What are the opening hours?

Monday 9am - 5pm Tuesday 9am - 5pm Wednesday 9am - 5pm Thursday 9am - 5pm Friday 9am - 5pm Saturday 9am - 5pm Sunday 3am - 5pm

https://www.facebook.com/369790536829637/

Sammy Said, Realty Street, Nashville, TN (2026)

09/02/2026

الحرب إيران رجعت والمواطن الأمريكي هو اللي هيدفع الفاتورة في محطة البنزين والسوبر ماركت والقرض العقاري

بعد فترة هدوء نسبي، حرب أمريكا وإيران دخلت جولة تصعيد قوية جدًا في الساعتين الأخيرتين. يومي 1 و2 سبتمبر شهدوا أكبر تبادل ضربات بين الطرفين من شهر يوليو، القوات الأمريكية ضربت أهدافًا عسكرية إيرانية، وإيران ردت بهجمات على قواعد ومصالح أمريكية وحلفاء أمريكا في المنطقة. الرئيس ترامب قال النهاردة إن الحملة الجديدة لن تطول، لكنه في نفس الوقت أكد إن أمريكا جاهزة لضربات إضافية لو إيران استمرت في التصعيد. المشكلة إن الحرب دي بقى تأثيرها بيوصل مباشرة لجيب المواطن الأمريكي، مش بس للأخبار.

خام برنت وصل حوالي 95.76 دولار للبرميل، بعد قفزة أكتر من 4 دولارات في جلسة واحدة، والسبب الرئيسي إن مضيق هرمز لسه في قلب الصراع، وهو الممر اللي بيعدي منه تقريبًا خُمس نفط وغاز العالم. متوسط سعر جالون البنزين في أمريكا وصل حوالي 4.12 دولار حسب AAA، ولو مضيق هرمز اتعطل أكتر، السعرين ممكن يزيدوا أكثر. ولما الطاقة تغلى، تكلفة النقل والصناعة والزراعة بتزيد ورا بعض، والغاز الطبيعي المسال في آسيا وصل فعلًا حوالي 23.20 دولار لكل مليون وحدة حرارية، أكتر من ضعف مستواه قبل الحرب. يعني حتى السلعة اللي ملهاش أي علاقة بإيران، تكلفتها بتتأثر بالحرب من بعيد.

وده بيرجّع التضخم للمشهد من جديد. في يوليو كان التضخم الأساسي Core CPI حوالي 2.5% سنويًا، وكانت فيه إشارات هدوء نسبي، لكن استمرار النفط عند 90 و95 دولار ممكن يقلب الحسابات. وهنا بييجي الجزء اللي هيوجعك فعلًا لو بتفكر تشتري بيت أو تعمل ريفاينانس: عائد سندات الخزانة الأمريكية لعشر سنوات وصل حوالي 4.8%، أعلى مستوى تقريبًا من 2023، وفوائد المورتج بتتحرك مع سوق السندات مش بس مع قرار الفيدرالي. آخر رقم رسمي أسبوعي من Freddie Mac كان 6.66% لمورتج 30 سنة، وبعض مؤشرات السوق اليومية بتحط متوسط القرض التقليدي قرب 6.8%. يعني لو العوائد فضلت قرب الـ5%، صعب نتخيل انخفاض حقيقي ومستدام في الفوائد، بل العكس وارد. رئيس الفيدرالي كيفن وارش قال مؤخرًا إن البنك المركزي ممكن يحتاج يرفع الفائدة تاني لو التضخم ما رجعش بثقة لهدف الـ2%. وهنا المفارقة اللي واقع فيها الرئيس ترامب: هو عايز فوائد أقل عشان يحرك الاقتصاد والعقارات، لكن ارتفاع النفط بسبب الحرب اللي هو نفسه قرر يخوضها ممكن يخلي الفيدرالي أكثر تشددًا بدل ما يريحه.

أما الذهب فقصته أغرب شوية. المنطقي إن الحروب تدعم الذهب كملاذ آمن، لكنه في الأيام الأخيرة نزل رغم الحرب لأن الدولار والعوائد ارتفعوا وتوقعات رفع الفائدة زادت، قبل ما يرتد النهاردة بأكتر من 1% لما الدولار والعوائد تراجعوا شوية. يعني الذهب دلوقتي متشدد بين قوتين متعاكستين، الخوف بيشده لفوق والفايدة المرتفعة بتشده لتحت، والكفة اللي هتكسب هي اللي هتحدد اتجاهه الجاية.

