Qarabağ Dirçəliş Fondu, Qurban Abbasov küç. 5, Bayıl Bay, Baku (2026)

Q: What is the address?

Qurban Abbasov Küç. 5, Bayıl Bay

18/05/2026

"Dirçəliş Kuboku" xeyriyyə futbol turnirinin yarımfinal oyunları keçirilib

Mayın 16-da Qarabağ Dirçəliş Fondunun (QDF) təşəbbüsü və təşkilatçılığı ilə keçirilən “Dirçəliş Kuboku” (www.revivalcup.az) xeyriyyə futbol turnirində yarımfinal mərhələsinin oyunları keçirilib.

Bununla bağlı təşkil edilən mərasimdə turnirdə iştirak edən dövlət qurumlarının və şirkətlərin, eləcə də futbol ictimaiyyətinin nümayəndələri, QDF-in donor və tərəfdaşları, tanınmış idmançılar və media nümayəndələri iştirak ediblər.

Qarabağ Dirçəliş Fondunun İdarə Heyətinin sədri Rəhman Hacıyev çıxış edərək yarımfinal mərhələsinə vəsiqə qazanan komandaları təbrik edib, onlara çox vacib oyunda uğurlar arzulayıb.

İdarə Heyətinin sədri turnirdən əldə olunan vəsaitin işğaldan azad edilmiş ərazilərdə həyata keçirilən bərpa və quruculuq layihələrinə yönəldiləcəyini xatırladaraq, iştirakçı komandalara və donorlara nümayiş etdirdirdikləri sosial məsuliyyətə görə təşəkkürünü bildirib.

Sonra Rəhman Hacıyev “Dirçəliş Kuboku” xeyriyyə futbol turnirinin 2024/2025 mövsümünün finalçılarına - İnnovasiya və Rəqəmsal İnkişaf Agentliyinin (İRİA) kapitanı Fərid Hüseynov, turnirin qalibi olmuş Dövlət Neft Şirkətinin (SOCAR) komandasının kapitanı Ramin İsmayılova Fond adından xüsusi hədiyyələr təqdim edib.

Eyni zamanda hazırkı mövsümün yarımfinalına yüksələn komandaların təmsil etdikləri şirkətlərin rəhbərləri - “Avrora Qrup” şirkətinin prezidenti Ceyhun Abbasov, “Bir Ecosystem” şirkətinin baş icraçı direktoru Fərid Hüseynov, “Azerconnect Group” şirkətinin baş direktorunun müavini Dövlət Dövlətov və “Unicapital İnvestisiya” şirkətinin baş direktoru Vüqar Namazov da xüsusi hədiyyələrlə təltif ediliblər. Yarımfinalçılara ötən il tanınmış almaniyalı rəssam İnqa Şmidtin rəhbərliyi ilə gənc Azərbaycan rəssamları üçün keçirilən master-klass çərçivəsində yaradılan və Qarabağa həsr edilən rəsm əsərləri hədiyyə olunub.

Təltifetmə mərasimindən sonra yarımfinal mərhələsinin oyunlarına start verilib. İlk olaraq meydana “Unicapital” və “Bir Ekosistemi” komandaları çıxıb. Rəqibinə 2:0 hesabı ilə qalib gələn “Bir Ekosistemi” finala vəsiqə qazanıb.

“Azerconnect Group” – “Avrora Qrup” oyunu da gərgin rəqabət şəraitində keçib. Görüşün əsas hissəsi 3:3 hesablı bərabərliklə başa çatdığından qalibin adına penaltilər seriyasında aydınlıq gəlib. Burada daha dəqiq olan “Azerconnect Group” finala ikinci vəsiqəni təmin edib.

Beləliklə, turnirin 6 iyun tarixində keçiriləcək həlledici final oyununda “Bir Ekosistemi” və “Azerconnect Grup” komandaları üz-üzə gələcəklər. Eyni zamanda, digər iki yarımfinalçı bürünc medalları uğrunda mübarizə aparacaqlar.

