06/16/2022
التبسيط المخل لأخبار النهاردة اقتصاديًا:
١-في بداية أزمة الكورونا في مارس ٢٠٢٠ انهارت أسهم الشركات في بورصات امريكا وطبعًا باقي العالم،
الانهيار كمثال إن مؤشر الداو جونز نزل من ٣٠ ألف نقطة إلى ١٨ ألف نقطة يعني انهيار بنسبة ٤٠٪ تقريبًا
٢-اتحركت الحكومة الامريكية وباقي الحكومات وكل حسب قدراته وتخطيطه الاقتصادي للدعم للشركات،
فاخد قرار الفيدرالي بسياسة التحفيز الكمي ، ودي بالبلدي كدة إن الحكومة الامريكية تفضل كل شهر تشتري أسهم الشركات الامريكية وبالتالي تصعد بسهم كل شركة أمريكية بعد الهبوط اللي حصل
٣-بنهاية سنة ٢٠٢٠ والوصول للقاحات الكوفيد حصل تفاؤل شديد، واحد يقوللي يا كابتن لطيف ايه علاقة التفاؤل بالبورصة؟
أقوله دي كلها تفاؤل وتشاؤم وآهات ودموع وحنين
كانت النتيجة صعود متواصل في البورصات الامريكية والعالمية
٤-الفلوس اللي اشترى بيها الفيدرالي الامريكي أسهم شركات وكمان دعم أسر امريكية خسرت شغلها احتاجت منه لطبع بنكنوت زيادة
وفي سنة ٢٠٢٠ بس اتطبع كمية دولارات زيادة تعادل ١٨٪ تقريبًا من اللي اتطبع السنة السابقة
تفرق؟
طبعًا هتفرق وهنعرف النقطة الجاية
٥-بعيد عن الكلام الكبير وعشان ما نبقاش زي عصام رفعت بتاع الاهرام الاقتصادي في تسعينيات القرن الماضي فببساطة كدة وبالهجايص ممكن نعرف التضخم بانه الحالة اللي فيها الفلوس اللي في جيوب الناس اكتر من السلع والخدمات اللي في السوق،
ساهم في ده زيادة الفلوس المطبوعة وانخفاض الناتج المتاح من خدمات وسلع فكانت النتيجة زيادة اسعار السلع والخدمات وكانت القاضية الحرب الروسية الاوكرانية اللي رفعت سعر البترول العالمي واكتشفنا نباهة عمو بايدن اللي جه يعاقب بوتين فعاقب الكوكو كله وأولهم المواطن الامريكي
٦-ارتفاع سعر البترول زود سعر كل السلع والخدمات ولسة احتمال البترول يزيد وزاد طين التضخم بلة والاسعار بقت في السما ،
والتضخم ده سرطان الاقتصاد ، لو سيبناه كدة هيبدأ الطلب والشراء يقل فهنا مفيش الا علاج واحد للقصة دي وهو رفع سعر الفايدة
٧-بدأ الفيدرالي الامريكي رفع سعر الفايدة على مراحل كانت اخرها النهاردة ولسة كمان كام رفعة في ٢٠٢٢ و٢٠٢٣ والمستهدف للتضخم ساعتها النزول الى ٢٪ وحاليا احنا أربع أو خمس اضعاف الرقم ده،
يعني لسة السكة طويلة
ورفع سعر الفايدة هيتسبب في رفع تكلفة الاقتراض بالتالي،
قروض منازل،ديون كروت الائتمان وكل أنواع الاقتراض
٨-اتكلمنا عن التضخم طيب ايه هو الركود التضخمي:
ده بقى حضرتك تضخم يعني زيادة اسعار السلع والخدمات ومعاه كمان بينزل اوردر ارتفاع بطالة
يعني الانفاق يقل ، يعني الشراء يقل
يعني ركود ،
عشان كدة سموه ركود تضخمي زي افيه احمد آدم بتاع لاول مرة حلاق ومغني
2X1
٩-طيب،ايه اللي يخصنا كأفراد في الليلة دي بعيد عن الناس الكبار دول؟
١-احنا في ازمة، لو عندك شغل حافظ عليه،
مش عامل ميزانية يبقى تعمل ، عامل؟
يبقى تراجعها وتعدلها
٢-بلاش استثمار في اسهم شركات ولا عقارات،
(فيه صناديق استثمارية في شركتي كانت بتعمل من ١٠-١٨٪ سنويا قبل الكورونا،حاليا العائد بالسالب في ٢٠٢٢)
معاك قرشين خليك مع الملك الحالي،الورق الأخضر اللي زاد قصاد كل عملات العالم ما عدا الروبل عشان بوتين القادر،
مش قادر ع الدولار وشراه ؟
تَبِّت بايدك وسنانك في الفلوس اللي معاك وفكر كويس قبل ما تفرط فيها
زي ما قلت البوست في الهجايص وللتبسيط ،فسامحونا لو حصل أي تجاوز أو خطأ
