DHANA Financial Services

18/04/2026

17/04/2026

Retirement: 2026-ல் ரிட்டைர்மென்ட் வாழ்க்கையை 'ராஜாங்கம்' ஆக்கும் 3 ரகசியங்கள்!

50+ வயதில் ரிட்டைர்மென்ட் நினைத்து கவலையா? 60 வயதில் மகிழ்ச்சியான ரிட்டைர்மென்ட் + மாத பென்ஷன் பெறும் வழிகள் உங்களுக்காக. கட்டுரையை இறுதி வரை படிக்கவும்!

'முப்பது வருட உழைப்பு... குழந்தைகளைப் படிக்க வைத்து, லோனைக் கட்டி முடித்து 60 வயதில் ஓய்வு பெறும்போது நிம்மதியாக மூச்சு விடலாம்!' இதுதான் 45-50+ வயதுகளில் இருப்பவர்களின் எண்ணமாக இருக்கும்.

இந்த வயதில் கையில் பி.எஃப் (PF), கிராஜுவிட்டி என ஒரு நல்ல 'லம்ப்சம்' (Lumpsum) தொகையும் இருக்கும். "இனி எந்தக் கவலையும் இல்லை, ஆபீஸ் டென்ஷன் இல்லை" என்ற கனவு எவ்வளவு அழகானது!

உங்கள் நண்பனாகவும் நிதி ஆலோசகராகவும் சொல்கிறேன், இந்த உழைப்பு உங்களுக்குப் பாதுகாப்பான அரணாக மாற வேண்டும். ஆனால் நிஜம் அவ்வளவு இனிமையானதா? இந்தியாவில் இன்று பல முதியவர்கள் கையில் பல லட்சங்கள் இருந்தும், சரியான மாதாந்திர வருமானம் இல்லாமல் தவிக்கிறார்கள்.

உலகப் பொருளாதார அமைப்பான (WEF) வெளியிட்ட அதிர்ச்சிகரமான ஆய்வின்படி, இந்தியர்களின் ஆயுட்காலம் அதிகரித்துள்ளதால், 60 வயதில் ஓய்வுபெறும் பெரும்பாலானோரின் சேமிப்புப் பணம், அவர்கள் இறப்பதற்கு 10 வருடங்களுக்கு முன்பே முழுமையாகத் தீர்ந்துவிடுகிறது!

இதற்குக் காரணம் என்ன? உங்களிடம் உள்ள பல லட்சம் லம்ப்சம் தொகையை அப்படியே பேங்க் FD-யிலோ அல்லது தபால் நிலையத்திலோ போட்டுவிட்டு நிம்மதியாகத் தூங்குவதுதான். இன்று பேங்க் FD வட்டி சுமார் 6.5%. ஆனால் மருத்துவப் பணவீக்கம் (Medical Inflation) வருடத்திற்கு 14% வளர்கிறது. அன்றாடச் செலவுகளின் பணவீக்கம் 7%.

உங்களின் 1 கோடி ரூபாயை பேங்கில் வைத்தால் வட்டியாக மாதம் 50,000 ரூபாய் கிடைக்கலாம். ஆனால் இன்னும் 10 வருடத்தில் அதே வாழ்க்கையை வாழ உங்களுக்கு மாதம் 1 லட்சம் ரூபாய் தேவைப்படுமே? அப்போது யாரிடம் போய் நிற்பீர்கள்? வட்டி போதாமல், அசலையும் சிறிது சிறிதாக அரித்துச் சாப்பிட்டால், கடைசி காலத்தில் பிள்ளைகளிடம் கையேந்தும் நிலை வருமே என நினைத்தால் பயமாக இருக்கிறது இல்லையா?

இந்த அச்சத்தை உடைத்தெறிந்து, லம்ப்சம் தொகையை வாழ்நாள் பென்ஷனாக (Monthly Pension) மாற்றுவதற்கு மியூச்சுவல் ஃபண்டில் உள்ள டாப் 3 வழிகள் இதோ:

வழி 1: SWP (Systematic Withdrawal Plan)

இது முதலீட்டின் மேஜிக்! உங்கள் பணத்தைப் பாதுகாப்பான மியூச்சுவல் ஃபண்டுகளில் முதலீடு செய்து, தேவையான பென்ஷனை மட்டும் எடுப்பது. 1 கோடி ரூபாய் லம்ப்சம் தொகையை ஒரு கன்சர்வேட்டிவ் ஹைபிரிட் ஃபண்டில் (வருடத்துக்கு 10% வருமானம்) முதலீடு செய்து, வருடத்துக்கு 5% withdrawal என்றால், மாதம் சுமார் ₹41,700 பென்ஷனாக எடுக்கலாம்.