طيب السؤال الحقيقي: قرارات ترامب في حرب إيران كانت ناضجة ومحسوبة ولا فيها تسرع والشعب الأمريكي بيدفع التمن؟ الحقيقة مش أبيض وأسود خالص. الحصار البحري الأمريكي نجح فعلًا في خنق صادرات النفط الإيرانية، اللي نزلت من حوالي مليوني برميل يوميًا في مارس لحوالي 220 لـ255 ألف برميل يوميًا في أغسطس، وإيران اتعرضت لضربات شديدة في منشآتها العسكرية وقدراتها الصاروخية والبحرية، فمينفعش نقول إن الحرب ما حققتش حاجة. لكن في المقابل، فيه مشكلة حقيقية في التخطيط لما بعد الضربة الأولى. الحرب بدأت 28 فبراير كعملية كان المفروض تكون قصيرة، وإحنا دلوقتي دخلنا الشهر السابع، وإيران لسه موجودة وحكومتها لسه قايمة ومضيق هرمز لسه مصدر خطر على الاقتصاد العالمي، ورويترز وصفت الوضع بعد ستة شهور بأنه حالة جمود مكلفة. حتى مخزون الذخائر الأمريكي بدأ يتأثر، والإدارة طلبت من الكونجرس في يونيو حوالي 87.6 مليار دولار تمويل إضافي، منها أكتر من 67 مليار مرتبطة مباشرة بالعمليات ضد إيران.

المشكلة الحقيقية مش إن ضرب إيران كان قرارًا بلا مبرر، المشكلة إن أي رئيس بيدخل حرب لازم يسأل نفسه قبل أول صاروخ: إيه الهدف النهائي، وهتاخد قد إيه، وهتخرج منها إزاي، وهيحصل إيه للنفط لو إيران قفلت هرمز، وهتكلف قد إيه، ومخزون الذخائر كافي لو حصلت أزمة تانية بالتوازي مع الصين أو روسيا. والأهم بالنسبة لك إنت كمواطن عادي: هتدفع قد إيه زيادة في محطة البنزين والسوبر ماركت والقرض العقاري. لأن النجاح العسكري لو صاحبه بنزين فوق 4 دولارات وفايدة مورتج قرب 7% وتضخم راجع يعلو، لازم نحسب المكسب والخسارة مع بعض مش نتف*ج على المكسب لوحده.

فيه منطق استراتيجي واضح ورا بعض القرارات، خصوصًا منع إيران من امتلاك سلاح نووي وحماية الملاحة والضغط على تمويل الحكومة الإيرانية، لكن تحويل عملية كان المفروض تكون قصيرة لحرب مستمرة للشهر السابع من غير تسوية نهائية، ومع ارتفاع تكلفة الطاقة والاقتراض، بيكشف إن بعض تقديرات البداية كانت متفائلة أكتر من اللازم. فمش دقيق نقول كل قرارات الرئيس ترامب متهورة، ومش دقيق برضه نقول كلها كانت محسوبة ونجحت زي ما اتخطط لها بالظبط. الاختبار الحقيقي مش عدد الأهداف اللي اتضربت، الاختبار الحقيقي هو هل أمريكا آخر الحرب هتبقى أكثر أمانًا وأقوى اقتصاديًا وبثمن يستاهل، والحكم النهائي على ده لسه بدري عليه، لكن الفاتورة الاقتصادية بدأت تتحصل من دلوقتي، وإنت اللي بتدفعها من غير ما تكون طرف في الحرب أصلًا.

مصطلحات مهمة: Brent هو خام برنت، أهم سعر مرجعي للنفط عالميًا. عائد سندات الخزانة لعشر سنوات له تأثير مباشر وقوي على فوائد المورتج. Core CPI هو التضخم بعد استبعاد الغذاء والطاقة الأكثر تقلبًا.

تابعنى / Follow me for more
شكرا ليكم
اخوكم سمسعيد
615-290-7758

#سمسعيد

09/01/2026

ترامبقها ع الكل
عقارات ترامبقها
بورصه ترامبقها
اسعار سلع واقتصاد وحتى اشقائنا المنياويه اللى شايلين البلد🤷‍♂️ترامبقهم🙂

09/01/2026

لقاح سرطان يتصنع مخصوص لكل مريض.. خطوة ممكن تغير مستقبل علاج السرطان

خبر مهم اتعلن عنه يوم 19 أغسطس 2026، ويمكن يكون من الأخبار اللي بعد كام سنة نبص لها ونقول من هنا بدأت مرحلة مختلفة في الحرب الطويلة ضد المرض اللعين اللي مايتسماش. شركتا Moderna وMerck أعلنوا نجاح تجربة كبيرة من المرحلة الثالثة لعلاج شخصي للسرطان باستخدام تكنولوجيا الـ mRNA، والنتيجة كانت إيجابية لدرجة تستاهل فعلًا نقف نفهم إيه اللي حصل بالظبط.

التجربة، اللي معروفة باسم INTerpath-001، شملت 1,137 مريض عندهم مراحل عالية الخطورة من سرطان الجلد، وكان الورم عندهم اتشال بالكامل بالجراحة. بعد الجراحة، مجموعة من المرضى أخدوا دواء المناعة المعروف Keytruda مع العلاج الجديد Intismeran Autogene، المعروف كمان باسم V940، وتمت مقارنة النتائج بمرضى أخدوا Keytruda لوحده. النتيجة إن إضافة العلاج الشخصي الجديد حققت تحسنًا واضحًا ومهم إحصائيًا في منع أو تأخير رجوع السرطان، وكمان في منع أو تأخير انتشاره لأماكن بعيدة في الجسم، حسب ما أعلنته الشركتان.