Qeyd edək ki, “Dirçəliş Kuboku” xeyriyyə futbol turniri Qarabağ Dirçəliş Fondunun (QDF) təşəbbüsü və təşkilatçılığı, Azərbaycan Futbol Federasiyaları Assosiasiyasının (AFFA) dəstəyi, “Tamstore” Marketlər Şəbəkəsinin baş sponsorluğu, “CBC Sport” telekanalının informasiya dəstəyi ilə keçirilir.

Dövlət qurumlarının və ölkəmizdə fəaliyyət göstərən aparıcı şirkətlərin 40 komandasının iştirakı ilə start verilən turnirin keçirilməsində başlıca məqsəd Qarabağın bərpası prosesinə ictimai dəstəyin gücləndirilməsi, eyni zamanda insanlar arasında ianə mədəniyyətinin təşviq edilməsi və sağlam həyat tərzinin təbliğ olunmasıdır.

Məlumat üçün onu da bildirək ki, turnirin baş sponsoru və iştirak edən komandalar tərəfindən Qarabağ Dirçəliş Fonduna ümumilikdə 115.000 manat vəsait ianə edilib və bu vəsait işğaldan azad edilmiş ərazilərdə idman infrastrukturunun yaradılmasına yönəldiləcək.

10/05/2026

Qarabağ Dirçəliş Fondunun kollektivi Ulu Öndər Heydər Əliyevin məzarını ziyarət edib

Bu gün Ümummilli Lider Heydər Əliyevin anadan olmasının 103-cü ildönümüdür.

Bu münasibətlə Qarabağ Dirçəliş Fondunun kollektivi Fəxri Xiyabanda Ulu Öndərin məzarını ziyarət edərək önünə gül dəstələri düzüb, əziz xatirəsini dərin ehtiramla yad edib.

10/05/2026

Bu gün Ümummilli Lider Heydər Əliyevin anadan olmasının 103-cü ildönümüdür.

Müasir Azərbaycan dövlətinin memarı olan Ulu Öndər uzaqgörən siyasəti ilə ölkəmizi tənəzzüldən xilas edərək parlaq gələcəyə daşıyıb. Onun müəllifi olduğu sosial-iqtisadi inkişaf strategiyası Azərbaycanın regionun ən qüdrətli dövlətinə çevrilməsinin təməlini qoyub.

Ulu Öndər Heydər Əliyevin dövlətimiz və xalqımız qarşısında əvəzsiz xidmətlərini minnətdarlıq hissi ilə xatırlayır, əziz xatirəsini dərin hörmət və ehtiramla anırıq!

05/05/2026

Qarabağ Dirçəliş Fondu III Beynəlxalq Xalça Festivalında rəsmi tərəfdaş qismində iştirak edib

Qarabağ Dirçəliş Fondu (QDF) Bakının tarixi mərkəzi olan İçərişəhərdə 2–3 may tarixlərində keçirilən III Beynəlxalq Xalça Festivalında rəsmi tərəfdaş qismində iştirak edib.

Azərbaycan Respublikasının İqtisadiyyat Nazirliyi, “Azərxalça” ASC və İxracın və İnvestisiyaların Təşviqi Agentliyi (AZPROMO) tərəfindən təşkil olunan festival hər il minlərlə yerli və xarici qonağı bir araya gətirməklə yanaşı, Azərbaycanın xalçaçılıq irsinin dünyaya təqdim edildiyi başlıca platformalardan birinə çevrilib.

Fondun Qala meydanında quraşdırılan interaktiv guşəsi festivalın qonaqlarını mədəniyyət, sənət və birgə iştirakçılıq dili vasitəsilə Qarabağın dirçəliş hekayəsi ilə tanış etmək məqsədi daşıyıb.

Fondun guşəsində təşkil olunmuş yaradıcılıq zonasında Azərbaycan Rəssamlıq Akademiyasının on nəfər istedadlı gənc tələbəsi Qarabağ xalçalarının bənzərsiz ornamentləri və rəng çalarlarından ilhamlanaraq unikal əsərlər ərsəyə gətiriblər.

