងបន្ទាយកងទ័ពវៀតណាម នៅតាមព្រំដែន ហើយការសាងសង់នៅត្រង់ចំណុចព្រំដែនទាំងនោះ គឺសុទ្ធតែជាកន្លែងហាមឃាត់ មិនឲ្យភាគីណាមួយ បោះតង់ឬធ្វើអ្វីឡើយ តែភាគីវៀតណាមវិញ នៅតែបំពានគឺឈ្លានពានដោយចំមុខតែម្ដង (បងប្អូនស្វែងយល់ដោយខ្លួនឯងចុះ) ចំណែកផែនការ ការរៀបចំរបស់វៀតណាម កន្លងមក មកលើកម្ពុជា គឺនៅតែដំណើរការដដែល ដូចជាសមាគមន៍វៀតណាមកម្ពុជា ការសាងសង់ស្តូបមិត្តភាពកម្ពុជាវៀតណាម ការផ្ដល់សញ្ជាតិដោយខុសច្បាប់ ឲ្យទៅជនអន្តោប្រវេសន៍ខុសច្បាប់វៀតណាម និងបញ្ហាជាច្រើនទៀតសឹងតែរាប់មិនអស់ គឺវៀតណាម នៅតែគ្រប់គ្រងបានដដែល មានតែប្រទេសកម្ពុជា ទេ ដែលរង់ចាំតែខាតបង់និងប្រឈមគ្រោះថ្នាក់ជាងគេ។ សុំបញ្ចប់សំណេរសិន ចាំបន្តសំណេរក្រោយៗទៀត....

03/09/2020

កាលពី៤១ឆ្នាំមុន សង្គ្រាមរយ:ពេលខ្លី រវាងចិននិងយួន ដែលគេឲ្យឈ្មោះថា ជាសង្គ្រាមឥណ្ឌូចិន លើកទី៣ បានផ្ទុះឡើងនៅថ្ងៃទី១៧ ខែកុម្ភៈ ឆ្នាំ១៩៧៩។ នៅក្នុងសង្រ្គាមមួយនោះ កងទ័ពចិនបានវាយសម្រុកក្នុងល្បឿនយ៉ាងលឿន ដូចជាផ្លេកបន្ទោរ ចូលតាមព្រំដែនខាងជើងនៃប្រទេសយួន ហើយ​បានកាន់កាប់ទីក្រុងមួយចំនួននៅជិតព្រំដែន គឺវាយដល់ត្រឹមរបងទីក្រុងហាណូយ។ ដោយសារកាលនោះ ចិនបានខឹងនឹងយួន ដែលមានការគាំទ្រដោយសហភាពសូវៀត បានវាយចូលឈ្លានពានក្នុងទឹកដីខ្មែរ នៅដើមឆ្នាំ១៩៧៩ ( ឡេឌឹកអាញ បានដឹកនាំកងទ័ពយួនរាប់ម៉ឺននាក់ វ៉ៃចូលឈ្លានពានស្រុកខ្មែរនៅចុងឆ្នាំ១៩៧៨ ត្រឹមតែរយៈពេលប៉ុន្មានសប្ដាហ៍តែប៉ុណ្ណោះ អាចគ្រប់គ្រងស្រុកខ្មែរស្ទើរតែទាំងស្រុង)។ នៅថ្ងៃទី៦ ខែមីនា ឆ្នាំ១៩៧៩ ប្រទេសចិនបានប្រកាសថា ខ្លួនបានវាយដល់​ទ្វារ​ចូលរដ្ឋធានីហាណូយ ហើយចាត់ទុកថាជោគជ័យ ហើយក៏សម្រេចបញ្ចប់បេសកកម្ម ដោយបានដកទ័ពចេញពីទឹកដីយួនវិញ។ ការវាយត្រឹមរបងក្រុងហាណូយ ត្រូវបានចិនចាត់ទុកគ្រាន់តែជាការផ្តល់​មេរៀនដល់យួនប៉ុណ្ណោះ។ តែតាមការពិត កងទ័ពចិនមិនអាចវាយសម្រុកទៅមុខបានទៀត ដោយសារការនោះមេបញ្ជាការកងទ័ពយួនឈ្មោះ វ៉ូ ង្វៀងយ៉ាប់ និង ង្វៀង ជា សុទ្ធតែជាមេបញ្ជាការកងទ័ពកំពូលរបស់យួន (យួនហៅថា២នាក់នោះថា ជាស្ដេចសង្គ្រាម) បានលើកកងទ័ពទៅផ្ទាល់ដើម្បីវាយទប់ទល់ បើសិនជាពេលនោះ ចិនមិនប្រកាសដកកងទ័ពទាន់ពេលនោះទេ ប្រហែលជាកងទ័ពរបស់ចិនទាំងអស់ មិនអាចមានជីវិតត្រឡប់ទៅស្រុកចិនវិញបានឡើយ។

