10/04/2026
အိမ်ထောင်ရှင် ယောကျ်ားများဖတ်ရန် Share ပါသည် ....
မအောင်မြင်ခဲ့သော အိမ်ထောင်သည်ဘဝ -အပိုင်း (၁)
****************************************
အမျိုးသမီးလေးတွေ အိမ်ထောင်သည်ဘဝမှာ ဒုက္ခရောက်ရတာ စိတ်မချမ်းမြေ့ရတာတွေကြားရင် သိပ်ကို ကိုယ်ချင်းစာမိပါတယ်
ဒါကြောင့် ကျွန်မ မပြောပြခဲ့ဖူးတဲ့ အကြောင်းအရာတွေကိုပြောပြမယ်နော်
ဒီစာလေးကို အထူးသဖြင့် အမျိုးသား အစ်ကိုတို့ ဖတ်ပေးစေချင်ပါတယ်ရှင် 🙏🏻
ဆရာလုပ်တာမဟုတ်ပါဘူးနော်
ကျွန်မ ဘဝမှာ ကိုယ်တွေ့ကြုံခဲ့ရတဲ့ ခံစားချက်တွေမို့
အစ်ကိုတို့ရဲ့ အိမ်ထောင်ရှင် အမျိုးသမီးလေးတွေ
မကြုံစေချင်တဲ့ ဆန္ဒနဲ့အတူ
အိမ်ထောင်ရေးလေးတွေ အဆင်ပြေ သာယာစေချင်လို့ပါ
မိန်းမကောင်း အမျိုးသမီးလေးတွေ
အိမ်ထောင်ပြုတယ်ဆိုတာ
ချစ်ခင်တွယ်တာစိတ်အပြင် အားပေးဖော်အဖြစ်
ရှိနေစေချင်စိတ်တွေကို အခြေခံပါတယ်
သူတို့ မေတ္တာရှိတဲ့အမျိုးသားကို
သူတို့တစ်ဘဝလုံး ပုံအပ်ပြီး ရိုးမြေကျလက်တွဲသွားချင်တာ အမျိုးသမီးတိုင်းပါ
ကျွန်မ သားရဲ့အဖေကို ကွာရှင်းခွင့် တောင်းခဲ့တဲ့ အကြောင်းအရာတွေထဲက အချို့က ဥပေက္ခာပြုမှုတွေ . ကိုယ့်အတွက်ပဲ ကိုယ်ကြည့်တတ်တဲ့အကျင့်တွေကို သည်းမခံနိုင်တော့လို့ပါ
တခြားအကြောင်းအရာတွေလည်း ရှိပေမယ့် ကျွန်မစိတ်ခံစားချက်နဲ့ ပါတ်သက်တာတစ်ချို့ကိုပဲ အရင်ပြောပြပါမယ် …
ကျွန်မသားလေးမွေးကာစ ရက်တွေကို ပြောပြပါရစေ
မွေးခန်းထဲက အထွက်မှာရော သားလေးမွေးတဲ့ တစ်ညလုံး ကလေးအဖေရဲ့ မျက်နှာကို မတွေ့ခဲ့ရပါဘူး
သားလေးကို မွေးကင်းစကလေးလေးတွေ ထားတဲ့ အခန်းကို ပို့ပြီးတာနဲ့ ညမိုးချုပ်နေပြီမို့ အိမ်ပြန်သွားတာတဲ့…
ရုပ်ရှင်တွေထဲကလို မွေးခန်းကအထွက်မှာ လက်လေးကိုင်ပြီး နေလို့ကောင်းရဲ့လား .
နာနေလား . မွေးခန်းထဲမှာ ကြောက်နေသေးလား လို့ မေးမယ့်ယောက်ျားမရှိတဲ့ ကျွန်မ .
