23/12/2025
https://www.facebook.com/share/1HhTdtLjNw/?mibextid=wwXIf
8%的基金
1）有大銀行最新出咗隻基金畀人係咁鬧，主要指佢repackage啲高風險資產做貌似低風險基金賣畀老散。
2）隻基金賣點係派8厘息，而家10年期美債做緊4.17%，中間要有多4厘息，就要靠HY同credit做到yield enhancement嘅效果，亦都係畀人鬧嘅原因。
3）睇返基金份小冊子，隻基金可以投資係公司或主權債券（低於投資級債券上限50%），以及各類證券化信貸，包括資產抵押證券（ABS，20%）、貸款抵押證券（CLO，10%）、按揭抵押證券及抵押按揭債務證券（MBS/CMO，5%）、信貸風險轉移證券（CRT，5%）及或然可換股債券（10%），各類資產皆設有投資上限。
4）而家隻基金就投咗37%落投資級別債、16%高收益債、28%私募信貸同貸款、20%證券化投資（當中18%係投資級別）。雖然唔知佢背後underlying係乜，但咁嘅配置又唔可以話係好高風險。最多話係8%派息嘅性價比唔高咁囉，特別係同升到上120蚊都仲有5.6%股息率嘅匯控（0005）比較。
5）其中最令人關注亦都係覺得好高風險嘅一部分係私募信貸同貸款，JP Morgan CEO Jamie Dimon早排嘅「蟑螂論」亦都係同私募信貸市場有關。隻基金投資私募信貸係通過上市商業發展公司（BDC），同OTC咁去投資私募信貸都有一定分別，而BDC裡面有好多唔同loan portfolios，爆咗1間loan唔代表有好大危機，亦都唔係隻基金要absorb晒啲loss。
6）隻基金係咪整出嚟坑人，甚至係大銀行要將風險轉移比散戶？依啲講法又太過譁眾取寵同妖魔化咗。家家有求嘅嘢，有求就有供，同埋依啲另類投資基金係用嚟平衡投資組合嘅風險同回報係有用嘅，你要大大力咁押注落去，輸晒（雖然隻基金有成4成係投資級債，輸晒嘅機會好低）果陣就唔好怪人。
7）經歷過雷曼迷債同i Q you later，好多人一早將基金、投資產品視為呃錢，to a certain extent係冇錯嘅。但產品本身無罪，每次出事都係因為有班以「低風險、回報穩定、唔會出事」做說辭嘅sales做不當銷售，同埋一班貪心又懶唔做功課嘅投資者。
