09/03/2025
ករណីប្រើអំណាចតួនាទីជាថ្នាក់ដឹកនាំមូលដ្ឋានទ័ពអាកាសខេត្តកំពង់ឆ្នាំង មកកាងរឿងវិវាទដី សូមសម្តេចបវរធិបតី មេត្តាជួយពិនិត្យ និងដោះស្រាយ🙏
សូមគោរពរាយការណ៍ជូន សម្តេចមហាបវរធិបតី នាយករដ្ឋមន្ត្រី ជាទីគោរពដ៏ខ្ពង់ខ្ពស់ នៅដើមខែមីនា ឆ្នាំ២០២៥ នេះ មន្ត្រីយោធាម្នាក់ឈ្មោះ ប្រាក់ ទីន អាងអំណាចមេបញ្ជាការរបស់ខ្លួន ដែលជាថ្នាក់ដឹកនាំមូលដ្ឋានទ័ពអាកាសខេត្តកំពង់ឆ្នាំង រំលោភលើកិច្ចសន្យាផ្អាកការសាងសង់លើទីតាំងដីទំនាស់ មានទីតាំងនៅផ្លូវជាតិ៥៣ ភូមិត្រោកលិច ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។ បុគ្គលឈ្មោះ ប្រាក់ ទីន នេះបានក្លែងឯកសារ និងប្រើប្រាស់ឯកសារក្លែង បន្លំភ្នែកអាជ្ញាធរ សាងសង់ដោយខុសច្បាប់ រំលោភបំពានលើអ្នកជាប់ព្រំ រហូតឈានដល់មានការធ្វើកិច្ចសន្យាផ្អាកការសាងសង់ដោយអាជ្ញាធរស្រុករួចហើយកាលពីថ្ងៃទី ១៨ ធ្នូ ២០២៤ ប៉ុន្តែនៅថ្ងៃ ២ មីនា ២០២៥ និងថ្ងៃ ៩ មីនា ២០២៥នេះ បុគ្គលឈ្មោះ ប្រាក់ ទីន ដែលអ្នកភូមិគេដឹងថាបានក្របខ័ណ្ឌយោធាដោយការទិញ បានប្រើប្រាស់អំណាចតួនាទីមេរបស់ខ្លួនជាថ្នាក់ដឹកនាំមូលដ្ឋានទ័ពអាកាសខេត្តកំពង់ឆ្នាំង មកបន្តសាងសង់លើទីតាំងដីទំនាស់យ៉ាងគឃ្លើនបន្តទៀត ដោយគ្មានជូនដំណឹងនិងពិភាក្សាជាមួយភាគីពាក់ព័ន្ធ។
បុគ្គលឈ្មោះ ប្រាក់ ទីន ធ្លាប់ផ្ញើរូបថតកាតយោធារបស់ខ្លួនទៅភាគីទំនាស់ ក្នុងន័យចង់ប្រើអំណាចគម្រាមសម្លុតភាគីទំនាស់។ យោងតាមឯកសារដីធ្លី ឈ្មោះប្រាក់ទីន កើតឆ្នាំ ១៩៧៨ ប៉ុន្តែបែរជាមានកាតយោធា ចុះហត្ថលេខាតាំងពីឆ្នាំ ១៩៩០ ក្នុងឋាន: យុទ្ធជន និងមានកាតយោធាចុះហត្ថលេខាឆ្នាំ ១៩៨៩ ក្នុងឋាន: នាយទាហានរង(រូបថតកាតយោធាក្នុង Comment)។ មានន័យថាបុគ្គលឈ្មោះ ប្រាក់ ទីន ដែលក្នុងឆ្នាំ ១៩៨៩ ទើបទែមានអាយុ ១១ ឆ្នាំប៉ុណ្ណោះ បែរជាមានក្របខ័ណ្ឌទាហាន ក្នុងឋាន: នាយទាហ៊ានរង បាត់ទៅហើយ តើបុគ្គលឈ្មោះ ប្រាក់ ទីន នេះចូលក្របខ័ណ្ឌជាពលទាហាន តាំងពីចាប់កំណើតភ្លាមឬយ៉ាងណា? នេះជាភាពមិនប្រក្រតី ដែលមានន័យគាំទ្រដល់ការលើកឡើងរបស់អ្នកភូមិថា បុគ្គលឈ្មោះ ប្រាក់ ទីន បានក្របខ័ណ្ឌយោធាដោយការទិញ។
🙏គោរពស្នើសុំ៖
១. បញ្ឈប់ការប្រើអំណាចតួនាទីជាថ្នាក់ដឹកនាំមូលដ្ឋាន ទ័ពអាកាសខេត្តកំពង់ឆ្នាំង មកលូកដៃពាក់ព័ន្ធរឿងវិវាទដី។
២. បញ្ឈប់រាល់ការសាងសង់បន្ថែម រំលោភលើកិច្ចសន្យាផ្អាកការសាងសង់ចុះថ្ងៃទី ១៨ ធ្នូ ២០២៤ និងសុំឲ្យកាយយកដីនិងសំណង់ដែលលួចសង់បន្ថែមឲ្យមកស្ថានភាពដើមវិញ។
៣. សុំឲ្យបើកការស៊ើបអង្កេតលើបុគ្គលឈ្មោះ ប្រាក់ ទីន ករណីមានការលើកឡើងថាបានទិញក្របខ័ណ្ឌយោធា ព្រោះមានភាពមិនប្រក្រតីធ្ងន់ធ្ងរលើកាតយោធារបស់បុគ្គលនេះ និងសុំអោយមានចំណាត់ការផ្លូវច្បាប់ លើបុគ្គលឈ្មោះ ប្រាក់ ទីន និងបក្សពួកសមគំនិត។
អាស្រ័យដូចបានគោរពជម្រាបជូនខាងលើ សូមសម្តេចមហាបវរធិបតី នាយករដ្ឋមន្ត្រី មេត្តាពិនិត្យនិងជួយដោះស្រាយដោយក្តីអនុគ្រោះ។
ដោយក្តីគោរពដ៏ខ្ពង់ខ្ពស់បំផុត 🙏