တကယ်တန်း သူသာ ကိုယ့်ကို အားပေးချင်စိတ်ရှိရင် မွေးခန်းအပြင်ကနေ စောင့်ပြီး အားပေးလို့ရတာပဲ
ဆိုတဲ့စိတ်နဲ့ ဝမ်းနည်းခဲ့ဖူးတယ်
သူ့အစ်မ ဝမ်းကွဲတစ်ယောက်ကတော့ လိုအပ်တာတွေ တစ်ညလုံး လုပ်ပေးပြီး စောင့်ပေးပါတယ်
ဒါပေမယ့် မိန်းကလေးတစ်ယောက် ကလေးမွေးတဲ့အခါ ကလေးအဖေရဲ့ အားပေးမှုကို အလိုချင်ဆုံးပါ
ကလေးမွေးပြီးကာစ အမျိုးသမီးတစ်ယောက်ရဲ့ အားပေးဖော် ဖြစ်ပေးဖို့ သူ သတိမရခဲ့ဘူး …
အစ်မဝမ်းကွဲတစ်ယောက်ကို စောင့်ခိုင်းရုံနဲ့ လုံလောက်ပြီလို့တွေးခဲ့ပုံပါ …
သားလေးကို Dufferin လို့ ခေါ်ကြတဲ့
ဗဟိုအမျိုးသမီးဆေးရုံမှာမွေးတာပါ
ဗဟိုအမျိုးသမီးဆေးရုံ ဖြစ်တာကြောင့်
အခုခေတ် ပုဂ္ဂလိကဆေးရုံတွေကို အစစအရာရာ
ပြည့်စုံနေတာမျိုး မဟုတ်ခဲ့ပါဘူး
အိမ်သာရေချိုးခန်းတွဲလျက်ပါတဲ့ တစ်ယောက်ခန်း အရေအတွက်က အရမ်းနည်းတာကြောင့်
တစ်ယောက်ခန်းကိုယူဖို့ စာရင်းပေးထားပေမယ့် ချက်ချင်းမရပါဘူး
မွေးပြီး နောက်ရက်တွေမှာ
၄ ယောက်ခန်းကို ပြောင်းရပါတယ်
၄ ယောက်ခန်းဆိုပေမယ့်
ကျန်တဲ့ ခုတင် ၃ လုံးက အလွတ်တွေပါ .
အဲ့ဒီအခန်းက တော်တော်မှောင်သလို အပြင်စင်္ကြံန်လျှောက်လမ်းတွေကလည်း မှောင်နေတာကြောင့် ခြောက်ခြားစရာပါ
သားသားမွေးပြီး နောက်ရက်တွေမှာ
သူ့အမေက Special nurse ငှါးထားပေးပါတယ်
သားလေးမွေးပြီး ၂ ရက်မြောက်နေ့မှာ
ညဖက် သူ စောင့်မယ် ပြောပါတယ်
ဘာပဲပြောပြော သူစောင့်ပေးမယ်ဆိုတော့ အားရှိသွားသလို ဝမ်းသာသွားမိတယ်
ဒါပေမယ့် ညဖက်ရောက်ရောက်ချင်းပဲ သူ့သူငယ်ချင်းတစ်ယောက်ရောက်လာပြီး
ဒီည ဘောလုံးပွဲကောင်းတယ် သွားကြည့်ရအောင်
ဆိုပြီး ခေါ်တော့ သူ လိုက်သွားပါတယ်
ထင်လိုက်တာက အလွန်ဆုံးကြာ ၂ နာရီလောက်ပေါ့နော် . ၉ နာရီ / ၁၀ နာရီလောက်တော့ ပြန်ရောက်လောက်မယ်ပေါ့
Nurse ရယ် . ကိုယ်ရယ် . ၂ ရက်သားပဲ ရှိသေးတဲ့ သားပိစိလေးရယ်ပဲ မီးရောင်မှိတ်တုတ်မှတ်တုတ်နဲ့ အခန်းလေးထဲ ကျန်ခဲ့ပါတယ်