15 வருடங்கள் இப்படி எடுத்தாலும், மொத்தம் சுமார் ₹75 லட்சம் எடுத்திருப்பீர்கள். அதற்குப் பிறகும் உங்கள் அசல் கரையாமல், முதலீடு சுமார் ₹2.5 கோடி முதல் ₹2.7 கோடி வரை வளர்ந்திருக்க வாய்ப்பு இருக்கிறது. (1 கோடி ரூபாய் கணக்குக்கு மட்டுமே, நீங்கள் 10 லட்சம் கூட முதலீடு செய்யலாம்!)

வழி 2: பணவீக்கத்தை வெல்லும் அலோகேஷன்

மொத்தப் பணத்தையும் ஒரே இடத்தில் போடாமல், பாதுகாப்பிற்கு டெப்ட் (Debt) ஃபண்டுகளிலும், பணவீக்கத்தைத் தாண்டி வளர ஈக்விட்டி (Equity) ஃபண்டுகளிலும் பிரிக்க வேண்டும். உங்களின் 50 லட்சத்தை FD-யில் 6.5% வட்டியில் வைத்தால் 10 வருடத்தில் 94 லட்சமாக மாறும். அதே 50 லட்சத்தை ஒரு 'பேலன்ஸ்டு அட்வான்டேஜ் ஃபண்டில்' (11% வருமானம்) முதலீடு செய்தால், 10 வருடத்தில் அது சுமார் 1.4 கோடியாக வளரும்.

வழி 3: வரியை மிச்சப்படுத்துதல்

பேங்க் FD-யில் உங்களுக்கு வரும் முழு வட்டிக்கும் அதிகபட்சம் வரம்பாக 30% வரை வரி (Tax) கட்ட வேண்டும். ஆனால் மியூச்சுவல் ஃபண்ட் SWP முறையில், நீங்கள் எடுக்கும் லாபப் பகுதிக்கு மட்டுமே 12.5% நீண்ட கால மூலதன வரி கட்டினால் போதும்.

இந்த உத்திகளால் உங்கள் ஓய்வூதியத் தொகை ஒருபோதும் கரையாது. பணவீக்கத்தைத் தாண்டி, யாருடைய உதவியும் இல்லாமல் ராஜாங்க வாழ்க்கையை நீங்கள் கம்பீரமாக வாழலாம்! இதை உங்களின் சொந்த பணத்திற்கு, உங்கள் வயதுக்கு ஏற்ப பிராக்டிகலாகத் திட்டமிட ஒரு பிரத்யேக வாய்ப்பு

17/04/2026

உங்களுக்கே தெரியாமல் தேங்கிக் கிடக்கும் குடும்பப் பணம்! - மீட்பது எப்படி?
நமது வாழ்க்கையில் பல விஷயங்களைக் குடும்பத்தினருடன் பகிர்ந்து பேசுவது வழக்கம். திருமணம், கல்வி, வேலை, பயணம் போன்ற முக்கிய முடிவுகளெல்லாம் குடும்ப உறுப்பினர்களின் ஆலோசனையுடன் எடுக்கப்படுகின்றன.

ஆனால், பணம், காப்பீடு, முதலீடு குறித்துப் பேசும்போது பெரும்பாலான குடும்பங்களில் அமைதி நிலவுகிறது. சிலர் எப்போதோ செய்த ஒரு முதலீட்டு ஆவணத்தை மறந்துபோய் எங்கோ வைத்துவிடுவார். இன்னும் சில வீடுகளில் கணவர், தான் செய்துவைத்திருக்கும் ஒரு காப்பீடு குறித்து மனைவியிடம்கூட சொல்வதில்லை. ஒரு தந்தை, தான் செய்துவைத்திருக்கும் முதலீடு குறித்து, பிள்ளைகளுக்குத் தெரியப்படுத்துவதில்லை. ஏதோ ஓர் அசம்பாவிதம் நிகழும்போது, அந்தப் பணம் குடும்பத்துக்குப் பயன்படாமலேயே போய்விடுகிறது.

இது ஒரு சிறிய குறைபாடு அல்ல. எதிர்காலத்தில் பெரிய நிதிச் சிக்கல்களுக்கு வழிவகுக்கும் ஒரு முக்கியக் காரணமாகும். ஒரு குடும்பத் தலைவர், தன் குடும்பத்தின் எதிர்காலத் தேவைக்காக என்று சேமித்துவைத்திருக்கும் ஃபிக்ஸட் டெபாசிட் பணம் அப்படியே வங்கியில் கிடக்க, அவர் குடும்பம் அன்றாடச் செலவுகளுக்கே வழியின்றி தடுமாறிக்கொண்டிருக்கும். இது எவ்வளவு பெரிய துயரம்!

கோரப்படாமல் இருக்கும் பணம் - ஒரு பெரிய உண்மை!

