04/02/2021
ILANG PAGLILINAW UKOL SA REPUBLIC ACT 11229 (CHILD SAFETY IN MOTOR VEHICLES ACT)
Bilang konsiderasyon sa ating mga kababayan ngayong panahon ng pandemya, at upang makapagbigay daan na rin sa isang epektibong information, education and communications (IEC) campaign na pagtutulungan ng DOTr, LTO, DOH, DTI, PIA, DepEd at ng pribadong sektor, ipinag-utos po nina DOTr Secretary Arthur Tugade at LTO Assistant Secretary Edgar Galvante na WALA PO MUNANG HULIHAN NA MANGYAYARI sa kabila ng pagpapatupad ng Republic Act 11229, o ang Child Safety in Motor Vehicles Act, na naging epektibo ngayong araw, 2 February 2021.
Magfo-focus po muna ang DOTr at LTO, kasama ang iba pang concerned agencies, sa pagpapatupad ng massive information campaign upang malinaw na maintindihan ng ating mga kababayan, lalung-lalo na ang mga mag-aaral, magulang, guardians, g**o, at law enforcers, ang mga nakapaloob sa batas, at kung anu-ano ang mga kailangang gawin upang masunod ito ng maayos.
Tandaan po sana nating lahat na maganda ang intensyon ng batas na ito na ipinasa ng Kongreso at nilagdaan ng ating Pangulo noong 2019. Layunin nito na maprotektahan ang mga kabataan habang lulan ng sasakyan sa kalsada.
Ayon po sa Department of Health (DOH) noong 2019, dalawang bata ang namamatay sa Metro Manila bawat araw dahil lamang sa mga road-related accidents. Sa katunayan, ayon pa sa DOH, road-related accidents din ang isa sa mga pangunahing dahilan ng pagkamatay ng mga kabataan.
Ayon naman sa pag-aaral ng World Health Organization, ang maayos na pagkabit at paggamit ng car seats (child restraint) ay nakapagpapababa ng risk ng pagkamatay para sa mga sanggol by 70%, at 47 to 54% naman para sa mga kabataang edad 1 hanggang 4 na taong gulang sa isang aksidente.
Ayon naman sa datos ng Philippine Statistics Authority, sa kabuuang bilang ng mga road deaths mula taong 2006 hanggang 2014, 17% o katumbas sa bilang na 12,000 ay mga kabataan mula kulang isang (1) taong gulang hanggang 19 taong gulang. Ibig sabihin nito, sa average, may 1,334 na batang namamatay dahil sa transport-related crashes sa loob ng isang taon sa bansa. Katumbas ito ng 4 hanggang 5 kabataan na namamatay bawat araw.
Magtulungan po tayo para maayos na maipatupad ang batas na ito para sa kapakanan ng ating mga anak, pamangkin, at kabuuan ng mga kabataan sa ating bayan!
Salamat po.
[Photo courtesy: YugaTech, Child Safety in Motor Vehicles Act: 5 Facts You Need to Know by Abe Olandres, February 1, 2021]
