04/07/2026
Huntu nos ta konstruí un mundu di pas: Kooperativanan ta demostrá ku pas ta kuminsá ora e hende ta sentral.
Awe, riba Dia Internashonal di Kooperativa, kooperativanan na mundu ta uni pa selebrá e balornan ku a mantené komunidatnan uní pa hopi generashon. E tema di e aña aki, "Kooperativanan pa un Mundu di Pas," ta pone énfasis riba e papel úniko ku kooperativanan ta hunga den promové pas mediante solidaridat, demokrasia, inklushon i prosperidat.
Den un tempu kaminda diferente parti di mundu ta enfrenando konflikto, desigualdat i insertidumbre, e modelo kooperativo ta ofresé un solushon komprobá pa konstruí komunidatnan mas fuerte i resiliente. Dor di pone e hende promé ku ganashi i fomentá partisipashon demokrátiko, kooperativanan ta kreá oportunidat pa diálogo, respeto mutuo i balanse sosial. Tur dia nan ta demostrá ku pas no ta solamente ausensia di konflikto, sino tambe presensia di hustisia, konfiansa, igualdad i oportunidat ekonómiko.
Na mundu, mas ku mil miyon sosio i mas ku tres miyon kooperativa ta kontribuí na desaroyo sostenibel dor di kreá trabou digno, promové inklushon finansiero, fortalesé ekonomianan lokal i duna hende e oportunidat pa mehorá nan kalidad di bida. Nan kontribushon ta bai hopi mas aya di desaroyo ekonómiko; kooperativanan ta fortalesé komunidatnan, redusí desigualdat i traha un brùg entre hende di diferente kultura i orígen.
Komo federashon di kooperativanan di spar i krédito na Kòrsou, Fekoskan ta sinti orguyo di defendé i promové e balornan kooperativo aki. Huntu ku e kooperativanan afiliá, nos ta sigui komprometé ku inklushon finansiero, bon gobernansa, partisipashon aktivo di miembronan i kooperashon entre kooperativanan. Dor di traha huntu, nos ta sigui kontribuí na un sosiedat mas inklusivo, resiliente i ku ta duna hende pas.
Riba e Dia Internashonal di Kooperativa aki, Fekoskan ta ekstendé su gratitut na kada sosio, boluntario, empleado i dirigente ku tur dia ta yuda fortalesé e movementu kooperativo. Huntu, nos ta reafirmá nos kompromiso pa sigui konstruí un futuro kaminda pas ta ser lográ mediante kooperashon, solidaridat i responsabilidat kompartí.
Felis Dia Internashonal di Kooperativa 2026! Huntu nos ta konstruí un mundu di pas.
Koperativa San Pedro Koperativa Spar i Kredito Aviashon
Algemene Spaar- en Kredietcoöperatie ACU KEP Credit Union Youth Council Utility Credit Union (UCU)