اللي شدني في الموضوع مش النتيجة بس، إنما الطريقة اللي العلاج بيتعمل بيها. إحنا متعودين إن شركة الدواء تصنع دواء واحد لملايين المرضى، لكن هنا الموضوع مختلف تمامًا. بياخدوا عينة من ورم المريض نفسه، ويحللوا الطفرات الجينية الموجودة فيه، ويحددوا العلامات المميزة للخلايا السرطانية عند الشخص ده، وبعدها بيتصنع علاج مخصوص ممكن يحمل تعليمات لما يصل إلى 34 هدف مختلف من الورم، علشان يدرب جهاز المناعة يتعرف على الخلايا السرطانية ويهاجمها لو حاولت ترجع. يعني بدل ما العلماء يدوروا على مفتاح واحد يفتحوا بيه كل الأقفال، بيصنعوا مفتاح مخصوص لقفل السرطان الموجود عند كل مريض. ودي يمكن أهم نقطة في الخبر كله، لأننا مش بنتكلم عن لقاح واحد هيتباع في الصيدلية وياخده أي مريض، إحنا بنتكلم عن اتجاه جديد ناحية علاج بيتفصل على البصمة الجينية لورم كل إنسان. ومش بنتكلم عن تجربة معملية صغيرة، دي مرحلة ثالثة، وهي من أهم وأكبر المراحل اللي بيمر بيها أي علاج قبل ما يتقدم للموافقات التنظيمية.

بس لازم نفرح بالخبر من غير ما نبيع للناس أمل أكبر من حجمه الحقيقي. لحد دلوقتي محدش اكتشف علاج يشفي كل أنواع السرطان، والعلاج ده لسه تجريبي وماخدش موافقة FDA، والنتيجة اللي اتعلنت تخص تحديدًا مرضى الميلانوما عالية الخطورة بعد إزالة الورم بالجراحة. وكمان الشركتان أعلنوا إن التجربة حققت أهدافها الرئيسية من غير ما ينشروا الأرقام التفصيلية الكاملة بعد، وده متوقع يحصل في مؤتمر طبي قريب.

اللي بيفرح فعلًا إن العلماء مش واقفين عند سرطان الجلد. نفس التكنولوجيا بيتم اختبارها بالفعل على أنواع أخرى من السرطان، منها الرئة والكلى والمثانة، وبالتالي نجاحها في الميلانوما ممكن يدي دفعة قوية لفكرة العلاج الشخصي للسرطان كلها. هل ده معناه إننا انتصرنا على السرطان؟ لسه بدري جدًا نقول كده. لكن معناه إن البشر نجحوا في خطوة مهمة، إنهم ياخدوا البصمة الخاصة بورم إنسان ويصنعوا علاجًا مخصوصًا يساعد جهازه المناعي يتعرف على عدوه. ولو الدراسات القادمة أثبتت إن نفس الفكرة تنجح مع أنواع أخرى من الأورام، ممكن خلال السنوات القادمة نشوف تغيير كبير في مفهوم علاج السرطان نفسه. بدل سؤال إيه علاج سرطان الرئة أو الجلد أو الكلى، ممكن السؤال في المستقبل يبقى إيه البصمة الجينية لورم المريض ده وإزاي نصنع العلاج المناسب ليها.

السرطان لسه عدو صعب، والطريق لسه طويل، لكن العلم كل يوم بياخد منه حتة جديدة من الأرض، ودي المرة خبر يستاهل نفرح بيه. ربنا يشفي كل مريض ويقوي كل إنسان بيحارب المرض ده، ويعزي كل أسرة فقدت إنسان غالي بسببه.

تابعنى
Follow me for more

شكرا ليكم
اخوكم سمسعيد
615-290-7758

مصطلحاتك بالعربي والإنجليزي: Phase 3 يعني المرحلة الثالثة من التجارب السريرية، Neoantigen يعني علامة جينية مميزة على الخلية السرطانية، Recurrence-Free Survival يعني البقاء من غير رجوع للمرض، Adjuvant Therapy يعني علاج مكمل بعد الجراحة.

كتاب تقراه يزيد وعيك: The Emperor of All Maladies لسيدهارثا موكرجي، سيرة ذاتية للسرطان نفسه كمرض، وبيشرح إزاي العلم اتطور في مواجهته على مدار قرن.

#سمسعيد #صحة #علم #سرطان

09/01/2026

اللعب شكله يسخن والحرب بتكبر وضرب ايران بيزيد بشكل غير متوقع وعناد ايرانى مثير للتعجب
ترامب من شويه هدد ايران بالنووى بشكل غير مباشر وقال على صفحته بموقع تروث ميديا قال:

الولايات المتحدة، وإحنا بنتكلم دلوقتي، بتضرب أهداف إيرانية بالقرب من مضيق هرمز. الضربات كبيرة وقوية، وجاية ردًا على محاولة الإيرانيين الفاشلة لزرع ألغام بحرية في المضيق، واللي حاليًا مفيهوش أي ألغام، لأنها كلها اتشالت أو تم تفجيرها بالكامل.