Onların yanında fəaliyyət göstərən xalçatoxuma guşəsi isə hər yaşdan olan ziyarətçiləri “Azərxalça”nın usta toxucuları ilə birlikdə Qarabağ xalçasının toxunmasında iştirak etməyə dəvət edib.

İnteraktiv rəqəmsal guşədə Fondun fəaliyyəti, eləcə də işğaldan azad edilmiş ərazilərdə həyata keçirilən bərpa işlərinin gedişatı barədə məlumatlar nümayiş etdirilib. Ziyarətçilər həmçinin yerindəcə Fonda ianə etmək imkanını qazanıb və əvəzində sülhün, dayanıqlılığın və Qarabağın dirçəlişində şəxsi iştirakın rəmzi olaraq zeytun fidanını hədiyyə alıblar.

“Qarabağın inciləri” interaktiv pazl oyunu da müxtəlif yaş qruplarından olan qonaqların xüsusi marağına səbəb olub.

İştirakçılar Qarabağın tarixi və mədəni abidələrinin təsvirlərini rəmzi olaraq “bərpa” edərək xatirə hədiyyələri əldə ediblər.

Fondun məkanını ziyarət edən qonaqlar arasında Gürcüstanın birinci xanımı Tamar Baqrationi də olub. Fondun nümayəndələri fəxri qonağa Qarabağ Dirçəliş Fondunun təşəbbüsü ilə hazırlanmış “Revival of Karabakh: The Story of Azerbaijan’s Renaissance” kitabını təqdim ediblər.

Fondun interaktiv guşəsini İqtisadiyyat naziri, QDF-in Müşahidə Şurasının sədri Mikayıl Cabbarov da ziyarət edib.

Qonaqlar sırasında həmçinin Milli Məclisin Ailə, qadın və uşaq məsələləri komitəsinin sədri Hicran Hüseynova, Ailə, Qadın və Uşaq Problemləri üzrə Dövlət Komitəsinin sədri Bahar Muradova, “Azərxalça” ASC-nin İdarə Heyətinin sədri Emin Məmmədov, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, Mədəniyyət nazirinin müavini Saadət Yusifova, eləcə də digər rəsmi şəxslər və ictimai xadimlər olub.

Qonaqlara həmçinin Fondun təşəbbüsü ilə hazırlanmış və ölkənin işğaldan sonrakı bərpa yolunun bütöv mənzərəsini əks etdirən “Revival of Karabakh: The Story of Azerbaijan’s Renaissance” innovativ kitab layihəsi barədə ətraflı məlumat verilib.

Festivalın yekununda Fondun stendində iki gün ərzində toxunan Qarabağ xalçasının rəmzi sap kəsilməsi mərasimi keçirilib. Qədim adətə uyğun olaraq xalçanın üzərinə şirniyyat səpilib.

Sap kəsilməsi mərasimini Qarabağ Dirçəliş Fondunun İdarə Heyətinin sədri Rəhman Hacıyev, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud və “Azərxalça” ASC-nin İdarə Heyətinin sədri Emin Məmmədov birgə həyata keçiriblər.

Fondun III Beynəlxalq Xalça Festivalındakı iştirakı onun missiyasının əsas prinsiplərindən birini bir daha təsdiqlədi: Qarabağın dirçəlişi yalnız infrastruktur və institutlar məsələsi deyil, eyni zamanda mədəniyyət, yaddaş və birgə iştirakçılıq məsələsidir — ilmə-ilmə toxunan, hər töhfənin vacib olduğu bir prosesdir.

03/05/2026

Beynəlxalq Xalça Festivalında Qarabağ xalçasının simvolik ipinin kəsilməsi mərasimi keçirilib

Mayın 3-də İçərişəhərdə təşkil olunan Beynəlxalq Xalça Festivalı öz işini davam etdirib.

Festivala rəsmi tərəfdaş kimi qatılan Qarabağ Dirçəliş Fondunun xüsusi interaktiv guşəsi ilk gündə olduğu kimi ziyarətçilərin böyük marağına səbəb olub.

