29/05/2020
فاكر صاحبك اللي اخدك علي القهوة وقالك عايزك في موضوع مهم وقالك علي المنتج اللي لو اشتريته ب ١٠٠ جنيه وجبت ٢ تانيين يشتروا نفس المنتج انت ليك ٥٠٪ ربح من كل واحد فيهم وهم لو كل واحد فيهم جاب اتنين تانيين واشتروا ليك عمولة وهكذا لحد ما تكونوا شجرة كبيرة.
طب فاكرة صاحبتك اللي أخذتك معاها بعد زن طويييييل لفيلا في المعادي كل الناس اللي فيها متحمسين وكل واحد فيهم بيتكلم عن فلان اللي عنده ال BMW وفيلا وبيصيف في كازابلانكا الصيف اللي فات وبقي ماسك منصب مهم في شركة التسويق 🧛🏿
ايوه هم الاثنين دول مثالين بساط جدا لنفس المفهوم الهرمي اللي كان عليه علامات استفهام كبيرة قوي وفي الاخر طلع كله وهم
طب انت بتوجع دماغنا ليه وبتفكرنا بوجعنا وال ٥٠٠ جنيه اللي دفعناهم في سلسلة الطاقة 😢 وغيره وغيره.
هقولك ليه. لاحظنا في الفترة الاخيرة عن انتشار رهيب لنفس الموضوع من التسويق بس علي شكل جديد من خلال رسالة مضمونها أنك تنزل ابليكيشن معين وتحط بياناتك وبعدها تخلي اتنين من معارفك ينزلو الأبليكيشن عندهم ويستعملوا كود معين وهكذا كل واحد يجييب اتنين تحتيه علي الأقل وكلكوا هتكسبوا فلوس من عملة رقمية جديدة.
البرنامج اسمه بي نيتوورك Pi Network🧐.
ايه دي بقي؟؟؟؟!!!!
علي حد علمنا في أواخر ٢٠١٩ بدأ الترويج علملة رقمية جديدة فكرتها الأساسية انها تحل كل مشاكل البيتكوين - ودي عملة رقمية هنتكلم عليها في بوست منفصل - في التعدين وطريقة استخراج العملة دي من خلال الموبايلات بدل ما الناس كانت بتستخدم سيرفرات عملاقة واجهزة كمبيوتر قوية قوي ومكلفة جداعلشان تقدر تستخرج العملات الرقمية المنتشرة في الفترة الأخيرة واللي أشهرها البيتكوين.
طيب ما ده كلام جميل قوي وايه تاني
اللطيف ان فريق العمل علي رأسه ثلاثة من خريجي جامعة من اشهر الجامعات في العالم وهي جامعة ستانفورد ما بين متخرج ومحاضر حامل الماجيستيروالدكتوراه.
طيب ما الكلام لطيف أهو والناس دي شكلها فاهم والحياة منتهي اللذه وهنودع الفقر وكلنا هنبقي أغنياء وهنروح كازابلانكا.
لحظة واحدة بس استني
أولًا لما تفتح الصفحة بتاعتهم بتلاقي انه كاتب ازاي البيتكوين وحاجة اسمها البلوك تشين بيشتغلوا - ودي هنتكلم عليها في بوست منفصل- وإنهم بيهدفوا انهم يحلوا كل المشاكل بتاعت البيتكوين بس من غير أساس علمي ومن غير ما يشرحوا حتي ولو بشكل مبدئي ده هيتم ازاي غير انه هيتم عن ظريق الموبايل وده علميا لحد دلوقتي مستحيل حدوثه لان الموبايل جهاز ضعيف جدا مستحيل يستحمل حركة التعدين المطلوبة.
ثانيًا مافيش اَي مقياس تم ذكره ازاي هيقدروا يقيموا ثمن العملة دي ولا هيتم تداولها ازاي ولا حتي انت هتقدر تكسب منها علي اَي أساس وتاخد فلوسك. مش عايز أقولك طبعا انهم مالهوش مقر وليهم موقع ضعيف مع صفحة تويتر وفيس بوك.
ثالثًا: أساس الابليكيشن انهم بياخدوا من الناس بياناتهم
سامع واحد بيقول ياعم مايخدوا معلوماتي ايه المشكلة طيب هيعملوا ليها ايه؟!
لما بتنزل البرنامج عندك بتدوس علي موافقة لكل الشروط والأحكام اللي بتخلي البرنامج يقدر يدخل علي بيانات تليفونك بالشكل اللي هم عايزينه من رسائل وصور وإيميلات ومكالمات وغيره.
هيعملوا بيها ايه؟!
المعلومات هي دهب العصر بموافقتك علي اتاحتها للمستخدمين هيكون من حقهم بيعها واستخدامها بالشكل اللي هم عايزينه
طيب لحظة واحدة انت بتقول اللي عاملينها ناس من جامعة معروفة
اه فعلا بس ده مش معناه انهم أنبياء.
حابب أقولك كمان ان فيه عملات رقمية كتير قوي مش ناجح منها غير كام عملة أشهرها البيتكوين وده لأسباب معقدة ومحكومة جدا علشان مافيش فيها أوجه للتلاعب وفيها شفافية كبيرة وده لسه مش واضح ازاي البي نيتورك هتشتغل.
اخر حاجة لازم تكون عارف ان المادة 206 من مشروع قانون البنك المركزي والجهاز المصرفي بتحظر استخدام العملات الرقمية. (شوف الصورة).
خلي بالك من الةقةع في وهم الثراء اللي مش هيحصل بالطرق اللي زي دي
دمتم سالمين ان شاء الله