وده كمان رد على إطلاق الإيرانيين 8 صواريخ على قاعدتنا العسكرية في الأردن، والـ8 صواريخ تم إسقاطهم بنجاح.

ولو إيران، الدولة الفاشلة، ردت على الهجوم ده، واللي إحنا شايفينه مبرر تمامًا، هتتعرض لضربة تانية أقوى وأعنف بكتير.

لكن حتى الضربة دي مش هتكون أكبر ضربة من الضربات اللي عندنا. الضربة الأكبر لسه مستنية، ولما تخلص، مش هيتبقى غير القليل جدًا من جمهورية إيران الإسلامية.
امضاء:
الرئيس دونالد جيه ترامب

نحن نتمنى السلام للعالم ولا يتئذى أى انسان ولا اى طفل برىء ونتمنى جميع الاطراف تراجع نفسها، الحياه ثمينه وغاليه على الماس اللى بتحب الحياه لكنها رخيصه فى عيون المساكين المغيبين والضحايا اطفال فى عمر الزهور وشباب ابرياء وتدفع الشعوب ثمن غطرسة وغرور القاده وعدم فهمهم وغطرستهم

الله ستار ويسترها مع العالم كله ومعى كل محبى الحياه

اخوكم
سمسعيد

09/01/2026

امريكا تختلف فى التعاملات تماماً
ماتديش عربون لحد ماتعرفوش ومهم تسأل على سمعته فى التعاملات سواء سكن أو شغل، ولو انت صنايعى ماتشتغلش عند حد ماتعرفوش فتره طويله قوى من غير ماتاخد جزء من أجرتك الا لو كنت اتعاملت معاه وبينكم ثقه ومجربه.
طبعاً محدش هيديك فلوس قبل ماتبدأ، لكن بعد ماتبدأ وتعمل نص الشغل لازم مهم فيه حساب واضح، لأن للأسف فيه بعض الناس هبيده وشهوة الفلوس عندهم عاليه ومابترحمش ظروف حد، قشاشين حتى لو اللى قدامهم ميت هينهبوه بدون شفقه ولا عندهم رحمه
ومبدأهم الوحيد فى الحياه “اللى يطول فلوس التانى بيدهسها”، الفلوس عمتهم وأبوهم وخالتهم. والحق يتقال مش بيقصروا فى النهب وممكن يبجحوا كمان لو طالبت بحقك ويتعاملوا ولا كانهم واكلين حق الناس.
طبعاً مش كل الناس كده، بالعكس معظم الناس محترمه، لكن النسبه الصغيره دى مخليه شكلنا وحش قدام الجاليات التانيه.
سمعنا عن اللى ركب تكييف ببلاش وهرب من البيت ساعة الدفع، واللى واخدها سبوبه يشغل كذا واحد أسبوعين تلاته وبعدين يمشيهم بحجة إن ده كان تدريب وما نفعوش، واللى ما دفعش للصنايعيه، واللى نصب فى شراكات بيزنس. فالحرص مهم وولاد الحرام ماسابوش حاجه لولاد الحلال.

ولو شغال موظف فى مطعم مثلاً أو كاشير أو غيره، ماتنساش نفسك فى الشغل من غير ماتقبض. اعرف من الأول نظام القبض وميعاده، ولو الوقت طول وبدأت المماطله فى أجرتك يبقى لازم الفار يلعب فى عبك، لأن ممكن تكون شغال مع واحد ابن تيت عملها مع ناس قبلك، لاعنده ضمير ولا بيرحم، وأكيد كل واحد بياخد جزاؤه من ربنا فى الوقت المناسب.

وقوانين التحرش هنا قاسيه وحراقه ولو اتقفشت اللى كنت بتفكر تعمله هيتعمل فيك، فغمض عينيك عنهن واهدى وكل عيش انت ماشى على الحركرك وبالتلصيم وربنا يسترها عليك، خد الورق وركز فى رزقك وبلاش وجع قلب مالوش لازمه.

وهنا مفيش عشم بزياده. اللى هتعشم فيه زياده ممكن يعرفك يعنى إيه خذلان ويصدمك، فخلى عشمك الكبير فى اتنين، ربنا ونفسك، وبعدهم الناس على حسب المواقف والعشره.

وصاحبك اللى نازل معاك من الطياره؟ خد بالك بقى من الحته دى 😂 ممكن بمجرد نزولكم من الطياره يتحول من صاحب لمنافس. تقولى ليه ده حبيبى؟ 🥹 أقولك لأن سلو البلد اللى هناك كان صاحب وحبيب، لكن هنا ممكن يبدأ يشوفك منافس لأنه بدأ معاك على نفس خط البدايه فى ماراثون الغربه. والكلام ده ممكن يكون فى دماغه هو بس حتى لو انت مركز فى حالك. هتلاقيه يقارن نفسه بيك، انت بتشتغل فين؟ بكام؟ ورقك وصل لفين؟ عربيتك إيه؟ ساكن فين؟ بتشتغل كام ساعه؟ يا أخى هو انت اشتغلت كام ساعه النهارده يا أبو الصحاب؟ 😂 ولو انت اتقدمت عنه ممكن الموضوع يتحول لغيره ومشاكل.

