04/05/2026
Reflektime nga Kosova Finance Forum. Besimi si faktor kyç në ndërtimin e marrëdhënieve financiare të qëndrueshme.
UniFin ishte pjesë për herë të parë në edicionin e dytë të Kosova Finance Forum, organizuar më 27–28 Prill në Prishtinë.
Kryefjala e kësaj konference ishte besimi, si elementi që lidh njerëzit, si faktor kyç në ndërtimin e marrëdhënieve financiare të shëndetshme dhe të qëndrueshme në kohë, por edhe si një faktor i rëndësishëm për t’u rritur dhe zhvilluar së bashku.
Modeli i Shoqërive të Kursim-Kreditit, që UniFin përfaqëson, e ka në gjenezë pikërisht besimin. Është një model që funksionon mbi bazën e anëtarësisë, ku individët bashkohen dhe kontribuojnë së bashku në zhvillimin e këtij modeli, duke krijuar mundësinë për të mbështetur dhe financuar nevojat e njëri-tjetrit.
Ky model, të cilin UniFin e ka ndërtuar fillimisht mbi marrëdhënien e besimit mes një grupi të vogël profesionistësh nga fusha të ndryshme, sot numëron mbi 13,000 anëtarë dhe vazhdon të rritet. Me kalimin e viteve, ai ka dëshmuar se funksionon, nga financimi i nevojave personale dhe familjare, përmirësimi i jetesës, deri tek mbështetja e bizneseve që kanë ndërtuar dhe zhvilluar aktivitetin e tyre duke iu besuar këtij modeli.
Një element interesant që lidhet edhe me platforma si Kosova Finance Forum është rrjetëzimi, pikërisht mënyra sesi rriten Shoqëritë e Kursim-Kreditit: një anëtar sjell një tjetër, një familjar sjell të afërmin e tij dhe kështu ndërtohet gradualisht një komunitet.
Edhe pse në Kosovë ende nuk ekziston një ligj specifik që rregullon Shoqëritë e Kursim-Kreditit, ky model gjen përputhshmëri të natyrshme me kulturën e besimit, njohjes dhe komunitetit mbi të cilat ndërtohen një pjesë e mirë e marrëdhënieve financiare në shoqëri.
Pikërisht kjo e bën modelin jo vetëm të kuptueshëm, por edhe potencialisht të zbatueshëm në mënyrë graduale në tregun kosovar, duke krijuar hapësira për zhvillim të qëndrueshëm dhe përfshirje më të gjerë financiare.
Interesant për të gjithë sektorin e financës ishte gjithashtu edhe paneli “Fintech Revolution: Transforming Financial Services”, ku u diskutua mbi digjitalizimin e sektorit financiar dhe zhvillimet që kanë transformuar industrinë gjatë viteve të fundit. Një element kyç për t’u parë në vazhdim, që lidhet sërish me besimin, është mënyra sesi këto zhvillime do të ndikojnë marrëdhënien midis individëve dhe institucioneve financiare në të ardhmen, veçanërisht në shoqëri që historikisht kanë qenë të orientuara drejt modeleve tradicionale të financës.
Kënaqësi të ndiqnim edhe prezantimin dhe panelin e Asosacionit të Institucioneve të Mikrofinancës në Kosovë, të moderuar nga Z. Shpresim Vranovci, dhe të shihnim nga afër punën e bërë ndër vite nga sektori i mikrofinancës në Kosovë.
Për të vënë edhe një herë në pah fuqinë e modeleve të mikrofinancës dhe misionin e tyre social, vlen të veçohet një nga statistikat e prezantuara gjatë panelit: përmes Fondacionit të Bursave AMIK, 261 studentë kanë përfituar bursa studimi gjatë 3 viteve akademike të fundit. Një iniciativë vërtet për t’u duartrokitur.
Jemi të hapur për të parë zhvillimin e mëtejshëm të sektorit të mikrofinancës në Kosovë dhe për të kontribuar me ide mbi mënyrën sesi modeli i Shoqërive të Kursim-Kreditit mund të implementohet edhe në një treg si Kosova, i cili ende nuk e ka këtë model pjesë të bazës së tij rregullatore, por që funksionon fort mbi bazën e besimit, njohjes dhe komunitetit.
UniFin
https://www.linkedin.com/pulse/reflektime-nga-kosova-finance-forum-besimi-si-faktor-ky%C3%A7-n%C3%AB-9mcef/