இந்தியாவில் ரூ. 1.5 லட்சம் கோடியைத் தாண்டிய அளவில் ‘கோரப்படாமல் இருக்கும் பணம்’ (Unclaimed Money) கிடப்பதாக மதிப்பிடப்பட்டிருக்கிறது. இது பலருக்கும் தெரியாமல் மறைந்து கிடக்கும் சொத்து போன்றது. வங்கிக் கணக்குகள், காப்பீடு, நிறுவனப் பங்குகள், மியூச்சுவல் ஃபண்ட் முதலீடுகள் போன்ற பல இடங்களில் இந்தப் பணம் கிடக்கிறது. பல நேரங்களில், கணக்கு தொடங்கியவர் மறந்து விடுவதாலும் அல்லது குடும்பத்தினருக்குத் தகவல் தெரியாததாலும், அவர் இறந்து விடுவதாலும் இந்த நிலை உருவாகிறது.

கோரப்படாத சொத்துகளின் முக்கியப் பகுதிகள்!

இந்தக் கோரப்படாத பணத்தில் மிக அதிகமாக வங்கிகளில்தான் ரூ. 78,000 கோடிக்கு மேல் கிடக்கிறது. எந்தெந்த வகைகளில் இருக்கிறது

நெறிப்படுத்தும் அமைப்புகளின் முயற்சிகள்!

இந்தப் பிரச்னையைத் தீர்க்க இந்தியாவின் முக்கிய நிதி நெறிப்படுத்தும் அமைப்புகள் இணைந்து செயல்படுகின்றன. இந்திய ரிசர்வ் வங்கி, நமக்கு வங்கிக் கணக்குகள், ஃபிக்ஸட் டெபாசிட் தொடர்பான வழிகாட்டுதல்களை வழங்குகிறது. செபி (Securities and Exchange Board of India – SEBI) முதலீட்டாளர்களின் பங்குகள் மற்றும் மியூச்சுவல் ஃபண்ட் பாதுகாப்பை உறுதிசெய்கிறது. ஐ.ஆர்.டி.ஏ.ஐ (Insurance Regulatory and Development Authority of India) காப்பீட்டுத்துறையில் விழிப்புணர்வை அதிகரிக்கிறது. இவை அனைத்தும் சேர்ந்து ‘Your Money, Your Right’ என்ற இயக்கத்தின் மூலம் மக்களுக்கு அவர்களின் உரிமையான பணத்தைத் திரும்பப் பெற உதவுகின்றன.

உங்கள் பணத்தைக் கண்டுபிடிக்கும் எளிய வழிகள்..!

இன்றைய டிஜிட்டல் காலத்தில், மறந்துபோன பணத்தைத் தேடுவது மிகவும் எளிதாகியிருக்கிறது. வங்கிக் கணக்குகளைக் கண்டுபிடிக்க UDGAM இணைய தளம் (https://udgam.rbi.org.in/unclaimed-deposits/ #/login) பயன்படுகிறது. பங்குகள் மற்றும் டிவிடெண்டுகளைத் தேட IEPF இணையதளம் (https://www.iepf.gov.in/content/iepf/global/master/Home/Home.html) உதவுகிறது. காப்பீட்டுத் தொகைகளை அறிய Bima Bharosa (https://policyholder.gov.in/integrated-grievance-management-system) தளம் இருக்கிறது. மியூச்சுவல் ஃபண்ட் முதலீடுகளை அறிய MITRA (https://app.mfcentral.com/links/inactive-folios) தளம் பயன்படுகிறது. பணியாளர் பிராவிடெண்ட் ஃபண்ட் தொகை விவரங்களை அறிய EPFO (https://unifiedportal-mem.epfindia.gov.in/memberinterface/) தளம் உதவுகிறது. இந்த அனைத்துத் தளங்களும் பொதுமக்கள் பயன்பாட்டுக்கு எளிமையாக வடிவமைக்கப்பட்டுள்ளன.

பணத்தை மீட்கும் நடைமுறை

மறந்துபோன பணத்தை மீட்கும் செயல்முறை மிகவும் சிக்கலானது அல்ல. முதலில், உங்கள் பெயரிலுள்ள பழைய கணக்குகள் மற்றும் முதலீடுகளைத் தேட வேண்டும். அதன் பிறகு, அடையாள ஆவணங்கள் மற்றும் உங்கள் வாடிக்கையாளரை அறிந்துகொள்ளுங்கள் (KYC) விவரங்களைத் தயார் செய்ய வேண்டும். தேவையான விண்ணப்பப் படிவங்களை நிரப்பி, சம்பந்தப்பட்ட நிறுவனத்துக்குச் சமர்ப்பிக்க வேண்டும். உரிமையாளர் உயிருடன் இல்லாதபட்சத்தில், வாரிசுகள் இறப்புச் சான்றிதழ், சட்ட ஆவணங்களுடன் விண்ணப்பிக்கலாம். சரியான ஆவணங்கள் இருந்தால், பணத்தை மீட்பது சுலபம்.

