میرویس خان نيکه زابل پوهنتون-اقتصاد پوهنځی

02/08/2026

د اقتصاد پوهنځی د دري تنه استادانو علمي مقاله په ارغند نړیوال ژورنال کي نشر سوه.
د پوهنیار امان الله حقیار، پوهنیار شفیق الله صمیم، او نوماندپوهنیار محمد اسحاق سعادت ګډه علمي مقاله د ارغند نړیوال علمي ژورنال (Arghand Journal of Social Sciences) په دویم ټوک، لومړۍ ګڼه (۲۰۲۶) کې په بریالیتوب سره خپره شوې ده. د مقالې سرلیک "The Impact of Investment and Population Growth on Unemployment in Afghanistan (2002–2024)" دی. دغه څېړنه په افغانستان کې د ۲۰۰۲ څخه تر ۲۰۲۴ کال پورې د پانګونې او نفوس د ودې اغېزې پر بېکارۍ علمي ارزونه کوي.
د دې مقالې خپرېدل د لیکوالانو د علمي هڅو، څېړنیز فعالیت او اکاډمیک پرمختګ څرګندونه کوي او د هېواد د اقتصاد په برخه کې د علمي څېړنو د پیاوړتیا لپاره ارزښتناک ګام بلل کېږي. هیله ده چې دا ډول علمي لاسته راوړنې د نورو څېړنو او نوښتونو لپاره هم الهام‌بښونکې وي.
د اقتصاد پوهنځی اداره دري واړه لیکوالانو ته د دې علمي بریا مبارکي وایي او ورته د لا ډېرو څېړنیزو او اکاډمیکو بریاوو هیله
لري.
درنښت
د اقتصاد پوهنځی د نشراتو کمېټه

22/07/2026

ميرويس خان نيکه پوهنتون - زابل اقتصاد پوهنځي (۷۸) تنه محصلان ټولنې ته د خدمت په موخه وړاندې کړل!

د ميرويس خان نيکه پوهنتون - زابل، د اقتصاد پوهنځي د درېیمې دورې فراغت غونډې مراسم همدا مهال جريان لري.
د يادونې وړ ده چې، د ميرويس خان نيکه پوهنتون - زابل، اقتصاد پوهنځي څخه په درېيمه دوره کې له دوو څانګو؛ اداره تجارت او ملي اقتصاد څانګو څخه ۷۸ تنه محصلان ټولنې ته د خدمت په موخه وړاندې سول.
د اقتصاد پوهنځي مشرتابه او استادان فارغ سوو محصلانو ته د فراغت مبارکي وايي او په راتلونکو هڅو کې ورته د برياليتوبونو دعا کوي.

درنښت
د اقتصاد پوهنځي نشراتي څانګه

03/06/2026

د اقتصاد پوهنځي استادانو د علمي لاسته راوړنې په ویاړ!

په ډېرې خوښۍ او ویاړ سره د اقتصاد پوهنځي د قدرمنو استادانو هريوه پوهنيار رحمن ولي سهار او نوماند پوهنيار احسان الله سعد د (From Farm to Society: Reshaping the Future of Food Systems Through Green Technologies, with a Bibliometric and Literature Review for a Future Research Agenda) تر عنوان لاندې علمي څېړنه د Springer Nature په Discover Environment ژورنال کې چې، د نړۍ‌والو علمي خپرونو له معتبرو مجلو څخه شمېرل کېږي او په Scopus نړیوال ډیټابېس کې انډیکس دی، خپره شوه.

