01/10/2026
សេចក្តីប្រកាសព័ត៌មាន
នៅថ្ងៃព្រហស្បតិ៍ ទី១ ខែតុលា ឆ្នាំ២០២៦ វេលាម៉ោង ១០:១០នាទីព្រឹក ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួល និងអមដំណើរក្រុមអ្នកសង្កេតការណ៍អាស៊ានប្រចាំកម្ពុជា (ASEAN Observer Team – Cambodia: AOT-KH) ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពជាក់ស្តែងនៅតាមបណ្តោយព្រំដែនកម្ពុជា-ថៃ។
ការចុះសង្កេតការណ៍នេះបានធ្វើឡើងនៅចំណុចបង្គោលព្រំដែនលេខ២៧ ស្ថិតក្នុងភូមិថ្មរមៀលលិច ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
គោលបំណងសំខាន់នៃការចុះសង្កេតការណ៍ គឺដើម្បីផ្តល់ឱ្យក្រុមអ្នកសង្កេតការណ៍អាស៊ាននូវព័ត៌មាន និងការយល់ដឹងកាន់តែច្បាស់លាស់ ដោយផ្អែកលើការសង្កេតជាក់ស្តែងនៅទីតាំងព្រំដែនដែលភាគីកម្ពុជា និងភាគីថៃបានឯកភាពគ្នា។
ជាមួយគ្នានេះ ការចុះសង្កេតការណ៍ក៏ជាឱកាសបង្ហាញពីគោលជំហររបស់រាជរដ្ឋាភិបាលកម្ពុជា ដែលបន្តប្រកាន់ខ្ជាប់នូវការដោះស្រាយបញ្ហាព្រំដែនដោយសន្តិវិធី តាមរយៈការពិភាក្សា និងយន្តការទ្វេភាគី ស្របតាមច្បាប់អន្តរជាតិ កិច្ចព្រមព្រៀងទ្វេភាគីដែលមានជាធរមាន និងអាណត្តិរបស់គណៈកម្មការចម្រុះខណ្ឌសីមាព្រំដែនគោក (JBC)។
កម្ពុជានៅតែប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយផ្អែកលើគោលការណ៍ និងច្បាប់អន្តរជាតិ ព្រមទាំងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។
ក្នុងនោះ រួមមានគោលការណ៍ខ្សែព្រំដែនមិនកែប្រែ (Uti Possidetis Juris) អនុសញ្ញា និងសន្ធិសញ្ញាបារាំង-សៀម ពិធីសារកំណត់ព្រំដែន ផែនទីដែលជាលទ្ធផលនៃការងារខណ្ឌសីមារបស់គណៈកម្មការកំណត់ព្រំដែនឥណ្ឌូចិន-សៀម កំណត់ហេតុកិច្ចប្រជុំ និងកំណត់ហេតុបោះបង្គោលព្រំដែនរបស់គណៈកម្មការព្រំដែនឥណ្ឌូចិន-សៀម ព្រមទាំងអនុស្សរណៈនៃការយោគយល់គ្នា (MOU) ឆ្នាំ២០០០ លក្ខខណ្ឌយោង (TOR) ឆ្នាំ២០០៣ និងកិច្ចព្រមព្រៀង ឬឯកសារពាក់ព័ន្ធផ្សេងទៀត។
កម្ពុជាបញ្ជាក់ថា ឯកសារ និងយន្តការទាំងនេះ គឺជាមូលដ្ឋានសម្រាប់ភាគីទាំងពីរបន្តដោះស្រាយបញ្ហាព្រំដែនដោយសន្តិវិធី និងរួមចំណែកដល់ការសម្រេចបាននូវសន្តិភាព និងស្ថិរភាពយូរអង្វែងរវាងកម្ពុជា និងថៃ។
ប្រភព៖ ក្រសួងការពារជាតិ