Günün yekununda Fondun guşəsində yerləşdirilən xüsusi xalça dəzgahında toxunan Qarabağ xalçasının simvolik ipinin kəsilməsi mərasimi keçirilib, qədim adət-ənənəyə uyğun olaraq xalçanın üzərinə şirniyyat səpilib.

02/05/2026

Qarabağ Dirçəliş Fondu Beynəlxalq Xalça Festivalında iştirak edir

Mayın 2-də İçərişəhərdə Beynəlxalq Xalça Festivalı öz işinə başlayıb.

Qarabağ Dirçəliş Fondu rəsmi tərəfdaşı qismində qatıldığı festivalda İçərişəhərin dördbucaqlı Qala meydanında qurulan xüsusi interaktiv guşəsi ziyarətçilərin böyük marağına səbəb olub.

Burada hər bir iştirakçı guşədə yerləşdirilən xüsusi xalça dəzgahında Qarabağ xalçasına rəmzi ilmə vurub, gənc rəssamların Qarabağ xalçalarının bənzərsiz motivləri əsasında canlı yaradıcılıq prosesini izləyib və işğaldan azad edilmiş ərazilərdəki genişmiqyaslı bərpa işləri barədə ətraflı məlumat əldə ediblər.

30/04/2026

Qarabağ Dirçəliş Fondu Beynəlxalq Xalça Festivalının rəsmi tərəfdaşıdır

Qarabağ Dirçəliş Fondu (QDF) 2-3 may tarixlərində İçərişəhərdə keçiriləcək Beynəlxalq Xalça Festivalının rəsmi tərəfdaşı qismində çıxış edəcək.

Fond festival günlərində İçərişəhərin Qala meydanında qurulacaq interaktiv guşə ilə təmsil olunacaq.

Hər il minlərlə yerli sakini və ölkəmizə gələn xarici turistləri bir araya gətirən Beynəlxalq Xalça Festivalı milli irsimizin beynəlxalq səviyyədə tanıdılması baxımından mühüm platformadır.

Fondun fəaliyyətinin ana xəttini təşkil edən ianə mədəniyyətinin təşviqi və milli həmrəyliyin gücləndirilməsi məqsədilə guşə ərazisində müxtəlif interaktiv fəaliyyətlər nəzərdə tutulub.

Guşədə yerləşdiriləcək xüsusi xalça dəzgahı Qarabağın çoxəsrlik xalçaçılıq irsini yaşadan canlı bir nümunə kimi çıxış edəcək. Fondun maarifləndirmə fəaliyyətinin tərkib hissəsi olan bu təşəbbüs çərçivəsində hər bir ziyarətçi Qarabağ xalçasına rəmzi olaraq öz ilməsini vura biləcək.

“Qarabağın inciləri” interaktiv pazl oyunu vasitəsilə isə ziyarətçilər Qarabağın tarixi və mədəni abidələrinin təsvirlərini bir araya gətirərək rəmzi mənada bərpa prosesində iştirak edəcəklər.

Bundan başqa, Azərbaycan Rəssamlıq Akademiyasının tələbələri interaktiv guşə ərazisində Qarabağ xalçalarının bənzərsiz motivləri əsasında canlı rəsm nümunələri yaradaraq festivalın yaradıcılıq ruhunu ziyarətçilərə çatdıracaqlar.

Qarabağ Dirçəliş Fondu olaraq hər kəsi Fondun 2-3 may tarixlərində Qala meydanında qurulacaq guşəsinə dəvət edirik.

Gəlin, Qarabağı birlikdə daha gözəl bərpa edək!

29/04/2026

Rəhman Hacıyev “Yüksəliş” müsabiqəsinin qalibləri ilə görüşüb

Qarabağ Dirçəliş Fondunun İdarə Heyətinin sədri Rəhman Hacıyev beşinci “Yüksəliş” müsabiqəsinin qalibləri Kamran Ələsgərov və Numrəddin Hüseynovla Mentorluq proqramı çərçivəsində yenidən bir araya gəlib.

Görüşdə gənc liderlərin peşəkar fərdi inkişaf planları və bu istiqamətdə atılan praktiki addımlar müzakirə edilib.