"دغه نوښتګره څېړنه ارزوي، چې شنې ټکنالوژۍ څنګه د نړۍ د خوراکي سیستمونو راتلونکی بدلوي او د پایښت لرونکي پرمختګ لپاره نوې لارې پرانیزي. څېړونکو د زرګونو علمي اسنادو د تحلیل له لارې موندلې چې: د کرنې ډیجیټلي کول او ځېرکه ټکنالوژي د تولید موثریت لوړوي؛ د ماشین زده‌کړې (Machine Learning) کارول د خوراکي ځنځیرونو مدیریت ښه کوي؛ د اوبو د سپما او چاپېریال ساتنې لپاره نوې حللارې رامنځته شوې دي؛ شنې ټکنالوژۍ کولی شي د خوراکي خوندیتوب، اقتصادي ودې او چاپېریالي پایښت ترمنځ توازن رامنځته کړي."

همدارنګه، څېړنه د راتلونکو علمي مطالعاتو لپاره یو مهم علمي چوکاټ او څېړنیزه اجنډا هم وړاندې کوي.

د اقتصاد پوهنځي د استادانو دغه علمي لاسته راوړنه نه یوازې د هغوی د علمي هڅو، مسلکي وړتیاوو او څېړنیز تعهد څرګندونه کوي، بلکې د پوهنتون او هېواد د علمي اعتبار د لوړولو په برخه کې هم ارزښتناک ګام بلل کېږي.

دا ډول نړیوالې خپرونې ښيي چې زموږ علمي کادرونه د نړیوالو څېړنیزو بهیرونو برخه دي او کولای شي د انساني ټولنې د مهمو ننګونو لپاره علمي او عملي حللارې وړاندې کړي.

اقتصاد پوهنځی د دې ارزښتمنې څېړنې لیکوالانو ته د زړه له کومې مبارکي وړاندې کوي، د هغوی د علمي هڅو ستاینه کوي او د راتلونکو لا ډېرو نړیوالو بریاوو هیله څرګندوي.

موږ باور لرو چې دا ډول هڅې به د نورو استادانو او محصلینو لپاره هم د علمي څېړنو، نوښت او نړیوالو خپرونو په برخه کې د الهام سرچینه وګرځي.

درنښت
د اقتصاد پوهنځي نشراتي څانګه

The details of discover environment in 2026 like Impact Factor, Indexing, Ranking, acceptance rate, publication fee, publication time

21/05/2026

د ميرويس خان نيکه پوهنتون-زابل د اقتصاد پوهنځي محصلينو علمي او عملي سير نن پنجشنبه په بريالۍ توګه پای ته ورسېد!

د ميرويس خان نيکه پوهنتون-زابل د اقتصاد پوهنځي څلورم ټولګي محصلينو علمي او عملي سير نن د پنجشنبې په ورځ له ګڼ شمېر لاسته راوړنو سره پای ته ورسېد.
په دغه دوه ورځني علمي سفر کې چې د تېرې سه شنبې په ورځ پيل شوی وو، د اقتصاد پوهنځي دوو تنو استادانو په ګډون پکې ۳۵ تنه د څلورم ټولګي محصلينو برخه اخیستې وه، د کندهار صنايعو او معدنونو خونې په همکارۍ محصلينو د کندهار ښار درې ( جنوبي، شمالي او عينو مينې) صنعتي پارکونو له څلورو لويو او کوچنيو توليدي فابريکو (باور ټکنالوژي او انجنيرنګ کمپني، سندس نساجي فابريکې، کندهار دانې او خالد افغان) توليدي فابريکو او همدا راز، د کندهار پوهنتون اقتصاد پوهنځي، کندهار پوهنتون عامه ادارې او پاليسي پوهنځي او علامه حبيبي کتابتون څخه ليدنه وکړه.

د ياد سفر په جريان کې محصلينو د صنعت د ودې، توليدي معيارونو، مسلکي مديريت، معاصرو توليدي پروسو او په افغانستان کې د نړيوالو معيارونو د تطبيق عملي بيلګې له نږدې مشاهده کړې. همداراز، دوی وکولای شول چې د علمي مفاهيمو تطبيقي بڼه په واقعي صنعتي او اکاډميکو ساحو کې وويني او د نوښت، مديريت او پرمختګ له نويو تجربو سره بلدتيا ترلاسه کړي.