ទោះបីជាកាលនោះ ចិនបានដកកងទ័ពត្រឡប់ទៅស្រុកចិនវិញក៏ដោយ ក៏ប៉ុន្តែនៅស្រុកខ្មែរសង្គ្រាមនៅតែបន្ត លោកប៉ុល ពត បានបង្កើតកងទ័ពព្រៃថ្មីបន្ថែម បានជាង៣ម៉ឺននាក់ ហើយនាំគ្នាឈរជើងនៅតាមព្រំដែនខ្មែរថៃ និងខេត្តដទៃទៀត ដើម្បីចាំទប់ទល់នឹងកងទ័ពយួន។ មុនដំបូងកងទ័ពខ្មែរក្រហម ហាក់បីដូចជាមិនសូវមានឥទ្ធិពលឡើយ ដោយសារការខ្វះខាតមានសម្ភារៈសឹក ស្បៀង និងប្រជាជនស្ម័គ្រចិត្តចូលបម្រើកងទ័ព តែក្រោយមកទៀត ប្រទេសចិន អាមេរិច ថៃនិងប្រទេសដទៃទៀតនៅក្នុងអាស៊ាន បានចូលរួមគ្នាផ្ដល់ជំនួយចជាច្រើនដល់កងទ័ពខ្មែរក្រហម ធ្វើឲ្យកងទ័ពខ្មែរក្រហមហាក់បីដូចជាមានឥទ្ធិពលខ្លាំងឡើងវិញ (បើកងទ័ពខ្មែរក្រហមចាញ់ នោះនៅក្នុងអាស៊ានទាំងមូល ប្រាកដជាគ្មានសុវត្ថិភាពឡើយ ព្រោះគោលបំណងយួន ចង់ឈ្លានពានទឹកដីប្រទេសនៅក្នុងអាស៊ាន តាមតែអាចធ្វើបាននៅក្នុងពេលនោះ)។

សង្គ្រាមរវាងកងទ័ពខ្មែរក្រហមនិងកងទ័ពយួន នៅក្នុងទឹកដីខ្មែរបានអូសបន្លាយរយៈពេលជិត១០ឆ្នាំ នៅតែមិនអាចបែងចែកអ្នកឈ្នះនិងអ្នកចាញ់បាន ក៏ប៉ុន្តែគេអាចសន្និដ្ឋានលើការស្លាប់របស់កងទ័ពទាំងសងខាង កងទ័ពយួនត្រូវស្លាប់មិនក្រោមពី១៥ម៉ឺននាក់នៅក្នុងដីខ្មែរ ចំណែកឯកងទ័ពខ្មែរក្រហម បានពលីការពារទប់ទល់ ស្លាប់មិនដល់ជាង៣ម៉ឺននាក់នោះទេ ក្នុងពេលនោះ ទើបគេអាចសន្និដ្ឋានថា កងទ័ពខ្មែរក្រហមមានប្រៀបជាងកងទ័ពយួន។ យួនបានសម្រេចដកកងទ័ពចេញពីស្រុកខ្មែរ នៅក្នុងឆ្នាំ១៩៨៨ ដោយសារមូលហេតុបីយ៉ាង: ទីមួយ. ដោយសារសហភាពសូវៀត ដែលជាខ្នងបង្អែករបស់ខ្លួនបានចុះខ្សោយឥទ្ធិពល ព្រោះមានការកៀបសង្កត់ពីសហរដ្ឋអាមេរិក នៅបណ្ដាលប្រទេសដទៃទៀត ដែលជាសម្ព័ន្ធមិត្តរបស់អាមេរិក បានគៀបសង្កត់ ទាំងផ្នែកយោធា សេដ្ឋកិច្ច និងនយោបាយ សភាពសូវៀតនៅពេលនោះបានចុះខ្សោយជាលំដាប់។ ទីពីរ. ដោយសារឥទ្ធិពលរបស់កងទ័ពខ្មែរក្រហម ហាក់បីដូចជាមានឥទ្ធិពលខ្លាំងជាងកងទ័ពយួន និងបានវាយយកខេត្តមួយចំនួនទៀតពីយួនថែមទៀត។ ទីបី. ដោយសារយួនបានរៀបចំផែនការថ្មី គឺខ្ចីដៃសម្ដេចសីហនុ លោកតាសឺនសាន ទោះប្រទេសខ្មែរបានសន្ធិសញ្ញាទីក្រុងប៉ារីស ក៏ដោយ ក៏ស្ថិតនៅក្រោមឥទ្ធិពលរបស់យួន ជាក់ស្ដែងដូចយួនបានរៀបចំផែនការនៅក្នុងចន្លោះឆ្នាំ១៩៩៤ និងឆ្នាំ១៩៩៧ ជាដើម សុទ្ធតែជាការរៀបចំទុកជាមុន មុនពេលយួនដកកងទ័ពត្រឡប់ទៅស្រុកវិញ។ ចប់.

