29/09/2026
पछिल्लो दुई महिनामा नेपाली बैंकिङ क्षेत्रमा कर्जा विस्तारले गति लिएको देखिएको छ। चालु आर्थिक वर्षको साउन र भदौमा २० वाणिज्य बैंकले कुल ६० अर्ब ९७ करोड रुपैयाँ कर्जा थप गरेका छन्। यससँगै भदौ मसान्तसम्म बैंकहरुको कुल कर्जा लगानी ५३ खर्ब ५० अर्ब ६५ करोड रुपैयाँ पुगेको छ, जुन असार मसान्तको ५२ खर्ब ८९ अर्ब ६८ करोड रुपैयाँभन्दा ६० अर्ब ९७ करोड बढी हो।
रोचक कुरा के छ भने साउनमा बैंकहरुको कर्जा लगानी उल्टै १ अर्ब ७१ करोड रुपैयाँले घटेको थियो। तर भदौमा मात्रै ६२ अर्ब ६८ करोड रुपैयाँभन्दा बढी कर्जा प्रवाह भएपछि दुई महिनाको समग्र कर्जा विस्तार सकारात्मक देखिएको हो।
बैंकअनुसार हेर्दा ग्लोबल आइएमई बैंक सबैभन्दा अगाडि देखिएको छ। उसले दुई महिनामा २० अर्ब १ करोड रुपैयाँ कर्जा लगानी गरेको छ। त्यसपछि एभरेष्ट बैंकले १२ अर्ब ८८ करोड र लक्ष्मी सनराइज बैंकले १० अर्ब ३१ करोड रुपैयाँ कर्जा विस्तार गरेका छन्।
त्यस्तै, कुमारी बैंकले ७ अर्ब ६५ करोड, नबिल बैंकले ७ अर्ब ६ करोड, सिद्धार्थ बैंकले ४ अर्ब ८० करोड, माछापुच्छ्रे बैंकले ४ अर्ब ७४ करोड र एनएमबी बैंकले ४ अर्ब २९ करोड रुपैयाँ कर्जा लगानी गरेका छन्।
तर सबै बैंकको कर्जा विस्तार भने बढेको छैन। एनआईसी एशिया, सानिमा, प्रभु, प्राइम कमर्सियल, नेपाल इन्भेष्टमेन्ट मेगा, हिमालयन र स्ट्यान्डर्ड चार्टर्ड बैंकको कर्जा लगानी यस अवधिमा घटेको छ।
समग्रमा हेर्दा भदौमा भएको ठूलो कर्जा विस्तारले बैंकिङ प्रणालीबाट अर्थतन्त्रतर्फ जाने ऋणको प्रवाह बढेको संकेत गर्छ। अब महत्वपूर्ण कुरा भनेको यो कर्जा कुन क्षेत्रमा गएको छ, कर्जा माग आगामी महिनामा कस्तो रहन्छ र बैंकहरुको asset quality तथा खराब कर्जामा यसको प्रभाव कस्तो पर्छ भन्ने हो।