دغه علمي او عملي سير نه يوازې د محصلينو د پوهې د پراختيا لامل شو، بلکې هغوی ته يې د راتلونکي مسلکي ژوند لپاره نوې انګېزه، ليدلوری او عملي تجربې هم وښودلې.
درنښت
د اقتصاد پوهنځي نشراتي څانګه

20/05/2026

له تيوري تر عملي مشاهدې؛ د ميرويس خان نيکه پوهنتون اقتصاد پوهنځي محصلينو علمي او عملي سير!

د ميرويس خان نيکه پوهنتون ـ زابل، د اقتصاد پوهنځي محصلینو د خپل علمي او عملي سفر په دوام، نن دوهمه ورځ د کندهار ښار له مهمو صنعتي، تولیدي او علمي مرکزونو څخه لیدنه وکړه؛ کوم چې له امله يې محصلینو د نوښت، مدیریت او صنعتي پرمختګ نړۍ په عملي بڼه حس کړه.

د ورځې لومړنی او تر ټولو مهم سفر د سندس نساجي فابريکې ته ترسره شو؛ هغه ستره صنعتي پروژه چې د افغانستان د نساجي صنعت د بیا راژوندي کېدو سمبول ګڼل کېږي. یاده سهامي کمپنۍ چې د شاوخوا ۶۰ میلیونه ډالرو په لګښت پر ۶۰ جریبه ځمکه رغول سوې، د هېواد په کچه د ټوکر اوبدلو یوازینۍ ستره سهامي کمپنۍ بلل کېږي او د صنعتي افغانستان د هیلو روښانه انځور وړاندې کوي.

په پيل کې د کمپنۍ مسؤلینو محصلینو ته د خپل لرلید، رسالت او اساسي موخو په اړه هر اړخیز معلومات وړاندې کړل او څرګنده یې کړه چې موخه یې د کورني تولید پیاوړتیا، د وارداتو کموالی، د کاري فرصتونو رامنځته کول او د افغانستان د نساجي صنعت نړیوالو معیارونو ته رسول دي.

محصلینو د کمپنۍ له درېیو مهمو تولیدي فازونو څخه له نږدې لیدنه وکړه:
۱- د تار اوبدلو برخه
۲- د ټوکر جوړونې برخه
۳- د ټوکر رنګولو او بسته بندۍ برخه

د دغو برخو پرمختللې ماشینري، منظم تولیدي سیستمونه او معیاري ګودامداري د محصلینو له ځانګړې پاملرنې او ستاینې سره مخ شول. محصلینو په عملي ډول مشاهده کړه چې څنګه خام مواد په تدریجي ډول په معیاري تولیداتو بدلېږي او بازار ته وړاندې کېږي. دغه لیدنه د ډېرو محصلینو لپاره د صنعت، مدیریت او تولید په برخه کې یوه نه هېرېدونکې تجربه وه.

د ورځې دوهم سفر د کندهار پوهنتون عامه ادارې او پاليسي پوهنځي ته ترسره شو، چېرې چې د پوهنځي د علمي کادرونو له لوري د محصلینو تود هرکلی وشو. ورپسې د استاد ښاغلي پوهنيار سعيدي‌ صاحب له لوري د ميرويس خان نيکه پوهنتون اقتصاد پوهنځي محصلينو ته د سافټ مهارتونو په اړه یو اغېزناک او الهام‌بښونکی سیمینار وړاندې شو.

په سیمینار کې د فارغ کېدونکو زده کړيالانو لپاره نرم مهارتونه(Soft skills) د بریالیتوب اساسي عوامل وبلل شول. استاد پوهنيار سعيدي‌ټینګار وکړ چې په معاصر عصر کې یوازې علمي اسناد د بریا ضمانت نه شي کېدای، بلکې نرم مهارتونه انسان د برياليتوب او کاري اغيزناکتيا تر پوړیو رسوي.