مش معنى كده تقطع أصحابك طبعاً، لكن ماتحكيش كل حاجه، والتزم الصمت فى خصوصياتك وخططك وفلوسك وشغلك. سكتم بكتم. وزى ما قلتلك من الأول ماتعشمش زياده علشان ماتتخذلش.

ولما تطلب من حد خدمه أو معروف اتوقع احتمالية الرفض قبل الموافقه، لأن النظام هنا قاسى عليه وعليك وكل واحد عنده حساباته ومسؤلياته. وأنا شخصياً أنصحك تبعد قدر الإمكان عن الشراكات الماليه اللى مالهاش ورق واضح، وماتضمنش حد فى قرض، وماتحطش اسمك مع حد فى حساب بنك لمجرد العشم، وماتضمنش حد فى شقه، وماتحطش حد على تأمين عربيتك إلا وانت فاهم كويس جداً انت بتعمل إيه ومسؤوليتك إيه. ليه؟ لأن الشقه ممكن تتبهدل وتتسابلك وتلبس انت فى آلاف الدولارات، أو يحصل حادث والتأمين يعلى أو تحصل نزاعات، وفى الآخر تخسر فلوسك وصاحبك. لو بتحب حد وخايف الشيطان يدخل بينكم، ابعد الفلوس والضمانات عن العلاقه. ولو هو محترم هيفهم، ولو زعل من رفضك زعله صغيره النهارده أرحم من خناقه كبيره بكره.

👈 واه كمان حاجه مهمه.. لا تسلف ولا تستلف إلا فى أضيق الحدود وللضروره وفقط لو انت قادر تتحمل إن الفلوس ماترجعش. لأن السلف فى بدايته عسل ولما تيجى تطالب بيه بيبقى مرار واحراج وسلبيه زى السم على القلب، وممكن تخسر صاحبك وفلوسك معاه. رفض السلف فى البدايه وزعله صغيره أرحم من نزاعات السلف بعدين.
وماتنساش المثل اللى بيقول: ادينى فلوس أبوس إيدك، ولما تيجى تطالبنى بيها تبوس رجلى 😂

وفى نوع سلف مخصوص لازم نحط عليه كشاف لوحده: “ماتسلفنى يا أبو الصحاب أفتح بيزنس، وهبقى غنى وشهرين وأديهالك”. تروح مديله تحويشة عمرك، البيزنس يخسر، فلوسك تتبخر، وهو أصلاً خسر واتداين، والطم انت بقى يا صابر 😂 راحت فلوسك وطارت ولا فى العش. ودى مشكله كلاسيكيه حصلت مليون مره ولسه بتحصل. هو البيزنس بيتضمن؟ اللى عايز يفتح بيزنس لازم يبقى فاهم إن فيه احتمال مكسب واحتمال خساره، وماينفعش يخاطر بفلوس الناس وكأن المكسب مضمون.

وماتحكمش على حد بسرعه. اوعى من أول أسبوع تقول فلان ده أحسن واحد قابلته فى حياتى أو فلان ده أوحش بنى آدم. استنى لما تعاشر الناس وتشوفهم وقت الفلوس، وقت الخلاف، وقت الضيقه ووقت المصالح. اللى انت شايفه حلو ممكن بعدين تكتشف العكس، واللى انت أخدت عنه انطباع وحش ممكن يفاجئك ويبقى أول واحد يسندك فى الطوارئ. واللى يقدملك نصيحه اسمعله وماتفهموش غلط، محدش كبير على النصيحه وكلنا بنتعلم، والشخص المحترم ابن الأصول يسمع ويفكر ويشكر اللى حاول يوعيه حتى لو فى الآخر خد قرار مختلف.

نيجى بقى لإرسال الفلوس لمصر 😂 ابعت بعقل وحكمه وماتستعجلش تفتح على نفسك مليون فتحه. مش لازم من أول شهرين تورى الناس نجاحاتك اللى مكسره الدنيا وانت هنا أصلاً متمرمط. لأنك لو عملت كده ممكن اللى هناك يفتكرك عديت وبقيت وزير الماليه الأمريكى 😂 وانت هنا يوم فيه وعشره مافيش، إيجار وعربيه وتأمين وأكل وفواتير وحاجات بتطلعلك من تحت الأرض. خلى معاك احتياطى للظروف وساعد أهلك على قد قدرتك طبعاً، لكن ماتحطش نفسك تحت ضغط إنك لازم تثبت للناس إنك نجحت. مسير اللى يتغرب يفهم إن الدولارات اللى بتتصور حلوه فى الصوره وراها مرار طافح علشان تتجاب.

👈 وأخيراً يا محترم، الكلام ده كله رغم إن فيه سلبيات مش معناه أبداً إن كل الناس كده. معظم الناس فى الجاليه ناس محترمه جداً وناجحه وتخاف ربنا، والناس السيئه نسبه قليله، والدنيا مش ضلمه ولا حاجه. أنا بس بسلط الضوء على الحاجات الوحشه لأنها الحاجات اللى ممكن تأذيك وانت جديد ولسه ماتعرفش النظام ولا الناس.

