10/07/2026
दि अकोला अर्बन बँकेची ६३ वी वार्षिक सर्वसाधारण सभा उत्साहात संपन्न
0 भागधारकांच्या खात्यात ६.७५ टक्के लाभांश जमा
0 गुजरात राज्यात कार्यक्षेत्र विस्तारासही मंजुरी
अकोला, प्रतिनिधी : महाराष्ट्रातील अग्रगण्य मल्टीस्टेट शेड्युल्ड बँक दि अकोला अर्बन को-ऑपरेटिव्ह बँक लि., अकोलाची ६३ वी वार्षिक सर्वसाधारण सभा शुक्रवार, दि. १० जुलै २०२६ रोजी कृषी उत्पन्न बाजार समिती, अकोला येथील गायवाडा शेतकरी भवन सभागृहात उत्साहपूर्ण वातावरणात पार पडली. सभेला मोठ्या संख्येने भागधारक उपस्थित होते. बँकेचे अध्यक्ष शंतनू जोशी यांच्या अध्यक्षतेखाली सभेच्या कामकाजास प्रारंभ झाला.
सभेच्या प्रारंभी अहवाल वर्षात दिवंगत झालेल्या देशातील राजकीय, सामाजिक, शैक्षणिक, वैज्ञानिक, साहित्यिक, सहकार व आर्थिक क्षेत्रातील मान्यवर तसेच बँकेचे सभासद, ग्राहक, ठेवीदार, हितचिंतक आणि कर्मचारी यांना भावपूर्ण श्रद्धांजली अर्पण करण्यात आली.
प्रास्ताविकात अध्यक्ष शंतनू जोशी यांनी उपस्थित भागधारकांचे स्वागत करत बँकेच्या प्रगतीचा सविस्तर आढावा मांडला. त्यांनी सांगितले की, दि. ३१ मार्च २०२६ अखेर बँकेचे वसूल भागभांडवल ७१.७३ कोटी रुपये, राखीव व इतर निधी २२४.९६ कोटी रुपये, एकूण ठेवी १,८९८.३१ कोटी रुपये, कर्जवाटप १,१२३.६४ कोटी रुपये असून निव्वळ नफा १४.१० कोटी रुपये इतका झाला आहे. बँकेचे निव्वळ एनपीए केवळ ०.६१ टक्के राहिले असून, आर्थिक शिस्त आणि सक्षम व्यवस्थापनाचे हे द्योतक असल्याचे त्यांनी नमूद केले.
२०२५-२६ या आर्थिक वर्षाचा ६.७५ टक्के लाभांश भागधारकांना वितरित करण्यास सुरुवात झाल्याची माहिती त्यांनी दिली. तसेच अहवाल वर्षात तीन नवीन शाखा सुरू करण्यात आल्या असून, संपूर्ण गुजरात राज्यात बँकेचे कार्यक्षेत्र विस्तारण्यासाठी रिझर्व्ह बँकेची मंजुरी प्राप्त झाल्याची महत्त्वपूर्ण माहितीही त्यांनी सभेस दिली.
बँकेच्या भक्कम आर्थिक स्थितीबद्दल सभेत समाधान व्यक्त करण्यात आले. या यशामागे भागधारक, ग्राहक, ठेवीदार, कर्मचारी आणि संचालक मंडळ यांचे मोलाचे सहकार्य असल्याचे सांगत, भविष्यातही असेच सहकार्य लाभेल, असा विश्वास अध्यक्षांनी व्यक्त केला.
यानंतर मुख्य कार्यकारी अधिकारी आर. एम. सोनटक्के यांनी दि. १८ जून २०२५ रोजी झालेल्या वार्षिक सर्वसाधारण सभेचे इतिवृत्त सभेसमोर सादर केले. त्यास सभेने एकमताने मंजुरी दिली. त्यानंतर विषयसूचीतील विविध विषय उपाध्यक्ष राहुल राठी तसेच संचालक केदार खपली, धनंजय पाटील, किरण खोत, शार्दुल दिगंबर आणि राहुल गोयनका यांनी सभेसमोर मांडले. सर्व विषयांना उपस्थित भागधारकांनी एकमताने मंजुरी दिली.
सभेचे सूत्रसंचालन संचालक दीपक मायी यांनी केले, तर आभार प्रदर्शन संचालक माधव बनकर यांनी केले. यावेळी संचालक अमरिकसिंग वासरीकर, प्रमोद शिंदे, अजय गांधी, मोहन अभ्यंकर, कैलाशनाथ मशानकर, संगीता गांधी, सीमा डिक्कर, बोर्ड ऑफ मॅनेजमेंटचे सदस्य भूषण काळे, सुभाष गोरे, प्रसाद देशपांडे, अतिरिक्त मुख्य कार्यकारी अधिकारी राधेश्याम चिराणिया, कर्मचारी प्रतिनिधी पंजाब अव्हाळे, वरिष्ठ अधिकारी व कर्मचारी मोठ्या संख्येने उपस्थित होते.
उत्साही, खेळीमेळीच्या आणि सकारात्मक वातावरणात बँकेची ६३ वी वार्षिक सर्वसाधारण सभा यशस्वीरीत्या संपन्न झाली.