ခဏဆိုပြီး ဘောလုံးပွဲသွားကြည့်တဲ့သူက
ည ၂ နာရီကျော်တဲ့အထိ
ပြန်မရောက်လာသေးပါဘူး
အဲ့ဒီအချိန်မှာ ဆီးအရမ်းသွားချင်လာတယ်
အိမ်သာက ကျွန်မတို့ အခန်းနဲ့ တော်တော်ဝေးပါတယ်
ရိုးရိုးမွေးထားတဲ့ မွေးလူနာတစ်ယောက်အတွက် ဆီးသွားရတာ ဝေဒနာတစ်ခုဆိုတာ
ရိုးရိုးမွေးဖူးတဲ့ မိခင်တွေ အသိဆုံးပါ …
အိမ်သာသွားတဲ့လမ်းက တော်တော့်ကိုမှောင်ပြီး ဝေးလည်း ဝေးတာကြောင့် ကလေးမွေးပြီးတာ ၂ ရက်ပဲ ရှိသေးတဲ့ Drip တန်းလန်းနဲ့ ကျွန်မအတွက် တစ်ယောက်တည်းသွားဖို့ မလွယ်ပါဘူး
သူနာပြုဆရာမကြီးနဲ့အတူ ကလေးလေး ခေါ်ပြီး သွားဖို့ကလည်း
၂ ရက်သားကလေးလေးဆိုတာ သိပ်ကိုနုနယ်လွန်းတာကြောင့် အိမ်သာသွားတဲ့လမ်းက အနံ့အသက်တွေ . လေထဲပျံ့နေမယ့် ပိုးမွှားတွေကို တွေးကြည့်ပြီး မခေါ်သွားရဲဘူး
ကလေးလေးတစ်ယောက်တည်း အခန်းထဲထားခဲ့ပြီး သူနာပြုဆရာမကြီးကို အဖော်ခေါ်သွားဖို့ကျပြန်တော့လည်း သားလေး လန့်မှာ . ကိုယ်သွားနေချိန် တစ်စုံတစ်ခု ဖြစ်မှာ . လူစုံတဲ့ဆေးရုံမို့ ကလေးပျောက်မှာ စိုးရိမ်ပြန်ရော …
၃ နာရီကျော်မှ ကလေးအဖေက အရက်နံ့တစ်ထောင်းထောင်းနဲ့ ပြန်လာတယ် . သူကတော့ ပေါ့ပေါ့လေးပါပဲ
“Sorry . ကို ဘောလုံးပွဲကောင်းနေတာနဲ့ နည်းနည်းကြာသွားတယ်” တဲ့ …
ဝမ်းနည်းပေမယ့် မျက်ရည်မကျအောင်ထိန်းရင်း
ရှေ့လျှောက် ငါ့အတွက်ရော ငါ့သားလေးအတွက်ပါ ငါ့ကိုယ်ငါပဲ အားကိုးရမှာပါလားဆိုတဲ့ အသိ စ ဝင်လာခဲ့တယ် …
အခုရေးပြမယ့် သူ့လုပ်ရပ်ကတော့
သူတမင်ရည်ရွယ်တာ မဟုတ်ပေမယ့်
မတော်ရင် ကျွန်မဘဝ ပျက်သွားနိုင်တဲ့ လုပ်ရပ်ပေါ့
သားသားမွေးပြီး ၆ လလောက်နေတော့ သူ့သူငယ်ချင်းတစ်ယောက်ခြံထဲက Party ပွဲတစ်ခုကိုသွားပါတယ်
ကျွန်မကိုပါ လှလှလေးဝတ်ပြီး လိုက်ခဲ့ ဆိုလို့
ကျွန်မ ဒူးအထက်ဂါဝန်လေးဝတ် သပ်သပ်ရပ်ရပ်လေးပြင်ပြီး လိုက်သွားတယ်
ည ၂ နာရီလောက်မှ ပါတီပြီးလို့ ပြန်ခဲ့တယ်