Görüş zamanı müəyyən olunmuş hədəflərin real iş mühitinə uyğunlaşdırılması və idarəçilik bacarıqlarının təkmilləşdirilməsi məsələləri ətraflı nəzərdən keçirilib. Rəhman Hacıyev qaliblərin potensialının reallaşdırılması və müasir idarəçilik yanaşmalarının tətbiqi ilə bağlı tövsiyələrini bölüşüb.

Kamran Ələsgərov və Numrəddin Hüseynov şəxsi inkişaf prosesində onlara göstərilən diqqət və mentor dəstəyinə görə Rəhman Hacıyevə təşəkkürlərini bildiriblər. Onlar mütəmadi görüşlərin peşəkar yüksəliş və yeni idarəçilik vərdişlərinin dərindən mənimsənilməsi baxımından əhəmiyyətini qeyd ediblər.

Xatırladaq ki, “Yüksəliş” müsabiqəsi Azərbaycan Respublikası Prezidentinin 26 iyul 2019-cu il tarixində imzaladığı Sərəncamla təsis olunub. Müsabiqə 21-51 yaş aralığında, ikiillik idarəçilik təcrübəsi olan, ali təhsilli Azərbaycan Respublikasının vətəndaşlarını əhatə edir.

Müsabiqə 5 mərhələdən – qeydiyyat, onlayn seçim, əyani, yarımfinal və finaldan ibarətdir. Müsabiqə qalibləri idarəçi rəhbərlər (https://yukselish.az/mentors) tərəfindən birillik fərdi inkişaf planı və hər biri 20 min manat məbləğində özünüinkişaf qrantı əldə edirlər.

Qeyd edək ki, növbəti, sayca altıncı “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti tərəfindən 10 dekabr 2025-ci il tarixində müvafiq Sərəncam imzalanıb.

24/04/2026

Qarabağ Dirçəliş Fondu ADA Universitetində gənclərlə maarifləndirmə görüşü keçirib

23 aprel 2026-cı il tarixində ADA Universitetində Qarabağ Dirçəliş Fondunun təşəbbüsü ilə tələbələrlə maarifləndirmə görüşü keçirilib.

Qarabağ Dirçəliş Fondunun (QDF) təşəbbüsü ilə “ ” müzakirə platforması çərçivəsində keçirilən görüşdə Fondun İdarə Heyətinin sədrinin müşaviri Rəşad Qasımzadə, Fandreyzinq və kommunikasiya şöbəsinin müdiri Pərvin Bağırova və ADA Universitetinin tələbələri iştirak edib.

“Böyük Qayıdış: Viranlıqdan dayanıqlığa” mövzusuna həsr olunan tədbirdə əsas diqqət Qarabağın dirçəlişində gənclərin roluna və bu tarixi prosesdə onların yaradıcı töhfələrinin stimullaşdırılmasına yönəldilib. Eyni zamanda tədbir iştirakçılarına işğaldan azad edilmiş ərazilərdə aparılan bərpa və yenidənqurma işləri, Fondun fəaliyyəti və layihələri haqqında ətraflı məlumatlar təqdim edilib.

Fondun nümayəndələri azad edilmiş ərazilərdəki mövcud mənzərəyə toxunaraq bildiriblər ki, Qarabağın sürətli dirçəlişi və yüksək rifahlı regiona çevrilməsi prosesi cəmiyyətin bütün təbəqələrinin, xüsusilə gənclərin vahid bir amal ətrafında sıx birləşməsini tələb edir.

Görüş zamanı nümayiş etdirilən “Faciədən Zəfərə” videoçarxı vasitəsilə tələbələr azad edilmiş ərazilərdə görülən genişmiqyaslı bərpa və quruculuq işləri ilə yaxından tanış olublar.

İnteraktiv formatda davam edən görüşdə Fondun rəsmiləri tələbələrin çoxsaylı suallarını cavablandırıb, onları maraqlandıran məqamlara ətraflı aydınlıq gətiriblər. Tədbir “Böyük Qayıdış” prosesi ətrafında səmimi müzakirələr və qarşılıqlı fikir mübadiləsi ilə yekunlaşıb.

