03/01/2022
අළුත් අවුරුද්දෙ සමහරු දන්න ඒත් බහුතරයක් නොදන්න පුංචි පුංචි කාරණා ටිකක් ජීවිතේට කියලා දෙන්න හිතුණා.
අපි ඇඳුම් පැළඳුම් ගැන කතා කරමු. සාමාන්යයෙන් සපත්තු දෙක ගලපන්නෙ කලිසමේ වර්ණයට. ඒත් විනෝද චාරිකාවක් සවස් වරුවක සැහැල්ලු බීච් පාටියකට වගේ යනවා නම් මෙය එතරම් වැදගත් නෑ. එතැනදි නොගැලපීමත් ගැලපීමක්.
ගොඩාක් අය ටයි එක දාන්නෙ කලිසමට මැච් කරලා. ඒක වැරදියි. ටයි එක ගලපන්න ඕන මේස් දෙකට. මේස් වලට ගැලපෙන විදියට කලිසම අඳින්න. ටයි මෝස්තර කලින් කලට වෙනස් වූවත් ටයි එක පලඳින කොට එහි කොන එන්න ඕන කලිසමේ බෙල්ට් එකේ පහලට සමාන්තරව.
ඔබ රාජකාරි කරන කෙනෙක් නම් නිතරම සරල ලා වර්ණ කමිස තෝරා ගන්න. කමිසයෙ වර්ණය ඔබේ තරාතිරම සහ තත්වය පෙන්වන සාධකයක්.
එමෙන්ම ඉහළ පැලැන්තියේ සමාජය මිනිහෙක් මනින ප්රධාන මිනුම් දණ්ඩක් තමයි තමන් පාවිච්චි කරන පෑන. ඒ නිසා කීයක් හරි වියදම් කරලා හොඳ බ්රෑන්ඩඩ් පෑනක් ගන්න. අනිත් මිණුම් දණ්ඩ තමයි ඔරලෝසුව. ඔබ කෙනෙක් දෙස බැලූ සැණින් ඔරලෝසුවට ඇස යනවානම් ඒ කියන්නේ ඒ ඔරලෝසුව විශේෂයි.
සාමාන්යයෙන් චයිනිස් කොලර් අඳිනවා නම් කමිසය යට කරන්නෙ නෑ.
මතක ඇතුව හොඳ සුවඳ විලවුන් වර්ගයක් පාවිච්චි කරන්න. ඔය ඔබේ ප්රසන්න බව වැඩි කරනවා. ඔබ කුමන රැකියාවක නිරත උනත් එය වැදගත්.
අනිවාර්යෙන්ම ලේන්සුවක් පාවිච්චි කරන්න. එලියට ගොස් ආයතනයකට නිවසකට යනවා නම් දාඩිය ටික මූනෙ තෙල් ගතිය පිසදා ගෙන ඇතුල් වන්න.
ඇඳුමක් පැළඳුමක් අඳිනකොට පිරිසිදු බව අනිවාර්යෙන්ම තිබිය යුතුයි. ඒ ඇඳුම පැළඳුම තමන්ගෙ මනසට වදයක් නොවිය යුතුයි. වයස, තැන, වේලාව සහ අවස්ථාව අනුව ඇඳුම තෝරාගන්න. පිහිනන ඇඳුමෙන් සිල් ගන්නත් බෑ සිල්ගන්න ඇඳුමෙන් පිහිනන්නත් බෑ.
ඔබ කැමති උනත් නැතත් ඇඳුම කියන්නෙ සමාජය ඔබව මනින මිම්මක්. ඔබව පිටිපස්සට දැක්කත් මේ අරයනෙ කියලා කියන්න පුළුවන් වෙන විදිහේ ඇඳුමෙන් ඔබේ අනන්යතාවයක් තියාගන්න. ඔබ නළුවෙක් නොවන්නට පුළුවන් ඒත් ඇඳුමෙන් පැළඳුමෙන් ඔබට සමාජයෙ ප්රසන්නකාරි කෙනෙක් විය හැකියි.
නිලන්ත සත්සර ගමගේ ✍️