အရက်တွေအများကြီးသောက်ထားတော့ သူ တော်တော်မူးနေပြီ
သူ့အစ်ကို ဝမ်းကွဲတစ်ယောက်လည်းပါတယ်
လမ်းရောက်တော့ ဗိုက်ဆာတယ်တဲ့
ခုနကပဲ စားခဲ့တာ အခုဆာတယ်ဆိုတော့
တမင် ရစ်နေမှန်းသိတယ်
အိမ်ပြန်ရောက်မှ စားပါလားဆိုတာကို မရဘူး
သိမ်ကြီးစျေးနားက ညလုံးပေါက်ဖွင့်တဲ့ လမ်းဘေးက ထမင်းကြော် . ခေါက်ဆွဲကြော်ရောင်းတဲ့ ဆိုင်လေးတစ်ဆိုင်မှာ ထိုင်လိုက်ကြတယ်
မှာပြီး ခဏနေတော့ . ကြာတယ်
မစားတော့ဘူး ပြန်မယ်ဆိုပြီး လုပ်တယ်
ဆိုင်ရှင်တွေခမျာ
ကိုယ်မှာမှ မီးမွှေးပြီး ကြော်လှော်တာဆိုတော့ လုပ်လက်စ တန်းလန်းကြီး …
မှာထားတာတွေ အလဟဿဖြစ်ကုန်မှာပေါ့
ဆိုင်ရှင်တွေ ရှုံးလိမ့်မယ် . သနားပါတယ် လို့
ပြောမိလို့ … ရှေ့က စားပွဲကြီးကို တွန်းလှဲပြီး
စားပွဲခြေထောက်ကို ရိုက်ချိုးပြီး စားပွဲကိုရော
လမ်းဘေးက ဓာတ်မီးတိုင်တွေကိုပါ ရိုက်တာ
ပြီးတော့ သူ့အစ်ကို ကို ကားပေါ်တက်
နင်သနားရင် နင် နေခဲ့ ဆိုပြီး
ကျွန်မကို တစ်ယောက်တည်းထားပြီး မောင်းထွက်သွားတယ်
ကြောက်ကြောက်နဲ့ ည ၂ နာရီခွဲ. ၃ နာရီနီးပါးမှာ
မြို့ထဲလမ်းလယ်ခေါင်ကြီးမှာ ထားခဲ့ခံရတဲ့ စိတ်ကြီးက
အားငယ်တာရော . ရှက်တာရော . ဝမ်းနည်းတာရော …
ဆိုင်ရှင်က ညည်းကိုခေါ်လာတဲ့ အကောင်လုပ်သွားတာတွေ ပြန်လျော်ပေး တဲ့
အဲ့ဒီတုန်းက ကျွန်မအသက် ၂၆ နှစ်ကျော်ရုံလေး
လူက ပေါင် ၁၀၀ ကျော်ရုံပဲ ရှိတယ်
လူကောင်သေးသေး ဂါဝန်လေးနဲ့ဆိုတော့
ကလေးအမေလို့ မထင်သလို
ကိုယ့်ယောက်ျားနဲ့ လာတယ်လို့လည်း ထင်ပုံမရဘူး
သူတို့ မထင်တာလည်း အပြစ်ပြောလို့မရပါဘူး
ဘယ်ယောက်ျားမှ ကိုယ့်မိန်းမကို ဒီလို
ပစ်စလခတ် ထားခဲ့မှာ မဟုတ်ဘူးလေ
အဲ့ဒီအချိန်က လက်ထဲမှာ ဖုန်းလည်း မရှိဘူး
ဖုန်းတွေက အခုအချိန်လိုလည်း မပေါနေသေးဘူး
ဆိုင်နားမှာ Taxi တွေ စုရပ်ထားတဲ့ နေရာတော့ ရှိတယ်
ကျွန်မတို့ ပြဿနာဖြစ်နေတာကိုလည်း မြင်ကြမှာပါ
အဲ့ဒီကာလတုန်းက သိမ်ကြီးစျေးပါတ်ဝန်းကျင်မှာ စင်တင် ဆိုင်လေးတွေ ရှိတော့ အဲ့ဒီက ပြန်တဲ့လူတွေ ငှါးလို့ရအောင်နဲ့တူတယ်