وأمريكا بلد رأس ماليه، الأرقام فيها بتحكم حاجات كتير جداً ومحدش هيقف جنبك لمجرد إن ظروفك صعبه، لكن فى المقابل لو انت دغرى، بتشتغل بجد، بتحترم القانون، بتتعلم من غلطك وبتفهم البلد بسرعه، فرصتك فى النجاح كبيره جداً.

الله معاكم ويسندكم ويوفقكم، ومسيركم تفهموها وتستقروا. اصبروا وماتستعجلوش، ساعات ف*ج ربنا بيكون أقرب ما يكون لما الدنيا تضيق.

تحياتى
أخوكم سامى سعيد

08/31/2026

الفايده بتعلى⬆️

الرئيس الأمريكي دونالد ترامب قال للصحفيين في المكتب البيضاوي إنه يكن احترامًا كبيرًا لرئيس الاحتياطي الفيدرالي كيفن وارش، وإن وارش هيتصرف صح فيما يخص قرار الفائدة القادم. الكلام ده مهم جدًا لأنه جه بعد أيام قليلة من خطاب وارش في مؤتمر جاكسون هول، اللي أعاد فيه تثبيت هدف التضخم عند 2% ووصفه بإنه هدف ثابت مش قابل للتفاوض، ولمّح بوضوح إن رفع الفائدة وارد لو التضخم فضل مستني.

المفارقة إن ترامب نفسه لسه على نفس الموقف من زمان، وبيقول علنًا إن الفائدة الأمريكية مرتفعة أكتر من اللازم، وإن أمريكا المفروض يكون عندها أقل فائدة في العالم بفارق كبير. يعني عندنا رئيس عايز الفائدة تنزل، ورئيس بنك مركزي بيلمح إنها ممكن تعلى، ومع كده ترامب اختار يمدح وارش علنًا بدل ما يهاجمه زي ما كان بيعمل مع رئيس الفيدرالي السابق جيروم باول، اللي كان بينه وبين ترامب خلافات حادة وعلنية بسبب نفس القصة.

والمفارقة الأكبر إن ترامب كان متوقع من وارش أسلوب مختلف تمامًا عن باول، لكن الأرقام حاليًا بتحط الاتنين تقريبًا في نفس المكان، لأن اللي بيحكم قرار أي رئيس فيدرالي مش رغبة الرئيس، لكن التضخم نفسه. ومؤشر PCE، وهو المقياس المفضل عند الفيدرالي، جه في يوليو عند 3.7% سنويًا، بينما التضخم الأساسي استقر عند 3.3%. الرقمين لسه بعيدين عن هدف الـ2%، وده اللي بيخلي أي مسؤول في مكان وارش حذر من إعلان أي انتصار مبكر على التضخم، أيًا كانت توجهاته الشخصية.

الأسواق فهمت رسالة وارش بجدية، واحتمالات رفع الفائدة في اجتماع سبتمبر ارتفعت في سوق العقود الآجلة من حوالي الثلث لأكتر من 40%، وهي نسبة مش نهائية لكنها كافية إنها تخلي كل تقرير اقتصادي جاي مهم. الاختبار الحقيقي هيكون تقرير الوظائف وبيانات التضخم القادمة قبل اجتماع الفيدرالي في 15 و16 سبتمبر، واللي هيحدد هل وارش هيتحرك فعلًا برفع الفائدة، ولا ضعف سوق العمل هيخليه يفضل ثابت في مكانه.
عمليًا، طالما التضخم فوق مستوى معين، احتمالية خفض الفائدة بتفضل بعيدة، وغالبية المحللين بيربطوا أي حديث جدي عن خفض الفائدة بضرورة نزول التضخم لمستوى أقرب لـ2.5% أو أقل بشكل مستقر، مش مجرد تحسن مؤقت في شهر واحد. وده معناه إن أي حد مستني الفائدة تنزل عشان يشتري بيت أو يمول مشروع، القصة ممكن تاخد وقت أطول مما هو متوقع، وده مش موقف سياسي، ده رقم بيتحكم فيه سعر السلعة في السوق.

تابعنى
Follow me for more

شكرا ليكم
اخوكم سمسعيد
615-290-7758

مصطلحاتك بالعربي والإنجليزي: PCE يعني مؤشر نفقات الاستهلاك الشخصي، Core PCE يعني التضخم الأساسي بدون الطاقة والغذاء، FOMC يعني لجنة السوق المفتوحة الفيدرالية، Rate Hike يعني رفع سعر الفائدة.

كتاب تقراه يزيد وعيك: The Alchemists لنيل إيرفين، كتاب بيشرح إزاي البنوك المركزية بتاخد قرارات بتأثر على حياة الناس اليومية.