குடும்பங்களில் காணப்படும் பொதுவான நிதித் தவறுகள்

பல குடும்பங்களில் நிதித் தகவல்கள் ஒரே ஒருவரிடம் மட்டுமே இருக்கும். பாஸ்வேர்டுகள் குடும்ப உறுப்பினர்களிடம் பகிரப்படாமல் இருக்கும். நாமினி விவரங்கள் சேர்க்கப்படாமல் இருக்கும். குழந்தைகளுக்கு நிதி பற்றிய அடிப்படை அறிவு வழங்கப்படாது. இந்தக் குறைபாடுகள், அவசரச் சூழ்நிலைகளில் குடும்பத்தினரைப் பெரும் குழப்பத்துக்கு உள்ளாக்குகின்றன.

குடும்ப நிதித் திட்டத்தின் அவசியம்!

ஒரு நல்ல குடும்ப நிதித் திட்டம் (Financial Plan) என்பது பணத்தைச் சேமிப்பது மட்டுமல்ல. அதை சரியாகப் பகிர்ந்து புரிந்துகொள்ளச் செய்வதுமாகும். கணவன், மனைவி இருவருக்கும் அனைத்து முதலீட்டு விவரங்களும் தெரிந்திருக்க வேண்டும். குழந்தைகளுக்குச் சிறு வயதிலிருந்தே சேமிப்பு, முதலீட்டு பழக்கங்கள் கற்பிக்கப்பட வேண்டும். அனைத்து முதலீடுகளுக்கும் நாமினி சேர்க்கப்பட வேண்டும். இது குடும்பத்தின் நிதிப் பாதுகாப்பை உறுதிசெய்யும்.

முதலீட்டாளர்களுக்கான பயனுள்ள குறிப்புகள்!

முதலீட்டாளர்கள் தங்களின் அனைத்து நிதி விவரங்களையும் ஒரே இடத்தில் பதிவுசெய்து வைத்திருக்க வேண்டும். குடும்ப நிதிக் கோப்பு (Family Financial File) போன்ற ஒரு தொகுப்பை உருவாக்குவது நல்ல நடைமுறையாகும். முக்கிய ஆவணங்களை டிஜிட்டல் மற்றும் அச்சு வடிவங்களில் பாதுகாப்பாக வைத்திருக்க வேண்டும். வருடத்துக்குக் குறைந்தது ஒரு முறை உங்கள் முதலீடுகளைக் குடும்பத்தினருடன் ஒன்றாக உட்கார்ந்து பரிசீலனை செய்ய வேண்டும்.

17/04/2026

லார்ஜ்கேப் பங்குகள் Vs லார்ஜ்கேப் மியூச்சுவல் ஃபண்டுகள் - எதில் நல்ல லாபம்?

பல பெரிய பங்குகள், பல ஆண்டுகள் வருமானம் கொடுக்காத நிலையில் பல லார்ஜ்கேப் மியூச்சுவல் ஃபண்டுகள் நல்ல வருமானம் கொடுத்துள்ளன.

தற்போதைய நிலை, உண்மை, மற்றும் முதலீட்டாளர்களுக்குப் பாடங்கள்

இன்றைய பங்குச் சந்தை நிலையைப் பார்த்தால், பல முதலீட்டாளர்கள் ஒரு முக்கியமான கேள்வியைக் கேட்கிறார்கள்: நேரடியாகப் பெரிய நிறுவனப் பங்குகளை வாங்கலாமா? அல்லது பெரிய நிறுவனப் பங்குகளில் கலந்து முதலீடு செய்யும் லார்ஜ்கேப் மியூச்சுவல் ஃபண்டுகளில் முதலீடு செய்வதா?

இந்தக் கேள்விக்குப் பதில் தெரிய, கடந்த சில ஆண்டுகளின் தரவுகளை நிதானமாகப் பார்க்க வேண்டும்.

முக்கிய பெரிய நிறுவனப் பங்குகளின் விலை ஏற்றமா — ஏமாற்றமா?
கீழே குறிப்பிடப்பட்டுள்ள இந்தியாவின் முன்னணி நிறுவனங்கள்:

ஹெச்.டி.எஃப்.சி வங்கி

டாடா கன்சல்டன்சி சர்வீசஸ்

ரிலையன்ஸ் இண்டஸ்ட்ரீஸ்

இன்ஃபோசிஸ்

விப்ரோ

பஜாஜ் ஃபைனான்ஸ்

கோட்டக் மஹிந்திரா வங்கி

இந்த நிறுவனங்கள் அனைத்தும் தரமானவை என்றாலும், கடந்த 4–7 ஆண்டுகளில் மிகக் குறைந்த அல்லது 0% வருமானம் அளித்துள்ளன என்பது உண்மை.