ဒါပေမယ့် Taxi ငှါးပြီး တစ်ယောက်တည်းလည်း
မပြန်ရဲဘူး
Taxi တွေ အနေနဲ့လည်း
သူတို့တွေ့လိုက်ရတဲ့ မိနစ်ပိုင်းမြင်ကွင်းအရ
ကိုယ့်ကို မိန်းမကောင်းလို့ ထင်ဖို့က
ရာခိုင်နှုန်းနည်းတယ်
သူတို့အမြင်မှာ ကောင်မလေးငယ်ငယ်လေးတစ်ယောက်
ယောက်ျားနှစ်ယောက်နဲ့အတူ ကားပေါ်က ဆင်းလာတယ် (သားသားအဖေနဲ့ သူ့အစ်ကိုဝမ်းကွဲ)
စကားပြောကြည့်တာ အဆင်မပြေတာနဲ့ ယောက်ျားတစ်ယောက်က သောင်းကျန်းပြီး
ကောင်မလေးကို ထားခဲ့ပြီး ထွက်သွားတယ်
ဒီလိုပဲ တွေးကြမှာ
ဒီတော့ Taxi ငှါးပြီးလည်း မပြန်ရဲသလို သူဖျက်ဆီးသွားတဲ့ ပစ္စည်းတွေအတွက်လည်း ရှင်းပေးရဦးမယ်
ပိုက်ဆံပေးမကိုင် . အလုပ်လည်းပေးမလုပ်လို့ ဝင်ငွေ မရှိသလို လက်ထဲမှာ ပိုက်ဆံလည်း မရှိဘူး
ဒါနဲ့ ဆိုင်ရှင်ကို ဖုန်းလေး ခဏငှါးဆက်ပါ
အကုန်ရှင်းပေးပါ့မယ် ပြောပြီး
သူ့အမေဆီ ဖုန်းဆက်တယ်
သူ့အမေက သူ့သားတောင်အခုပဲ အိမ်ပြန်ရောက်လို့
သူ့အခန်းထဲ တက်အိပ်နေပြီ
ဘာကြောင့်လိုက်မလာတာလဲ
ရအောင်လိုက်ခဲ့ရမှာပေါ့တဲ့ …
မူးမူးနဲ့ မောင်းထွက်သွားတဲ့ကားနောက်ကို ဘယ်လိုများ လိုက်ရပါမလဲလေ …
အကြောင်းစုံပြောပြီး လာခေါ်ပေးဖို့ ပြောတော့
လာခေါ်ပေးတာကိုပဲ ကျေးဇူးတင်ရပါတယ်
ဒါ ကိုယ် ဥပေက္ခာအပြုခံရတဲ့အကြောင်းပဲ
ရေးပြတာပါ
သူ ဆိုးတာတွေတော့ မဆိုင်တော့တာကြောင့် မရေးတော့ပါဘူး
သားလေးကို မိတကွဲ ဖတကွဲ ဘဝ မရောက်စေချင်လို့ မျိုးစုံ သည်းခံခဲ့ပါတယ်
ဒါပေမယ့် သူ့ကို လမ်းခွဲမှ ဖြစ်တော့မယ်လို့ ဆုံးဖြတ်ချက်ကို ခိုင်ခိုင်မာမာ ချဖြစ်လိုက်တာက
၂၀၁၂ မှာပါ
၂၀၁၂ မေလ ၂ ရက်နေ့မှာ ဖေဖေဆုံးပါတယ်
ဖေဖေဆုံးတဲ့အချိန်က
အိမ်မှာ မေမေရယ် . ကျွန်မရယ် . ယောက်ျားလေးဆိုလို့ ဦးတူးတူးလို့ခေါ်တဲ့ မေမေ့မောင်အငယ်ဆုံး ဦးလေးရယ်ပဲ ရှိတယ်
မောင်လေးက နိုင်ငံခြားမှာ အလုပ်လုပ်နေတာမို့