Eyni zamanda gənclər işğaldan azad edilən ərazilərdə aparılan bərpa-quruculuq işlərini əks etdirən “Qarabağın Dirçəlişi: Azərbaycan İntibahının Hekayəsi” fotosərgisi ilə tanış olublar.

Qeyd edək ki, Qarabağ Dirçəliş Fondu gənclər arasında maarifləndirmə işini genişləndirmək məqsədilə mütəmadi olaraq müxtəlif ali təhsil müəssisələrində görüşlər təşkil edir, analoji tədbirlərin gələcəkdə digər universitetlərdə də davam etdirilməsi nəzərdə tutulur.

13/04/2026

QDF-in dəstəyi ilə Laçının tarixi “Bəylik Bağları”nın bərpası həyata keçirilir

Aprelin 11-də Qarabağ Dirçəliş Fondunun maliyyə dəstəyi, “Laçın Rayonunda Bərpa, Tikinti və İdarəetmə Xidməti” PHŞ-nin təşkilatçılığı ilə Laçın rayonunun Bəylik kəndinin “Bəylik Bağları” adlanan ərazisində ağacəkmə aksiyası keçirilib.

Aksiyada Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov, Qarabağ Dirçəliş Fondunun İdarə Heyətinin sədri Rəhman Hacıyev, o cümlədən ərazidə fəaliyyət göstərən dövlət qurumlarının rəhbər heyəti, ekoaktivistlər və yerli sakinlər iştirak ediblər.

Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov tədbirdə çıxış edərək bildirib ki, “Bəylik Bağları” Laçın rayonunun zəngin irsinin mühüm tərkib hissələrindən biri hesab olunur. Tarixən bu məkan münbit torpaqları və müxtəlif meyvə ağacları ilə seçilərək regionun tanınmış bağçılıq ənənələrinin formalaşmasına töhfə verib. Bu ərazi həm yerli sakinlərin təsərrüfat həyatında, həm də ərazinin ekoloji tarazlığının qorunmasında xüsusi rol oynayıb.

“İşğal dövründə ciddi zərər görməsinə baxmayaraq, bu ərazi yenidən bərpa və yaşıllaşdırma işlərinin əsas istiqamətlərindən birinə çevrilib. Bu gün Laçın rayonunda keçirilən ağacəkmə aksiyası təkcə ekoloji təşəbbüs deyil, eyni zamanda doğma torpaqlarımızın dirçəlişinə verilən mühüm töhfədir”- deyə, M.Məmmədov qeyd edib.

Qarabağ Dirçəliş Fondunun İdarə Heyətinin sədri Rəhman Hacıyev bildirib ki, layihənin başlıca məqsədi bu gözəl diyarı əvvəlkindən də abad və ekoloji cəhətdən dayanıqlı bir məkana çevirməkdir.

“Bu istiqamətdə cənab Prezident İlham Əliyevin rəhbərliyi ilə dövlətimizin həyata keçirdiyi genişmiqyaslı layihələr işğaldan azad edilmiş ərazilərdə ekoloji tarazlığın bərpası baxımından xüsusi əhəmiyyət daşıyır. Biz də Qarabağ Dirçəliş Fondu olaraq Qarabağda ekoloji tarazlığın bərpasına yönəlmiş təşəbbüslərə böyük önəm veririk. Bu cür layihlər cəmiyyətin müxtəlif təbəqələrini vahid məqsəd ətrafında birləşdirərək həmrəylik və məsuliyyət hissini gücləndirir. Əminəm ki, birgə səylərimiz nəticəsində Laçın yaxın illərdə regionun ən gözəl və yaşıl guşələrindən birinə çevriləcək”- deyə, İdarə Heyətinin sədri vurğulayıb.

Keçirilən ağacəkmə aksiyasına görə təşkilatçılara təşəkkür edən yerli sakinlər, aksiyanın ərazilərin yaşıllaşdırılması və ekoloji tarazlığın bərpası baxımından xüsusi əhəmiyyət daşıdığını qeyd ediblər.

