03/12/2025
Bankiga Horumarinta iyo Dib-u-Dhiska Soomaaliyeed (SDRB) ayaa shalay soo gabagabeeyay kulankii ugu horreeyay ee Guddiga Bangiga (Board Meeting) oo socday laba maalmood, taas oo ah guul horudhac uu ah wajiga xiga ee dhammaystirkiisa.
Kulankan waxaa shir guddoomiyey Guddoomiyaha Bankiga, Marwo Hodan Cusmaan, waxaana ka soo qaybgalay xubnaha cusub ee Guddiga oo ay ka mid ahaayeen Wasiirka Maaliyadda Mudane Bixi Iman Cigeh, Guddoomiyaha Bangiga Dhexe Mudane Cabdiraxmaan Maxamed Cabdillahi iyo afar xubnood oo kale. Waxyaabaha diiradda lagu saaray waxaa ka mid ahaa himilada Bankiga, mudnaanta maalgelinta iyo aragtida fog ee SDRB.
Xubnaha Guddiga, oo leh khibrad qoto dheer dhanka arrimaha maaliyadda iyo bangiyada, ayaa dib u eegay horumarka uu sameeyey bankiga ilaa asaaskiisi. Goluhu waxay soo jeediyeen talooyin mudnaan ballaaran leh oo lagu xoojinayo doorka masโuuliyadeed ee SDRB. Ujeeddadu waa sidii loo xaqiijin lahaa in uu noqdo hayโadda hormuudka u ah maalgelinta horumarineed ee dalka.
Wasiir Bixi ayaa kulanka ka sheegay in Guddiga Bangiga loo dhisay si madaxbannaan oo hufan, wuxuuna mar kale xaqiijiyay in Dowladda Federaalka Soomaaliya ay si buuxda u taageereyso horumarinta Bankiga. Dhankiisa, Guddoomiye Cabdiraxmaan Cabdillahi wuxuu tilmaamay muhimadda hawsha SDRB ee fududaynta maalgelinta iyo taageerada farsamo ee qaybaha wax-soo-saarka dalka.
Guddiga ayaa sidoo kale kulammo la yeeshay saaxiibbada Soomaaliya ka taageera dhanka horumarinta (Development Partners), kuwaas oo ammaanay horumarka bankiga iyo sida uu u qeexay jihada istaraatiijiyadeed ee lagu xoojinayo silsiladaha qiimaha dhaqaalaha.
Maaddaama Guddigu hadda uu si rasmi ah uu u hawl galay, xubnuhu waxay door muhim ah ka qaadan doonaan qaabaynta himilada iyo hadafka SDRB, taas oo muujinaysa wejiga cusub ee koboca Bankiga.