د سیمینار په پای کې محصلینو خپلې پوښتنې مطرح کړې او قدرمن استاد ورته په خورا ورین تندي، علمي استدلال او حوصله‌مندۍ ځوابونه وړاندې کړل چې، د محصلینو له لوري په تود هرکلي بدرګه شول.

ورپسې د درېيم سفر په لړ کې، محصلینو د کندهار دانې کمپني څخه لیدنه وکړه؛ ياده فابريکه د چرګانو د دانې د تولید په برخه کې مهم فعالیتونه ترسره کوي. محصلینو د دانې د تولید ټول بهیر له نږدې مشاهده کړ او د خامو موادو له پروسس څخه نیولې د وروستي تولید تر بسته‌بندۍ پورې یې عملي معلومات ترلاسه کړل.

د کمپنۍ مسؤلینو د تولید پروسه په بشپړ وضاحت تشریح کړه او محصلینو د بازار څېړنې، د تقاضا پوره کولو، د خامو موادو ته د لاسرسي، تولیدي ظرفیت او بازارموندنې په اړه خپلې پوښتنې مطرح کړې، چې د مسؤلینو له لوري ورته په ډېرې حوصلې انداز ځوابونه وویل شول.

د ورځې وروستی سفر پرينسکو د رنګ توليدي کمپني ته ځانګړی شوی و. محصلینو د یادې کمپنۍ پرمختللې ماشینري، تولیدي فلانټونه او د کیفیت کنټرول سیستمونه له نږدې ولیدل. محصلينو ته د کمپنۍ مسؤلینو د رنګ تولید تخنیکي پروسې، د موادو ترکیب، د کیفیت ارزونې معیارونه او د تولید مرحلې په مفصل ډول تشریح کړې.

محصلینو په دې سفر کې په عملي ډول درک کړه چې، معیاري تولید، تخنیکي مدیریت او کیفیت کنټرول د صنعتي بریا اساسي ستنې دي. د مسؤلینو له لوري د محصلینو پوښتنو ته په علمي او حوصله‌مند ډول ځوابونه وړاندې شول، چې د محصلینو د پوهې د پراختیا لپاره خورا ګټور تمام شول.

په ټوله کې، د نن ورځې علمي او عملي سفر د محصلینو لپاره د پوهې، تجربې او الهام یوه ژوندۍ بېلګه وه. دغه سفر وښودله چې افغانستان، په ځانګړې توګه کندهار، د صنعت، تولید او علمي پرمختګ په برخه کې د نوي بدلون پر لور روان دی او ځوان نسل کولای شي د علم او عمل په مټ د هېواد د اقتصادي ودې او صنعتي خودکفایۍ مهمه برخه وګرځي.
د يادونې وړ ده چې د ميرويس خان نيکه پوهنتون-زابل، اقتصاد پوهنځي محصلينو ياد علمي سفر سبا د پنجشنبې په ورځ پايته رسېږي.
درنښت
د اقتصاد پوهنځي نشراتي څانګه

19/05/2026

د ميرويس خان نيکه پوهنتون-زابل، د اقتصاد پوهنځي محصلينو د علمي او عملي سفر لومړۍ ورځ پایته ورسېده!

د ميرويس خان نيکه پوهنتون-زابل، د اقتصاد پوهنځي محصلینو د خپل علمي او عملي سفر لومړۍ ورځ د لاسته راوړنو، الهام او تجربو له نوې فضا سره پای ته ورسوله.
د نن ورځې پروګرامونه د عملي تجاربو، صنعتي پرمختګ څخه د خبراوي او مسلکي لیدلوري له پلوه د پام وړ او اغېزناک وو.