Çıxışlardan sonra ağacəkmə aksiyasına start verilib.

Qeyd edək ki, Qarabağ Dirçəliş Fondunun maliyyə dəstəyi ilə icra edilən bu layihə çərçivəsində müasir damcı suvarma sistemi çəkilən 2,8 hektarlıq ərazidə artıq 700 meyvə ağacı əkilib. Ümumilikdə isə ərazidə ümumilikdə 1280 meyvə ağacı və 400 üzüm tinginin əkilməsi nəzərdə tutulur.

Ağacəkmə aksiyasından sonra tədbir iştirakçıları Laçın şəhərini gəzərək burada aparılan bərpa və quruculuq işləri ilə tanış olublar.
Eyni zamanda Laçın rayonunda Azərbaycan Respublikasının xüsusi nümayəndəliyi ilə Qarabağ Dirçəliş Fondu arasında Laçın rayonunun bərpası çərçivəsində gələcəkdə birgə layihələrin icrası ilə bağlı geniş fikir mübadiləsi aparılıb.

Qeyd edək ki, Bəylik kəndi tarixən öz münbit torpağı və müxtəlif növ meyvə ağaclarından ibarət məşhur “Bəylik bağları” ilə tanınıb. 30 illik işğal dövründə bu ərazilər ekoloji terrora məruz qalıb, kəndin tarixi yaşıllıq örtüyü tamamilə məhv edilib.

Laçın rayonunun Zabux kənd inzibati ərazi dairəsinə daxil olan Bəylik kəndi 1992-ci ildə işğal edilmişdi. 2020-ci il 1 dekabr tarixində Azərbaycan Silahlı Qüvvələri tərəfindən azad edilib.

Kənd işğaldan azad edildikdən sonra tamamilə yenidən qurulub, müasir standartlara uyğun yaşayış infrastrukturu yaradılıb. Burada fərdi yaşayış evləri, daxili yollar, elektrik, su, qaz və rabitə xətləri çəkilib, sosial obyektlərin tikintisi təmin edilib.

Tikinti-quruculuq işləri başa çatdırdan sonra Bəylik kəndinə əhalinin mərhələli şəkildə köçürülməsinə başlanıb.

Xatırladaq ki, 2025-ci il mayın 27-də Azərbaycan Respublikasının Prezidenti İlham Əliyev Laçın rayonuna səfəri çərçivəsində Bəylik kəndinə köçən sakinlərlə görüşərək, onlara evlərin açarlarını təqdim edib. Həmin vaxt kəndə 38 ailə (153 nəfər) köçürülüb. Hazırda isə Bəylik kəndində 89 ailə (363 nəfər) yaşamaqdadır.

10/04/2026

Qarabağ Dirçəliş Fondu Azərbaycanın 100 ən böyük vergi ödəyicisi sırasında yer alıb

Azərbaycan Respublikasının İqtisadiyyat Nazirliyi yanında Dövlət Vergi Xidməti 2025-ci il üzrə ölkənin 100 ən böyük vergi ödəyicisinin illik siyahılarını açıqlayıb.

Siyahılar dövlət büdcəsinə ödənilmiş vergilərin ümumi məbləği və dolayı vergilər (ƏDV və aksizlər) istisna olmaqla hesablanan vergi öhdəlikləri nəzərə alınmaqla iki istiqamət üzrə tərtib olunub.

Qeyd edək ki, vergi ödəyicilərinin bu siyahılara daxil edilməsi onların ödəniş məlumatlarının açıqlanmasına dair verdikləri rəsmi razılıq əsasında, tamamilə könüllü qaydada həyata keçirilir.

Qarabağ Dirçəliş Fondu (QDF) publik hüquqi şəxs hər iki siyahıda yer alıb. Belə ki, Fond dolayı vergilər (ƏDV və aksizlər) istisna olmaqla hesablanan reytinqdə 43-cü, ödənilmiş vergilərin ümumi məbləği üzrə isə 74-cü pillədə qərarlaşıb.

Fondun bu göstəricisi donorlar tərəfindən təqdim olunan vəsaitlərin məsuliyyətli və səmərəli idarə olunması nəticəsində əldə edilən gəlirliliyi əks etdirir.

