23/08/2015
نامەی سەربازێکی هەڵاتوو
ببوورە جەنابی فەرماندە
من کچێکم هەیە بە قەڵەم ڕەنگی بەرائەت نامەم بۆ دەنووسێ ژنێکم هەیە دارسێوی حەوشەکەمان ئاوڕشێن ناکا نەكا هێلانەی کوکوختییەکان تێکبچێ
جەنابی فەرماندە...
دوێنێ شەو لە خەونمدا دوژمن شکا ئێوە سەرگەرمی سەما بوون من لە گیرفانی تەرمێکدا نامەیەکم دۆزییەوە تیایدا نووسرابوو
بابە گیان دایكم دارسێوی حەوشەکەمان ئاوڕشێن ناکا دەڵێ با هێلانەی کوکوختییەکان تێك نەچێ
بەڵكو خوا لە پاداشتی ئەوەدا باوکتمان بۆ بپارێزێ
دەزانم بڕوا ناکەی جەنابی فەرماندە من لەترسی دوژمن هەڵنایەم من لەم تفەنگە خوێڕییەی دەستم تۆقیوم لە خۆم دەترسم ئەوکاتەی بۆ پاراستنی نیشتیمانێك ناچارم نیشتیمانێكی دی شەڵاڵی خوێن بکەم
ئەوکاتەی بۆ دیداری کچۆڵەیەك کەسێكی دی ناچار دەکەم تا ئەبەد چاوەڕێ بێت
تکایە جەنابی فەرماندە ئەم نامەیەم بنێرە بۆ فەرماندەی سوپای ئەوبەر بەڵكوئەویش کچێکی هەبێت ئەوینێکی هەبێت و چاوەڕێی بێت
سه ربازى ون....