02/09/2020

នៅចុងឆ្នាំ១៩៧៦ដល់ឆ្នាំ១៩៧៧ ជម្លោះនៅតាមព្រំដែន រវាងកម្ពុជានិងវៀតណាម ដោយសារកងទ័ពវៀតណាម មួយកងពលធំ ទទួលបញ្ជាពីបក្សកុម្មុយនិស្តវៀតណាម បានចូលឈ្លានទឹកដីកម្ពុជា រហូតដល់ក្នុងខេត្តតាកែវ។ មូលហេតុដែលវៀតណាម ឈ្លានពានកម្ពុជា ព្រោះ របបកម្ពុជាប្រជាធិបតេយ្យ របស់លោក ប៉ុល ពត មិនព្រមឲ្យខាងភាគីវៀតណាម មកជីកប្រឡាយថ្មីនៅតាមព្រំដែន និងមិនឲ្យវៀតណាម យកទង់ជាតិវៀតណាម ទៅដោតតាមព្រំដែន ដែលជាទីកន្លែងជម្លោះ។ ពួកកងទ័ពខ្មែរក្រហម នៅអត់ទ្រាំមិនបាននឹងទង្វើឈ្លានពានរបស់វៀតណាម ក៏នាំគ្នាទៅដកទង់ជាតិវៀតណាម ដែលដោតទាំងនោះ ចោលទាំងអស់។ នៅក្នុងពេលនោះ ខាងភាគីវៀតណាម បានខឹងសម្បាយ៉ាងខ្លាំង ក៏លើកទ័ពវៀតណាម ចំនួនរាប់ម៉ឺននាក់ វ៉ៃចូលប្រទេសកម្ពុជា នៅក្នុងពេលនោះ។ នៅក្នុងឆ្នាំ១៩៧៧ កងទ័ពវៀតណាម បានវាយចូលឈ្លានពានប្រទេសកម្ពុជា ចំនួន២ច្រក ទី១. តាមច្រកនារតី និង ទី២. តាមច្រកបូព៌ា។ កងទ័ពខ្មែរក្រហមខាងភូមិភាគនារតី ដឹកនាំដោយ តាម៉ុក បាននាំគ្នាវ៉ៃទប់ទល់និងកងទ័ពវៀតណាម បានជោគជ័យ ហើយបានជំលៀស ដកកងទ័ពចេញពីភូមិភាគនារតី ចំនួនរាប់ពាន់នាក់ ដើម្បីទៅជួយវ៉ៃទប់ទល់ នៅភូមិភាគបូព៌ាបន្ត រហូតដល់ទប់ទល់ជាប់ និងទទួលបានជោគជ័យដូចគ្នា (កងទ័ពវៀតណាម បានវ៉ៃចូលប្រទេសកម្ពុជា តាមភូមិភាគបូព៌ា នៅសល់ចម្ងាយតែ២០គីឡូម៉ែត្រទៀតតែប៉ុណ្ណោះ គឺដល់ទីក្រុងភ្នំពេញ ក្នុងវត្ថុបំណងរបស់វៀតណាម នៅក្នុងពេលនោះ គឺចង់វាយយកគ្រប់គ្រងប្រទេសកម្ពុជា តែម្ដង តែត្រូវបរាជ័យទៅវិញ)។ ក្រោយពីវ៉ៃទប់ទល់ជាប់ ពីការឈ្លានពានរបស់ភាគីកងទ័ពវៀតណាម លោក ប៉ុល ពត បានខឹងសម្បារយ៉ាងខ្លាំង ក៏សម្រេចចិត្តលើកកងទ័ពខ្មែរក្រហមរាប់ម៉ឺននាក់ វាយចូលប្រទេសវៀតណាមវិញ ចាប់ទុកជាការឆ្លើយតប។ នៅពេលកងទ័ពវៀតណាម វ៉ៃចូលឈ្លានពានប្រទេសកម្ពុជា គ្មានកាសែតឬសៀវភៅបរទេសណាមួយ សរសេរនិងនិយាយនោះទេ តែពេលកងទ័ពខ្មែរក្រហម វាយចូលប្រទេសវៀតណាម វិញ មានកាសែតនិងសៀវភៅជាច្រើនបានសរសេរនិងនិយាយផ្សព្វផ្សាយ។ ការលើកកងទ័ពខ្មែរក្រហម រាប់ម៉ឺននាក់ របស់លោក ប៉ុល ពត វាយចូលប្រទេសវៀតណាម ត្រូវបរាជ័យ ព្រោះអន្តរជាតិជាច្រើន បានថ្កោលទោស លោក ប៉ុល ពត ក៏សម្រេចចិត្តលើកកងទ័ពត្រឡប់មកប្រទេសកម្ពុជាវិញ។ ក្រោយពីពួកកងទ័ពវៀតណាម បានវាយចូលឈ្លានពានកម្ពុជា ត្រូវបរាជ័យនៅក្នុងឆ្នាំ១៩៧៧ បក្សកុម្មុយនីស្តវៀតណាម ក៏រៀបចំផែនការសារជាថ្មីម្ដងទៀត គឺខ្ចីដៃពួកបូព៌ា មួយចំនួនដែលនៅមានជីវិត រត់ទៅប្រទេសវៀតណាម ក្នុងឆ្នាំ១៩៧៧ បង្កើតជារណសិរ្ស២ធ្នូ (ការបង្កើតរណសិរ្ស២ធ្នូនោះ បក្សកុម្មុយនីស្តវៀតណាម បានរៀបចំតាំងពីខែមេសា ឆ្នាំ១៩៧៨ មកម៉្លេះ គឺត្រៀមរួចជាស្រេច ដើម្បីជាលេសវ៉ៃចូលឈ្លានពានប្រទេសកម្ពុជា នឹងទទួលជោគជ័យនៅក្នុងថ្ងៃទី០៧ ខែមករា ឆ្នាំ១៩៧៩ )។ សំណេរមួយនេះ គ្រាន់តែជាការសង្ខេបបែបខ្លីដើម្បីឱ្យបងប្អូនងាយយល់ ពីការឈ្លានពានរបស់វៀតណាម មកលើប្រទេសកម្ពុជា ក្នុងរបបកម្ពុជាប្រជាធិបតេយ្យ ប៉ុល ពត ព្រោះមួយរយៈចុងក្រោយនេះ ពេលដែលអាខោនហ្វេសប៊ុកខ្ញុំ ត្រូវគេមួយរយ:បិទ មានប្រព័ន្ធផ្សព្វផ្សាយតាមបណ្ដាញសង្គមជាច្រើន បានសរសេរតែរឿងរបបកម្ពុជាប្រជាធិបតេយ្យ របស់លោក ប៉ុល ពត បានចូលឈ្លានពានក្នុងទឹកដីវៀតណាម តែមិនបានសរសេរពីដើមហេតុដំបូង ពីខាងភាគីរឿងវៀតណាម បានឈ្លានពាននិងបង្កជម្លោះជាច្រើន តាមព្រំដែន កម្ពុជា.វៀតណាម នោះទេ។ កលល្បិច ការឈ្លានពានរបស់វៀតណាម នៅតាមព្រំដែន ក្នុងឆ្នាំ១៩៧៧ ក៏ស្រដៀងនឹង ការឈ្លានពាននិងបង្កជម្លោះរបស់វៀតណាម តាមព្រំដែន ដូចក្នុងពេលបច្ចុប្បន្ននេះផងដែរ ដែលវៀតណាម បានយកលេស ក្នុងបញ្ហាសមុទ្រចិនខាងត្បូង និង វិបត្តសេដ្ឋកិច្ច នយោបាយពិភពលោក ជាគោល ដើម្បីឈ្លានពានកម្ពុជា ដោយស្របច្បាប់អន្តរជាតិ ចាំសំណេរក្រោយ ខ្ញុំនឹងសរសេររៀបរាប់បន្ត។