د ورځې لومړۍ برخه د کندهار پوهنتون اقتصاد پوهنځي په علمي چاپېریال کې ترسره شوه، چېرې چې د ميرويس خان نيکه پوهنتون اقتصاد پوهنځي محصلینو، د کندهار پوهنتون اقتصاد پوهنځي د څېړنو د دفاع په ځانګړې غونډه کې ګډون وکړ. دغه علمي ناسته د علمي استدلال، څېړنیزو میتودونو او اکاډمیکو بحثونو له پلوه د محصلینو لپاره یوه ارزښتناکه تجربه وه. وروسته د کندهار پوهنتون اقتصاد پوهنځي رئیس قدرمن پوهنیار عبدالله زيارمل د زابل پوهنتون محصلینو ته یو اغېزناک سیمینار وړاندې کړ چې، عنوان یې د اقتصاد په برخه کې د نوښتونو، مصنوعي ځیرکتیا (AI)، ډیجیټلي اقتصاد او راتلونکو مهارتونو په محور راڅرخېده.

په سیمینار کې ټینګار وشو چې نړۍ په بې ساري سرعت بدلېږي او راتلونکی د هغو کسانو دی چې د زده کړې، تطابق او نوښت وړتیا ولري. د مصنوعي ځیرکتیا رول، د معلوماتو پر بنسټ اقتصادي تحلیلونه، ډیجیټلي بانکداري، مالي سکتور کې ټکنالوژي، زرغون اقتصاد او د مهارتونو ارزښت د سیمینار له مهمو بحثونو څخه وو. همداراز یادونه وشوه چې په معاصر اقتصاد کې یوازې سندونه بسنه نه کوي، بلکې مهارتونه، ابتکارانه فکر او د ټکنالوژۍ سره بلدتیا د بریا اساسي عوامل ګڼل کېږي.

د سیمینار یوه په زړه پورې برخه دا وه چې، د نړۍ اقتصادي بدلونونه، د AI چټک پرمختګ، د ډیجیټلي اقتصاد پراختیا او د معلوماتو پر بنسټ تصمیم نیونه د راتلونکي اقتصاد اصلي ستنې وبلل شوې. ښاغلي پوهنيار زيارمل څرګنده کړه چې، د نن ورځې محصل باید یوازې د کتاب تر پاڼو محدود نه وي، بلکې د عملي تجربو، ټکنالوژۍ او نړیوالو بدلونونو له بهیر سره همغږی واوسي.

د ورځې دوهمه برخه د باور ټکنالوژي او انجنيرنګ فابريکې لیدنې ته ځانګړې شوې وه، چې د محصلینو لپاره یې د صنعت او تولید ژوندۍ نړۍ انځور کړه. محصلینو د فابریکې له بېلابېلو تولیدي برخو، اسمبلي لاین، تخنیکي تجهیزاتو او تولیدي پروسو څخه له نږدې لیدنه وکړه. د فابریکې مسؤلینو د تولید د مرحلو، ماشینري سیستمونو، کیفیت کنټرول او تخنیکي مدیریت په اړه هر اړخیز معلومات وړاندې کړل او د محصلینو پوښتنو ته یې په حوصله‌مندانه ډول ځوابونه وویل.

دغه لیدنه د محصلینو لپاره یوازې یو عادي صنعتي سفر نه و، بلکې د علم او عمل ترمنځ د پُل حیثیت یې درلود. محصلینو وکولای شول چې د تولید عملي بهیر، اداري همغږي، تخنیکي نوښتونه او صنعتي مدیریت په واقعي چاپېریال کې مشاهده کړي.

په ټوله کې، د نن ورځې علمي او عملي پروګرامونه د محصلینو لپاره د پوهې، تجربې او راتلونکو هیلو یوه نوې دريڅه وه. دغه سفر وښودله چې د هيواد ځوان نسل د علم، صنعت او نوښت پر لور پیاوړي ګامونه اخلي او کولای شي په راتلونکي کې د هېواد د اقتصادي او صنعتي ودې په برخه کې مهم رول ولوبوي.
درنښت
د اقتصاد پوهنځي نشراتي څانګه

19/05/2026

له کتابتونه تر فابريکې د علم، تجربې او نوښتونو پر لور عملي ګام!