இதன் காரணங்கள்:
அதிக மதிப்பீட்டில் (Overvaluation) வாங்கப்பட்ட பங்குகள்

வருமான வளர்ச்சி மந்தமானது

உலகளாவிய பொருளாதார அழுத்தங்கள்

வங்கி மற்றும் ஐடி துறைகளில் சுழற்சி (cycle) மாறுதல்

இதனால், “லார்ஜ்கேப் பங்குகள் என்றாலே பாதுகாப்பு + நல்ல வருமானம்” என்ற கருத்து சற்றே சவாலுக்கு உள்ளாகி இருக்கிறது.

லார்ஜ்கேப் ஃபண்டுகள் — நல்ல மாற்று?
பல பெரிய பங்குகள், பல ஆண்டுகள் வருமானம் கொடுக்காத நிலையில் பல லார்ஜ்கேப் மியூச்சுவல் ஃபண்டுகள் நல்ல வருமானம் கொடுத்துள்ளன.

ஏன் பங்குகளை விட ஃபண்டுகள் நல்லது?
சிறு முதலீட்டாளர்களுக்கு நேரடி பங்குகளை விட மியூச்சுவல் ஃபண்டுகள் சிறப்பானதாக இருக்கும் என்பதைப் பார்ப்போம்.

1. பரவலாக்கம் (Diversification): ஒரே பங்கில் முதலீடு செய்தால் ரிஸ்க் அதிகம். ஆனால், ஃபண்ட் திட்டங்களில் பல நிறுவனப் பங்குகளில் பிரித்து முதலீடு செய்யப்படுகிறது.

2. தானியங்கி மாற்றம் (Rebalancing): மியூச்சுவல் ஃபண்ட் மேலாளர்கள் பங்குச் சந்தை நிலைக்கு ஏற்ப பங்குகளை மாற்றிக் கொண்டே இருப்பார்கள்.

3. நெக்ஸ்ட் 50 பலன்: பல லார்ஜ்கேப் ஃபண்டுகள் நிஃப்டி நெக்ஸ்ட் 50 போன்ற குறியீடுகளில் முதலீடு செய்ததால் வருமானம் அதிகமாகக் கிடைத்தது. இது அடுத்த தலைமுறை பெரிய நிறுவனங்கள் வளர்ந்ததைக் காட்டுகிறது.

முக்கிய பாடம் — முதலீட்டாளர்கள் கவனிக்க வேண்டியது:

தவறான அணுகுமுறை:
பெரிய பங்குகளை வாங்குவது மட்டும் நீண்ட காலம் மாற்றமின்றி வைத்திருப்பது.

சரியான அணுகுமுறை:
மியூச்சுவல் ஃபண்ட் மூலம் பரவலாக்கம்

காலம் தவறாமல் மதிப்பாய்வு

லார்ஜ்கேப் பங்குகள் + நெக்ஸ்ட் 50 பங்குகள் + மிட்கேப் பங்குகள் கலவை

லார்ஜ்கேப் பங்கு முதலீடு — வேண்டுமா வேண்டாமா?
ஆனால்:

நேரடி பங்குத் தேர்வு கடினம்

சரியான நேரத்தில் வாங்குவது மிக முக்கியம்

அதனால், லார்ஜ்கேப் ஃபண்ட் (Index Fund/ETF) மூலம் முதலீடு செய்வது பாதுகாப்பான மற்றும் சீரான வழி ஆகும்.

லார்ஜ்கேப் பங்குகள் கடந்த சில ஆண்டுகளில் வருமானம் கொடுக்கவில்லை என்றாலும், மியூச்சுவல் ஃபண்ட்கள் — குறிப்பாக நிஃப்டி நெக்ஸ்ட் 50 சார்ந்தவை — நல்ல வருமானம் கொடுத்துள்ளன.

அதனால், ஒரே பங்கு மீது நம்பிக்கை வைக்காமல், பரவலாக்கப்பட்ட ஃபண்ட் மூலம் முதலீடு செய்வதே புத்திசாலித்தனமான அணுகுமுறை ஆகும்.

16/04/2026

நீங்கள் கோடி ரூபாய் சேர்க்க இந்த 5 விஷயங்கள் போதும்... வாரன் பஃபெட் சொல்லும் முதலீட்டு அறிவுரைகள்!

பல லட்சம் கோடிகளைச் சம்பாதித்த, அதேநேரம் எளிமையான வாழ்க்கை முறையால் உலகம் முழுவதும் மதிப்பு பெற்ற முதலீட்டாளர், வாரன் பஃபெட் (Warren Buffett). அவர் கூறும் முதலீட்டு ஆலோசனைகள் எளிமையாகத் தோன்றி னாலும், அவற்றில் ஆழமான நிதி அறிவு இருக்கும். அவரது கருத்துகளை அடிப்படை யாகக்கொண்டு, நாம் வாழ்க்கையில் பணத்தைச் சரியாக நிர்வகித்துவந்தால், நம்மாலும் சேர்க்க முடியும் கோடிகள்.

