09/02/2024
打機與交易
一直覺得打機同交易有唔少共同點，無論係博弈思維、操作、策略、由初學者到高手再到頂尖既過程等等都有共通處。打打下機心血來潮就想打埋篇文，盡量用LOL英雄聯盟哩隻比較為人熟知既game黎做比喻，用博弈類遊戲比較會比較相似。
利申：少玩Lol主要玩魂系game。
打機係初學者階段首先要理解隻game點玩同獲勝條件等等（了解市場規則），然後就會開始嘗試唔同既新英雄、裝備、隊友配置等（試唔同市場、產品、炒法、資產配置等），而係game入面無最強既英雄，亦唔會有毫無作用既英雄，有d英雄講求反應要求速度連招、有d遠距離英雄講求距離感同預判、輔助英雄講求大局觀、坦克容錯率則較高，唔同性格既人會用唔同類型既英雄，正如無一個炒法適合任何人，唔同性格既人應選用適合自己既炒法而唔係盲跟。
而當你搵到一個自己鐘意既英雄（可能美股、crypto、forex)，就會開始刻意去圍繞一隻英雄鑽研玩法(選擇炒法），當你鑽研成功後就會由初學者去到中手既階段，依個階段靠努力同熟練係大部分人都做到，而天份就會影響到成長既速度同上限。
之後中級到高手階段，就要去了解裝備既配搭同細節（策略細節、加減注等），唔少人配裝都係上網跟人出裝而根本無好好去了解一件裝備（問number)，唔會清楚每件裝備既數值同應該咩情況下出咩裝，當然哩個方法可以快速幫助你達到中等水平，但會影響成長。每件裝備係唔同環境下應用都有唔同，所以要因應對手出裝而去改變，無一套裝備係可以適應任何情況（一個炒法唔會適合所有市況），如果對面已經出全魔防裝，咁你再死出魔攻裝效果就低得多（e.g.大牛市下，做空難度非常高），當然有可能贏，但就要求更高既技術操作水平（反向交易者）。
正如好多高手炒港股一樣贏到，但實力較差或經驗較少既人就應該先選擇比較簡單既市場去做，就等同打機揀難易度最簡單就可以忽略好多其他因素同較少訓練都贏得到。
當你成功理解各個英雄技能、相生相剋、每件裝備數值配搭同隊友配合等等，就會成為高手（穩定交易者）。
另外高手過招時，好多時都係平a或一個輕技試探（試倉），唔會一黎就一下大技（滿倉），除非好有把握或者風險回報比好高（有足夠機會一換二以上），平a階段亦係你了解對手pattern同習性既時機（市場pattern)，當機會來臨時，高手就會因應情況使出一連串連招、走位同操作（加減倉、更改止賺止蝕位、反手）。
如果要由高手到頂尖，僅僅靠努力就唔夠，天份、心態同運氣都缺一不可，假如faker唔係出身韓國、假如巴菲特唔係出身美國，我相信以佢地思維水平加上本身既天份同努力都可以有好高成就，但仲可唔可以成為世界第一就好難講。所以好多人窮其一生都只可以係高手階段止步。
但無論係交易又好，遊戲又好，大家都係係失敗中成長，就算到左頂尖階段，而每場比賽自己都發揮到最好，但都唔等於100%贏硬，仍然會有輸既可能，強如世界第一既faker勝率平均都係大約75%，當然佢對手都係頂尖水平，巴菲特亦有虧損既經驗，到哩個階段，心態會顯得更重要，心態亦係當大家技術相差不大時，區分高手同頂尖既其中一個重要指標。
重點：理解遊戲規則、了解遊戲細節、刻意及有目的既練習、培養好心態、盡量適應不同情況，其他順其自然。
最後祝大家龍年大吉、龍馬精神🦖
#偶像
#幾個月先出一篇文睇吓咩環境先