#سمسعيد #الفائدة

08/31/2026

آخر أخبار وقرارات الرئيس ترامب خلال أسبوع

1. الرئيس ترامب هدد يوم الأحد بإبلاغ لجنة الاتصالات الفيدرالية عن مذيعة NBC كريستين ويلكر، بعد ما وصفت سجل تأييده للمرشحين في الانتخابات التمهيدية بإنه "نتائج متفاوتة". الرئيس رد بإنه حقق نسبة نجاح تقترب من المية بالمية في مجلس الشيوخ وحوالي 98% في مجلس النواب، وطلب من رئيس اللجنة برندان كار التعامل مع الموضوع بجدية. NBC دافعت عن مذيعتها. الجدل هنا أكبر من واقعة واحدة، لأنه بييجي ضمن سلسلة ضغوط مستمرة من الرئيس على شبكات إعلامية بتنتقده، وسط مخاوف حقيقية من استخدام سلطة تراخيص البث كأداة ضغط على الصحافة.

2. وزارة الأمن الداخلي طرحت رسميًا يوم 24 أغسطس قاعدة مقترحة برسم إضافي 103,265 دولار على كل طلب H-1B خاضع للسقف السنوي. الوزارة بتتوقع تحصيل حوالي 8.8 مليار دولار سنويًا لو اتطبق الرسم على الـ85 ألف طلب المعتادة. النسخة السابقة من الرسم، اللي كانت 100 ألف دولار، سقطت في المحكمة يونيو اللي فات، فالإدارة دلوقتي بتحاول تمرره بسلطة قانونية مختلفة. الموضوع هيأثر بشكل مباشر على شركات التكنولوجيا وأصحاب الأعمال اللي بيستقدموا كفاءات من برة.

3. الخلاف التجاري مع كندا وصل لمرحلة تصعيد قوية. الرئيس هدد برسوم تصل لـ50% على منتجات كندية من ضمنها السيارات والشاحنات وقطع الغيار لو ما تم التوصل لاتفاق، وكندا ردت برسوم مماثلة على منتجات أمريكية. وفي تصعيد لفظي زاد من حدة الموقف، الرئيس تكلم عن تسمية بحيرة أونتاريو باسم جديد ووصف رئيس الوزراء الكندي بلقب ساخر. الموضوع مهم اقتصاديًا لأن صناعة السيارات في البلدين متشابكة جدًا، وأي تصعيد فعلي ممكن يوصل تأثيره لسعر العربية اللي هتشتريها في أمريكا نفسها.

4. مع اقتراب انتخابات التجديد النصفي، الرئيس وحلفاؤه كثفوا الحديث عن تصويت غير المواطنين، وبيدفع باتجاه قانون يفرض إثبات موثق للجنسية عند التسجيل للتصويت. الأرقام اللي بتُستخدم لإثبات اتساع المشكلة محل خلاف من ناحية المنهجية العلمية، وتصويت غير المواطنين في الأصل غير قانوني ونادر جدًا في الإحصائيات الرسمية. الملف ده مرشح يبقى من أكتر ملفات نوفمبر 2026 جدلًا.

5. بالتوازي، محكمة فيدرالية في بوسطن أوقفت مؤقتًا قواعد جديدة لهيئة البريد كانت هتقيد تسليم أوراق التصويت بالبريد، بعد ما المحكمة العليا كانت سمحت بالأسبوع اللي فات بالمضي في القرار من الناحية الإجرائية. الأمر لسه معلق، وهيتحدد مصيره في جلسة 3 سبتمبر.

6. في واقعة إنسانية أثارت جدل واسع، رحّلت الإدارة يوم السبت عشرات الأشخاص لجمهورية أفريقيا الوسطى، من ضمنهم شاب أفغاني في العشرينيات كان قاضي هجرة منحه حماية من الترحيل لأفغانستان خوفًا عليه من طالبان. إخوته ساعدوا الجيش الأمريكي، وواحد منهم كان طيارًا دربته أمريكا وقُتل على يد طالبان، حسب محاميته ووثائق اطلعت عليها وكالة أسوشيتد برس. الرحلة نفسها ضمت أفغان وإيرانيين وأشخاص من دول تانية.

7. بيانات جديدة كشفت إن جهاز الهجرة والجمارك (ICE) اعتقل 49,571 شخص خلال يوليو، أعلى رقم شهري في الولاية الثانية للرئيس، بزيادة 15% عن يونيو و70% عن فبراير. ولاية تكساس وفلوريدا وحدهم شكلوا تقريبًا 20 ألف من إجمالي الاعتقالات.

8. رويترز نقلت عن مسؤولين في بنوك مركزية أوروبية خرجوا من مؤتمر جاكسون هول قلقهم من عدم استقرار العلاقة الاقتصادية مع واشنطن، ومن تدخلات وزارة الخزانة الأمريكية الأخيرة في أسواق العملات والسندات، في وقت بيحاول فيه الفيدرالي الأمريكي نفسه السيطرة على التضخم.

لو جمعنا خيوط الأسبوع، هنلاقي إن أكتر ملفين هيحددوا شكل الأشهر الجاية هما معركة الهجرة اللي بتتصاعد على أكتر من مستوى، ومعركة الثقة بين الإدارة ومؤسسات زي الإعلام والقضاء والبنوك المركزية. وكل خيط فيهم له تأثير حقيقي على حياة ناس عادية، سواء مهاجر مستني قرار، أو ناخب هيصوت في نوفمبر، أو مستثمر بيراقب السوق.