په داسې حال کې چې د لوړو زده کړو بنسټونه د عملي زده کړو او علمي تجربو د پياوړتيا لپاره نه ستړې کېدونکې هڅې کوي، د ميرويس خان نيکه پوهنتون-زابل، اقتصاد پوهنځي د اداره تجارت او ملي اقتصاد څانګو محصلينو خپل علمي او عملي سفر په الهام‌بښونکي ډول پيل کړ. دغه سفر چې په (۱۴۰۵/۲/۲۹) نېټه، د سه شنبې ورځې په سهار رسماً پيل شو، د محصلينو د مسلکي پراختيا، عملي تجربو د ترلاسه کولو او مسلکي مهارتونو د پياوړتيا په موخه ترتيب شوی دی.

د ياد سفر په لړ کې به د کندهار پوهنتون د بېلابېلو پوهنځيو استادان او علمي کادرونه د ميرويس خان نيکه پوهنتون اقتصاد پوهنځي محصلينو لپاره ارزښتناک سيمينارونه وړاندې کړي، څو د بېلابېلو علمي برخو تجربې، نوښتونه او پرمختللې مفکورې له محصلينو سره شريکې شي. تمه ده چې دغه علمي پروګرامونه به د محصلينو فکري وده نوره هم پياوړې او د راتلونکي مسلکي لیدلوري لپاره به هغوی ته نوې لارې پرانيزي.

همداراز، د سفر يوه مهمه برخه به د کندهار پوهنتون کتابتون او د پوهنتون د بېلابېلو پوهنځيو څخه ليدنه وي، چېرته چې محصلين به د معاصرو علمي سرچينو، تدريسي امکاناتو او اکاډميکو فعاليتونو سره له نږدې بلدتيا ترلاسه کړي. دا ليدنې به د دوی د علمي تندې د خړوبولو ترڅنګ، د لوړو زده کړو د ارزښت په اړه درک لا ژور کړي.

د دې ستر علمي سفر بله ځانګړې برخه د کندهار ښار عينو مېنې صنعتي پارک او شمالي او جنوبي صنعتي پارکونو د بېلابېلو شرکتونو او توليدي فابريکو ليدنه ده. محصلين به هلته د مديريت، بازارموندنې، توليد، مالي چارو او سوداګريزو فعاليتونو عملي بهيرونه له نږدې مشاهده کړي. دغه عملي تجربې به د دوی نظري زده کړې په ژونديو او واقعي تجربو بدلې کړي او د راتلونکو مسلکي مسؤليتونو لپاره به يې لا پياوړي او چمتو کړي.

دغه علمي او عملي سفر نه يوازې د اداره تجارت او ملي اقتصاد څانګو د محصلينو لپاره يو عادي پروګرام نه دی، بلکې د پوهې، تجربې او پرمختګ پر لور يو لوی ګام بلل کېږي؛ داسې ګام چې د سبا ورځې مسلکي، بااستعداده او متعهد نسل به ترې الهام اخلي. تمه کېږي چې دا سفر به د محصلينو د فکري ودې، علمي پوخوالي او مسلکي برياوو لپاره يو نوی باب پرانيزي.
درنښت
د اقتصاد پوهنځي نشراتي څانګه