ဖေဖေဆုံးပြီး တစ်ရက်ကျော်မှာမှ အလုပ်ကနေ ခွင့်တင်ပြီး ပြန်လာရတာပါ
ဖေဖေဆုံးတာ ညနေစောင်း ၆ နာရီ ထိုးခါနီးမို့ စီစဉ်စရာရှိတာတွေ စီစဉ်ပြီးတော့
သူ့ကို အိမ်မှာ ယောက်ျားသားဆိုလို့ ဦးတူးတူးပဲရှိလို့ မေမေတို့အိမ်မှာပဲ အိပ်ပေးပါလားလို့ ပြောမိတဲ့အချိန်မှာ
သူ ပြန်ပြောတာက
အသုဘ အိမ်မှာ သူမအိပ်တတ်တာ မသိဘူးလား တဲ့ …
အသုဘအိမ် မှန်ပေမယ့်
သူ့ယောက္ခမရဲ့ အသုဘပါ …
သူ မရရင် သေပါတော့မယ်ဆိုပြီး အတင်းရအောင် ယူထားတဲ့ မိန်းမရဲ့ အဖေပါ …
ဒီမိန်းမက အဖေကို သိပ်ချစ် သိပ်အားကိုးတဲ့ မိန်းမဆိုတာ သူနဲ့ ကြိုက်ခဲ့တဲ့ ၆ နှစ်လုံးလည်း သူကောင်းကောင်း သိပါတယ်
ဖေဖေဆုံးတာ ကျွန်မအတွက် ဝမ်းအနည်းရဆုံး
အားအငယ်ရဆုံး ဆိုတာလည်း သူသိမှာပါ
ဖေဖေက လေဖြတ်နေတာ ၆ နှစ်ကျော်ပေမယ့် ဇွဲရှိရှိနဲ့ လေ့ကျင့်ခန်းတွေ လုပ်ခဲ့လို့
စကားတွေပြော . အစားတွေစား . သတိကောင်း .
နေကောင်းနေရာကနေ ဦးနှောက်သွေးကြောပြတ်ပြီး ဆုံးတာမို့
ကျွန်မအတွက် ပြင်ဆင်ချိန်မရတဲ့ ဆုံးရှုံးမှုကြီးကို
မထင်မှတ်ထားဘဲ ရုတ်တရက် ကြုံရလို့ ဖြေမဆည်နိုင်မှန်းလည်း တွေးမိလောက်မှာပါ
ဒီလိုအချိန်မှာ အနားကနေ အားပေးစကားလေး ပြောပေးဖို့ ၇ ရက်လေးတောင် အောင့်အည်းပြီး
အချိန်မပေးနိုင်ဘူးတဲ့လား …
နေ့ခင်းပိုင်းလာပြီး လုပ်စရာရှိတာတော့ အကုန်လုပ်ပေးပါတယ်
ဒါပေမယ့် သိပ်ချစ်ရတဲ့အဖေကို ရုတ်တရက် ဆုံးရှုံးလိုက်ရတဲ့ သမီးတစ်ယောက်အနေနဲ့
နေ့ခင်းပိုင်း လုပ်စရာရှိတာ လုပ်ပြီးရင်
ညဖက် စိတ်လျှော့လိုက်တဲ့အချိန်မှာတော့
အားရပါးရ ငိုဖို့ . ဖေဖေ့အကြောင်းတွေ ပြောပြတဲ့အချိန်မှာ နားထောင်ပေးပြီး နှစ်သိမ့်ပေးဖို့
သူ့ကို ရှိစေချင်တာတော့ အမှန်ပါ …
သူ့စကားက ရိုးရိုးရှင်းရှင်းနဲ့ တိုတိုလေးပါ
ဒါပေမယ့် ကျွန်မ ဘဝနဲ့ချီပြီး အရှည်ကြီး စဉ်းစားမိလိုက်ပါတယ်
ကျွန်မပိုင်ဆိုင်ထားတဲ့ အိမ်ထောင်ရေးရဲ့
အနှစ်သာရက ဘာများပါလိမ့်ပေါ့ ….