تابعنى
Follow me for more

شكرا ليكم
اخوكم سمسعيد
615-290-7758

مصطلحاتك بالعربي والإنجليزي: FCC يعني لجنة الاتصالات الفيدرالية، H-1B Visa يعني تأشيرة العمالة المتخصصة، Deportation يعني الترحيل، Mail-in Voting يعني التصويت بالبريد.

كتاب تقراه يزيد وعيك: How Democracies Die لستيفن ليفتسكي ودانييل زيبلات، كتاب مهم لفهم إزاي المؤسسات بتتآكل تدريجيًا مش بانقلاب فجأة.

#سمسعيد #أمريكا

08/31/2026

أمريكا وإيران يتبادلوا الضربات تاني، الهدوء اللي عمره شهر انكسر النهارده

بعد فترة هدوء نسبي دامت حوالي شهر، الجبهة بين أمريكا وإيران اشتعلت تاني يوم الأحد الموافق 30 أغسطس. القوات الأمريكية ضربت منصتي إطلاق إيرانيتين في جزيرة لارك، اللي بتقع عند مضيق هرمز، وده أول ضربة أمريكية معلنة داخل الأراضي الإيرانية من أواخر يوليو.

القيادة المركزية الأمريكية قالت إن قوات من الحرس الثوري كانت بتجهز صواريخ لإطلاق ألغام بحرية داخل مضيق هرمز، وإن الضربة جت في وقت حساس لأن القوات الأمريكية كانت لسه خلصت الأسبوع اللي فات عملية تطهير الممرات الملاحية في المضيق من الألغام. يعني الهدف المعلن كان حماية حركة الملاحة الدولية، مش بداية جولة تصعيد جديدة، حسب الرواية الأمريكية.

لكن إيران شافت الموضوع من زاوية تانية تمامًا. الحرس الثوري أعلن وقوع قتلى وجرحى نتيجة الضربة، وتوعد بالرد، والرد فعلًا جه بعدها بساعات قليلة. الحرس الثوري أطلق صواريخ وطائرات مسيّرة على قاعدتين تستخدمهما القوات الأمريكية في الأردن، وربط بشكل واضح بين الهجوم وبين ضربة لارك. الدفاعات الجوية الأمريكية والأردنية اعترضت أغلب الصواريخ القادمة، ولحد كتابة هذا البوست مفيش تقارير عن أضرار كبيرة أو خسائر بشرية موثقة على الجانب الأمريكي أو الأردني.

المشكلة إن اللي حصل مش مجرد تبادل ضربات بعيد عن حياتنا اليومية. جزيرة لارك موجودة عند واحد من أهم الممرات البحرية في العالم، وقبل الحرب كان بيمر من مضيق هرمز تقريبًا خُمس إمدادات النفط العالمية. عشان كده أسعار الطاقة تحركت بسرعة فور الإعلان عن الضربتين، وارتفاع سعر البرميل مؤشر واضح إن الأسواق بتاخد التطور ده بجدية.

السيناريو الأقل خطورة إن الجولة دي تفضل محدودة، بمعنى إن كل طرف أخد فرصته وحفظ ماء وجهه والموضوع يهدأ زي ما حصل في جولات سابقة. لكن السيناريو الأصعب إن أمريكا تعتبر استهداف قواعدها في الأردن خط أحمر يستاهل رد جديد، وإيران ترد على الرد، وندخل تاني في دائرة تصعيد متتالي كانت الهدنة النسبية الشهر اللي فات وقفتها مؤقتًا. الأيام الجاية هي اللي هتحدد إحنا في أي سيناريو من الاتنين.

تابعنى
Follow me for more

شكرا ليكم
اخوكم سمسعيد
615-290-7758

مصطلحاتك بالعربي والإنجليزي: Strait of Hormuz يعني مضيق هرمز، Sea Mines يعني ألغام بحرية، Ballistic Missile يعني صاروخ باليستي، De-escalation يعني تهدئة التصعيد.

كتاب تقراه يزيد وعيك: The Oil Kings لأندرو سكوت كوبر، كتاب مفيد لفهم إزاي ملف النفط والشرق الأوسط بيأثر على القرار الأمريكي من عقود.

#سمسعيد #إيران

08/30/2026

"النفس الشبعانه تدوس العسل والنفس الجوعانه كل شيء مُر بالنسبالها بيكون طعمه حلو🤷🏻‍♂️

Sammy Said

09/02/2026

09/01/2026

09/01/2026

09/01/2026

09/01/2026

08/31/2026

08/31/2026

08/31/2026

08/30/2026

Address

Opening Hours

Website

Alerts

Contact The Business

Shortcuts

Share

Listing takedown request

Monday	9am - 5pm
Tuesday	9am - 5pm
Wednesday	9am - 5pm
Thursday	9am - 5pm
Friday	9am - 5pm
Saturday	9am - 5pm
Sunday	3am - 5pm