18/06/2020
قۆڵبڕی بە ناوی Unique Finance یونیک فایننس
هاوڕێی هێژا لێرەدا کۆمەڵێک زانیاری لەسەر پڕۆژەیەکی قۆڵبڕی خراوەتەڕوو، ئەم کارەم تەنها وەک دڵسۆزی بۆ ئێوە ڕێگریکردن لە زیانمەندبوونتان ئەنجامداوە. ڕەنگە بۆ تۆیەک کە ئێستاکە سودی مانگانە لەم پڕۆژەیە وەردەگریت بڕواکردن بەوەیکە ئەم کۆمپانیایە ئامانجی چیە سەخت بێت، چونکە کە باسی پارە و سود دێتە گۆڕێ چاوەکان کوێر دەبن و گوێیەکان نابیستن.
بۆ ئەوەی هەزمکردنی ئەم بابەتە لات ئاسان بێت سەرەتا بە چەند نمونەیەکی قۆڵبڕی دەستپێدەکەم دواتر دەچمە نێو ئەسڵی بابەتەکە
⛔ Bernard madof
گەورەترین پڕۆژەی قۆڵبری لە لایەن bernard madof ئەنجامدرا لە ئەمریکا کە یەکێک بوو لە سەرمایەگوزارە گەورەکانی ئەمریکا و چەند ساڵێک سەرۆکی بۆرسەی Nasdaq نەزدەک بوو لە ئەمریکا، کە لەماوەی تەنیا 15 ساڵدا بڕی 65 میلیار دۆلار فێڵی کرد و پارەی سەرمایەگوزاران و گەورە کۆمپانیاکانی ئەمریکای خوارد، لە ساڵی 2009 سزای زیندانیکردنی بۆ ماوەی 150 ساڵ بەسەردا درا. تەنانەت فیلمێکی سینەماییشی بەناوی ( the wizard of lies ) لەسەر بەرهەمهێنراوە.
⛔ One coin
کە لە کوردستاندا چەند میلیۆن دۆلار سەرمایەی خەڵکی کۆکردەوە، من وەک خۆم وە چەندین هاوڕێی دیکە خەڵکیمان لە نزیکبونەوە لەو پڕۆژەیە ئاگادار کردەوە بەڵام بەداخەوە بەهۆی وەعدی درۆینە و بەڵێنی دەوڵەمەندبوون لە ڕؽگەی ئەم کۆینەوە خەلکێکی زۆر لە کوردستان فریودران، جێگای ئاماژەیە کە ئەم پڕۆژەیە بڕی 4 ملیار و 400 میلیۆن دۆلار فێڵی کردووە.
کۆنستانتین ئیگناتۆفی هاوبنیاتنەری پڕۆژەکە پاش دەستگیرکرانی لە ئەمریکا بە تۆمەتی فێڵ و پارە شۆردنەوە بۆ ماوەی 90 ساڵ حوکم درا
شایەنی باسە کەسی یەکەمی پڕۆژەکە کە بریتیە لە رۆجا ئیگناتۆف تاوەکو ئێستا لە شوێنێکی نادیار خۆی حەشار داوەو دەستگیر نەکراوە.
دەیان نموونەی دیکە هەن کە توانیویانە چەندین میلیار دۆلار لە سەر ئاستی جیهان وە چەندین ملیۆن دۆلار لە سەر ئاستی کوردستان فێل بکەن. بەڵام بۆ ئەوەیکە نوسینەکە زۆر دوورودرێژ و ماندووکەر نەبێت تەنها ئاماژەم بەو دوو نموونەیە کردووە.
🕹 بابەتی سەرەکی
کۆمپانیای Unique finance یونیک فایننس، بانگەشەی ئەوە دەکات کە ئەم کۆمپانیایە لە سویسرا تۆمارکراوە و لە بازاڕی بۆرسە و پشکەکاندا چالاکە. بەڵام لە ڕاستیدا ئەم پڕۆژەیە لە لیستی #هۆشداری Finima ( بەڕیوەبەرایەتی چاودێری بازاڕە داراییەکانی سویسرا ) دایە. کە لە ڕێگەی ئەم لینکەی خوارەوە دەتوانن هۆشدارییەکە ببینن
https://www.finma.ch/en/finma-public/warning-list/unique-finance/
پاش ئەوەی یەکێک لە لێکۆڵەرەکان داوای ناونیشانی کۆمپانیای لە یەکێک لە پرێزنترەکان کۆمپانیا کردبوو، ئەم ناونیشانەی وەک ئۆفیسی کۆمپانیا ناردبوو.
75 Myddelton Rd, Wood Green, London N22 8Lz, uk
بە سێرچکردنی ئەم ئادرێسە بۆتان دەدەکەوێت کە ئەم شوێنە بوونی هەیە!!! بەڵام ئەوە نییە کە بانگەشەی بۆ دەکەن.
هاوپێچ لە خوارە بەڵگەکانم بە وێنە داناوە
لە وێنەی ژمارە 1 کە لە لایەن بەڕێوەبەری کۆمپانیاکەوە لە گوگڵ ئاپلۆد کراوە، وادەزانیت کە کۆمپانیایەکی میلیارد دۆلارییە.
بە سوود وەرگرتن لە Google map و بژاردەی Street view وێنەی ڕاستەقینەی شوێنەکەمان دەستدەکەوێت. کە لە ناو وێنەکانی خوارەوەدا ژمارە 2 م لەسەر داناوە.
بەسوود وەرگرتن لە بژاردەی پێوانەکردنی ڕووبەر لە گوگڵ ماپ، دەردەکەوێت کە ڕووبەری ئەم کۆمپانیایە 18 مەتری چوارگۆشەیە!!!
پرێزنتری کۆمپانیاکە وەک بەرگری لەخۆکردنێک گوتی کە ئەمە بینایە تەنیا لقێکە لە لقەکانی کۆمپانیاکە. هەر بۆیە داتابەیسی کۆمپانیا تۆمارکراوەکان لە بەڕیتانیا گەڕام. زۆر سەرنجڕاکێشبوو چونکە ئەم کۆمپانیایە تەنیا یەک لقی هەبوو کە هەمان ناونیشانەکەی سەرەوە بوو. بەلگەکە وێنەی ژمارە 3 یە.
خاڵی سەرنجڕاکێشتر ئەوەیە کە بەهای گشتی کۆمپانیاکە تەنیا 7 هەزار پاوەندە!!!
بەڵگە وێنەی ژمارە 4
سەرئەنجامی گشت ئەم بەڵگانە دەرخەری ئەوەیە کە متمانەکردن بە قۆڵبرەکان تەنیا بەفیڕۆدانی سەرمایە و وزەیە. هەمیشە بەر لە سەرمایەگوزاریکردن لێکۆڵینەوەی پێویست بکەن و لەو سایتانە دڵنیا ببنەوە کە سەرمایەگوزارییان تێدا دەکەن.
( ئەم بابەتە ئاوێتەیەکە لە نوسینی خۆم وە بەشێکیشی لە سەرچاوەی دیکە وەرگیراوە و وەرگێڕدراوە )
