25/12/2025
ការដកស្រង់ ផលវិបាកនៃសង្គ្រាម (វិបាក ស.)
ប្រាជ្ញាសកល និងមេរៀនជីវិតទូទៅ
(បសមជទ)
សម្រង់ ៦៧, ២០៣ និង២៦៨
វិបាក ស.១
សង្រ្គាមនាំឲ្យមានការបាត់បង់ជីវិតមនុស្ស សត្វ និងរុក្ខជាតិ តាមរយៈការសម្លាប់រង្គាល និងមរណៈភាពជាបន្តបន្ទាប់ ។
វិបាក ស.២
សង្រ្គាមនាំឲ្យមានការបំផ្លិចបំផ្លាញជីវិតមនុស្សរាប់មិនអស់ ទាំងយោធា និងប្រជាពលរដ្ឋស្លូតត្រង់ ។ ការកាប់សម្លាប់គ្នាជាបាបកម្មធ្ងន់ធ្ងរ ដែលរងទុក្ខវេទនាគ្មានទីបញ្ចប់ ។
វិបាក ស.៣
អំពើសាហាវយង់ឃ្នង និងការកាប់សម្លាប់ នាំមកនូវសេចក្ដីទុក្ខលំបាកវេទនាក្រៃលែង ការបាត់បង់ជីវិតមនុស្សសត្វ និងមានកម្មពៀរវេរាធ្ងន់ធ្ងរ ។
សម្រង់ ១៨២, ១១៦, ២០១ និង៤៤២
វិបាក ស.៤
សង្គ្រាមធ្វើឲ្យមានការស្អប់សួរពូជ ការជេរប្រទេចផ្ដាសា និងការសងសឹកគ្នាគ្មានទីបញ្ចប់ ។
វិបាក ស.៥
សង្គ្រាមមិនដែលបញ្ចប់ដោយការស្អប់ឡើយ វាបង្កើតឲ្យតែមានការសងសឹកវិលជុំ រវាងខ្មាំងសត្រូវនឹងគ្នា ។
វិបាក ស.៦
ការស្អប់ដែលកើតចេញពីជម្លោះប្រដាប់អាវុធ នាំឲ្យមានការសងសឹក និងធ្វើអំពើឃោរឃៅព្រៃផ្សៃដាក់គ្នា គ្មានទីបញ្ចប់ ។
សម្រង់ ៤៥៤, ៧២, ៤១៤ និង៤៦៥
វិបាក ស.៧
សង្រ្គាមបំផ្លិចបំផ្លាញផ្ទះសម្បែង ភូមិស្ថាន ទីក្រុង ប្រាង្គប្រាសាទ វត្តអារាម ទ្រព្យសម្បត្តិ ធនធានធម្មជាតិ បរិដ្ឋាន និងជីវភាពរស់នៅ ។
សម្រង់ ៥៤០ និង១២
វិបាក ស.៨
សង្រ្គាមធ្វើឲ្យរងទុក្ខសោកដល់ជនស្លូតត្រង់ ដែលគ្មានកំហុស ។
វិបាក ស.៩
មនុស្សស្លូតត្រង់ ទាំងកុមារ ទាំងមនុស្សចាស់ និងព្រះសង្ឃ ក៏ត្រូវរងទុក្ខលំបាកវេទនាផងដែរ ទុកជាមិនបានចូលក្នុងសមរភូមិក៏ដោយ ។
វិបាក ស.១០
ប្រជាពលរដ្ឋស្លូតត្រង់ នឹងរងទុក្ខវេទនាខ្លោចផ្សា ទុកជាមិនមានតួនាទីអ្វីក្នុងសង្គ្រាមក៏ដោយ ។
សម្រង់ ៥១ និង៥៣៣
វិបាក ស.១១
សង្រ្គាមធ្វើឲ្យធ្លាក់ចុះសីលធម៌សង្គម និងកាត់ផ្ដាច់មេត្តាធម៌ ។
វិបាក ស.១២
សង្រ្គាមបំផ្លាញគុណតម្លៃនៃសីល ដូចជា មេត្តា ខន្តី និងសេចក្តីសប្បុរស ។
វិបាក ស.១៣
សង្គ្រាមកាត់ផ្ដាច់សីល មេត្តា ខន្តី និងប្រាជ្ញា ។
សម្រង់ ២៧៦, ១ និង១២៧
វិបាក ស.១៤
សង្រ្គាមនាំឲ្យសេដ្ឋកិច្ចដួលរលំ និងនាំភាពក្រីក្រមកឲ្យ ។
វិបាក ស.១៥
សង្រ្គាមបំផ្លាញវិស័យកសិកម្ម ពាណិជ្ជកម្ម និងទ្រព្យសម្បត្តិ ហើយភាពក្រីក្រក៏ចាប់ផ្ដើមរីករាលដាលឡើង ។
សម្រង់ ៤០៧ និង៣៧១
វិបាក ស.១៦
សង្រ្គាមបង្កើតឲ្យមានកម្មពៀរវេរាក្នុងវដ្ដសង្សារវែងឆ្ងាយ ។
វិបាក ស.១៧
អំពើឃោរឃៅក្នុងសង្គ្រាមបង្កនូវកម្មពៀរធ្ងន់ធ្ងរ ដែលនាំទៅរកសេចក្តីទុក្ខវេទនានៅជាតិក្រោយ ។
សម្រង់ ៣៩ និង៥០
វិបាក ស.១៨
សង្រ្គាមបង្កឲ្យមានការភ័យខ្លាចជាប់រហូត អារម្មណ៍បាក់ស្បាត អសន្តិសុខសង្គម និងអស្ថិរភាពរយ:ពេលវែង ។
វិបាក ស.១៩
ការស្អប់មិនបញ្ចប់ដោយការស្អប់ តែបញ្ចប់ដោយការមិនស្អប់ ។
វិបាក ស.២០
ពៀរមិនរម្ងាប់ដោយការចងពៀរ តែរម្ងាប់ដោយការមិនចងពៀរ ។
#