வாரன் பஃபெட்டின் சொத்து மதிப்பு சுமார் 140 பில்லியன் டாலர். இந்திய ரூபாய் மதிப்பில் ரூ.12,88,000 கோடி. அவர் சொல்லும் ஆலோசனைகளைக் கேட்க நீங்கள் ரெடியா?!

1. பல வருமான மூலங்கள் அவசியம்!

ஒரே ஒரு சம்பளத்தை மட்டும் நம்பி வாழ்வது இன்றைய காலத்தில் பாதுகாப்பானது அல்ல. வேலை இழப்பு, உடல்நலப் பிரச்னைகள் போன்ற காரணங்களால் வருமானம் தடைப்படலாம். அதனால், முதலீடு மூலம் கூடுதல் வருமானம் உருவாக்க வேண்டும். உதாரணமாக, நிலம், வீடு, நிறுவனப் பங்குகள், மியூச்சுவல் ஃபண்ட், தங்கம், வெள்ளி போன்றவற்றில் முதலீடு செய்தால், அவை நமக்குத் தொடர்ந்து வருமானத்தை உருவாக்கும். இது நிதிப் பாதுகாப்பை அதிகரிக்கும்.

2. முதலீட்டைப் பரவலாகச் செய்யுங்கள்!

ஒரே இடத்தில் எல்லா பணத்தையும் முதலீடு செய்வது மிகப்பெரிய ரிஸ்க். ஒரு துறையில் இழப்பு ஏற்பட்டால், முழு முதலீடும் பாதிக்கப்படும். அதனால், பங்குச் சந்தை, நிலம், தங்கம், கடன் பத்திரங்கள், மியூச்சுவல் ஃபண்ட் போன்ற பல்வேறு சொத்துப் பிரிவுகளில் பணத்தைப் பகிர்ந்து முதலீடு செய்வது நல்லது. இதையே `பரவலாக்கம்’ என்று கூறுகிறோம். இது ரிஸ்க்கை வெகுவாகக் குறைக்கும்.

3. தேவையற்ற செலவுகளைத் தவிர்த்துவிடுங்கள்!

நாம் தேவையில்லாத பொருள்களை வாங்குவதில் அதிக ஆர்வம் காட்டினால், அது நிதிச் சிக்கலை உருவாக்கும். இன்று தேவையில்லாத பொருள்க ளுக்குச் செலவுசெய்தால், நாளை அவசியமான பொருள்களை விற்க வேண்டிய நிலை வரலாம். எளிமையான வாழ்க்கைமுறை மற்றும் கட்டுப்படுத்தப்பட்ட செலவுதான் நீண்டகாலத்தில் செல்வத்தை உருவாக்கும்.

4. சேமிப்புப் பழக்கம் மிக முக்கியம்!

ஒவ்வொரு மாத வருமானத்திலும் குறைந்தது 10% தொகையைச் சேமிக்க வேண்டும். இந்தச் சேமிப்பு அவசர காலங்களில் மிகவும் உதவும். அதேபோல, அவசரகால நிதி (Emergency Fund) உருவாக்குவது மிக முக்கியம். குறைந்தது 6 மாதச் செலவுக்கு சமமான தொகையை தனியாக வைத்திருப்பது பாதுகாப்பானது.

5. அறிவில்லாமல் முதலீடு செய்வது அபாயம்!

“Risk comes from not knowing what you’re doing” என்ற வாரன் பஃபெட்டின் கருத்து மிகவும் முக்கியமானது. நாம் நமக்குப் புரியாத முதலீட்டில் பணம் செலுத்தினால், அது சூதாட்டம் போன்றதாக மாறும். அதனால், முதலீடு செய்வதற்கு முன்பு அந்தத் துறையைப் பற்றி நன்றாக அறிந்துகொள்ள வேண்டும்.

வாரன் பஃபெட் சொல்லும் பின்வரும் டிப்ஸையும் எடுத்துக்கொள்ளுங்கள்...

நீண்டகால முதலீட்டு நோக்கம் அவசியம்!

முதலீட்டைக் குறுகியகால லாபத்துக்காக அல்லாமல், நீண்டகால வளர்ச்சிக்காகச் செய்ய வேண்டும். பொறுமைதான் செல்வத்தை உருவாக்கும் முக்கிய குணம்.

உணர்ச்சிகளைக் கட்டுப்படுத்துங்கள்!

பங்குச் சந்தை உயர்ந்தால் மகிழ்ச்சி, விழுந்தால் பயம் என்று இருந்தால் இவை முதலீட்டை பாதிக்கும். உணர்ச்சிகளைக் கட்டுப்படுத்தி, திட்டமிட்டு முதலீடு செய்ய வேண்டும்.

கடன் கட்டுப்பாடு!

அதிக கடன் வாங்குவது நிதிச் சுதந்திரத்தைக் குறைக்கும். முதலில் கடனைக் கட்டுப்படுத்தி, பிறகு முதலீட்டை அதிகரிக்க வேண்டும்.

