28/01/2025
1：今日除夕，想講多個「雞棚」嘅故事。呢個雞棚，仲要係喺香港用「航天科技」呢個幌子搭出嚟，一聽，就知伏。
2：話說有間上市公司「洲際航天科技」（1725），上個月俾科技園告佢欠租兼冇交管理費，追數4700萬。欠債還錢，suppose就天經地義，但呢間公司厲害，一個轉身，1月23日向高院入稟告返科技園，索賠76億，相當於欠科技園租金近162倍！大癲！
3：夠膽咁樣反咬，間公司當然有咁上下「背景」。事情要講到2021年，當年「新香港人」文壹川，買咗隻電子零件殼股恒達科技返嚟，近2.9億買近64％股權入主。然後隻股搖身一變就成為「航天太空」股，結果股價幾日內，由賣盤前3.7元，升到50蚊。不過見頂當日，即日急回至31蚊左右收市，相信做莊家嘅，幾多億成本都已經cover到了。
4：不得不佩服嘅係，佢為求吹到上太空，吹奏會成為港版Starlink，佢一年內真係陸續搵到一班名人幫佢搖旗吶喊。
好似時任數碼港主席林家禮，出任公司聯席主席；行會成員兼立法會議員林健鋒、前財庫局副秘書長古嘉利做執董；時任香港工業總會主席葉中賢做非執董；前財庫局局長陳家強、前律政司長袁國強、前香港科技園主席蒲祿祺、前德勤中國主席洪嘉禧、前機管局財務執行總監羅志聰、滙豐銀行前主席艾爾敦，全部都做過呢間公司獨立非執董。好多人名好亂呀可？總之就星光熠熠。
5：可惜係，雖然有粒粒皆星嘅陣容，但幾年來，公司收入主要仍然係製造電子零件，來自航天收入係零。自賣殼後，業績由賺變蝕，而且越蝕越甘，2023全年蝕2億人仔。
睇2021年至2023年年報，盤數就越來越衰，唯一越來越靚就係班董事、管理層人工。其中文壹川嘅董事酬金，由2021年全年154萬元仔，去到2023年升到344萬人仔。
6：當然你可以話「佢未到收成期，科研嘢邊有咁快回本？」不過當公司項目兌現唔到，難免令人失去信心。公司2023年頭，好威咁話，要用10億美金，去非洲國家吉布提搞個國際太空港，簽晒MOU，話要興建7座衛星發射台、3座火箭試驗台。
結果，短短三個月後，公司都開唔成，MOU失效，成個項目就冇咗。其實上佢website，會見到公司不停簽MOU，文壹川不停去唔同地方打卡，但唔係好見到佢簽正式合約嘅公佈。
7：去到2023年底，公司管理開始混亂，先有上面提到嘅星級陣容，唔知係咪開始聞到味，陸續宣布跳船；去年中更加同其中一位執董古嘉利，因為「分手費」嘈交嘈到要出通告。
至於時任公司聯席主席林家禮，更加成為越南女首富張美蘭死刑案中，其中一名通緝犯。核數師羅兵咸亦於2023年年報表示，因為公司負債太高，「對集團持續經營的能力構成重大疑慮」，隨後更宣佈劈炮唔撈。
8：目前公司董事局，已全面換晒人，分別來自美國、杜拜、英國、內地等地，入局嘅包括歐洲天文學家、中東王子咁。換咗陣容，唔代表解決到資金問題。上年全年，公司為應付營運資金，一共三次大折讓配股，三次加埋籌近1.5億。同年亦開始傳出公司欠租消息，科學園外，仲有聖約翰大廈都試過入稟追租。
9：故仔去到呢度，呢間公司嘅股價，已經由高峰50蚊，跌到最新得返0.81元，市值4億。以今次向科技園索賠76億計，相當於索賠緊19間「洲際航天科技」。
可能大家都會好奇，呢76億佢係點計呢？據公司入稟狀指，有9億係話科技園suppose 要俾佢嘅資助，有34億係現有客戶訂單損失；另外33億呢？係來自埃及、意大利、中東等地，潛在potential盈利。呢啲叫真正十年磨一劍。