အဲ့ဒီတုန်းက ကျွန်မအသက် ၂၉ နှစ်ကျော် …
ကျွန်မ ဝမ်းနည်းနာကျင်ရဆုံးအချိန်မှာတောင် ကျွန်မဘေးမှာ အချိန်ပြည့်မနေပေးနိုင်တဲ့ ယောက်ျားတစ်ယောက်ရဲ့ ကျွန်မအပေါ်ထားတဲ့အချစ်ဆိုတာကြီးကို သံသယ စ ဝင် လာပါတယ်
အေးအတူ ပူအမျှ ဆိုတဲ့စိတ် မရှိတဲ့ အိမ်ထောင်ရေးကို ကျွန်မ ရှေ့ဆက်မလျှောက်ချင်တော့ဘူး …
အခုလိုအချိန်မှာတောင် ကိုယ့်ရဲ့ ခံစားချက်ကို နားလည်မပေးတတ်တဲ့ လူတစ်ယောက်ရဲ့လက်မှာ
ကျွန်မ အသက်ကြီးလို့ အိုမင်းမစွမ်းတော့ချိန်
သူ့လက်ထဲမှာ ကုန်ဆုံးဖြတ်သန်းရမှာကို တွေးပြီး
သိပ်ကြောက်သွားပါတယ်
အသုဘအိမ်မှာ မအိပ်တတ်တဲ့သူက ကျွန်မသာ သူ့ထက်အရင် လူ့လောကထဲက ထွက်သွားရရင်
ဘယ်လိုလုပ်မှာတဲ့လဲ …
သူ ဆိုးခဲ့တာ . ကျွန်မ မကြိုက်တာ လုပ်ခဲ့တာတွေမှန်သမျှကို သားလေးအတွက် သည်းခံနိုင်ခဲ့ပေမယ့် . ဒီတစ်ခါတော့ ကျွန်မ မခံစားနိုင်တော့ပါဘူး
ဒီလိုနဲ့ ဖေဖေ့နာရေးအပြီးမှာ ကျွန်မ သူ့ကို တရားဝင်ကွာရှင်းခွင့် တောင်းခဲ့ပါတယ်
ဒီကိစ္စတွေကြောင့်ပဲတော့ မဟုတ်ပါဘူး
တခြားသောအရာတွေနဲ့ ကျွန်မရဲ့ သည်းခံနိုင်စွမ်းအားကို ကျော်သွားပြီး
နာစရာတွေ အကုန်စုသွားတာလည်း ပါမှာပေါ့
၂၀၁၃ ဇူလိုင်မှာ ကျွန်မတို့ တရားဝင်ကွာရှင်းခဲ့ပါတယ်
ကျွန်မတို့ မိန်းမတွေရဲ့ စိတ်ကလေ
ကိုယ့်ရဲ့လက်တွဲဖော် အမျိုးသားအပေါ်
မှီခိုချင်တာ မဟုတ်ပေမယ့်
ကိုယ့်အတွက် အားပေးဖော်တော့
ဖြစ်စေချင်ကြတယ် …
ကိုယ့်ကို စိတ်ပူပေးနေတဲ့
တစ်စုံတစ်ယောက် ရှိနေတယ်ဆိုတဲ့ အသိက အားအင်တွေ အလိုလို ဖြစ်စေပါတယ်
ကွာရှင်းပြီး ၇ နှစ်အကြာ .