செல்வந்தராக மாறுவது ஒரே நாளில் நடக்காது. ஆனால், முறையான சேமிப்பு, திட்டமிட்ட முதலீடு, பொறுமை, அறிவு இவை நான்கும் இணைந்தால், நிச்சயம் நல்ல நிதி வளர்ச்சி ஏற்படும்.

உலகக் கோடீஸ்வரர் வாரன் பஃபெட் கூறும் இந்த எளிய ஆலோசனைகளை நாம் வாழ்க்கையில் நடைமுறைப்படுத்தினால், நிதிச் சுதந்திரத்தை அடையலாம். கோடிகளைச் சேர்க்கலாம்!

16/04/2026

டேர்ம் லைஃப் இன்ஷூரன்ஸ் எத்தனை வயது வரைக்கும் எடுக்க வேண்டும்?

‘‘டேர்ம் லைஃப் இன்ஷூரன்ஸ் (Term Life Insurance) பாலிசி என்பது குறைந்த பிரீமியத்தில் அதிக கவரேஜ் வழங்கும் ஆயுள் காப்பீடு. இந்த பாலிசியில் முதிர்வின்போது தொகை எதுவும் கிடைக்காது. பாலிசி காலத்தில் ஏதாவது அசம்பாவிதம் நடந்தால், குடும்பத்தினருக்கு இழப்பீடு கிடைக்கும்.

ஒருவர் அவரின் பிள்ளைகளின் உயர்கல்வி, கல்யாணம் போன்ற முக்கியக் குடும்பப் பொறுப்புகளை அவரின் 58-60 வயதுக்குள் கிட்டத்தட்ட நிறைவேற்றி விடுவார் என்கிறபட்சத்தில் அந்த வயது வரைக்கும் அவர் டேர்ம் லைஃப் இன்ஷூரன்ஸ் பாலிசியை எடுத்தால் போதும். அதுவே, தாமதமாக திருமணமானால் அல்லது தாமதமாக பிள்ளைகள் பிறந்தால் 60-65 வயது வரைக்கும் இந்த பாலிசியை எடுத்துக் கொள்வது நல்லது.

ஆண்டு வருமானத்தைப் போல் சுமார் 15 மடங்கு தொகைக்கு டேர்ம் பிளான் எடுப்பது நல்லது. 70, 80 வயது வரைக்கும் இந்த பாலிசியை எடுக்கும் பட்சத்தில், அந்த வயதில் மருத்துவச் செலவுகள் அதிகரித்திருக்கும் பட்சத்தில் டேர்ம் பிளான் பாலிசிக்கு பிரீமியம் கட்டுவது கடினமாக இருக்கும். அதனால், சம்பாதிக்கும் காலம் மற்றும் குடும்பப் பொறுப்புகள் உள்ள காலம் வரைக்கும் இந்த பாலிசியை எடுத்துக்கொள்வது நல்லது.’’

16/04/2026

எல்&டி பங்கு விலை

‘‘எல்&டி நிறுவனத்துக்கு மத்தியக் கிழக்கு நாடுகளில் மிகப்பெரிய அளவில் வியாபாரம் இருக்கிறது. குறிப்பாக சவூதி அரேபியா, ஐக்கிய அரபு எமிரேட்ஸ், கத்தார் போன்ற நாடுகளில் ஹைட்ரோகார்பன், உள்கட்டமைப்பு, சோலார், மின் பகிர்மானம், டேட்டா சென்டர்கள் என பல்வேறு தொழில்களை எல்&டி நிறுவனம் செய்து வருகிறது. ஆனால், சமீபத்தில் ஈரான் போர் காரணமாக மத்தியக் கிழக்கு நாடுகளில் நீடித்த பதற்றத்தால், எல்&டி நிறுவனத்தின் தொழிலும், திட்டங்களும் பாதிக்கப் படும் என்ற அச்சத்தில், எல்&டி பங்கு விலை இறங்கி வந்தது. கடந்த மார்ச் மாதத்தில் மட்டும் எல்&டி பங்கு விலை 18 சதவிகிதம் சரிந்துள்ளது. அமெரிக்கா – ஈரான் இரண்டு வாரங் களுக்கு போர் நிறுத்தம் செய்ய ஒப்புக் கொண்டுள்ள நிலையில், ஏப்ரல் 8-ம் தேதி வர்த்தகத்தில் எல்&டி பங்கு விலை 8 சதவிகிதத்தை தாண்டி உயர்ந்துள்ளது.’’