17/05/2026

نوماند پوهنیار سایل خپله دوهمه نړۍ واله څېړنیزه مقاله خپره کړه!
د علم، څېړنې او اکاډمیکو لاسته راوړنو هره بریا د یوه علمي بنسټ د پرمختګ، اعتبار او روښانه راتلونکي څرګندونه کوي؛ له همدې امله د اقتصاد پوهنځي لپاره د ډېر ویاړ او خوښۍ ځای دی چې د میرویس خان نیکه پوهنتون-زابل اقتصاد پوهنځي د اداره تجارت څانګې دروند استاد نوماند پوهنیار محمد اسمعیل سایل نړۍ واله علمي او څېړنیزه مقاله د کابل پوهنتون په معتبر نړۍ‌وال علمي ژورنال (JSSH) کې خپره شوې ده. دا ستره علمي لاسته راوړنه نه یوازې د نوموړي استاد شخصي بریا بلکې د اقتصاد پوهنځي او ټول پوهنتون لپاره د علمي تولید په زړه پورې ګام ګڼل کېږي.
یاده مقاله چې د کارکوونکو د ښکېلتیا (Employee Engagement) پر علمي موضوع راڅرخي، د ټولنیزې تبادلې تیورۍ (Social Exchange Theory) پر بنسټ ترسره شوې علمي څېړنه ده. په دې څېړنه کې د دندې ښکېلتیا (Job Engagement) او سازماني ښکېلتیا (Organizational Engagement) په جلا ډول ارزول شوي او د کارکوونکو ترمنځ د همکارۍ، متقابل ملاتړ، اړیکو او مسلکي پرمختګ اغېزې تحلیل شوې دي.
د مقالې د میتودولوژي له مخې، د څېړنې لومړني معلومات په کابل پوهنتون کې د ۱۳۳ تنو اداري او اکاډمیکو غړو څخه د پوښتنلیکونو له لارې ترلاسه شوي دي. د معلوماتو د تحلیل لپاره د Multiple Regression Analysis علمي میتود کارول شوی، چې په څېړنیز چاپیریال کې د یوې معیاري څېړنې څرګندونه کوي.
*د څېړنې پایلې ښيي چې د کارکوونکو ترمنځ متقابل ملاتړ او همکاري دواړه، د دندې او سازماني ښکېلتیا پیاوړې کوي او همدا ښکېلتیا د دندې رضایت او سازماني ژمنتیا په لوړولو کې مهم رول لري.* دغه علمي موندنې د افغانستان د اکاډمیکو بنسټونو لپاره ارزښتناک پیغام لري او د علمي او عملي مدیریت او انساني سرچینو د پرمختګ په برخه کې د پام وړ علمي زیاتونه ګڼل کېږي.
اقتصاد پوهنځی د نوماند پوهنیار محمد اسمعیل سایل دغه ستره علمي هڅه د علم، څېړنې او اکاډمیک پرمختګ روښانه مثال بولي. نوموړي استاد یو ځل بیا ثابته کړه چې د میرویس خان نیکه پوهنتون اقتصاد پوهنځي علمي کادرونه د هېواد د علمي ودې، څېړنیز اعتبار او نړیوال اکاډمیک حضور د پیاوړتیا لپاره په اخلاص او ژمنتیا کار کوي.
د اقتصاد پوهنځي مشرتابه، استادان او محصلین سایل صاحب ته د زړه له کومې ددې علمي نوښت په پار مبارکي وايي، د نوموړي نه ستړې کېدونکې علمي هڅې ستايي او هیله څرګندوي چې په راتلونکو وختونو کې هم د لا ډېرو نړیوالو علمي بریاوو شاهدان واوسو.
الله تبارک و تعالی دې سايل صاحب ته لا ډېر علمي ویاړونه، بریاوې او توفیق ور په برخه کړي.
درنښت
د اقتصاد پوهنځي نشراتي څانګه

Grounded in Social Exchange Theory (SET), this study investigates the factors and outcomes of employee engagement by distinguishing between job and organizational engagement. This study examines how employee communication, employee development, and co-supportive employee behavior influence key work....

12/05/2026

د اقتصاد پوهنځي استاد له نړۍوالې څېړنيزې مجلې تائید پاڼه تر لاسه کړه!
د ميرويس خان نيکه پوهنتون-زابل د اقتصاد پوهنځي لپاره د ویاړ او افتخار ځای دی چې د اداره تجارت څانګې تکړه استاد، ښاغلی رحمن ولي سهار، د Future Business Journal نړیوالې علمي مجلې له لوري د علمي مقالو د ارزونکي (Manuscript Reviewer) په توګه غوره شوی او خپله علمي وړتیا یې په نړیواله کچه ثابته کړې ده.