QDF-in investisiya fəaliyyəti nəticəsində formalaşan gəlirlər bir tərəfdən azad edilmiş ərazilərdə həyata keçirilən bərpa və yenidənqurma işləri üçün əlavə maliyyə imkanları yaradır, digər tərəfdən isə vergi ödənişləri vasitəsilə birbaşa dövlət büdcəsinə töhfə verir.

Nəzərinizə çatdıraq ki, 2025-ci ildə Fondun ümumi vergi ödənişləri 19 milyon manat təşkil edib. Bunun 18,5 milyon manatı investisiya gəlirindən əldə olunan mənfəət vergisinin payına düşür.

Qeyd edək ki, bu gəlirin formalaşması Fondun fəaliyyət prinsipləri ilə birbaşa bağlıdır. Yarandığı gündən etibarən QDF fiziki və hüquqi şəxslərin könüllü ianələri hesabına 1,5 milyard manatdan artıq vəsait cəlb edib. Bu isə azad edilmiş ərazilərin bərpası istiqamətində Azərbaycan cəmiyyətində formalaşmış güclü milli həmrəyliyin bariz göstəricisidir.

Toplanan vəsaitlər Fondun prioritetlərinə və “Böyük Qayıdış” dövlət proqramının icrasına uyğun olaraq azad edilmiş ərazilərdə bərpa və inkişaf layihələrinə mərhələli şəkildə yönəldilir. Bununla yanaşı, Fondun uzunmüddətli maliyyə dayanıqlılığını təmin etmək məqsədilə sərbəst vəsaitlər aşağı riskli, konservativ investisiya alətlərində - dövlət və dövlət təsisatlarının istiqrazlarında və dövlət, eləcə də sistem əhəmiyyətli banklarda yerləşdirilən depozitlərdə saxlanılır. Bu yanaşma həm mövcud vəsaitlərin qorunmasına, həm də əlavə maliyyə resurslarının formalaşdırılmasına xidmət edir.

Publik hüquqi şəxs olaraq QDF dividend ödənişləri həyata keçirmir. Bu o deməkdir ki, investisiya fəaliyyətindən əldə olunan hər bir manat birbaşa Fondun azad edilmiş ərazilərdə mədəni irsin və ekoloji tarazlığın bərpası, eləcə də insan kapitalının inkişafı və qayıdan əhalinin dəstəklənməsi ilə bağlı həyata keçirdiyi layihələrin maliyyələşdirilməsinə yönəldilir.

Qarabağ və Şərqi Zəngəzurda bərpa prosesinin infrastruktur mərhələsindən iqtisadi şaxələndirmə və sosial inkişafa keçidi ilə bu əlavə resursların əhəmiyyəti daha da artır və Fondun töhfəsini genişləndirməyə imkan verir.

QDF-in Dövlət Vergi Xidmətinin məlumatların könüllü açıqlanması təşəbbüsündə iştirakı Fondun ictimai hesabatlılıq sahəsində formalaşdırdığı yanaşmanın göstəricisidir.

Fond fəaliyyətə başladığı gündən etibarən audit olunmuş maliyyə hesabatlarını və müstəqil auditor rəylərini rəsmi internet səhifəsində mütəmadi olaraq dərc edir.

Donorların etimadı əsasında fəaliyyət göstərən QDF şəffaflığı imtiyaz deyil, geniş ictimaiyyət qarşısında əsas öhdəlik kimi qəbul edir.

Qeyd edək ki, Fondun 2025-ci il üzrə maliyyə hesabatları hazırda “PwC” şirkəti tərəfindən audit olunur və audit başa çatdıqdan sonra ictimaiyyətə təqdim ediləcək.

Qarabağ Dirçəliş Fondu

18/05/2026

10/05/2026

10/05/2026

05/05/2026

03/05/2026

02/05/2026

30/04/2026

29/04/2026

24/04/2026

13/04/2026

10/04/2026

Address

Website

Alerts

Contact The Business

Shortcuts

Share

Category