16/04/2026

எல்.ஐ.சி பங்கு

‘‘எல்.ஐ.சி நிறுவனம் முதல்முறையாக தனது பங்குதாரர்களுக்கு போனஸ் பங்குகளை வழங்குவதற்கு திட்டமிட்டுள்ளது. ஏப்ரல் 13-ம் தேதி நடைபெற உள்ள எல்.ஐ.சி இயக்குநர்கள் குழுக் கூட்டத்தில், முதலீட்டாளர்களுக்கு போனஸ் பங்குகளை வழங்குவது பற்றி ஆலோசனை நடத்தி முடிவெடுக்கப்படும் என்று அதிகாரபூர்வமாக அறிவிப்பு வந்திருக்கிறது. இது முதலீட்டாளர்களுக்கு ஒரு நல்ல செய்தி என்றாலும் கூட, ஏப்ரல் 8-ம் தேதி ஒட்டுமொத்தமாகவே பங்குச் சந்தை உற்சாகத்தில்தான் இருந்தது. எல்லாம் சேர்ந்து, எல்.ஐ.சி பங்கு விலை ஒரே நாளில் 8 சதவிகிதத்தைத் தாண்டி ஏற்றம் கண்டுள்ளது.’’

16/04/2026

Retirement-க்கு 2-3 ஆண்டுகளுக்கு முன் 'இதை' மாத்திடுங்க பணம் வளர்ப்போம்

எமெர்ஜென்சி ஃபண்ட், காப்பீடு, வீடு, கார், டிராவல் எல்லாத்தையும் முடித்து, 60 வயதிற்கு மேல் 'அக்காடா' என்று உட்காருவது தான் ஓய்வுக்காலம்.

"60 வயது ஓடியாடி உழைத்துவிட்டு, கொஞ்சம் ரிலாக்ஸாக அமரும் காலம் தான் இந்த ஓய்வுக்காலம். இந்தக் காலத்திற்கான நிதியை இப்போதே திட்டமிடவில்லை என்றால், ரிலாக்ஸாக அமரும் காலத்திலும் ஓட வேண்டியதாக இருக்கும்.

அதனால், 25 - 32 வயதிற்குள் இதற்கான பிளானையும் திட்டமிடத் தொடங்கிவிடுவது நல்லது.

30 வயதிற்குள் எத்தனையைத் தான் திட்டமிடுவது என்று தோன்றும்தான். ஆனால், ஓய்வுக்காலத்திற்காக சிறிய தொகையைச் சேமிக்கத் தொடங்கலாம்.

முக்கால்வாசி கமிட்மென்ட் முடிந்ததும் தொகையை ஸ்டெப் அப் செய்துகொள்ளலாம்.

இந்த முதலீட்டைச் சீக்கிரம் தொடங்குவதில் ஒரு நன்மை உண்டு. அது தான் காம்பவுண்டிங்.

ஓய்வுக்காலத்திற்கான முதலீட்டில் பெரிய ரிஸ்க் எடுக்க வேண்டாம். அதனால், PPF, NPS, சீனியர் சிட்டிசன் சேமிப்பு திட்டம் போன்ற அரசு முதலீட்டு ஆப்ஷன்களுக்குச் சென்றுவிடலாம்.

மிகவும் சின்ன வயதிலேயே இந்த முதலீட்டைத் தொடங்கினால் மியூச்சுவல் ஃபண்ட்டில் முதலீடு செய்யலாம்.

உங்களுக்கு ஓர் ஆண்டிற்கு ஆகும் செலவுத்தொகையைக் கணக்கில் எடுத்துக்கொள்ளுங்கள். இதில் இப்போது நீங்கள் கட்டிக்கொண்டிருக்கும் இ.எம்.ஐ தொகைகளைச் சேர்க்காதீர்கள். காரணம், நீங்கள் உங்கள் ஓய்வுக்காலத்திற்கு முன் இந்தக் கமிட்மென்டை முடித்துவிடுவீர்கள்.

ஆனால், அதற்கு பதிலாக, மருத்துவச் செலவு போன்றவற்றைக் கணக்கு செய்து சேர்த்துக்கொள்ளுங்கள்.

இப்போது கணக்கு செய்திருக்கும் தொகை * பணவீக்க சதவிகிதமாக 6 சதவிகிதத்தைக் கணக்கு செய்து, அந்தத் தொகை * 25 என்று கணக்குப் போட்டுக்கொள்ளுங்கள்.

இங்கே 25 என்பது நீங்கள் ஓய்வுக்காலத்திற்குப் பின் வாழும் காலமாக கணக்கிடும் ஆண்டுகள் ஆகும்.

ஓய்வுக்காலத்தின் நிதியை மியூச்சுவல் ஃபண்டில் முதலீடு செய்திருந்தால், ஓய்வு பெறுவதற்கு 2 - 3 ஆண்டுகளுக்கு முன்பு டெப்ட் ஃபண்டில் மாற்றிவிடுங்கள்.

காரணம், இந்த நிதியில் நாம் ரிஸ்க் எடுக்க முடியாது.

முடிந்தளவிற்கு, ஓய்வுக்காலத்திற்குள் ஒரு சொந்த வீடு இருப்பது நல்லது. இதன் மூலம், வாடகை ஒரு செலவு ஆவதைத் தடுக்கலாம்".