22/05/2026
डोंबिवली नागरी सहकारी बँकेच्या ७० व्या रुणवाल गार्डन्स शाखेचे भव्य उद्घाटन :
सहकार क्षेत्रातील अग्रणी बहुराज्यीय दर्जा असणाऱ्या डोंबिवली नागरी सहकारी बँकेच्या रूणवाल गार्डन्स सिटी, घारिवली येथील ७० व्या शाखेचे जाहीर उद्घाटन गुरुवार, दिनांक २१ मे रोजी रा. स्व. संघ, कल्याण जिल्हा संघचालक मा. श्री. नितीनजी शिंत्रे तसेच भारतीय इतिहास संकलन समिती, कोकण प्रांत सचिव, मा. श्री. चंद्रकांतजी जोशी यांच्या हस्ते करण्यात आले.
याप्रसंगी डोंबिवली बँकेचे माननीय अध्यक्ष ॲड श्री गणेश धारगळकर, माननीय उपाध्यक्षा सौ नंदिनी कुलकर्णी, माननीय संचालक श्री.मिलिंद आरोलकर तसेच श्री.योगेश चौधरी तथा बँकेचे व्यवस्थापकीय संचालक व मुख्य कार्यकारी अधिकारी श्री. विश्राम दीक्षित आणि इतर वरिष्ठ अधिकारी वर्ग उपस्थित होते.
यावेळी मनोगत व्यक्त करताना श्री. नितीनजी शिंत्रे यांनी डोंबिवली नागरी सहकारी बँकेचे आपण प्रारंभापासून ग्राहक असल्याचे आवर्जून सांगितले आणि बँकेच्या आजवर झालेल्या प्रगतीवर आनंद व्यक्त केला.
बँकेचे माननीय संचालक श्री.मिलिंद आरोलकर यांनी १९७० स्थापन झालेल्या बँकेच्या आजवरच्या वाटचालीत ७० वी शाखा सुरू होणे हा एक ऐतिहासिक टप्पा आहे असे नमूद केले. ग्राहकास अपेक्षित असणाऱ्या सर्व प्रकारच्या सेवा सुविधा डोंबिवली बँकेकडे असून परिसरातील ग्राहकांनी बँकेत आपले खाते उघडून त्याचा लाभ घ्यावा असे आवाहन त्यांनी केले. "अर्थाला विश्वास मिळे अन् विश्वासाला अर्थ मिळे" ही बँकेची नुसती टॅगलाईन नसून हा बँकेने इतकी वर्ष कमवलेला ग्राहकांचा विश्वास आहे हे त्यांनी उपस्थितांना सांगितले.
रुणवाल गार्डन्स शाखा व्यवस्थापिका सौ.प्रियंका बागवे यांनी परिसरातील ग्राहकांनी सुरवातीलाच दिलेल्या उत्स्फूर्त प्रतिसादाबद्दल त्यांचे आभार मानले आणि उत्कृष्ट बँकिंग सेवा देण्यासाठी शाखा चमू तयार असल्याचे सांगितले.
या दिवशी शाखेत गणेश पूजन केले गेले. उपस्थितांना प्रसाद आणि अल्पोपहाराचे वाटप करण्यात आले. उद्घाटनाला उपस्थित गणमान्य ग्राहक, कर्जदार आणि आस्थापना यांचा बँकेतर्फे पुष्पगुच आणि भेटवस्तू देऊन सन्मान करण्यात आला. गृहकर्जासाठी आवेदन केलेल्या काही ग्राहकांना *इन प्रिन्सिपल मंजुरीपत्र* देखील आजच्या दिवशी देण्यात आले.
या कार्यक्रमानंतर रुणवाल गार्डन्सच्या क्लब हाऊस मध्ये डोंबिवली नागरी सहकारी बँक आणि रुणवाल गार्डन्स यांच्या संयुक्त विद्यमाने आयोजिलेल्या शिवकालीन शस्त्र, नाणी आणि किल्ल्यांच्या प्रदर्शनाचे उद्घाटन करण्यात आले. दिनांक २२ आणि २३ मे हे दोन दिवस प्रदर्शन सर्व नागरिकांसाठी खुले राहील.
रुणवाल गार्डन्स आणि आसपासच्या परीसरातील अनेक नागरिकांनी यावेळी शाखेस भेट देऊन बँकेच्या विविध ठेव आणि कर्ज योजनांची माहिती घेतली तसेच डोंबिवली बँक आपल्या परिसरात आल्याबद्दल समाधान व्यक्त केले.