یاده مجله چې د Springer Nature له خوا خپرېږي او په نړیوالو علمي ډیټابېسونو لکه Scopus، Web of Science (ESCI) او DOAJ کې راجسټر ده، د نړۍ د معتبرو علمي خپرونو له ډلې شمېرل کېږي. په داسې یوه نړیوال علمي چوکاټ کې د یوه افغان استاد حضور او ونډه، نه یوازې د نوموړي شخصي بریا ده؛ بلکې د هېواد د لوړو زده کړو او علمي ټولنې لپاره هم ستر ویاړ ګڼل کېږي.
ښاغلي سهار د تجارت مدیریت، پایښت، ډیجیټلي بدلون او نوښت په برخو کې د علمي مقالو ارزونه کړې، لیکوالانو ته یې رغنده علمي نظریات وړاندې کړي او د نړیوالو علمي معیارونو د ساتنې په برخه کې یې ارزښتناکه ونډه اخیستې ده. له همدې کبله قدرمن سهار صاحب ته د Future Business Journal له لوري تصدیق پاڼه (Certificate) ورکول سوې ده.
د نوموړي دغه علمي فعالیتونه د دې څرګندونه کوي چې د ميرويس خان نيکه پوهنتون-زابل، اقتصاد پوهنځي علمي کادرونه د نړیوالو اکاډمیکو معیارونو د سیالۍ وړتیا لري او کولی شي د نړیوال علمي ډګر برخه وګرځي.
اقتصاد پوهنځی د استاد رحمن ولي سهار له دوامدارو علمي هڅو، نه ستړې کېدونکو خدمتونو او نړیوالو علمي لاسته راوړنو څخه د زړه له کومې مننه کوي او نوموړي ته د لا زیاتو بریاوو، علمي پرمختګونو او نړیوالو افتخاراتو هیله لري. موږ باور لرو چې د داسې ځوانو، متعهدو او علم‌پالو استادانو شتون به د افغانستان د علمي بنسټونو راتلونکی لا روښانه او پیاوړی کړي.
درنښت
اقتصاد پوهنځي نشراتي څانګه

07/04/2026

اسلامي هیوادونه دې د اسلامي اقتصاد د بنسټیز اصل (زکات) د پیاوړتیا لپاره عملي ګامونه واخلي،
د اقتصاد پوهنځي ملي اقتصاد څانګې استاد نوماند پوهنیار احسان الله سعد څېړنيزه مقاله د ((د عوايدو د نابرابر ویش په کموالي کې د زکات رول)) تر عنوان لاندې د کندز پوهنتون نړۍ وال ژورنال کې خپره شوه. څېړنه پدې موخه ترسره شوې وه ترڅو د عوايدو ويش د توپیرونو په کموالي کې د زکات اغېزناکتيا و ارزوي. له کتابتوني روش څخه په ګټې اخیستنې د څېړنې پایله څرګندوي چې، زکات د عوايدو د نابرابر ویش په کمولو کې مثبت اغېزناک رول لري. څېړنه وړاندیز کوي چې، اسلامي هیوادونه دې د اسلامي اقتصاد د بنسټیز اصل (زکات) د پیاوړتیا لپاره عملي ګامونه واخلي. ترڅو ورسره په ټولنه کې د عوايدو د نابرابر وېش کموالی وکړي.
د اقتصاد‌ پوهنځي مشرتابه او علمي کادر غړي ښاغلي سعد صاحب ته د يادې علمي لاسته راوړنې‌ له کبله یې شمېره مبارکي وايي او د څښتن تعالی ج په دربار کې ورته د لا برياليتوبونو دعا کوي.
درنښت
د اقتصاد پوهنځي، نشرانو څانګه
نېټه: ۱۴۰۵/۱/۱۸هـ ل - سه شنبه
https://edu.gov.af/ #/article/3566