![[បទវិចារណកថា ភាគទី១] ការបង្ហូរទឹកភ្នែក ទុក្ខសោក សេចក្តីអំពាវនាវ រហូតដល់ការអង្វរក មិនអាចធ្វើអោយចោរសៀមឈ្លានពានបញ្ឈប់នូវទង្...](https://img3.financial1000.com/552/845/770201115528452.jpg)
30/07/2025
[បទវិចារណកថា ភាគទី១]
ការបង្ហូរទឹកភ្នែក ទុក្ខសោក សេចក្តីអំពាវនាវ រហូតដល់ការអង្វរក មិនអាចធ្វើអោយចោរសៀមឈ្លានពានបញ្ឈប់នូវទង្វើរ និងមហិច្ចតាឈ្លានពានរបស់វាមកលើយើងបានឡើយ ទាំងរយៈពេលខ្លី និងរយៈពេលវែងតទៅមុខទៀត ត្បិតប្រវត្តិសាស្ត្រក៏បានបង្ហាញយ៉ាងច្បាស់រួចមកហើយពីទង្វើរឈ្លានពាន សង្កត់សង្កិន ធ្វើទុក្ខបុកម្នេញ ជាញឹកញយ និងដដែលៗរាប់ទសវត្សមកហើយ។
តើ ចុះអ្វីដែលអាចធ្វើអោយប្រជាជាតិដ៏ផូរផង់ មានអរិយធម៍ដ៏ចំណាស់នេះអាចយកជ័យលើពួកចោរឈ្លានពានបាន?
ខាងក្រោមនេះជាទស្សនៈផ្ទាល់ខ្លួនខ្ញុំ ដើម្បីចូលរួមដោះស្រាយនូវចំណោទខាងលើ។ ខ្ញុំសូមអធ្យាស្រ័យទុកជាមុន បើសិនការលើកឡើងបន្តិចទៀតនេះមានការឆ្គាំឆ្គងត្រង់ប្រការណាមួយ 🙏🏻
✔️ត្រូវធ្វើអោយប្រទេសយើងខ្លាំង!
👉ប្រទេសជាតិមួយខ្លាំង ដោយសារសម្បូរប្រជាជនពូកែរៀន រៀន រៀន រៀនជានិច្ចនិរន្ត។
យើងសង្កេតឃើញថា ក្រោយរំដោះប្រទេសចេញពីបនប្រល័យពូជសាសន៍ពុលពត អ្វីៗត្រូវចាប់ផ្តើមកសាងសារឡើងវិញចេញពីបាតដៃទទេ ហើយវិស័យអប់រំត្រូវបានថ្នាក់ដឹកនាំដាក់ជាវិស័យអាទិភាព និងតែងត្រូវបានយកចិត្តទុកដាក់យ៉ាងខ្លាំងកន្លងមករហូតមកដល់ពេលបច្ចុប្បន្ននេះ។ ប៉ុន្តែយើងក៏សង្កេតឃើញថា នៅក្នុងស្រទាប់យុវវ័យបច្ចុប្បន្ន អ្នករៀននៅតែប្រឹងរៀន អ្នកអត់រៀននៅតែអត់។
តើនោះគឺដោយសារពួកគេគ្មានលទ្ធភាពឬ? (សាលារដ្ឋនៅពាសពេញប្រទេសមិនមានបង់ប្រាក់ទេ)
តើកង្វះសាលាក្នុងសហគមន៍ឬ? (សាលាកម្រិតទុតិយភូមិចុះ គឺមានវត្តមាននៅគ្រប់ទីប្រជុំជន ឬយ៉ាងហោចណាស់ក៏វាមិនឆ្ងាយពេកដែរសម្រាប់អ្នកមានឆន្ទៈរៀន)
នៅត្រង់ចំណុចនេះ ខ្ញុំយល់ថា មូលហេតុចម្បងៗមានដូចខាងក្រោម:
• មិនទាន់យល់ពីសារៈសំខាន់នៃការសិក្សារៀនសូត្រ។
• មិនទទួលបានការលើកទឹកចិត្ត និងមិនមានជនគំរូ ឬជនគំរូតិចតួចដែលមិនអាចជះឥទ្ធិពលជាវិជ្ជមានដល់ពួកគេ
• ការបណ្តែតបណ្តោយរបស់អាណាព្យាបាល ពិសេសក្នុងដំណាក់នៃការវិវត្តវ័យក្មេង ដោយបណ្តោយអោយធ្វើអ្វីស្រេចតែចិត្ត ប្រើប្រាស់ទូរសព្ទដោយគ្មានការគ្រប់គ្រងបានល្អ បណ្តោយអោយសេពគប់មិត្តភឿនផ្តេសផ្តាសដើរលេងសប្បាយរហូតភ្លេចការសិក្សា
• សាលាមួយចំនួនមានភាពធូររលង់ ខ្ជីខ្ជាក្នុងការបំពេញភារកិច្ច កង្វះមធ្យោបាយសម្ភារៈ និងមិនមានទំនាក់ទំនងទៀងទាត់រវាងគ្រូនិងអាណាព្យាបាលជាដើម
👉ប្រទេសជាតិមួយខ្លាំង ដោយសារសម្បូរប្រជាជនពូកែធ្វើ ឧស្សាហ៍ព្យាយាម ហ្មត់ចត់ក្នុងកិច្ចការងារ និងមានគំនិតច្នៃប្រឌិតបង្កើតសមិទ្ធផលថ្មីៗ
ខ្ញុំសង្កេតឃើញថា ប្រជាជនខ្មែរទូទៅជាមនុស្សពូកែធ្វើ ឧស្សាហ៍ព្យាយាម តែមិនសូវហ្មត់ចត់ និងពុំសូវមានស្មារតីទទួលខុសត្រូវខ្ពស់នៅឡើយទេ។ ហើយអ្វីដែលគួរអោយបារម្មណ៍ខ្លាំងជាងនេះទៀតនោះគឺ ខណៈមានលំហូរចូលយ៉ាងច្រើន និងសំបូរបែបនៃទំនិញបរទេស ធ្វើអោយប្រជាជនទូទៅបាត់បង់ចិត្តចង់ឆ្នៃបង្កើតរបស់ថ្មីៗ ត្បិតស្អីក៏អាចទិញពីគេបានដែរ ជាហេតុធ្វើអោយគំនិតមិនដុះថ្មី គិតចាំតែប្រើ ចាំតែចម្លងស្នាដៃ ចាំអោយបរទេសគិតជំនួស។
លោកអ្នកប្រុសស្រី បើនៅតែបែបនេះ តើអាចជួយអោយប្រទេសខ្លាំងបានយ៉ាងដូចម្តេច?
✔️ត្រូវធ្វើអោយប្រទេសយើងស្មើរមុខស្មើរមាត់ និងទទួលបានការគាំទ្រលើឆាកអន្តរជាតិ។
ដូចដែលពាក្យធ្លាប់លើកឡើងរួចមកហើយថា «មានតែយើងខ្លាំងទេ ទើបគេរាប់អានយើង និងព្រមជួយយើង»
(សូមរង់ចាំអានបន្តនៅភាគ២)