၂၀၂၀ မှာ အခုလက်ရှိအမျိုးသားနဲ့ ဒုတိယအိမ်ထောင်ကို ထူထောင်ခဲ့ပါတယ်
၂၀၂၅ ဒီဇင်ဘာလတုန်းက မိသားစု ခရီးသွားတဲ့အချိန်မှာ
Agent က VISA နံပါတ် မှားလို့ ကျွန်မအမျိုးသားတစ်ယောက်တည်း လိုက်လို့မရဘဲ
ကျန်ခဲ့တဲ့အကြောင်းလေး ရေးဖူးပါတယ်
အဲ့ဒီအချိန်မှာ အမျိုးသားရဲ့ စိတ်ကိုတွေ့လိုက်ရတာက
သူ မလိုက်ရတာထက် ကိုယ့်ကို စိတ်ပူတဲ့စိတ်ပါ
မသွားဖူးသေးတဲ့ နိုင်ငံမို့ရယ် ချူချာတတ်တဲ့ ကျွန်မအကြောင်းသိလို့ရယ် သူ စိတ်မချနိုင်ဘူး
"မောင် ၂၄ နာရီအတွင်း ရအောင်လိုက်လာမယ်
မိန်းမ စောရောက်တုန်း လျှောက်လည်ထားနှင့် Shopping ထွက်ထားနှင့်နော် . မောင်အတူတူ မပါလို့ စိတ်ညစ်မနေရဘူးနော် . မောင် စိတ်ချမယ်နော်" လို့
ကိုယ့်ကို တဖွဖွမှာသလို
သားလေးကိုလည်း
"သား မေကြီးကို ဂရုစိုက်နော်
ဆေးတွေ မှန်မှန်တိုက်နော်
မတည့်တာတွေ မစားစေနဲ့နော်
ဒယ်ဒီရောက်အောင်လိုက်လာမယ် စိတ်ချနော်" လို့ တဖွဖွ မှာရှာတယ်
ဒါ ကျွန်မနားမှာ အားကိုးလို့ရနေပြီဖြစ်တဲ့
၁၇ နှစ်အရွယ် သားလေး ပါနေတယ်နော် …
ကျွန်မတို့ သားအမိ လေယာဉ်စီးနေချိန်တောင်
Viber ကနေ တစ်ချိန်လုံး Message တွေ အဆက်မပြတ် ပို့ထားတာ …
လေဆိပ်ရောက်လို့ ဖုန်းဖွင့်တာနဲ့ message တွေ တစ်တောင်တောင်ဝင်လာတယ်
သူ့ကတိအတိုင်းလည်း Visa ကို နေ့ချင်းအပြီး ပြန်လုပ်ပြီး လေယာဉ်လက်မှတ် အသစ်ဝယ် . ရအောင်လိုက်လာတယ်
အိမ်ထောင်ပြုလိုက်တဲ့ အမျိုးသမီးတွေအနေနဲ့
ကိုယ့်ခင်ပွန်းသည်ရဲ့ ဂရုစိုက်နွေးထွေးမှုနဲ့ ဖေးမမှုကို
လိုချင်ကြပါတယ်
ဘာလိုလဲ မေးတဲ့အချိန်မှာ . ဘာမှ မလိုအပ်ဘူးဆိုတာ
စိတ်ပေါ့အောင်သာ ပြောတဲ့စကားပါ
တကယ်တော့ သူမချစ်တဲ့ အမျိုးသားစီက ကြင်နာမှုနဲ့ ဂရုစိုက်မှုကို အမျိုးသမီးတိုင်း တိတ်တခိုး မျှော်လင့်တောင့်တ ကြပါတယ်
အိမ်ထောင်ရေးတိုင်းသာယာပြီး
အိမ်ထောင်ရှင်တိုင်းစိတ်ချမ်းမြေ့ကြပါစေရှင် 🙏🏻🙏🏻🙏🏻
With Love @ ချစ်ခြင်းအားဖြင့်
နန်းတင်မိုးသူ
စာလေးတွေ copy ယူမယ်ဆိုရင်
နာမည်လေး မဖြုတ်ခဲ့ဖို့တော့ တောင်းပန်ပါရစေရှင် 🙏🏻
#နန်းတင်မိုးသူ
