15/10/2026
አሚጎስ በታንዛንያ እየተካሄደ በሚገኘው የ2026 የህ/ስ/ማህበራት ኮንግረስ ላይ እየተሳተፈ ይገኛል፡፡
ጥቅምት 5/2019፡- አሚጎስ ቁጠባ እና ብድር ኃ/የተ/ህስማ. በታንዛንንያ ዳርኤስ ሰላም ከተማ እየተካሄደ በሚገኘው የ2026 ህ/ስ/ማህበራት ኮንግረስ ላይ ንቁ ተሳትፎ እያደረገ ይገኛል፡፡
ኮንግረሱ የህ/ስራ መሪዎች እና የፋይናንስ ዘርፍ ባለድርሻ አካላትን በአንድ ላይ በማሰባሰብ፣ ሀሳቦችን ለመለዋወጥ፣ ልምዶችን ለመካፈል እንዲሁም የቁጠባ እና ብድር ህ/ስ/ማህበራት ሁሉን አካታች የኢኮኖሚ እድገት መፍጠርን እና ማበረታታት እንዲችሉ ለመወያት እድል ፈጥሯል፡፡
በዚህ ኮንግረስ ከበርካታ የአለም ሀገራት የተውጣጡ ከፍተኛ የስራ ሀላፊዎች የተገኙ ሲሆን፤ የአሚጎስ መስራች እና ዋና ስራ አስፈጻሚ አቶ ፍጹም አብረሃ “የቁጠባ እና ብድር ህ/ስ/ማህበራት በፋይናንስ የተረጋጉ ስራ ፈጣሪ እና ሁሉን አካታች ማህበረሰቦችን መገንባት” በሚል ርዕሰ ጉዳይ በተካሄደ የፓናል ውይይት ላይ ተወያይ ሁነው ተሳትፈዋል፡፡
በዚህ ውይይት አሚጎስ ልምዶቹን እና እውቀቱን ያካፈለ ሲሆን፣ ከሌሎች የህ/ስ/ማህበራት ልምድ ለመቅሰም እንዲሁም የፋይናንስ ተደራሽነትን፣ ስራ ፈጠራን፣ የማህበረሰብ ልማት የሚያጠናክሩ ግንኙነቶችን ለማድረግ ትልቅ አድል እንደፈጠረለትም ገልጸዋል፡፡
በተጨማሪም አሚጎስ በዚህ ታላቅ መድረክ ላይ በመሳተፉ የህብረት ስራ እንቅስቃሴ የወደፊት አቅጣጫን በሚቀርጹ ውይይቶች ላይ አስተዋጽኦ እያደረገ ይገኛል፡፡
